“Pamatuki ang Yawa” Subong sang Ginhimo ni Jesus

“Pamatuki ang Yawa, kag magapalagyo sia sa inyo.”​—SANT. 4:7.

1. Ano nga paghingabot ang nahibaluan ni Jesus nga atubangon niya sa duta, kag ano ang buot silingon sini?

NAHIBALUAN ni Jesucristo nga hingabuton sia sang Yawa. Maathag ini nga katunayan sa ginsiling sang Dios sa man-ug, nga ginapatuhoy Niya sa rebelyuso kag malaut nga espiritu nga naggamit sa man-ug: “Butangan ko sing kaawayon sa tunga mo kag sang babayi [ang langitnon nga bahin sang organisasyon ni Jehova], kag sa tunga sang imo kaliwat kag sang iya kaliwat; sia [si Jesucristo] magadugmok sang imo olo, kag dugmokon mo ang iya tikod.” (Gen. 3:14, 15; Bug. 12:9) Ang buot silingon sang pagdugmok sa tikod ni Jesus amo nga patyon sia sa duta, apang temporaryo lamang ini bangod banhawon sia ni Jehova sa langitnon nga himaya. Apang, ang pagdugmok sa ulo sang man-ug nagakahulugan nga laglagon ang Yawa sing dayon.​—Basaha ang Binuhatan 2:31, 32; Hebreo 2:14.

2. Ngaa may pagsalig si Jehova nga mapamatukan sing madinalag-on ni Jesus ang Yawa?

² May pagsalig si Jehova nga matuman sing madinalag-on ni Jesus ang iya hilikuton kag mapamatukan niya ang Yawa samtang yari sia sa duta. Ngaa napat-od gid ini ni Jehova? Bangod sia ang nagtuga kay Jesus sa langit kag madugay na sila nga nag-updanay, kag nahibaluan niya nga matinumanon kag matutom ining “pangolo nga manugpangabudlay” kag “panganay sa tanan nga tinuga.” (Hulu. 8:22-31; Col. 1:15) Gani, sang ginpadala si Jesus sa duta kag sang gintugutan ang Yawa nga tilawan sia tubtob sa kamatayon, may pagsalig ang Dios nga magamadinalag-on ang Iya bugtong nga Anak.​—Juan 3:16.

 Ginaamligan ni Jehova ang Iya mga Alagad

3. Ano ang pagtamod sang Yawa sa mga alagad ni Jehova?

³ Gintawag ni Jesus ang Yawa nga “manuggahom sini nga kalibutan” kag ginpaandaman ang Iya mga disipulo nga hingabuton man sila kaangay niya. (Juan 12:31; 15:20) Ang kalibutan nga yara sa gahom ni Satanas nga Yawa, nagadumot sa matuod nga mga Cristiano bangod nagaalagad sila kay Jehova kag nagabantala sang pagkamatarong. (Mat. 24:9; 1 Juan 5:19) Ang paghingabot ni Satanas nakasentro sa nagkalabilin sang mga hinaplas nga magagahom sa ulihi kaupod ni Cristo sa iya Ginharian sa langit. Ginapuntariya man ni Satanas ang mga Saksi ni Jehova nga may paglaum nga magkabuhi sing dayon sa paraiso sa duta. Ginapaandaman kita sang Pulong sang Dios: “Ang inyo kaaway, ang Yawa, nagaluyong subong sang nagangurob nga leon, nga nagapangita sing matukob.”​—1 Ped. 5:8.

4. Ano ang pamatuod nga madinalag-on nga ginapamatukan sang katawhan sang Dios ang Yawa sa aton panahon?

⁴ Subong isa ka organisasyon nga ginasakdag ni Jehova nga Dios, madinalag-on naton nga ginapamatukan ang Yawa. Binagbinaga ini: Sang nagligad nga 100 ka tuig, gintinguhaan gid sang pila sa pinakamapintas nga mga manuggahom sa maragtas nga dulaon ang mga Saksi ni Jehova. Apang, padayon ang pagdamo sang mga Saksi. Sa karon mga 7,000,000 na sila sa kapin sa 100,000 ka kongregasyon sa bug-os nga kalibutan. Samtang, yadtong mapintas nga mga manuggahom nga naghingabot sa katawhan ni Jehova wala na!

