Pamatuki “ang Espiritu sang Kalibutan”

“Nabaton naton, indi ang espiritu sang kalibutan, kundi ang espiritu nga gikan sa Dios.”​—1 COR. 2:12.

1, 2. (a) Ngaa ginbutangan sing mga pispis ang mga minahan sadto sa Britanya? (b) Ano nga katalagman ang ginaatubang sang mga Cristiano?

SANG tuig 1911, gin-aprobahan sang mga awtoridad sa Britanya ang kasuguan nga nagaamlig sa kabuhi sang mga manugmina sang karbon. Ang tagsa ka minahan dapat maghupot sing duha ka pispis. Ngaa? Kay kon masunog ang minahan, ginadala ini sang mga manugsalbar kon magkadto sila sa idalom. Ining gamay nga mga pispis sensitibo sa makahililo nga mga hangin. Kon kontaminado ang hangin, nagasalasala kag nagakahulog ini sa iya ginahapunan. Importante gid ini nga mga patimaan. Indi makita kag wala sing baho ining makahililo nga hangin apang makamamatay kay ginapunggan sini ang pula nga selula sang dugo nga magdala sing oksiheno sa lawas. Kon indi makabantay ang mga manugsalbar, mahimo nga hinali lang sila malipong kag mapatay bangod nahiluan na gali sila.

² Sing kaanggid, amo man sini ang kahimtangan sang mga Cristiano. Ngaa? Sang ginsugo ni Jesus ang iya mga disipulo nga magbantala sa bug-os nga kalibutan, nahibaluan niya nga yara sila sa katalagman bangod ginadumalahan ini ni Satanas kag sang espiritu sang kalibutan. (Mat. 10:16; 1 Juan 5:19) Nabalaka gid si Jesus sa iya mga disipulo, gani sang gab-i antes sia mapatay, nangamuyo sia sa iya Amay: “Nagapangabay ako sa imo nga indi mo sila pagkuhaon gikan sa kalibutan, kundi  bantayan mo sila bangod sa isa nga malauton.”​—Juan 17:15.

3, 4. Ano ang ginpaandam ni Jesus sa iya mga disipulo, kag ngaa importante ini sa aton karon?

³ Ginpaandaman ni Jesus ang iya mga sumulunod nga ang pagtulog sa espirituwal nagadul-ong sa kamatayon. Mas importante ining mga pulong sa aton karon bangod nagakabuhi kita sa katapusan sining sistema sang mga butang. Ginpalig-on niya ang iya mga disipulo: “Magpadayon kamo nga nagamata . . . agod magmadinalag-on kamo sa pagpalagyo sa sining tanan nga butang nga gintalana nga mahanabo, kag sa pagtindog sa atubangan sang Anak sang tawo.” (Luc. 21:34-36) Apang, makalilipay gid bangod ginpasalig sila ni Jesus nga itigana sang iya Amay ang balaan nga espiritu agod buligan sila nga madumduman ang ila mga natun-an kag makapabilin nga nagamata kag malig-on.​—Juan 14:26.

⁴ Kamusta naman sa aton panahon karon? Sarang man bala naton matigayon ang balaan nga espiritu? Kon huo, ano ang dapat naton himuon? Ano ang espiritu sang kalibutan, kag paano ini nagapanghikot? Kag paano naton ini mapamatukan sing madinalag-on?​—Basaha ang 1 Corinto 2:12.

Balaan nga Espiritu Ukon Espiritu sang Kalibutan?

5, 6. Ano ang mabulig sa aton sang balaan nga espiritu, kag paano naton ini matigayon?

⁵ Nagabulig ang Dios paagi sa balaan nga espiritu indi lamang sang unang siglo kundi pati man sa aton tion sa karon. Ginabuligan kita sini nga himuon kon ano ang husto kag ginahatagan kita sing kusog sa aton pag-alagad. (Roma 12:11; Fil. 4:13) Nagabulig man ini sa aton nga mapadayag ang maayo nga mga kinaiya, subong sang gugma, kaayo, kag pagkamaayo, nga amo ang pila sa mga bahin sang “mga bunga sang espiritu.” (Gal. 5:22, 23) Apang, wala ni Jehova nga Dios ginapilit nga ihatag ini sa mga indi luyag magbaton.

