Determinado nga Magpanaksi sing Maid-id

“Ginsugo niya kami nga magbantala sa mga tawo kag magpanaksi sing maid-id.”​—BINU. 10:42.

1. Ano nga sugo ang ginpadaku ni Pedro sang nagpakighambal sia kay Cornelio?

GINTIPON sang isa ka Italyano nga opisyal sang hangaway ang iya mga paryente kag mga abyan para saksihan ang isa ka daku nga pagbag-o sang pagpakig-angot sang Dios sa mga tawo. Yadto nga tawo amo ang mahinadlukon sa Dios nga si Cornelio. Si apostol Pedro naghambal sa mga nagtilipon nga ang mga apostoles ginsugo “nga magbantala sa mga tawo kag magpanaksi sing maid-id” tuhoy kay Jesus. Ang pagpanaksi ni Pedro may makalilipay gid nga mga resulta. Ang wala matuli nga mga Gentil nakabaton sang espiritu sang Dios, nabawtismuhan, kag nangin palaabuton nga mga hari sa langit kaupod ni Jesus. Maayo gid ini nga mga resulta bangod sang pagpanaksi sing maid-id ni Pedro!​—Binu. 10:22, 34-48.

2. Paano naton mahibaluan nga ang sugo nga magpanaksi sing maid-id wala lamang ginpatuman sa 12 ka apostoles?

² Natabo yadto sang 36 C.E. Mga duha ka tuig antes sini, ang isa ka masupog nga manugpamatok sang Cristianismo nakaeksperiensia sing isa ka hitabo nga nagpabag-o sang iya kabuhi. Si Saulo sang Tarso nagapakadto sadto sa Damasco sang nagpakita sa iya si Jesus kag nagsiling: “Magsulod sa siudad, kag isugid sa imo ang dapat mo himuon.” Ginpasalig ni Jesus ang disipulo nga si Ananias nga magapanaksi sing maid-id si Saulo “sa mga pungsod subong man sa mga hari kag sa mga anak ni Israel.” (Basaha ang Binuhatan 9:3-6, 13-20.) Sang nagkit-anay sila ni Saulo, si Ananias nagsiling: “Ang Dios sang aton mga katigulangan nagpili sa imo . . . bangod mangin saksi ka para sa iya sa tanan nga tawo.” (Binu. 22:12-16) Daw ano ka makugihon nga gintuman ni Saulo, nga sang ulihi gintawag nga Pablo, ang sugo nga magpanaksi sing maid-id?

Nagpanaksi Sia sing Maid-id!

3. (a) Ano nga hitabo ang aton binagbinagon? (b) Ano ang ginhimo sang mga gulang sa Efeso sang nabaton nila ang mensahe ni Pablo, kag ano nga maayo nga halimbawa ang ginapakita sini?

³ Makawiwili gid nga tun-an sing detalyado ang tanan nga ginhimo ni Pablo pagkatapos sadto nga hitabo. Apang, binagbinagon naton sa sini nga pagtinuon ang pamulongpulong ni Pablo sang mga 56 C.E., nga ginsambit sa Binuhatan kapitulo 20. Ginhatag ni Pablo ini nga pamulongpulong sang nagahingapos na ang iya ikatlo nga paglakbay subong misyonero. Nagpanaug sia sa Mileto, isa ka pantalan sa Dagat Aegean, kag ginpatawag niya ang mga gulang sa kongregasyon sang Efeso. Ang Efeso mga 50 kilometros ang kalayuon, apang mas malawig ang paglakbay bangod nagalikoliko ang dalan. Mahanduraw mo kon daw ano ka malipayon ang  mga gulang sa Efeso sang nabaton nila ang mensahe ni Pablo. (Ipaanggid ang Hulubaton 10:28.) Apang, kinahanglan maghimo sila sing mga kahimusan agod makalakbay pakadto sa Mileto. Ang iban sa ila mahimo nga nag-untat anay sa pagtrabaho ukon nagsirado sang ila mga balaligyaan. Madamo sa mga Cristiano karon ang naghimo sing subong sini agod mapat-od nga matambungan nila ang tanan nga sesyon sang ila tuigan nga distrito nga kombension.