5. Paano natuman ang Isaias 54:17 sa bahin sang mga alagad ni Jehova?

⁵ Nagapatuhoy sa kongregasyon sang Israel sang una, ang Dios nagsaad: “Wala sing hinganiban nga ginhimo batok sa imo nga magauswag, kag ang tagsa ka dila nga magtindug batok sa imo sa paghukom tagudilian mo. Ini amo ang panublion sang mga alagad sang GINOO kag ang ila pagkamatarung nga gikan sa akon.” (Isa. 54:17) Natuman gid ini nga saad sa bahin sang katawhan ni Jehova sa bug-os nga kalibutan sa sining “katapusan nga mga adlaw.” (2 Tim. 3:1-5, 13) Padayon naton nga ginapamatukan ang Yawa, kag wala sia sing hinganiban nga magamadinalag-on sa pagpapas sa katawhan sang Dios, bangod si Jehova kaupod naton.​—Sal. 118:6, 7.

6. Ano ang ginasugid sa aton sang tagna ni Daniel tuhoy sa madangatan sang paggahom sang Yawa?

⁶ Sa malapit na lang mag-abot nga katapusan sang malaut nga sistema sang mga butang, ang tanan nga bahin sang paggahom ni Satanas pagadulaon sing bug-os. Paagi sa pagtuytoy sang Dios, si Daniel nagtagna: “Sa mga adlaw sadto nga mga hari [nga nagaluntad sa aton adlaw] magapatindug ang Dios sang langit sing ginharian [sa langit] nga dili gid malaglag, ukon ang pagbulut-an sini ibilin sa iban nga katawohan. Kondi dugmokon sini kag papason ini tanan nga ginharian [nga nagaluntad karon] kag ini magapadayon sa gihapon.” (Dan. 2:44) Sa katumanan sini, madula na ang paggahom ni Satanas kag ang paggahom sang di-himpit nga mga tawo. Ang tanan nga bahin sang sistema sang mga butang sang Yawa dulaon sing dayon, kag wala na sing magapamatok sa paggahom sang Ginharian sang Dios sa bug-os nga duta.​—Basaha ang 2 Pedro 3:7, 13.

7. Subong indibiduwal nga mga alagad ni Jehova, ngaa nahibaluan naton nga mapamatukan naton sing madinalag-on ang Yawa?

⁷ Pat-od gid nga magapadayon kag magauswag ang organisasyon ni Jehova bangod sa iya pagpakamaayo. (Basaha ang Salmo 125:1, 2.) Kamusta naman kita? Ang Biblia nagasiling nga mapamatukan naton sing madinalag-on ang Yawa, subong sang ginhimo ni Jesus. Ang matuod, ginapakita sang tagna nga ginhatag ni Cristo paagi kay apostol Juan, nga walay sapayan sang pagpamatok sang Yawa, “isa ka dakung kadam-an” nga may paglaum nga magapuyo diri sa duta ang makaluwas sa katapusan sining sistema. Suno sa Kasulatan, nagasinggit sila: “Ang kaluwasan utang namon sa amon Dios, nga nagalingkod sa trono, kag sa Kordero [si Jesucristo].” (Bug. 7:9-14) Ang mga hinaplas ginsiling nga nagamadinalag-on batok kay Satanas, kag amo man ang ila mga kaupod nga “iban nga mga karnero.” (Juan 10:16; Bug. 12:10, 11) Apang kinahanglan gid naton ang maukod nga panikasog kag tudok nga pangamuyo agod ‘maluwas gikan sa isa nga malauton.’​—Mat. 6:13.

