Pag-alagad sa Dios nga “Nahiusa sa Tagipusuon kag sa Kalag”

ANG mga Judiyo kag mga proselita nagtipon sa pagpamati sa mga disipulo ni Jesucristo. Pagsaulog sadto sang Kapiestahan sang Pentecostes kag ang mga bisita sa Jerusalem naghalin pa sa malayo nga mga lugar subong sang Roma sa katundan kag Parto sa sidlangan. Nanuhaytuhay nga lenguahe ang mabatian sa kadam-an. Apang, ang mga disipulo ni Jesus nga nagapakighambal sa ila mga taga-Galilea. Ang pila sa natingala nga mga bisita namangkot: “Ngaa mabatian sang kada isa sa aton ang iya namat-an nga lenguahe?”​—Binu. 2:8.

Nagtindog si apostol Pedro kag ginpaathag ang basihan sang milagro nga ila nasaksihan. Gilayon nga ginbaton sang katawhan ang mensahe, kag linibo  ka mga bag-uhan ang nabawtismuhan! (Binu. 2:41) Bisan pa madasig ang pagdaku sang kongregasyon, nahiusa gihapon ini. “Ang kadam-an sang mga nagpati nahiusa sa tagipusuon kag sa kalag,” siling sang manunulat sang Biblia nga si Lucas.​—Binu. 4:32.

Linibo sang mga nabawtismuhan sa Jerusalem sang Pentecostes, 33 C.E. ang luyag magtener sa Jerusalem agod magtuon sing dugang pa tuhoy sa ila bag-o nga pagtuluuhan. Apang, wala sa ila plano nga magtener sing dugay, gani ginkulang ang ila balon. Sa amo, ang mga kauturan nagtipon sing kuarta para sa mga nagtener. Kinabubut-on nga ginbaligya sang pila ka tumuluo ang pila nila ka pagkabutang kag gindala ang bili sini sa mga apostoles, agod ipanagtag sa mga nagakinahanglan. (Binu. 2:42-47) Isa gid ka maayo nga halimbawa sang gugma kag kaalwan!

Ang matuod nga mga Cristiano nagapakita gid sing gugma kag kaalwan sa tanan nga tion. Sa karon, ang Cristianong kongregasyon padayon nga nagaalagad kay Jehova nga “nahiusa sa tagipusuon kag sa kalag.” Ang tagsa ka Cristiano maalwan nga nagaamot sang ila tion, kusog, kag kuarta agod mabantala ang maayong balita kag mapasanyog ang mga intereses sang Ginharian sang Dios.​—Tan-awa ang kahon nga  “Mga Paagi sa Paghatag nga Ginapili sang Iban.”

[Piktyur sa pahina 6, 7]

 MGA PAAGI SA PAGHATAG NGA GINAPILI SANG IBAN

MGA KONTRIBUSYON PARA SA BUG-OS KALIBUTAN NGA HILIKUTON

Madamo ang nagapain, ukon nagatigana, sing kantidad nga ginahulog nila sa mga kahon-alamutan nga may ngalan “Worldwide Work.”

Kada bulan, ginapadala sang mga kongregasyon ini nga kantidad sa opisina sang mga Saksi ni Jehova sa ila pungsod. Ang boluntaryo nga donasyon nga kuarta mahimo man ipadala sing direkta sa Watch Tower Bible and Tract Society of the Philippines, Inc., P.O. Box 2044, 1060 Manila, ukon sa sanga talatapan sang mga Saksi ni Jehova nga nagapangalagad sa inyo pungsod. Ang mga tseke nga ipadala sa sini nga adres dapat ipangalan sa “Watch Tower Society.” Mahimo man idonar ang mga alahas ukon iban pa nga malahalon nga mga pagkabutang. Dapat ilakip sa sini nga mga kontribusyon ang isa ka malip-ot nga sulat nga nagasiling nga ini isa ka direkta nga regalo.