4. Ano ang ginhimo ni Pablo sang pila ka tuig nga yara sia sa Efeso?

⁴ Ano sa banta mo ang ginhimo ni Pablo sa Mileto sa sulod sang tatlo ukon apat ka adlaw nga wala pa makaabot ang mga gulang? Kon ikaw si Pablo, ano ang himuon mo? (Ipaanggid ang Binuhatan 17:16, 17.) Ang pinamulong ni Pablo sa mga gulang sa Efeso makabulig sa aton agod mahibaluan ang sabat. Ginlaragway niya ang iya kinabatasan sa pagbantala nga hilikuton sa sulod sang mga tinuig, lakip sadtong una niya nga pagkadto sa Efeso. (Basaha ang Binuhatan 20:18-21.) Bangod nagapati sia nga hayag sa mga gulang ang iya ginhimo, nagsiling sia: “Nahibaluan gid ninyo nga sa nahaunang adlaw nga nagtapak ako sa Asia . . . nagpanaksi ako sing maid-id.” Huo, determinado sia nga tumanon ang hilikuton nga ginsugo sa iya ni Jesus. Paano niya ginhimo sing madinalag-on ini nga hilikuton sa Efeso? Ang isa ka paagi amo ang pagpanaksi sa mga Judiyo, kag pagkadto sa mga lugar diin madamo ang mga Judiyo. Suno kay Lucas, sang si Pablo yara sa Efeso sang mga 52-55 C.E., ‘nagpamulongpulong sia kag naggamit sang makabuluyok nga pangatarungan’ sa sinagoga. Sang ang mga Judiyo ‘padayon nga nagpakatig-a kag indi magpati,’ si Pablo nagbantala sa iban. Nagsaylo sia sa iban nga bahin sang siudad kag padayon nga nagbantala. Gani, napanaksihan niya ang mga Judiyo kag mga Griego sa sinang daku nga siudad.​—Binu. 19:1, 8, 9.

5, 6. Ngaa mapat-od naton nga mga di-tumuluo ang ginbantalaan ni Pablo sa mga balay?

⁵ Sang ulihi, ang pila sang mga nangin Cristiano kalipikado na subong mga gulang, kag naistorya sila ni Pablo sa Mileto. Ginpahanumdom sa ila ni Pablo ang pamaagi nga iya gingamit: “Wala ako magpugong sa pagsugid sa inyo sing bisan ano sa mga butang nga mapuslanon ukon sa pagtudlo sa inyo sing dayag kag sa mga balay.” Ang pila ka tawo sa karon nagsiling nga ginapatuhuyan lamang diri ni Pablo amo ang pagduaw sa mga tumuluo agod palig-unon sila. Apang indi amo sina ang ginapatuhuyan ni Pablo. Ang paglaragway nga ‘pagtudlo sing dayag kag sa mga balay’ panguna nga nagapatuhoy sa pagbantala sa mga di-tumuluo. Maathag ini sa masunod nga mga pinamulong ni Pablo. Nagsiling sia nga nagpanaksi sia “sa mga Judiyo kag sa mga Griego tuhoy sa paghinulsol sa Dios kag pagtuo sa aton Ginuong Jesus.” Maathag nga nagpanaksi si Pablo sa mga di-tumuluo, nga kinahanglan maghinulsol kag magtuo kay Jesus.​—Binu. 20:20, 21.

⁶ Sa isa ka tul-id nga pagtuon sa Cristianong Griegong Kasulatan, ang isa ka iskolar sa Biblia nagsiling tuhoy sa Binuhatan 20:20: “Si Pablo nagpabilin sing tatlo ka tuig sa Efeso. Ginkadtuan niya ang tagsa ka balay, kag mahimo nga nagbantala sa tanan nga tawo (bersikulo 26). Isa ini ka awtorisasyon gikan sa  kasulatan nga kinahanglan ang pag-ebanghelyo sa mga balay kag subong man sa publiko nga mga pagtilipon.” Literal man nga ginkadtuan ni Pablo ang tagsa ka balay, subong sang ginsiling sini nga iskolar, ukon indi, luyag ni Pablo nga ipahanumdom sa mga gulang sa Efeso kon paano sia nagpanaksi kag kon ano ang resulta sini. Si Lucas nagreport: “Nakabati sang pulong sang Ginuo ang tanan nga nagapuyo sa distrito sang Asia nga mga Judiyo kag mga Griego.” (Binu. 19:10) Apang paano posible nga nakabati ang “tanan” sa Asia, kag ano ang ginatudlo sini kon paano kita dapat magpanaksi?

