Huptan Mo Bala ang Imo Integridad?

“Tubtub nga mapatay ako indi ko pag-isikway gikan sa akon ang akon pagkatadlong [integridad, NW].”​—JOB 27:5.

1, 2. Ano nga proyekto ang pagatukuron naton, kag ano nga mga pamangkot ang aton pagabinagbinagon?

HUNAHUNAA nga nagatan-aw ka sa plano sang isa ka balay. Nagdayaw ka gid sa pagkadesinyo sini. Nalipay ka sa paghunahuna nga ini nga balay makahatag sing benepisyo sa imo kag sa imo pamilya. Indi bala nga ina nga plano kag ang ginahunahuna mo nga mga benepisyo sini mangin wala pulos kon ang balay indi mo pagtukuron, istaran, kag mentinahon?

² Sing kaanggid, mahimo hunahunaon naton nga ang integridad importante gid nga kinaiya nga makahatag sing kapuslanan sa aton kag sa aton mga hinigugma. Apang makabenepisyo lamang kita kon tukuron naton kag huptan ang aton Cristianong integridad. Sa karon, ang literal nga mga proyekto sa pagtukod magasto gid man. (Luc. 14:28, 29) Pareho ini sa pagtukod sang integridad nga indi mahapos, apang takus ini hatagan sing tion kag panikasog. Gani, binagbinagon naton ang tatlo ka pamangkot: Paano kita mangin mga tawo nga nagapakita sing integridad? Paano naton mahuptan ang aton Cristianong integridad? Ano ang himuon sang isa kon wala niya nahuptan ang iya integridad?

Paano Kita Mangin mga Tawo nga Nagapakita sing Integridad?

3, 4. (a) Paano kita ginabuligan ni Jehova nga matukod ang aton integridad? (b) Paano naton matukod ang aton integridad subong sang ginpakita ni Jesus?

³ Natun-an naton sa nagligad nga artikulo nga ginapadunggan kita ni Jehova paagi sa paghatag sa aton sing pribilehiyo sa pagdesisyon nga mangin mga tawo nga nagapakita sing integridad. Makalilipay nga wala niya kita ginapabay-an sa sini nga butang. Ginatudluan niya kita kon paano tukuron ining hamili nga kinaiya, kag maalwan nga ginahatagan niya kita sang iya balaan nga espiritu agod mabuligan kita nga maaplikar ang iya mga panudlo. (Luc. 11:13) Nagaaman man sia sing espirituwal nga pangamlig para sa mga nagatinguha nga maglakat sa dalanon sang integridad.​—Hulu. 2:7.

⁴ Paano kita gintudluan ni Jehova nga mangin mga tawo nga nagapakita sing integridad? Labaw sa tanan, paagi sa pagpadala sang iya Anak nga si Jesus diri sa duta. Nangin matinumanon gid si Jesus sa iya bug-os nga kabuhi. “Nangin matinumanon [sia] tubtob sa kamatayon.” (Fil. 2:8) Gintuman ni Jesus ang iya langitnon nga Amay sa tanan niya nga ginhimo, bisan pa sa pinakamabudlay nga kahimtangan. “Indi ang akon kabubut-on, kundi ang imo  kabubut-on ang matuman,” siling niya kay Jehova. (Luc. 22:42) Maayo nga pamangkuton naton ang aton kaugalingon, ‘Ginatuman ko man bala ang Dios kaangay ni Jesus?’ Paagi sa pagkamatinumanon nga may husto nga motibo, mangin mga tawo kita nga nagapakita sing integridad. Binagbinaga ang pila ka bahin sang kabuhi sa diin importante gid ang pagkamatinumanon.

5, 6. (a) Paano ginpadaku ni David nga importante ang paghupot sing integridad bisan pa indi kita makita sang iban nga tawo? (b) Ano nga mga hangkat sa integridad ang ginaatubang sang isa ka Cristiano kon nagaisahanon sia?

