Buligi Sila nga Makabalik Gilayon!

“Kay sin-o kami makadto? Ikaw ang may mga pinamulong sang kabuhi nga walay katapusan.”​—JUAN 6:68.

1. Ano ang ginhambal ni Pedro sang madamo nga disipulo ang nagbiya kay Jesus?

ISA ka bes, ginbiyaan si Jesus sang madamo nga disipulo nga nagsikway sa isa sang iya mga panudlo. “Indi man ninyo luyag nga magbiya, indi bala?” pamangkot niya sa iya mga apostoles. Nagsabat si Pedro: “Ginuo, kay sin-o kami makadto? Ikaw ang may mga pinamulong sang kabuhi nga walay katapusan.” (Juan 6:51-69) Huo, wala na sila sing iban pa nga kadtuan. Wala sadto sa Judaismo ang “pinamulong sang kabuhi nga walay katapusan,” kag pat-od nga wala ini subong sa Babilonia nga Daku, ang bug-os kalibutan nga emperyo sang butig nga relihion. Para sa mga napahilayo sa panong sang Dios nga luyag pahamut-an si Jehova, “oras na nga magbugtaw” kag magbalik sa kongregasyon.​—Roma 13:11.

2. Ano ang dapat tandaan tuhoy sa hudisyal ukon kompidensial nga mga butang?

² Ginpakita ni Jehova ang kabalaka sa nadula nga mga karnero sang Israel. (Basaha ang Ezequiel 34:15, 16.) Sing kaanggid, handum kag salabton sang Cristianong mga gulang nga buligan ang mga tulad-karnero nga napahilayo sa panong sang Dios. Kon ginpangabay nila ang isa ka manugbantala nga hiwatan sing pagtuon ang di-aktibo nga luyag magpabulig, ano ang iya himuon kon mahibaluan niya nga nakahimo sing mabug-at nga sala ang di-aktibo? Sa baylo nga maglaygay tuhoy sa hudisyal ukon kompidensial nga mga butang, dapat ipanugda niya sa di-aktibo nga isugid ini sa mga gulang. Kon indi ini paghimuon sang di-aktibo, dapat pahibaluon sang manugbantala ang mga gulang.​—Lev. 5:1; Gal. 6:1.

3. Ano ang ginbatyag sang tawo nga may 100 ka karnero sang makita niya ang isa nga nadula?

 ³ Sa nagligad nga artikulo, ginhinambitan ang ilustrasyon ni Jesus tuhoy sa tawo nga may 100 ka karnero. Sang nadula ang isa, ginbiyaan niya ang 99 kag ginpangita ang nadula nga karnero. Daku gid ang kalipay sang tawo sang nakita niya ini! (Lucas 15:4-7) Amo man sini ang aton kalipay kon magbalik ang di-aktibo sa panong sang Dios. Ginaduaw sang mga gulang kag sang iban pa nga katapo sang kongregasyon ang di-aktibo bangod sang ila gugma sa iya. Luyag man nila makita ang di-aktibo nga magbalik sa kongregasyon kag matigayon ang pagsakdag, pag-amlig, kag pagpakamaayo sang Dios. (Deut. 33:27; Sal. 91:14; Hulu. 10:22) Kon may kahigayunan kita nga mabuligan ang di-aktibo, ano ang aton himuon?

4. Ano ang ginapadaku sang Galacia 6:2, 5?

⁴ Mahimo naton palig-unon ang di-aktibo nga magbalik sa kongregasyon paagi sa pagpahanumdom sa iya nga ginahigugma ni Jehova ang Iya mga karnero. Dugang pa, masarangan naton ang Iya mga ginapatuman. Nalakip sa sini ang pagtuon sa Kasulatan, pagtambong sa Cristianong mga miting, kag pagbantala sing maayong balita sang Ginharian. Ayhan nagakaigo nga basahon ang Galacia 6:2, 5 kag ipadaku nga mahimo magbuligay ang mga Cristiano sa pagpas-an sang kabug-atan sang kada isa, apang “ang kada isa magadala sang iya kaugalingon nga lulan” ukon salabton kay Jehova. Indi puede nga sakupon kita sang iban sang ila katutom sa Dios.