 Ang Pinakamaayo nga Halimbawa sang Pagpamatok sa Yawa

8. Ano ang una nga pagsulay sang Yawa kay Jesus sa kahanayakan, kag ano ang ginhimo ni Cristo?

⁸ Nagpanikasog gid ang Yawa nga bungkagon ang integridad ni Jesus. Sa kahanayakan, ginsulay ni Satanas si Jesus nga lapason si Jehova. Apang, ginpahamtang ni Jesus ang pinakamaayo nga halimbawa sang pagpamatok kay Satanas. Pagkatapos sang 40 ka adlaw kag 40 ka gab-i nga pagpuasa, mahimo nga gutom na gid si Jesus. “Kon ikaw anak sang Dios,” siling ni Satanas, “sugua ining mga bato nga mangin mga tinapay.” Apang, wala gingamit ni Jesus ang gahom nga ginhatag sang Dios para sa iya kaugalingon nga kaayuhan. Sa baylo, si Jesus nagsiling: “Nasulat na, ‘Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.’”​—Mat. 4:1-4; Deut. 8:3.

9. Ngaa dapat naton pamatukan ang mga panikasog sang Yawa nga hingalitan ang aton kinaandan nga mga handum?

⁹ Sa karon, ginahingalitan man sang Yawa ang kinaandan nga mga handum sang mga alagad ni Jehova. Gani, dapat determinado kita nga pamatukan ang pagsulay nga maghimo sing sayop nga mga buhat sa sekso, nga kinaandan na lang sa sining imoral nga kalibutan. Ang Pulong sang Dios maathag nga nagasiling: “Ano! Wala bala kamo makahibalo nga ang di-matarong nga mga tawo indi makapanubli sang ginharian sang Dios? Indi pagtuguti nga mapatalang kamo. Wala sing mga makihilawason, ukon mga nagasimba sa mga idolo, ukon mga makihilahion, ukon mga lalaki nga ginahuptan para sa di-kinaugali nga mga katuyuan, ukon mga lalaki nga nagahulid sa mga lalaki . . . nga makapanubli sang ginharian sang Dios.” (1 Cor. 6:9, 10) Maathag gid nga ang imoral nga mga tawo nga indi luyag magbag-o, indi makapuyo sa bag-ong kalibutan sang Dios.

10. Suno sa Mateo 4:5, 6, ano ang isa pa ka pagsulay nga gingamit sang Yawa agod bungkagon ang integridad ni Jesus?

¹⁰ Tuhoy sa isa pa ka pagsulay nga naeksperiensiahan ni Jesus sa kahanayakan, ang Kasulatan nagsiling: “Gindala sia sang Yawa sa balaan nga siudad, kag ginpahamtang niya sia sa ibabaw sang pamakod sang templo kag nagsiling sa iya: ‘Kon ikaw anak sang Dios, maglukso ka; kay nasulat na, “Magasugo sia sang iya mga anghel may kaangtanan sa imo, kag sal-on ka nila sa ila mga kamot, agod indi gid masumpo ang imo tiil sa bato.”’” (Mat. 4:5, 6) Ginpahangop ni Satanas nga kon himuon ini ni Jesus, mahimo ini mangin tumalagsahon nga buhat nga magapamatuod nga sia ang Mesias. Apang, ang matuod mangin isa ini ka di-nagakaigo kag padayawdayaw nga buhat, nga wala ginakahamut-an kag wala ginasakdag sang Dios. Sa liwat, ginhuptan ni Jesus ang iya integridad kay Jehova kag nagsabat paagi sa pagkutlo sang isa ka teksto. Nagsiling sia: “Sa liwat nasulat na, ‘Indi mo pag-ibutang sa pagtilaw si Jehova nga imo Dios.’”​—Mat. 4:7; Deut. 6:16.

11. Paano kita mahimo sulayon ni Satanas, kag ano ang mahimo nga resulta?

 ¹¹ Mahimo sulayon kita ni Satanas nga tilawan si Jehova. Paano? Ayhan buyukon niya kita nga handumon ang kahamuot sang kalibutan paagi sa pag-ilog sang mga uso sa pagpamayo kag pagpamustura ukon makigbahin sa kwestionable nga mga kalingawan. Apang, kon ilugon naton ang kalibutan kag balewalaon ang mga laygay sang Biblia, mapaabot bala naton nga amligan kita sang mga anghel gikan sa malain nga mga resulta sang aton mga buhat? May matun-an kita sa halimbawa ni Hari David. Ginhinulsulan niya ang iya sala upod kay Bat-seba, apang wala niya malikawan ang masakit nga mga resulta sini. (2 Sam. 12:9-12) Indi gid naton pagtilawan si Jehova sa di-nagakaigo nga mga paagi, ayhan paagi sa pagpakig-abyan sa kalibutan.​—Basaha ang Santiago 4:4; 1 Juan 2:15-17.