⁵ Kinahanglan tumanon naton si Jehova bisan nagaisahanon lamang kita. Natalupangdan ni David nga importante ang integridad sa mga tion nga mahimo nagaisahanon lamang sia. (Basaha ang Salmo 101:2.) Subong hari, si David madamo pirme sing kaupod nga mga tawo. Wala duhaduha nga kaupod niya sa madamo nga mga tion ang ginatos, ukon linibo pa gani nga nagapanilag sa iya. (Ipaanggid ang Salmo 26:12.) Importante gid ang paghupot sing integridad sa sina nga mga tion, kay ang hari kinahanglan magpakita sing maayo nga halimbawa sa katawhan. (Deut. 17:18, 19) Apang, nahibaluan ni David nga bisan nagaisahanon sia​—‘sa sulod sang iya balay’—​kinahanglan gihapon sia maglakat sa dalanon sang integridad. Ano ang aton matun-an sa sini?

⁶ Sa Salmo 101:3 (NW), mabasa naton ang pinamulong ni David: “Indi ako magbutang sa atubangan sang akon mga mata sing butang nga walay pulos.” Madamo sing kahigayunan sa karon nga mahimo mabutang sa atubangan sang aton mga mata ang mga butang nga wala sing pulos, ilabi na kon nagaisahanon lamang kita. Madamo sa mga nagagamit sang Internet ang nagaatubang sing hangkat. Madali lang ang isa mahaylo nga magtan-aw sing di-nagakaigo, ukon pornograpiko pa gani nga materyal. Apang, ang pagtan-aw bala sang pornograpiya isa ka buhat sang pagkamatinumanon sa Dios? Ang pornograpiya makahalalit, kay nagapukaw ini sing sayop kag makagod nga mga handum, nagahalit sa konsiensia, nagaguba sang pag-asawahay, kag nagapakanubo sa kada isa nga nadalahig.​—Hulu. 4:23; 2 Cor. 7:1; 1 Tes. 4:3-5.

7. Ano nga prinsipio ang makabulig sa aton nga mahuptan ang aton integridad kon nagaisahanon kita?

⁷ Sa pagkamatuod, ang mga alagad ni Jehova wala gid nagaisahanon. Mahigugmaon nga nagatan-aw sa aton ang aton Amay. (Basaha ang Salmo 11:4.) Nahamuot gid si Jehova kon makita niya nga ginabatuan mo ang pagsulay! Sa paghimo sina, ginapamatian mo ang paandam nga ginapahangop sang mga pulong ni Jesus nga makita sa Mateo 5:28. Gani, mangin determinado nga indi magtan-aw sa mga laragway nga magasulay sa imo sa paghimo sing malain. Indi pag-ibaylo ang imo hamili nga integridad sa makahuluya nga buhat nga pagtan-aw ukon pagbasa sang pornograpiya!

8, 9. (a) Ano nga hangkat sa integridad ang naatubang ni Daniel kag sang iya mga kaupdanan? (b) Paano mapahalipay sang mga pamatan-on nga Cristiano sa karon si Jehova kag ang ila mga masigka-Cristiano?

⁸ Mangin mga tawo man kita nga nagapakita sing integridad paagi sa pagtuman kay Jehova kon kaupod naton ang mga di-tumuluo. Dumduma si Daniel  kag ang iya tatlo ka kaupdanan. Gindala sila nga bihag sa Babilonia sang pamatan-on pa sila. Ginpalibutan sila didto sang mga di-tumuluo nga may diutay lang nga nahibaluan ukon wala gid gani makakilala kay Jehova. Ginpilit ining apat ka Hebreo nga magkaon sing pagkaon nga gindumilian sang Kasuguan sang Dios. Mahimo mahapos lang kuntani mangatarungan ining mga lalaki nga magkompromiso kay wala man didto ang ila mga ginikanan, mga hamtong nga Judiyo, kag mga saserdote. Gani indi man mahibaluan kon ano ang ila himuon. Sin-o lang ang makahibalo? Si Jehova. Bangod sini, nagtindog sila sing malig-on kag nagtuman walay sapayan sang pag-ipit kag katalagman.​—Dan. 1:3-9.

⁹ Sa bug-os nga kalibutan, ang mga pamatan-on nga Saksi ni Jehova malig-on man nga nagapanindugan sa talaksan sang Dios para sa mga Cristiano kag wala nagapadala sa makahalalit nga pag-ipit sang mga katubotubo. Kon isa ikaw ka pamatan-on, ginatuman mo si Jehova kon nagalikaw ka sa droga, kasingki, pagpamuyayaw, imoralidad, kag iban pa nga sayop nga mga buhat. Sa paghimo sini, mahuptan mo ang imo integridad. Makahatag ini sa imo sing benepisyo, kag mapahalipay mo si Jehova kag ang imo mga masigka-Cristiano!​—Sal. 110:3.