⁶ Gani, nagakaigo lamang nga pamangkuton naton ang aton kaugalingon, ‘Paano ko matigayon ang balaan nga espiritu?’ Bueno, ginapakita sang Biblia kon ano nga mga tikang ang mahimo naton himuon. Ang pinakaimportante kag pinakasimple nga tikang amo ang pagpangayo sini sa Dios. (Basaha ang Lucas 11:13.) Ang isa pa amo ang pagtuon kag pag-aplikar sa mga laygay sang inspirado nga Pulong sang Dios. (2 Tim. 3:16) Siempre pa, indi tanan nga nagabasa lamang sing Biblia makabaton sang espiritu sang Dios. Apang kon ginatun-an ini sang isa ka sinsero nga Cristiano, mahangpan niya ang mga ideya kag pagtamod nga nasulat diri. Importante man nga kilalahon naton si Jesus subong ang gintangdo ni Jehova nga tiglawas kag nga ginaaman ni Jehova ang balaan nga espiritu paagi sa iya. (Col. 2:6) Gani, dapat naton sundon si Jesus kag magkabuhi suno sa iya mga panudlo. (1 Ped. 2:21) Kon manikasog gid kita nga sundon si Cristo, matigayon pa gid naton ang balaan nga espiritu.

7. Paano ginaimpluwensiahan sang espiritu sang kalibutan ang mga tawo?

⁷ Sa kabaliskaran, ang espiritu sang kalibutan nagaimpluwensia sa mga tawo nga mangin kaangay ni Satanas. (Basaha ang Efeso 2:1-3.) Nagapanghikot ini sa nanuhaytuhay nga mga paagi. Subong  makita naton sa palibot karon, ginapalig-on sang espiritu sang kalibutan nga supakon ang mga talaksan sang Dios. Ginapasanyog sini “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa.” (1 Juan 2:16) Nagapatubas man ini sing mga buhat sa unod, subong sang pagpakighilawas, idolatriya, espiritismo, kaimon, pagsilabo sang kaakig, kag pagpahubog. (Gal. 5:19-21) Ginapalambo man sang espiritu sang kalibutan ang mga panudlo sang mga apostata kag nagasikway sa kon ano ang balaan. (2 Tim. 2:14-18) Pat-od gid nga kon tugutan sang isa ka indibiduwal nga maimpluwensiahan sia sang espiritu sang kalibutan, mas mangin kaangay na gid sia ni Satanas.

8. Ano nga desisyon ang dapat naton himuon?

⁸ Imposible gid nga makapahilayo kita sing bug-os sa malain nga mga impluwensia. Ang tagsa ka indibiduwal dapat magdesisyon kon diin sia magapasakop, sa balaan nga espiritu bala ukon sa espiritu sang kalibutan? Bisan ang mga tawo nga naimpluwensiahan na sang espiritu sang kalibutan, mahimo pa makagua gikan sa sini kag magpatuytoy sa balaan nga espiritu. Apang, mahimo man nga ang madugay na nga nagapatuytoy sa balaan nga espiritu madala pa sa ulihi sang espiritu sang kalibutan. (Fil. 3:18, 19) Binagbinagon naton kon paano mapamatukan ang espiritu sang kalibutan.

Hibalua ang mga Patimaan

9-11. Ano ang mga patimaan nga naimpluwensiahan na kita sang espiritu sang kalibutan?

⁹ Suno sa ginsambit kaina, ang mga manugmina sa Britanya nagagamit sing mga pispis agod maghatag sa ila sing patimaan nga makahililo ang hangin. Kon makita gani nila nga nahulog na ang pispis sa iya ginahapunan, kinahanglan nila nga magpalayo dayon agod indi mahalitan. Sing kaanggid, subong mga Cristiano paano naton mahibaluan nga nahiluan na kita sang espiritu sang kalibutan?