Bangod Bala sang mga “Kabalaka sa Kabuhi”?

5, 6. (a) Ngaa importante nga pamatian naton sing maayo ang ginapabutyag sang mga di-aktibo nga masigkatumuluo? (b) Paano mo mapatalupangod sa mga di-aktibo nga nagluya sila bangod wala na sila nagapakig-upod sa katawhan sang Dios?

⁵ Agod mahibaluan kon paano buligan ang mga di-aktibo nga masigkatumuluo, ang mga gulang kag hamtong nga mga manugbantala dapat mamati sing maayo samtang ginapabutyag sang mga di-aktibo ang ila balatyagon. Ayhan ginaduaw sang gulang ang mag-asawa nga nangin di-aktibo bangod sang mga “kabalaka sa kabuhi.” (Luc. 21:34) Mahimo nga ang kapigaduhon ukon dugang nga mga responsibilidad sa pamilya ang rason sang ila amat-amat nga pag-untat sa Cristianong mga hilikuton. Ayhan nagabatyag sila nga kinahanglan anay magpahuway sa pag-alagad, apang sarang mo mapadaku nga indi solusyon ang pagpain sang ila kaugalingon. (Basaha ang Hulubaton 18:1.) Mahimo mo sila pamangkuton sing mataktikanhon: “Mas malipayon bala kamo sugod sang wala na kamo nagatambong sa mga miting? Mas nag-ayuhan bala ang inyo kahimtangan? May yara pa bala kamo kalipay nga nagahalin sa pagsalig kay Jehova?”​—Neh. 8:10.

⁶ Paagi sa pagpamalandong sa sini nga mga pamangkot, mahimo mabuligan ang mga di-aktibo nga makita nga bangod sang ila pagbiya sa kongregasyon amo nga nagluya ang ila espirituwalidad kag nabuhinan ang ila kalipay. (Mat. 5:3; Heb. 10:24, 25) Mahimo man ipatalupangod sa ila nga  nawasi nila ang kalipay nga nagahalin sa pagbantala sing maayong balita. (Mat. 28:19, 20) Busa, ano ang maalamon nila nga himuon?

7. Ano ang mapalig-on naton nga himuon sang mga di-aktibo?

⁷ Si Jesus nagsiling: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi . . . Magpadayon kamo nga nagamata nga nagaampo sa tanan nga tion agod magmadinalag-on kamo sa pagpalagyo sa sini tanan nga butang nga gintalana nga mahanabo.” (Luc. 21:34-36) Mahimo palig-unon ang mga di-aktibo nga luyag nga mangin malipayon liwat nga magpangamuyo para sa balaan nga espiritu kag bulig sang Dios kag manghikot nahisuno sa sini.​—Luc. 11:13.

Nasandad Bala Sila?

8, 9. Paano palig-unon sang gulang ang isa nga nasandad?

⁸ Bangod sang aton pagkadihimpit, may mga di-pagsahuay kon kaisa nga mahimo bangdan sang pagkasandad sang isa. Nasandad ang iban sang may isa ka hamtong sa kongregasyon nga naggawi sing di-maayo. Kon amo ini ang rason, mahimo ipadaku sang nagaduaw nga gulang nga indi man si Jehova ang rason sang pagkasandad. Gani, ngaa utdon sang isa ang iya kaangtanan sa Dios kag sa Iya katawhan? Sa baylo, indi bala dapat nga padayon kita sa pag-alagad sa Dios, nagasalig nga “ang Hukom sang bug-os nga duta” nakahibalo sang nagakatabo kag solbaron niya ini sa husto nga paagi? (Gen. 18:25; Col. 3:23-25) Kon ang isa ka tawo literal nga nasandad kag natumba, pat-od nga indi niya paghungdon nga maghigda na lang kag indi man lang magtinguha nga magtindog.

⁹ Mahimo man hinambitan sang gulang nga sa pagligad sang tion, natalupangdan sang iban nga indi na importante ukon ayhan wala na gani ang rason sang ila pagkasandad. Kon nasandad sia bangod sang pagdisiplina sa iya, mahimo makabulig ang pagpamalandong upod ang pangamuyo agod makita niya nga may yara man sia kakulangan kag indi pagtugutan ang disiplina nga magpasandad sa iya.​—Sal. 119:165; Heb. 12:5-13.