12. Ano nga pagsulay ang ginsambit sa Mateo 4:8, 9, kag ano ang ginhimo sang Anak sang Dios?

¹² Ang isa pa ka pagsulay nga gingamit sang Yawa sa kahanayakan amo ang pagtanyag kay Jesus nga maggahom sa kalibutan. Ginpakita ni Satanas kay Jesus ang tanan nga ginharian sang kalibutan kag ang ila himaya kag nagsiling: “Ini tanan nga butang ihatag ko sa imo kon magyaub ka kag maghimo sang isa ka buhat sang pagsimba sa akon.” (Mat. 4:8, 9) Tuman gid ini kalaut nga pagtinguha nga maagaw ang pagsimba nga para lamang kay Jehova kag mahaylo si Jesus nga mangin di-matutom sa Dios! Ginpasundan sining matutom nga anghel sadto ang iya handum nga simbahon man. Gani, ining anghel nangin makasasala, mahamkunon, kag tuman kalaut nga manugsulay nga si Satanas nga Yawa. (Sant. 1:14, 15) Sa kabaliskaran, determinado si Jesus nga magpabilin nga matutom sa iya langitnon nga Amay kag gani nagsiling sia: “Palayo ka, Satanas! Kay nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.’” Sa liwat, ginpamatukan ni Jesus ang Yawa paagi sa malig-on kag maathag nga sabat. Indi luyag sang Anak sang Dios nga mangin bahin sang kalibutan ni Satanas kag indi gid niya pagsimbahon ining isa nga malaut!​—Mat. 4:10; Deut. 6:13; 10:20.

“Pamatuki ang Yawa, kag Magapalagyo Sia sa Inyo”

13, 14. (a) Paagi sa pagpakita kay Jesus sang tanan nga ginharian sang kalibutan, ano ang gintanyag ni Satanas sa iya? (b) Ano ang ginahimo ni Satanas agod masulay kita?

¹³ Paagi sa pagpakita kay Jesus sang tanan nga ginharian sang kalibutan, gintanyag sa iya sang Yawa ang gahom nga wala pa sing tawo nga nakaangkon. Naglaum si Satanas nga basi pa lang maganyat si Jesus sa iya makita kag magpasugot nga mangin ang pinakagamhanan nga manuggahom sa kalibutan. Wala kita karon ginatanyagan sang Yawa sing mga ginharian, apang ginasulay niya ang aton tagipusuon paagi sa aton makita, mabatian, kag ginahunahuna.

¹⁴ Ang Yawa ang nagakontrol sini nga kalibutan. Gani, kontrolado niya ang media. Sa amo, mapaabot naton nga ang mga talan-awon, musika, kag balasahon sa sini nga kalibutan puno sing imoralidad kag kasingki. Ang mga pasayod nagapukaw sang aton handum nga magbakal sing madamo nga butang nga indi man naton kinahanglan. Paagi sa sini, padayon kita nga ginasulay sang Yawa nga tigayunon ang mga butang nga makagalanyat sa aton panulok, palamatin-an, kag hunahuna. Apang, kon indi kita magtan-aw, magpamati, ukon magbasa sing mga materyal nga ginapakamalaut sa Biblia, kaangay nga nagasiling kita: “Palayo ka, Satanas!” Kon himuon naton ini, mailog naton si Jesus nga malig-on kag maabtik sa pagsikway sa mahigko nga kalibutan ni Satanas. Mapakita man naton nga indi kita bahin sang kalibutan paagi sa aton maisugon nga pagpakilala subong mga Saksi ni Jehova kag mga sumulunod ni Cristo, sa trabaho, sa eskwelahan, sa aton mga kaingod, kag sa aton mga paryente.​—Basaha ang Marcos 8:38.