¹⁰ Sang natun-an naton ang kamatuoran sa Pulong sang Dios kag gindedikar ang aton kaugalingon kay Jehova, mahimo nangin maukod kita sa pagbasa sing Biblia. Mahimo nga pirme man kita nagapangamuyo sing hanuot. Nalipay kita magtambong sa mga miting sa kongregasyon, nga kaangay sang tuburan sa tunga sang desyerto, ginatamod naton ini subong ginahalinan sang kaumpawan. Paagi sa sini, naamligan kita batok sa espiritu sang kalibutan.

¹¹ Ginapanikasugan pa bala naton nga basahon ang Biblia kada adlaw? (Sal. 1:2) Pirme pa bala kita nagapangamuyo sing tinagipusuon? Nalipay pa bala kita sa pagtambong sa tanan nga miting sa kongregasyon kada semana? (Sal. 84:10) Ukon basi nadula na naton ining maayong mga rutina? Huo, mahimo madamo kita sing obligasyon nga nagaubos sang aton tion kag kusog kag basi mabudlay ang maghupot sing maayo nga rutina sa pagsimba sa Dios. Apang kon ang pila sang aton maayong mga rutina madugay na nga nadula, nagapakita bala ini nga naimpluwensiahan na kita sang espiritu sang kalibutan? Panikasugan gid bala naton karon nga ibalik ang aton maayo nga mga rutina?

‘Indi Magpabug-at sing Sobra’

12. Suno kay Jesus, sa ano dapat ‘magpadayon nga nagamata’ ang iya mga disipulo kag ngaa?

¹² Ano pa ang iban nga paagi agod mapamatukan naton ang espiritu sang kalibutan? Sang ginsaway ni Jesus ang iya mga disipulo nga ‘magpadayon nga nagamata,’ bag-o lamang niya sila ginpaandaman tuhoy sa pila ka mga katalagman. “Mag-andam kamo,” siling niya, “nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali subong sang siod.”​—Luc. 21:34, 35.

13, 14. Ano ang dapat naton ipamangkot sa aton kaugalingon kon tuhoy sa pagkaon kag pag-inom?

¹³ Hunahunaa yadto nga paandam. Ginapakamalaut bala ni Jesus ang pagkaon kag pag-inom? Wala! Nakahibalo sia tuhoy sa mga pulong ni Solomon: “Nahibaloan ko nga wala na sing maayo pa sa ila [mga anak sang tawo] sang sa magkalipay kag maghimo sing maayo tubtub nga nagakabuhi sila; kag nga ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.” (Man. 3:12, 13) Apang, nahibaluan ni Jesus nga ang espiritu sang kalibutan nagapasanyog sing pagkahakugan sa pagkaon kag pagpahubog.

¹⁴ Paano naton mapat-od nga wala pa mahiluan sang espiritu sang kalibutan ang aton pagtamod sa sini? Mahimo naton pamangkuton ang aton kaugalingon: ‘Ano bala ang akon reaksion kon mabasahan  ko sa Biblia ukon sa aton mga publikasyon ang mga laygay tuhoy sa pagkahakugan sa pagkaon? Ginasikway ko bala ini bangod diutay lamang ini nga butang ukon tuman ka estrikto, ukon basi ginapakamatarong ko pa ang akon mga buhat? * Paano ko bala ginatamod ang mga laygay tuhoy sa pag-inom sing alkoholiko nga mga ilimnon, kag kon nagainom gid man ako, haganhagan lamang bala kag indi “pagpahubog”? Ginabalewala ko bala ini nga laygay subong nga daw wala lang ini naaplikar sa akon? Kon ginalaygayan ako sang iban tuhoy sa akon pag-inom, nagapangatarungan pa bala ako ukon nagapangakig? Ginahambalan ko bala ang iban nga indi pagsapakon ang amo nga laygay sang Biblia?’ Huo, ang panimuot sang isa ka tawo amo ang talaksan kon bala naimpluwensiahan na sia sang espiritu sang kalibutan.​—Ipaanggid ang Roma 13:11-14.