Bangod Bala nga Indi Sila Ugyon sa Isa ka Panudlo?

10, 11. Ano ang mahimo nga makabulig sa isa nga may tuhay nga paghangop sa pila ka panudlo sang Biblia?

¹⁰ Nagbiya ang iban sa panong sang Dios bangod indi sila ugyon sa pila ka Makasulatanhon nga panudlo. Ang mga Israelinhon nga ginhilway sa pagkaulipon sa Egipto ‘nalipat sa mga binuhatan sang Dios’ para sa ila kag “wala sila maghulat sang iya laygay.” (Sal. 106:13) Mahimo makabulig ang pagpahanumdom sa di-aktibo nga “ang matutom kag mainandamon nga ulipon” amo ang nagaaman sang ekselente nga espirituwal nga pagkaon. (Mat. 24:45) Paagi sa sini nga aman, natun-an niya ang kamatuoran. Gani, ngaa abi indi sia mangin determinado nga maglakat liwat sa kamatuoran?​—2 Juan 4.

¹¹ Kon nagabulig sa di-aktibo, mahimo ipatalupangod sang gulang ang tuhoy sa mga disipulo nga nagbiya kay Jesus bangod indi sila ugyon sa isa niya ka panudlo. (Juan 6:53, 66) Bangod nag-untat sila sa pagpakig-upod kay Cristo kag sa iya matutom nga mga sumulunod, nadula nila ang kalipay kag apresasyon sa espirituwal nga mga butang. May nakita bala ang mga nag-untat sa pagtambong sa Cristianong mga miting nga iban pa nga duog sa diin may bugana nga espirituwal nga pagkaon? Wala, kay wala gid sila sing may makita!

Bangod Bala sa Mabug-at nga Sala?

12, 13. Kon ang di-aktibo nagtu-ad nga nakahimo sia sing mabug-at nga sala, paano sia mahimo mabuligan?

¹² Nag-untat ang iban sa pagbantala kag pagtambong sa mga miting bangod nakahimo sila sing mabug-at nga sala. Nagahunahuna sila nga kon itu-ad nila ini sa mga gulang, mahimo sila ma-disfellowship. Ang matuod, indi sila pagsikwayon sa kongregasyon kon gin-untatan na nila ang di-Makasulatanhon nga buhat kag sinsero nga naghinulsol. (2 Cor. 7:10, 11) Batunon sila liwat sa kongregasyon, kag buligan sila sang mga gulang nga magbakod sa espirituwal.

¹³ Kon ikaw isa ka hamtong nga manugbantala nga ginpangabay nga buligan ang di-aktibo, ano ang himuon mo kon ginsugiran ka niya nga nakahimo sia sing mabug-at nga sala? Subong ginhinambitan kaina, ipanugda sa iya nga istoryahon  niya ang mga gulang, sa baylo nga idalahig ang imo kaugalingon. Kon indi niya ini paghimuon, ipakita ang imo kabalaka sa ngalan ni Jehova kag sa kaayuhan sang kongregasyon paagi sa paghikot nahisuno sa kasuguan sang Dios tuhoy sa sini. (Basaha ang Levitico 5:1.) Nahibaluan sang mga gulang kon paano buligan ang isa nga luyag magbalik kag magkabuhi suno sa kabubut-on sang Dios. Mahimo nga kinahanglan ang mahigugmaon nga pagdisiplina. (Heb. 12:7-11) Kon ginbaton niya nga nakasala sia sa Dios, nag-untat sa paghimo sing sala, kag mahinulsulon, buligan sia sang mga gulang, kag matigayon niya ang pagpatawad ni Jehova.​—Isa. 1:18; 55:7; Sant. 5:13-16.