7. Paano ang mensahe ni Pablo nakalab-ot sa iban nga tawo luwas sa iya direkta nga napanaksihan?

⁷ Bangod sa pagbantala ni Pablo sa publiko nga mga lugar kag sa mga balay, madamo ang nakabati sang iya mensahe. Mahimo bala nga ang mga nakabati sang mensahe nagpabilin na gid lang sa Efeso, nga wala na nagkadto sa iban nga lugar agod magnegosyo, magpalapit sa mga paryente, ukon magpangita sing malinong nga lugar nga pagapuy-an? Indi gid. Madamo sa karon ang nagsaylo sa iban nga lugar bangod sining pila ka rason; kag mahimo nga isa ikaw sa sini. Subong man, ang mga tawo sadto sa iban nga lugar nagkadto sa Efeso bangod sa pila ka hilikuton ukon bangod sa palangitan-an. Samtang didto sila, mahimo nga nasugilanon nila si Pablo ukon nabatian nila nga nagapanaksi sia. Ano ang mahimo nga matabo kon magpauli na sila? Yadtong mga nagbaton sing kamatuoran posible nga nagpanaksi. Ang iban mahimo nga indi nangin tumuluo, apang mahimo nga ginsugid nila sa iban ang ila nabatian sa Efeso. Sang ulihi, ang ila mga paryente, mga kaingod, ukon mga kostumer nakabati sing kamatuoran, kag ang pila sa ila mahimo nga nagbaton sini. (Ipaanggid ang Marcos 5:14.) Ano ang ginapakita sini tuhoy sa mahimo mangin epekto sang imo pagpanaksi sing maid-id?

8. Paano mahimo nakabati sing kamatuoran ang mga tawo sa bug-os nga distrito sang Asia?

⁸ Sadtong panugod sang iya pagministeryo sa Efeso, nagsulat si Pablo nga ang ‘isa ka daku nga ganhaan nga nagadul-ong sa hilikuton nabuksan sa iya.’ (1 Cor. 16:8, 9) Ano yadto nga ganhaan, kag paano ini nabuksan sa iya? Ang padayon nga pagministeryo ni Pablo sa Efeso nagresulta sa paglapnag sang maayong balita. Binagbinaga ang Colosas, Laodicea, kag Hierapolis, ang tatlo ka siudad nga malapit sa Efeso. Wala didto makakadto si Pablo, apang ang maayong balita nakalab-ot didto. Si Epafras naggikan sa amo nga lugar. (Col. 2:1; 4:12, 13) Nabatian bala ni Epafras ang pagpanaksi ni Pablo sa Efeso, kag nangin Cristiano sia? Wala ginsambit sang Biblia ang espesipiko nga rason. Apang agod mapalapnag ang kamatuoran sa iya lugar, mahimo nga gintiglawas ni Epafras si Pablo. (Col. 1:7) Sa tion nga nagapanaksi si Pablo sa Efeso, mahimo man nga nakalab-ot ang Cristianong mensahe sa mga siudad sang Filadelfia, Sardis, kag Tiatira.

9. (a) Ano ang tinagipusuon nga handum ni Pablo? (b) Ano ang tuigan nga teksto para sa 2009?

 ⁹ Bangod sini, may madamo nga rason ang mga gulang sa Efeso nga mag-ugyon sa ginsiling ni Pablo: “Wala ko ginakabig ang akon kalag nga mahal sa akon, agod lamang matapos ko ang akon dalaganon kag ang ministeryo nga akon nabaton kay Ginuong Jesus, nga magpanaksi sing maid-id sa maayong balita tuhoy sa wala tupong nga kaayo sang Dios.” Ina nga pinamulong nagaunod sing makapalig-on kag makapahulag nga tuigan nga teksto para sa 2009: “Magpanaksi sing maid-id sa maayong balita.”​—Binu. 20:24.

Pagpanaksi sing Maid-id Karon

10. Ngaa kinahanglan man kita magpanaksi sing maid-id?

¹⁰ Ang sugo nga “magbantala sa mga tawo kag magpanaksi sing maid-id” indi lamang para sa mga apostoles. Sang nabanhaw si Jesus, nakighambal sia sa mga 500 ka disipulo nga nagtipon sa Galilea, kag nagsugo sa ila: “Lakat kamo kag maghimo sang mga disipulo sa mga tawo sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila nga tumanon ang tanan nga butang nga ginsugo ko sa inyo.” Ina nga sugo naaplikar sa tanan nga matuod nga Cristiano karon, subong sang ginapakita sa pinamulong ni Jesus: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.”​—Mat. 28:19, 20.