Indi Magpadaug sa Kahuol

15. Ginpaandaman kita ni Jesus tuhoy sa anong mga tawhanon nga huyog?

¹⁵ Ang isa pa ka importante nga tikang agod mapamatukan ang espiritu sang kalibutan amo ang pagkontrol sa kahuol ukon kabalaka. Nahibaluan ni Jesus nga mga di-himpit kita kag may huyog sa pagkabalaka sa aton mga kinahanglanon kada adlaw. Mahigugmaon niya nga ginsilingan ang iya mga disipulo: ‘Mag-untat sa pagkabalaka.’ (Mat. 6:25) Natural lamang nga mabalaka kita sa importante nga mga butang, kaangay sang pagpahamuot sa Dios, sang aton mga responsibilidad subong Cristiano, kag sang pag-aman sa mga kinahanglanon sang aton pamilya. (1 Cor. 7:32-34) Ano nian ang matun-an naton gikan sa paandam ni Jesus?

16. Ano ang resulta sang impluwensia sang espiritu sang kalibutan sa madamo nga katawhan?

¹⁶ Ang espiritu sang kalibutan karon nga nagapadaku sang pagpadayawdayaw sang palangabuhian, nagapahuol gid sa madamo amo nga nagabalatian sila kag nagakasubo. Ginakumbinsi kita nila nga ang kuarta makahatag sa aton sing kalig-unan. Subong man, nagapati sila nga ang talaksan sang tawo amo ang kadamuon sang iya manggad kag indi ang iya kaangtanan sa Dios. Ang mga nahaylo sa sining mga pahito padayon nga nahul-an bangod luyag  nila pirme tigayunon ang pinakabag-o, pinakadaku, kag pinakamoderno nga mga gamit. Gani, nangin ulipon sila sang manggad. (Hulu. 18:11) Ining sayop nga pagtamod sa materyal nga mga butang nagalumos sa espirituwalidad sang isa ka Cristiano.​—Basaha ang Mateo 13:18, 22.

17. Paano naton madaug ang kahuol?

¹⁷ Madaug naton ang kahuol kon sundon naton ang sugo ni Jesus nga nagasiling: ‘Padayon nga pangitaa anay ang ginharian kag ang pagkamatarong sang Dios.’ Ginapasalig kita ni Jesus nga kon tumanon naton ini, idugang sa aton ang aton mga kinahanglanon. (Mat. 6:33) Paano naton mapakita nga nagapati kita sa sini nga saad? Ang isa ka paagi amo ang pag-una sa pagkamatarong sang Dios. Mahimo naton ini kon ginatuman naton ang iya mga talaksan sang husto kag sayop tuhoy sa mga butang nga may kahilabtanan sa kuarta. Halimbawa, bunayag kita sa pagbayad sing buhis ukon wala kita nagahimo sing bisan diutay lang nga pagpangdaya sa aton negosyo. Ginahimo naton ang aton bug-os nga masarangan agod matuman ang aton mga obligasyon, nga ang aton “Huo magakahulugan sang Huo” sa pagbayad sang aton mga utang. (Mat. 5:37; Sal. 37:21) Mahimo nga ang pagkabunayag wala nagapamanggaranon sa isa ka tawo apang, mahimo niya mapahamut-an ang Dios, matigayon ang matinlo nga konsiensia, kag mabuhinan ang iya kahuol.

