Si Jehova—“Manugluwas” sa Tion sang Biblia

“Dalidali sa akon O Dios! Ikaw ang akon bulig kag ang akon manugluwas.”​—SAL. 70:5.

1, 2. (a) Sa anong mga kahimtangan ang mga sumilimba sang Dios nagapangabay sang iya bulig? (b) Anong pamangkot ang nagautwas, kag sa diin naton masapwan ang sabat?

SAMTANG nagabakasyon ang isa ka mag-asawa, ginpahibalo sila nga nadula ang 23 anyos nila nga bata nga babayi. Ginasuspetsahan nga ginpatay sia. Sa gilayon, naghimos ang mag-asawa pauli kag hanuot nga nangamuyo kay Jehova nga buligan sila. Ang isa ka 20 anyos nga Saksi may balatian nga mangin paralisado ang bug-os niya nga lawas. Sang nahibaluan niya ini, nangamuyo sia gilayon kay Jehova. Ang isa ka nagasolo nga iloy nga haluson makakita sing trabaho wala na sing kuarta agod ibakal sing pagkaon para sa iya kag sa 12 anyos niya nga bata nga babayi. Bug-os tagipusuon sia nga nangamuyo kay Jehova. Ginapakita sining mga halimbawa nga kon nagaatubang sing mga kabudlayan ang mga sumilimba sang Dios, nagapangabay sila gilayon sang iya nga bulig. Natilawan mo na bala nga makitluoy kay Jehova nga buligan ka sa tion sang mabudlay nga kahimtangan?

² Mahimo mamangkot ka: Makasalig gid bala kita nga sabton ni Jehova ang aton mga pangamuyo? Ang sabat sa sining pamangkot masapwan sa Salmo 70. Ining makapalig-on kag makatalandog nga salmo ginsulat ni David, ang matutom nga alagad ni Jehova nga nakaeksperiensia sing mabudlay nga kahimtangan sa kabuhi. Ining inspirado nga salmista nagsiling tuhoy kay Jehova: “O Dios! Ikaw ang akon kabulig kag ang akon manugluwas.” (Sal. 70:5) Mabuligan kita sa pagbinagbinag sang Salmo 70 kon ngaa makadangop man kita kay Jehova sa tion sang kabudlayan kag makasalig sa iya subong aton “Manugluwas.”

“Ikaw ang . . . Manugluwas”

3. (a) Ano nga mga pangabay ukon pakitluoy ang mabasa naton sa Salmo 70? (b) Ano nga pagsalig ang ginpabutyag ni David sa ika-70 sang Salmo?

³ Ang Salmo 70 nagasugod kag nagatapos sa dalidali nga pagpangabay sang bulig sang Dios. (Basaha ang Salmo 70:1-5.) Nagpakitluoy si David kay Jehova nga ‘magdalidali’ sa pagluwas sa iya. Sa mga bersikulo 2-4, may mga pangabay si David kag ang tagsa sa sini nagapabutyag sang iya handum ukon luyag nga matabo. Sa bersikulo 2 kag 3, amo ang tuhoy sa mga tawo nga nagatinguha sa pagpatay sa iya. Nakitluoy si David kay Jehova nga paslawon kag pakahuy-an ining mga kaaway bangod sang ila kalautan.  Ang mga pangabay sa bersikulo 4 nagapatuhoy naman sa katawhan sang Dios. Nangamuyo si David nga ang mga nagapangita kay Jehova kabay nga magkalipay kag magdayaw sa iya. Sa katapusan, nagsiling si David tuhoy kay Jehova: “Ikaw ang akon kabulig kag ang akon manugluwas.” Talupangda nga wala nagsiling si David, “Kabay nga ikaw mangin. . .” nga daw subong bala nagapangabay sia liwat. Sa baylo, sia nagsiling, “Ikaw ang,” buot silingon nagasalig gid si David nga buligan sia sang Dios.

4, 5. Ano ang aton matun-an tuhoy kay David sa Salmo 70, kag ano ang masaligan naton?

⁴ Ano ang ginapakita sang Salmo 70 tuhoy kay David? Sang ginhingabot sia kag gintinguhaan nga patyon sang iya mga kaaway, wala magbalos si David. Sa baylo, nagasalig sia nga tadlungon ini ni Jehova sa Iya nagakaigo nga tion kag pamaagi. (1 Sam. 26:10) Kumbinsido gid sia nga buligan kag luwason ni Jehova ang mga nagapangita sa iya. (Heb. 11:6) Nagapati man si David nga ang matuod nga mga sumilimba may rason gid nga magkalipay kag dayawon si Jehova paagi sa pagsugid sa iban sang iya pagkagamhanan.​—Sal. 5:11; 35:27.