Nagadala sing Kalipay ang Pagbalik sang Anak

14. Isaysay ang ilustrasyon ni Jesus tuhoy sa buhaha nga anak.

¹⁴ Kon nagabulig sa di-aktibo, mahimo ipatalupangod sang isa nga ginpangabay nga magbulig ang ilustrasyon ni Jesus sa Lucas 15:11-24. Ginapakita sa sini ang isa ka pamatan-on nga lalaki nga nag-uyang sang iya ginpanubli sa patuyang nga pagkabuhi. Sang ulihi, gintalikdan niya ang iya estilo sang pagkabuhi. Ginagutom sia kag nahidlaw sa iya pamilya, amo nga nagdesisyon sia nga magpauli sa ila puluy-an. Samtang malayo pa sia, nakita sia sang iya amay. Gani, nagdalagan ang iya amay kag nagsubsob sa iya liog, mapinalanggaon nga naghalok sa iya, kag nagkalipay gid. Ang pagpamalandong sa sini nga ilustrasyon mahimo magpahulag sa isa nga napahilayo nga magbalik sa panong. Sanglit laglagon na sa indi madugay ining sistema sang mga butang, dapat sia magbalik gilayon sa kongregasyon.

15. Ngaa ang iban amat-amat nga nadaldal palayo sa kongregasyon?

¹⁵ Ang kalabanan sang mga napahilayo sa kongregasyon indi man gid kaangay sa buhaha nga anak. Ang pila amat-amat nga nadaldal palayo, kaangay sang sakayan nga inanay nga naanod palayo sa baybayon. Ang iban naman bangod sang sobra nga pagkabalaka, napabay-an nila ang ila kaangtanan kay Jehova. May yara man nga gintugutan ang ila kaugalingon nga masandad sang katapo sang kongregasyon, ukon nagbiya bangod indi sila ugyon sa isa ka Makasulatanhon nga panudlo. Nadalahig naman ang iban sa di-Makasulatanhon nga paggawi. Kon amo ini ang mga rason ukon may iban pa nga ginbangdan nga nangin di-aktibo ang isa, mabuligan ka sang ginbinagbinag nga mga panugda agod buligan sia nga magbalik sa panong, antes mangin ulihi ang tanan.

“Nalipay Gid Ako nga Nagbalik Ka Anak!”

16-18. (a) Paano ginbuligan sang isa ka gulang ang utod nga nangin di-aktibo sa malawig nga tinuig? (b) Ngaa nangin di-aktibo ang utod, paano sia nabuligan, kag paano sia ginbaton sa kongregasyon?

¹⁶ Isa ka Cristianong gulang ang nagsiling: “Ang mga gulang sa amon kongregasyon nagapanikasog gid nga duawon ang mga di-aktibo. Nadumduman ko ang isa ka utod nga akon nabuligan nga matun-an ang kamatuoran. Nangin di-aktibo sia sing 25 ka tuig kag may mabug-at  nga problema, gani ginpaathag ko nga mabuligan sia kon iaplikar niya ang mga prinsipio sa Biblia. Pagligad sang tion, nagtambong sia sa Kingdom Hall kag nagpasugot nga hiwatan liwat sing pagtuon sa Biblia agod magbakod ang iya pamat-od nga magbalik sa panong.”

¹⁷ Ngaa nangin di-aktibo ang utod? Ginbaton niya: “Mas nahatagan ko sing atension ang mga butang sang kalibutan sangsa akon kaangtanan kay Jehova. Nian, wala na ako nagatuon, nagapakigbahin sa ministeryo, kag nagatambong sa mga miting. Wala ko mamulalungan nga nag-untat na gali ako sa pagpakig-upod sa kongregasyon. Paagi sa personal kag sinsero nga interes nga ginpakita sang mga gulang, nabuligan ako nga makabalik.” Naghaganhagan ang problema sini nga utod sang ginbaton niya ang pagtuon sa Biblia. Nagsiling sia: “Narealisar ko nga ang kulang sa akon kabuhi amo ang gugma kag pagtuytoy ni Jehova kag sang iya organisasyon.”