18. Anong halimbawa ang ginhatag ni Jesus, kag ano ang mga benepisyo kon sundon naton sia?

¹⁸ Ang pag-una naton sa Ginharian nagalakip sang paghibalo kon ano ang aton mga prioridad. Binagbinaga ang halimbawa ni Jesus. Kon kaisa, nagasuksok sia sing malahalon nga bayo. (Juan 19:23) Nagakaon man sia kag nagainom upod sa iya mga abyan. (Mat. 11:18, 19) Apang, para kay Jesus ang paglingawlingaw isa lamang ka pangyam-is sa kabuhi, kag indi ang pagkaon mismo. Ang pagkaon ni Jesus amo ang paghimo sing kabubut-on ni Jehova. (Juan 4:34-36) Kon sundon naton si Jesus, mangin malipayon gid kita! Malipayon kita bangod nagahatag kita sing lugpay sa mga nagaantos paagi sa Kasulatan. Mabaton naton ang gugma kag pagsakdag sang mga kauturan. Kag mapahalipay naton si Jehova. Kon nakahibalo kita kon ano ang aton prioridad sa kabuhi, indi na kita mangin ulipon sang manggad kag paglingawlingaw. Sa baylo, magamit naton ini sa pagsimba kay Jehova. Kon mangin makugi pa gid kita sa pagsakdag sang Ginharian sang Dios, mapamatukan gid naton ang espiritu sang kalibutan.

Padayon nga ‘Hunahunaa ang Espiritu’

19-21. Paano naton padayon nga ‘mahunahuna ang espiritu’ kag ngaa dapat naton ini himuon?

¹⁹ Ang panghunahuna ginasundan sang buhat. Ang unudnon nga panghunahuna nagaresulta sang padasudaso nga mga buhat. Gani, ginapahanumdom kita ni apostol Pablo nga bantayan ang aton panghunahuna. Sia nagsulat: “Ang mga suno sa unod nagapahamtang sang ila hunahuna sa mga butang sang unod, apang ang mga suno sa espiritu sa mga butang sang espiritu.”​—Roma 8:5.

²⁰ Paano naton mapamatukan ang impluwensia sang espiritu sang kalibutan sa aton panghunahuna kag mga buhat? Dapat naton butangan sing salaan ang aton hunahuna, nga wala nagatugot nga makasulod ang mga pahito sang kalibutan tubtob sa aton masarangan. Halimbawa, sa pagpili sang kalingawan, wala naton ginatugutan nga madagtaan ang aton hunahuna sang mga programa nga nagapasanyog sing imoralidad kag kasingki. Nakahibalo kita nga ang matinlo nga espiritu sang Dios wala nagapabilin sa mga hunahuna nga mahigko. (Sal. 11:5; 2 Cor. 6:15-18) Apang, ginatugutan naton ang espiritu sang Dios sa pagsulod sa aton hunahuna kon regular kita nga nagabasa sing Biblia, nagapangamuyo, nagapamalandong kag nagatambong sa mga miting. Kag makapanghikot man kita upod sa balaan nga espiritu kon regular kita nga nagapakigbahin sa pagbantala.

²¹ Gani, dapat naton pamatukan ang espiritu sang kalibutan kag ang ginapasanyog sini nga kailigbon sa unod. Ang paghimo sini mapuslanon gid, kay si Pablo nagsiling, “ang paghunahuna sa unod nagakahulugan sang kamatayon, apang ang paghunahuna sa espiritu nagakahulugan sang kabuhi kag paghidait.”​—Roma 8:6.

[Footnote]

Madumduman Mo Bala?

• Ano ang dapat naton himuon agod matigayon ang balaan nga espiritu?

• Ano ang pila ka paagi nga mahimo maimpluwensiahan kita sang espiritu sang kalibutan?

• Paano naton mapamatukan ang espiritu sang kalibutan?

[Mga Pamangkot sa Pagtinuon]

[Piktyur sa pahina 21]

Antes ka magkadto sa obra ukon sa eskwelahan, ipangamuyo ang pagtuytoy sang balaan nga espiritu

[Mga piktyur sa pahina 23]

Dapat naton huptan nga matinlo ang aton hunahuna, mangin bunayag sa negosyo, kag mangin haganhagan sa pagkaon kag pag-inom