⁵ Kaangay ni David, makasalig man kita sing bug-os kay Jehova subong aton Kabulig kag “Manugluwas.” Gani, kon nagaatubang kita sing mga kabudlayan kag nagakinahanglan gid sing bulig, makapangabay kita sa gilayon kay Jehova nga buligan niya kita. (Sal. 71:12) Apang, sa anong mga paagi ginasabat ni Jehova ang aton mga pangabay? Antes naton binagbinagon kon paano kita ginabuligan ni Jehova, usisaon naton anay ang tatlo ka paagi kon paano niya ginluwas si David sa idalom sang mabudlay nga mga kahimtangan.

Ginluwas Gikan sa mga Manugpamatok

6. Paano nahibaluan ni David nga ginaluwas ni Jehova ang matarong?

⁶ Gikan sa mga bahin sang Kasulatan nga matigayon sadto, natun-an ni David nga masaligan sang mga matarong ang bulig ni Jehova. Sang ginlaglag ni Jehova ang di-diosnon nga kalibutan paagi sa Anaw, ginluwas niya si Noe kag ang iya pamilya. (Gen. 7:23) Sang nagpaulan si Jehova sing kalayo kag asupre sa mga malaut nga pumuluyo sang Sodoma kag Gomorra, ginbuligan niya nga makapalagyo ang matarong nga si Lot kag ang iya duha ka anak nga babayi. (Gen. 19:12-26) Sang ginlaglag ni Jehova si Paraon kag ang iya mga hangaway sa Dagat nga Mapula, gin-amligan Niya ang iya katawhan. (Ex. 14:19-28) Gani, indi katingalahan nga sa isa ka salmo gindayaw ni David si Jehova subong “ang Dios sang kaluwasan.”​—Sal. 68:20.

7-9. (a) Ngaa makasalig gid si David sa ikasarang ni Jehova sa pagluwas? (b) Suno kay David, sin-o ang nagluwas sa iya?

⁷ May rason gid si David nga magsalig sing bug-os sa ikasarang ni Jehova sa pagluwas. Naeksperiensiahan niya mismo ang “walay katapusan nga mga butkon” ni Jehova nga nagaluwas sa Iya mga alagad. (Deut. 33:27, Maayong Balita nga Biblia) Makapila ka beses nga ginluwas ni Jehova si David gikan sa iya “akig nga mga kaaway.” (Sal. 18:17-19, 48, NW) Binagbinaga ang isa ka halimbawa.

⁸ Sang gindayaw sang mga babayi sa Israel si David bangod sampaton sia sa pagpangdaug, nahisa sa iya si Hari Saul. Gani, duha ka beses nga gintinguhaan niya nga bangkawon si David. (1 Sam. 18:6-9) Apang, sa amo nga mga tion, nakalikaw si David kag wala maigo. Ngaa? Bangod bala kay maabtik si David kag naanad na sa pagpakig-away? Indi. Ang Biblia nagpaathag nga “ang GINOO nag-upud sa iya.” (Basaha ang 1 Samuel 18:11-14.) Sang napaslawan pa gid ang plano ni Saul nga patyon si David paagi sa mga Filistinhon, “nakita ni Saul kag nakilala nga ang GINOO nag-upud kay David.”​—1 Sam. 18:17-28.

⁹ Suno kay David, sin-o ang nagluwas sa iya? Ang superskripsion sa Salmo 18 nagasiling nga si David “nagpamolong sa GINOO sang mga polong sining ambahanon sang adlaw nga linuwas sia sang GINOO . . . sa kamut ni Saul.” Ginpabutyag ni David sa ambahanon ang iya nabatyagan nga nagasiling: “Ang GINOO amo ang akon igang, kag akon kuta, kag akon mamamawi,  Dios ko, igang ko, nga sa iya magadangup ako.” (Sal. 18:2) Indi bala napalig-on ang aton pagtuo nga nahibaluan naton nga ginaluwas ni Jehova ang iya katawhan?​—Sal. 35:10.

Ginsakdag Samtang Nagamasakit

10, 11. Subong ginpakita sa Salmo 41 san-o si David nagmasakit sing malubha?

¹⁰ Ang Salmo 41 nagsiling nga nakaeksperiensia anay si Hari David sing malubha nga balatian. Samtang nagaparumatay sia sa higdaan abi sang pila niya ka mga kaaway ‘indi na sia makabangon.’ (Bersikulo 7, 8) San-o si David nagmasakit sing malubha? Mahimo ginapatuhuyan sang salmo ining mabudlay nga tion sa kabuhi ni David sang gintinguhaan sang iya anak nga si Absalom nga agawon ang trono.​—2 Sam. 15:6, 13, 14.