11. Sa anong importante nga hilikuton nakilala ang mga Saksi ni Jehova?

¹¹ Ang makugi nga mga Cristiano padayon nga nagatuman sina nga sugo, nga nagapanikasog nga “magpanaksi sing maid-id sa maayong balita.” Ang panguna nga paagi agod mahimo ini amo ang ginsambit ni Pablo sa mga gulang sa Efeso​—ang pagbantala sa mga balay. Sa 2007 nga libro tuhoy sa epektibo nga hilikuton sang pagmisyonero, si David G. Stewart, Jr., nagsiling: “Ang mga Saksi ni Jehova mas epektibo sa pagpalig-on sa ila miembro nga isugid sa iban ang ila pagtuluuhan sangsa indi maathag [nga mga sermon sa pulpito]. Para sa madamo nga Saksi ni Jehova, ang pagsugid sa iban sang ila pagtuluuhan isa ka hilikuton nga nanamian gid nila.” Ano ang resulta sini? “Sang 1999, 2 tubtob 4 porsiento lamang sang mga tawo nga akon ginsurbe sa duha ka kapital sang Nasidlangan nga Europa ang nagsiling nga nasugilanon sila sang mga misyonero sang Latter-day Saints ukon ‘Mormon’. Kapin sa 70 porsiento ang nagsiling nga nasugilanon sila sing personal sang mga Saksi ni Jehova, indi lang sing makaisa, kundi sa masami sa madamo pa nga beses.”

12. (a) Ngaa ginakadtuan naton sing ‘madamo nga beses’ ang mga balay sa aton teritoryo? (b) May masugid ka bala nga eksperiensia tuhoy sa isa nga nagbag-o ang panimuot sa aton mensahe?

¹² Posible nga amo man sini ang naeksperiensiahan sang mga tawo sa inyo lugar. Mahimo nga nakabulig ka sa sina nga pagpanaksi. Samtang nagabantala ka sa mga tawo sa mga balay, mahimo nga ‘nakasugilanon ka sing personal’ sa mga lalaki, mga babayi, kag mga pamatan-on sa mga ganhaan. Ang pila mahimo nga indi magpamati bisan pa ginkadtuan mo sila sing ‘madamo nga beses.’ Ang iban mahimo nga mamati sing makadali samtang ginabasa mo sa ila ang isa ka teksto sa Biblia ukon ginasugid ang isa ka punto gikan sa Kasulatan. Apang sa iban naman, mahimo nga nakapanaksi ka sing maayo, kag ginbaton nila ang mensahe. Ining tanan nga kahimtangan mangin posible samtang ‘nagapanaksi kita sing maid-id sa maayong balita.’ Subong sang mahimo nga nahibaluan mo na, may yara indi maisip nga halimbawa sang mga nagpakita sing diutay nga interes sang ginkadtuan sila sing ‘madamo nga beses,’ apang sang ulihi nagbag-o ang ila kahimtangan. Ayhan may butang nga natabo sa ila, ukon sa ila pinalangga, nga nagpabukas sang ila hunahuna kag tagipusuon sa kamatuoran. Karon mga kauturan na naton sila. Gani, indi magpangampo bisan pa diutay lang ang nagabaton sining karon lang. Wala naton ginapaabot nga batunon sang tanan nga tawo ang kamatuoran. Apang, ginapaabot sang Dios nga mangin maukod kita kag padayon nga mapisan sa pagpanaksi sing maid-id.

 Mga Resulta nga Mahimo Wala Naton Nahibaluan

13. Ano ang mga resulta sang aton pagpanaksi nga mahimo wala naton nahibaluan?

¹³ Indi lamang ang direkta nga nabuligan ni Pablo nga mangin Cristiano ang nakapanginpulos sa iya ministeryo. Amo man sini sa aton pagministeryo. Ginatinguhaan naton nga makigbahin sing regular sa pagministeryo sa mga balay, nga nagapanaksi tubtob sa aton masarangan sa madamo nga tawo. Ginasugid naton ang maayong balita sa aton mga kaingod, mga kaupod sa trabaho, mga kabutho, kag mga paryente. Nahibaluan bala naton ang tanan nga resulta sini? Sa pila ka tawo, mahimo nga may insigida nga maayo nga mga resulta. Sa iban naman, ang binhi sang kamatuoran mahimo nga nagapabilin anay nga wala nagatubo sa pila ka tion, apang sang ulihi, nagapanggamot ini sa tagipusuon sang isa kag magatubo. Bisan pa indi ini matabo, ang mga tawo nga aton masugilanon mahimo manugid sa iban tuhoy sa aton ginsiling, ginapatihan, kag panimuot. Huo, mahimo nila maliton sing di-hungod yadtong mga binhi sa mabinatunon nga tagipusuon sang iban.

14, 15. Ano ang nangin resulta sang pagpanaksi sang isa ka utod nga lalaki?