¹⁸ Paano ginbaton ini nga utod sa kongregasyon? Nagsiling sia: “Daw kaangay ako sang buhaha nga anak sa ilustrasyon ni Jesucristo. May isa ka tigulang na nga utod nga babayi nga nagaalagad na 30 ka tuig ang nagligad kag matutom sa gihapon, ang nagsiling sa akon, ‘Nalipay gid ako nga nagbalik ka Anak!’ Natandog gid ang akon tagipusuon. Narealisar ko nga ang kongregasyon amo ang akon dalangpan. Luyag ko ipabutyag ang akon tudok nga pagpasalamat sa gugma, kainit, pagpailob, kag interes nga ginpakita sa akon sang mga gulang kag sang bug-os nga kongregasyon. Ang ila gugma kay Jehova kag sa isigkatawo nakabulig gid agod makabalik ako sa panong.”

Palig-una Sila nga Magbalik Gilayon!

19, 20. Paano mo mapalig-on ang mga di-aktibo nga magbalik gilayon sa panong, kag paano mo mapakita sa ila nga wala nagapaabot si Jehova sang indi naton masarangan?

¹⁹ Nagakabuhi kita sa katapusan nga mga adlaw, kag malapit na matapos ining sistema sang mga butang. Busa, palig-una ang mga di-aktibo nga magtambong gilayon sa Cristianong mga miting. Pahanumduma sila nga ginatinguhaan ni Satanas nga gub-on ang ila kaangtanan kay Jehova kag ginapapati niya sila nga matigayon ang kaumpawan sa mga problema sang kabuhi kon biyaan nila ang matuod nga pagsimba. Pasaliga sila nga matigayon lamang ang matuod nga kaumpawan kon ang isa matutom nga nagasunod kay Jesus.​—Basaha ang Mateo 11:28-30.

²⁰ Ipahanumdom sa mga di-aktibo nga ginapaabot ni Jehova nga himuon naton ang aton masarangan. Antes sang kamatayon ni Jesus, ginhaplasan sia ni Maria nga utod ni Lazaro sing malahalon kag mahumot nga lana, apang naakig sa sini ang iban. Gani nagsiling si Jesus: “Pabay-i ninyo sia. . . . Ginhimo niya ang iya masarangan.” (Mar. 14:6-8) Gindayaw ni Jesus ang imol nga balo nga nag-amot sa templo. Ginhimo man sining balo ang iya masarangan. (Luc. 21:1-4) Kalabanan sa aton makasarang magtambong sa Cristianong mga miting kag magbantala sing Ginharian. Paagi sa bulig ni Jehova, mahimo man ini sang madamo nga di-aktibo subong.

21, 22. Ano ang mahimo mo mapasalig sa manumbalik kay Jehova?

²¹ Kon ang mga di-aktibo nahuya ukon nagaalang-alang nga makita liwat sang mga kauturan, mahimo mo sila pahanumdumon sang kinasadya nga natabo sang nagbalik ang buhaha nga anak. Amo man sini ang batyagon sang kongregasyon kon magbalik ang di-aktibo. Palig-una sila nga maghulag gilayon nga pamatukan ang Yawa kag magpalapit sa Dios.​—Sant. 4:7, 8.

²² Isa ka malipayon nga kongregasyon ang nagahulat sa magabalik kay Jehova. (Pan. 3:40) Pat-od nga nalipay gid sila sang nagaalagad pa sila sang una. Apang mas madamo pa nga mga pagpakamaayo sa palaabuton ang nagahulat sa mga magabalik gilayon sa panong!

Ano ang Imo Sabat?

• Paano mo buligan ang Cristiano nga nasandad kag nangin di-aktibo?

• Ano nga pangatarungan ang mahimo makabulig sa nagbiya sa panong sang Dios bangod sang personal nga pagtamod tuhoy sa isa ka panudlo?

• Paano mabuligan ang isa nga nagaalang-alang nga magbalik sa kongregasyon?

[Mga Pamangkot sa Pagtinuon]

[Piktyur sa pahina 13]

Mamati sing maayo samtang ginapabutyag sang di-aktibo nga masigkatumuluo ang iya balatyagon

[Piktyur sa pahina 15]

Ang pagpamalandong sa ilustrasyon ni Jesus tuhoy sa buhaha nga anak mahimo makabulig sa iban nga magbalik sa panong