¹¹ Halimbawa, nagsiling si David nga ginluiban sia sang ginasaligan niya nga abyan nga nagasalo sa iya sa pagkaon. (Bersikulo 9) Mahimo madumduman naton ang isa ka hitabo sa kabuhi ni David sang nagrebelde si Absalom batok sa iya. Sa sini man nga tion, ang ginasaligan niya nga manuglaygay nga si Ahitofel nagtraidor kag nagbuylog kay Absalom sa pagribok batok sa iya. (2 Sam. 15:31; 16:15) Handurawa lang ang nagaparumatay nga hari sa iya higdaan nga indi na makabangon, samtang nahibaluan niya nga ginapalibutan sia sang mga tawo nga luyag na nga mapatay sia agod mahimo ang malaut nila nga mga plano.​—Bersikulo 5.

12, 13. (a) Ano nga pagsalig ang ginpabutyag ni David? (b) Paano ginpalig-on sang Dios si David?

¹² Apang, padayon nga nagsalig si David sa iya “Manugluwas.” Tuhoy sa matarong nga alagad ni Jehova nga nagamasakit, si David nagsiling: “Ang GINOO magaluwas sa iya sa adlaw sang kalaut. Sakdagon sia sang GINOO sa higdaan sang pag-antus; ginabaylohan mo ang bug-os niya nga higdaan sa iya pagbalatian.” (Sal. 41:1, 3) Talupangda nga ginpakita liwat ni David ang iya pagsalig kay Jehova kag napat-od gid niya nga luwason sia. Paano?

¹³ Wala nagapaabot si David nga magahimo si Jehova sing milagro agod dulaon ang iya balatian. Sa baylo, nagasalig si David nga “sakdagon sia” ni Jehova, buot silingon palig-unon sia kag hatagan sing kusog samtang nagamasakit sia sa higdaan. Kinahanglan gid ini ni David. Magluwas sa iya makapaluya nga balatian, ginapalibutan pa sia sing mga kaaway nga nagahambal sing malaut batok sa iya. (Bersikulo 5, 6) Mahimo nga ginpalig-on ni Jehova si David paagi sa pagpahanumdom sa iya sang makapaumpaw nga mga panghunahuna. Si David nagsiling: “Ginapatindug mo ako sa akon pagkatarung.” (Bersikulo 12) Napalig-on man si David kay bisan nagabalatian sia kag ginapakalain sang iya mga kaaway, ginatamod sia sang Dios subong ang isa nga may integridad. Sang ulihi, nag-ayo si David sa iya masakit. Indi bala makapalig-on gid nga mahibaluan nga ginasakdag ni Jehova ang mga nagabalatian?​—2 Cor. 1:3.

Gin-amanan sang Iya mga Kinahanglanon

14, 15. San-o si David kag ang iya mga tinawo nawad-an sing kinahanglanon, kag ano nga bulig ang ila natigayon?

¹⁴ Sang nagahari sia sa Israel, nagakaon si David sang pinakamanamit nga pagkaon kag ilimnon kag nagaagda pa sa iban nga magkaon upod sa iya lamesa. (2 Sam. 9:10) Apang, naeksperiensiahan man ni David kon paano magutman kag uhawon. Sang nagrebelde si Absalom kag nagtinguha nga agawon ang trono, nalagyo si David kag ang iya mga kaupod pagua sa Jerusalem. Nakadangat sila sa Gilead, sa sidlangan sang Suba sang Jordan. (2 Sam. 17:22, 24) Bangod nangin mga laaslaas, ginlapyo gid sila, gingutom kag gin-uhaw. Apang, sa diin ayhan nila makuha ining mga kinahanglanon sa sining nabaw-ing nga duog?

¹⁵ Sang ulihi, nakadangat si David kag ang iya mga tinawo sa siudad sang Mahanaim. Nakilala nila didto ang tatlo ka maisog nga lalaki nga sanday Sobi, Maquir, kag Barzilai. Kon maagaw na ni Absalom ang trono, pat-od nga silutan gid niya ang bisan sin-o nga nagsuporta kay David, apang handa ining tatlo ka mainunungon nga lalaki nga magrisgo  sang ila kabuhi agod buligan ang gintangdo sang Dios nga Hari. Sang nahibal-an nila ang kahimtangan ni David kag sang iya mga tinawo, nagdala sila sang mga kinahanglanon subong sang mga higdaan, trigo, sebada, uyas nga sinanlag, liso nga kulusiparon, lentejas, dugus, mantikilya, kag karnero. (Basaha ang 2 Samuel 17:27-29.) Natandog gid si David sa tumalagsahon nga pagkamainunungon kag pagkamaabiabihon sining tatlo ka lalaki. Indi gid niya ini malipatan.