15. Ngaa ang pagpamatok kay Satanas nagakahulugan sing pagpabilin nga alisto?

¹⁵ Sa tapos mapaslawan ang Yawa sing tatlo ka beses sa iya pagtinguha nga bungkagon ang integridad ni Jesus sa Dios, “ginbayaan sia sang Yawa.” (Mat. 4:11) Apang, wala sing tuyo si Satanas nga untatan ang pagsulay kay Jesus sadto nga tion, kay ginasugiran kita: “Kag sang natapos sang Yawa ang tanan nga pagsulay [sa kahanayakan], ginbiyaan niya sia tubtob nga may kahigayunan sia liwat.” (Luc. 4:13) Kon mapamatukan naton sing madinalag-on  ang Yawa, dapat pasalamatan naton si Jehova. Apang dapat man naton pangayuon ang padayon nga bulig sang Dios, kay balikan kita sang Yawa kag sulayon liwat sa tion nga wala naton ginapaabot. Gani, dapat kita mangin alisto sa tanan nga tion, nga padayon nga nagahatag kay Jehova sing sagrado nga pag-alagad bisan ano man ang pagtilaw nga maatubang naton.

16. Anong gamhanan nga puersa ang ginaaman ni Jehova sa aton, kag ngaa kinahanglan nga ipangamuyo naton ini?

¹⁶ Agod buligan kita nga mapamatukan ang Yawa, dapat kita mangamuyo sing pinakagamhanan nga puersa sa bug-os nga uniberso​—ang balaan nga espiritu sang Dios. Pat-od gid nga ihatag ini sang Dios sa aton. Paagi sa sini, mahimo naton ang mga butang nga indi naton masarangan kon sa aton lang kusog. Ginpasalig man ni Jesus ang iya mga sumulunod nga matigayon nila ang espiritu sang Dios, sang magsiling sia: “Busa, kon kamo bisan [di-himpit kag masiling nga] malaut makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!” (Luc. 11:13) Magpadayon kita sa pagpangamuyo kay Jehova nga amanan kita sing balaan nga espiritu. Paagi sa bulig sining labing gamhanan nga kusog, magabaskog pa gid ang aton determinasyon nga pamatukan ang Yawa, kag magamadinalag-on kita. Dugang sa regular kag tudok nga pangamuyo, dapat man naton isuklob ang kompleto nga espirituwal nga hinganib gikan sa Dios agod ‘makatindog kita sing malig-on batok sa mga pahito sang Yawa.’​—Efe. 6:11-18.

17. Ano nga kalipay ang nakabulig kay Jesus nga mapamatukan ang Yawa?

¹⁷ May isa pa ka butang nga nakabulig kay Jesus nga mapamatukan ang Yawa, kag makabulig man ini sa aton. Ang Biblia nagsiling: ‘Tungod sa kalipay nga ginbutang sa atubangan [ni Jesus] ginbatas niya ang usok sang pag-antos, nga ginatamay ang kahuluy-an, kag naglingkod sa tuo sang trono sang Dios.’ (Heb. 12:2) Matigayon man naton ini nga kalipay kon sakdagon naton ang pagkasoberano ni Jehova, padunggan ang iya ngalan, kag isentro ang aton igtalupangod sa padya nga kabuhi nga walay katapusan. Daku gid ang aton kalipay kon si Satanas kag ang tanan niya nga mga binuhatan dulaon na sing dayon kag “ang mapainubuson magapanubli sang duta, kag magakalipay sila sa kabuganaan sang paghidait”! (Sal. 37:11) Gani, padayon nga pamatuki ang Yawa, subong sang ginhimo ni Jesus.​—Basaha ang Santiago 4:7, 8.

Ano ang Imo Sabat?

• Ano ang pamatuod nga ginaamligan ni Jehova ang iya katawhan?

• Paano naghatag sing halimbawa si Jesus sa pagpamatok sa Yawa?

• Sa ano nga mga paagi mo mapamatukan ang Yawa?

[Mga Pamangkot sa Pagtinuon]

[Piktyur sa pahina 29]

Ang pagpakig-abyan sa kalibutan magahimo sa aton nga kaaway sang Dios

[Piktyur sa pahina 31]

Ginsikway ni Jesus ang tanan nga ginharian sang kalibutan nga gintanyag ni Satanas