CONDITIONAL-DONATION TRUST ARRANGEMENT

Mahimo ibutang sa ngalan sang Watch Tower Society ang kuarta agod gamiton sa bug-os nga kalibutan. Apang, kon pangabayon, mahimo ibalik ini nga kuarta. Para sa dugang nga impormasyon, pakig-anguti palihug ang Treasurer’s Office sa adres nga ginsambit sa ibabaw.

CHARITABLE PLANNING

Wala labot sa direkta nga mga regalo nga kuarta, may iban pa nga paagi sang paghatag nga makabulig sa bug-os kalibutan nga pag-alagad sa Ginharian. Nagalakip ini sa:

Pasiguro: Mahimo himuon ang Watch Tower Society nga benepisyaryo sang isa ka life insurance policy ukon sang isa ka retirement/pension plan.

Mga Deposito sa Bangko: Ang mga deposito sa bangko, sertipiko sang deposito, ukon indibiduwal nga deposito sa pagretiro mahimo ibutang sa ngalan ukon ihatag sa Watch Tower Society kon mapatay, suno sa mga reglamento sang bangko sa inyo lugar.

Stocks kag Bonds: Mahimo idonar sa Watch Tower Society ang stocks kag bonds subong direkta nga regalo.

Real Estate: Ang mabaligya nga real estate (balay, bilding, kag lote) mahimo ihatag nga donasyon paagi sa direkta nga pagregalo ukon, kon sa bahin sang balay, paagi sa pagreserba sini sa nagdonar, amo nga padayon sia nga makaistar sa sini tubtob buhi sia. Pakig-anguti anay ang sanga talatapan sa inyo pungsod antes isaylo ang titulo sang bisan ano nga real estate.

Gift Annuity: Ang gift annuity isa ka kasugtanan diin mahimo isaylo sang isa ang kuarta ukon securities sa isa ka gintangduan nga korporasyon nga ginagamit sang mga Saksi ni Jehova. Bilang kabaylo, ang nagdonar, ukon ang isa nga gintangduan sang nagdonar, regular nga makabaton sing espesipiko nga kantidad nga kabayaran kada tuig tubtob buhi sia. Ang nagdonar makabaton sang income-tax deduction sa tuig nga magsugod ang gift annuity.

Mga Testamento kag mga Trust Agreement: Mahimo ipasubli sa Watch Tower Society ang pagkabutang ukon kuarta paagi sa isa ka legal nga testamento, ukon himuon ang Watch Tower Society subong benepisyaryo sang isa ka trust agreement. Kon ang benepisyaryo isa ka relihioso nga organisasyon, ang ginabayaran nga buhis mabuhinan.

Subong ginapahangop sang termino nga “charitable planning,” ining sahi sang mga donasyon nagakinahanglan sang pila ka pagplano sa bahin sang nagdonar. Agod buligan ang mga indibiduwal nga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga pagdonar, ginhanda ang isa ka brosyur sa Ingles kag Espanyol nga ginatig-uluhan Charitable Planning to Benefit Kingdom Service Worldwide. Ginbalhag ini nga brosyur agod maghatag sing impormasyon tuhoy sa nanuhaytuhay nga paagi sang pagdonar sa karon ukon sa tion nga mapatay. Pagkatapos mabasa ang brosyur kag makonsulta ang ila mga abogado ukon manugkwenta sang buhis, nakabulig ang madamo sa pagsuportar sa relihioso nga mga hilikuton kag sa mga buhat sang kaluoy nga ginahimo sang mga Saksi ni Jehova sa bug-os nga kalibutan, kag sa amo, nabuhinan sing daku ang ila ginabayaran nga buhis. Ini nga brosyur matigayon paagi sa pagpangabay sing kopya direkta sa Charitable Planning Office.

Para sa dugang nga impormasyon, mahimo kamo magpakig-angot sa Charitable Planning Office, paagi sa sulat ukon sa telepono, sa adres nga nalista sa ubos, ukon makig-angot sa sanga talatapan sang mga Saksi ni Jehova sa inyo pungsod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco del Monte

1105 Quezon City

Telepono: (02) 411-6090