16. Sin-o gid ang nag-aman kay David kag sa iya mga tinawo sang ila kinahanglanon?

¹⁶ Apang, sin-o gid ang nag-aman kay David kag sa iya mga tinawo sang ila mga kinahanglanon? Nakahibalo si David nga nagakabalaka si Jehova sa iya mga katawhan. Mahimo pahulagon ni Jehova ang iban niya nga alagad nga buligan ang ila masigkasumilimba nga nagakinahanglan. Sang ginpamalandungan ni David ang kaayo nga ginpakita sang tatlo ka lalaki sa duta sang Gilead, nabatyagan gid niya ang gugma kag kabalaka sa iya ni Jehova. Tubtob sa katapusan sang iya kabuhi, si David nagsulat: “Nanginpamatan-on ako, kag karon tigulang na; apang wala ako makakita nga ang matarung ginpabayaan ukon ang iya kaliwat nga nagapakilimos sing kalan-on.” (Sal. 37:25) Indi bala makalulugpay gid nga si Jehova magaaman sing kinahanglanon sang iya mga alagad?​—Hulu. 10:3.

“Nahibaluan ni Jehova Kon Paano Luwason ang mga Tawo”

17. Ano ang padayon nga ginapamatud-an ni Jehova?

¹⁷ Isa lang si David sa madamo nga sumilimba nga ginluwas ni Jehova sa tion sang Biblia. Sugod sa iya tion, padayon nga ginapamatud-an ni Jehova ang ginsiling ni apostol Pedro: “Nahibaluan ni Jehova kon paano luwason ang mga tawo nga may diosnon nga debosyon gikan sa pagtilaw.” (2 Ped. 2:9) Binagbinaga ang duha ka halimbawa.

18. Paano si Jehova nag-aman sing kaluwasan sang adlaw ni Ezequias?

¹⁸ Sang ginsalakay sang gamhanan nga mga soldado sang Asiria ang Juda kag hana naman nga salakayon ang Jerusalem sang ikawalo nga siglo B.C.E., si Hari Ezequias nangamuyo: “O GINOO nga Dios namon, luwasa kami . . . agud nga ang tanan nga ginharian sang duta makakilala nga ikaw amo ang GINOO gid lamang.” (Isa. 37:20) Indi gid luyag ni Ezequias nga mahuy-an ang ngalan sang Dios. Ginsabat ni Jehova ang iya tinagipusuon nga pangamuyo. Sa isa lang ka gab-i, ginpatay sang isa ka anghel ang 185,000 ka Asirianhon agod luwason ang matutom nga mga alagad ni Jehova.​—Isa. 37:32, 36.

19. Paagi sa pagtuman sang ano nga paandam naluwas ang unang siglo nga mga Cristiano sa kalaglagan?

 ¹⁹ Pila ka adlaw antes sang iya kamatayon, naghatag si Jesus sing matagnaon nga paandam para sa iya mga disipulo sa Judea. (Basaha ang Lucas 21:20-22.) Nagligad ang pila ka dekada, apang sang 66 C.E., nagribok ang mga Judiyo, gani ginsalakay sang Romanong mga hangaway ang Jerusalem. Nagmadinalag-on ang mga soldado nga ginpangunahan ni Cestius Gallus nga rumpagon ang pader sang templo, apang sa hinali lang nag-isol sila. Bangod nahantop sang matutom nga mga Cristiano nga amo na ini ang kahigayunan nga makalampuwas gikan sa kalaglagan nga gintagna ni Jesus, nagpalagyo sila sa mga bukid. Nagbalik ang Romano nga mga soldado sang 70 C.E. Sa sini nga tion, ginlaglag na nila sing bug-os ang Jerusalem. Ang mga Cristiano nga nagtuman sa paandam ni Jesus nakalampuwas sa kalaglagan.​—Luc. 19:41-44.

20. Ngaa makasalig kita kay Jehova subong aton “Manugluwas”?

²⁰ Nagabakod ang aton pagtuo kon binagbinagon naton ang mga halimbawa sadto kon paano si Jehova nagabulig sa iya katawhan. Nagahatag ini sa aton sing rason nga magsalig gid kita sa iya. Ano man nga mga kabudlayan ang aton maeksperiensiahan karon ukon atubangon pa sa palaabuton, makasalig kita sing bug-os kay Jehova subong aton “Manugluwas.” Apang, paano kita luwason ni Jehova? Kag ano ang natabo sa mga indibiduwal nga ginhinambitan kaina sa una nga parapo? Tan-awon naton sa masunod nga artikulo.

Madumduman Mo Bala?

• Ano nga pagsalig ang ginapakita sa aton sang Salmo 70?

• Paano ginsakdag si David sang nagmasakit sia?

• Ano nga mga halimbawa ang nagapakita nga ginaluwas ni Jehova ang iya katawhan gikan sa mga manugpamatok?

[Mga Pamangkot sa Pagtinuon]

[Piktyur sa pahina 6]

Ginsabat ni Jehova ang pangamuyo ni Ezequias