Pagpanaksi sa Balaligyaan

KON yara si apostol Pablo sa siudad sang Atenas, nagakadto sia kada adlaw sa may tiendahan agod magbantala didto sang maayong balita tuhoy kay Jesus. (Binu. 17:17) Ginpili niya nga magbantala sa mga balaligyaan bangod diri masapwan ang kalabanan nga taga-Atenas.

Mga 2,000 ka tuig sang ulihi, ang katawhan ni Jehova nagabantala gihapon sang mensahe sang Ginharian sang Dios sa mga balaligyaan. Ngaa? Bangod didto masapwan ang kalabanan nga mga tawo. Ang mga balaligyaan sa karon diin masapwan ang madamo nga nagapamalaklon amo ang mga shopping center ukon mall. Sa tapos makalisensia sa manedyer ukon sa tag-iya sang balaligyaan, ang pila ka mga Saksi nagdispley diri sang pasad sa Biblia nga mga literatura.

Halimbawa, sa isa ka shopping mall sa New Jersey, E.U.A., may gindispley nga mga literatura tuhoy sa tema nga “Paano Mahuptan ang Maayo nga Talaksan sang Pamilya?” Ano ang resulta? Sa isa lang ka adlaw, 153 ka libro ang napahamtang sa anom ka lenguahe.

Isa ka babayi ang nagpalapit sa ginadispley nga mga literatura kag namati sing maayo samtang nagapaathag ang isa sa mga Saksi. Nag-ugyon sia nga importante gid nga ilakip ang Dios sa aton kabuhi kag sa aton pamilya. Nagkuha sia sing mga publikasyon nga Magtuon Gikan sa Daku nga Manunudlo, Ang Sekreto Sang Kalipay sa Pamilya, kag Questions Young People Ask​—Answers That Work.

Sang temprano pa sina nga hapon, naglabay ang isa ka lalaki sa ginadispley nga mga literatura sang manugsulod sia sa tupad nga balaligyaan. Gintulok niya ang libro nga Young People Ask. Natalupangdan sang utod nga babayi nga interesado sia sa sini nga libro, gani ginpamangkot niya ang lalaki, “May nanamian ka bala nga libro?” Nagtango ang lalaki kag gintudlo ang libro nga Young  People Ask. Samtang ginahana niya nga kuhaon, gindaho na ini sang utod sa iya. Nagsiling sia nga may tatlo sia ka kabataan kag ang kamagulangan kag ikaduha, mga tin-edyer na. Sa pagpadayon sang ila pag-istoryahanay, naghambal sia nga makaisa kada semana, nagahinun-anon sia upod sa iya kabataan. Samtang ginatan-aw niya ang mga pahina sang libro, nagsiling sia nga mahapos gid ini nga giya para sa ila paghambalanay subong pamilya. Gintanyagan man sia sang utod sing libro nga Ang Sekreto Sang Kalipay sa Pamilya, kag ginpasalig nga makabulig gid ini sa ila nga mag-asawa sa paghimo sing mga desisyon. Nagpasalamat gid ang lalaki, naghatag sing donasyon kag nagpasugot nga duawon sia kag ang iya pamilya.

Ano ang nabatyagan sang mga Saksi sa ila pagbantala sadto nga adlaw sa mall? “Nalipay gid ako sa pagpakigbahin sa amo sini nga paagi sang pagbantala,” siling sang isa ka utod nga babayi. “Maayo gid ini nga eksperiensia!” Naghambal man ang isa ka utod nga babayi: “Nagsiling si Jehova nga ang maayong balita ibantala tubtob sa ukbong sang duta. Karon, nalab-ot na sang maayong balita ang mga tawo nga may nanuhaytuhay nga lenguahe sa Paramus, New Jersey. Makakulunyag gid ang pagbantala sa shopping center. Nalipay gid ang tanan nga nagpakigbahin sa sini nga kahimusan. Sang natapos na, daw indi na kami magpalauli.”

Mahimo ka man bala makabantala sang maayong balita sa tuhay naman nga paagi? Ang panguna nga paagi nga ginahimo naton amo ang pagpamalaybalay. (Binu. 20:20) Apang, luyag mo man bala tilawan nga magbantala sa mga balaligyaan ukon sa mall?