¹⁴ Subong halimbawa, binagbinaga ang mag-asawa nga sanday Ryan kag Mandi nga nagapuyo sa Florida, U.S.A. Sa ginatrabahuan ni Ryan, ginpanaksihan niya sing di-pormal ang iya kaupod sa trabaho. Yadto nga lalaki, nga isa anay ka Hindu, nagdayaw sa kon paano mamayo si Ryan kag kon paano sia nagapakighambal sa iban. Sa ila pagsugilanon, ginlakip ni Ryan ang mga topiko kaangay sang pagkabanhaw kag ang kahimtangan sang mga patay. Isa sadto ka gab-i sang Enero, ginpamangkot sini nga lalaki ang iya asawa nga si Jodi, kon ano ang iya nahibaluan tuhoy sa mga Saksi ni Jehova. Katoliko si Jodi, kag nagsiling ini nga ang nahibaluan lamang niya tuhoy sa mga Saksi amo ang “pagbantala sa mga balay.” Ginpangita ni Jodi sa Internet ang impormasyon tuhoy sa mga Saksi ni Jehova, kag nasapwan niya ang aton Web site nga www.watchtower.org. Sa sulod sang mga tatlo ka bulan, ginbasa ni Jodi ang impormasyon sa sina nga Web site, lakip ang Biblia kag ang makapainteres nga mga artikulo.

¹⁵ Sang ulihi, nakilala ni Jodi si Mandi, kay pareho sila nga nars. Nalipay si Mandi sa pagsabat sa mga pamangkot ni Jodi. Pagligad sang pila ka tion, nahambalan na nila ang madamo nga topiko sa Biblia. Ginbaton ni Jodi ang pagtuon sang Biblia sa puluy-an, kag sang ulihi nagtambong na sia sa Kingdom Hall. Pag-abot sang Oktubre, si Jodi nangin di-bawtismado nga manugbantala, kag nabawtismuhan sang Pebrero. Si Jodi nagsulat: “Karon nga nahibaluan ko na ang kamatuoran, madinalag-on kag malipayon katama ang akon kabuhi.”

16. Ano ang matun-an naton gikan sa eksperiensia sang isa ka utod nga lalaki sa Florida tuhoy sa aton mga panikasog nga magpanaksi sing maid-id?

¹⁶ Wala makahibalo si Ryan nga ang iya pagpanaksi sa isa ka tawo magaresulta sa pagbaton sang iban sang kamatuoran. Apang sa iya bahin, nahibaluan niya ang mangin epekto kon determinado sia nga “magpanaksi sing maid-id.” Mahimo nga nagapanaksi ka man sa mga balay, sa ulubrahan, sa eskwelahan, ukon sa iban pa nga di-pormal nga paagi. Kag wala ka lang makahibalo, mangin isa ini ka pamaagi nga mapalapnag mo ang kamatuoran sa iban. Subong nga wala nahibaluan ni Pablo ang tanan nga bunga sang iya pagpanaksi sa “distrito sang Asia,” mahimo nga indi mo man mahibaluan ang tanan nga maayo nga resulta sang imo pagpanaksi sing maid-id. (Basaha ang Binuhatan 23:11; 28:23.) Apang importante gid nga padayon mo ini nga himuon!

17. Ano ang determinado mo nga himuon sa tuig 2009?

¹⁷ Sa sini nga tuig 2009, kabay nga tamdon naton tanan sing serioso ang sugo nga magpanaksi sa mga balay kag sa iban pa nga paagi. Sa amo, mapabutyag man naton ang sentimiento ni apostol Pablo: “Wala ko ginakabig ang akon kalag nga mahal sa akon, agod lamang matapos ko ang akon dalaganon kag ang ministeryo nga akon nabaton kay Ginuong Jesus, nga magpanaksi sing maid-id sa maayong balita tuhoy sa wala tupong nga kaayo sang Dios.”

Ano Ang Imo Sabat?

• Paano nagpanaksi sing maid-id sang unang siglo sanday apostol Pedro kag Pablo kag ang iban pa?

• Ngaa mahimo nga may daku pa nga epekto ang aton pagpanaksi sangsa nahibaluan naton?

• Ano ang tuigan nga teksto para sa 2009, kag ngaa nagakaigo ini?

[Mga Pamangkot sa Pagtinuon]

[Blurb sa pahina 19]

Ang tuigan nga teksto para sa 2009: “Magpanaksi sing maid-id sa maayong balita.”​—Binu. 20:24.

[Piktyur sa pahina 17]

Nahibaluan sang mga gulang sa Efeso ang kinabatasan ni Pablo nga pagpanaksi sing maid-id sa mga balay

[Piktyur sa pahina 18]

Daw ano ayhan ka daku ang mangin epekto sang imo pagpanaksi sing maid-id?