10. (a) Ano nga sayop nga pagtamod sa pagpakighilawas ang nagdul-ong sa pila ka pamatan-on nga ikompromiso ang ila integridad? (b) Paano ang aton integridad makabulig sa aton nga maggawi sing nagakaigo kag malikawan ang pagpakighilawas?

¹⁰ Kinahanglan man naton mangin matinumanon kon nagapakig-angot sa tuhay nga sekso. Nahibaluan naton nga ginadumilian sang Pulong sang Dios ang pagpakighilawas. Kon indi kita maghalong, ang aton matinumanon nga panimuot mahimo mangin matinuguton. Halimbawa, ang pila ka pamatan-on nagahimo sing oral ukon anal sex ukon nagahimasay sang kinatawo, kag nagarason sila nga ining mga buhat indi gid man malain kay wala man sila direkta nga “nagapakigsekso.” Ginakalimtan sini nga mga pamatan-on​—ukon mahimo nga hungod nga wala nila ginasapak—​nga ang tinaga sa Biblia para sa pagpakighilawas nagalakip sina tanan nga buhat sang sayop nga paggawi nga mahimo bangdan nga ma-disfellowship ang isa ka Cristiano. * Ang malain pa kay wala nila ginpabaloran ang ila integridad. Bangod ginatinguhaan naton nga mahuptan ang aton integridad, wala kita nagapangita sing balibad sa paghimo sing malain. Indi kita dapat magpensar nga puede kita makahimo sing sala basta indi lang mabug-at nga takus sa pagdisiplina. Indi kita dapat magkonsentrar lamang sa hudisyal nga disiplina nga mahimo naton mabaton. Sa baylo, dapat magkonsentrar kita sa paghimo sang mga butang nga makapahamuot kay Jehova kag likawan ang mga butang nga makapasaklaw sa iya balatyagon. Sa baylo nga magpalapit sa sala, magpalayo kita sa sini kag ‘magpalagyo gikan sa pagpakighilawas.’ (1 Cor. 6:18) Sa amo, mapakita naton nga mga tawo kita nga may tunay nga integridad.

Paano Naton Mahuptan ang Aton Integridad?

11. Ngaa importante ang tagsa ka buhat sang pagkamatinumanon? Iilustrar.

¹¹ Matukod naton ang aton integridad paagi sa pagkamatinumanon, kag mahuptan naton ini  kon padayon kita nga mangin matinumanon. Ang isa ka buhat sang pagkamatinumanon daw indi importante kag daw isa lang ka diutay nga butang. Apang, inang mga buhat sang pagkamatinumanon nagadugang sa pagligad sang panahon. Sa pag-ilustrar: Ang isa ka hollow block daw indi importante, apang kon mahinalungon naton nga tangkas-tangkason ang madamo nga hollow block, makatukod kita sing isa ka matahom nga balay. Gani paagi sa aton padayon nga pagkamatinumanon, mahuptan naton ang aton integridad.​—Luc. 16:10.

12. Paano nagpahamtang si David sing halimbawa sa paghupot sing integridad sa pag-atubang sang pagmaltrato kag inhustisya?

¹² Ang aton integridad labi nga mapadayag kon nagaatubang kita sing mga kabudlayan, pagmaltrato, ukon inhustisya. Binagbinaga ang halimbawa ni David sa Biblia. Subong isa ka pamatan-on, nagbatas sia sang paghingabot sang isa ka hari nga amo dapat ang magrepresentar sa awtoridad ni Jehova. Apang, nadula ni Hari Saul ang kahamuot ni Jehova kag nahisa gid sia kay David nga amo ang nahamut-an sang Dios. Pero, nagpabilin si Saul sa iya posisyon sing pila ka tion kag gingamit pa niya ang hangaway sang Israel sa paglagas kag sa paghingabot kay David. Gintugutan ni Jehova nga magpadayon ining inhustisya sing pila ka tuig. Naakig bala si David sa Dios? Naghunahuna bala sia nga wala sing pulos ang pagbatas? Wala gid. Ginhuptan niya ang iya tudok nga pagtahod sa posisyon ni Saul subong hinaplas sang Dios, kag wala sia magtimalos kay Saul bisan may kahigayunan na kuntani sia.​—1 Sam. 24:2-7.

13. Paano naton mahuptan ang aton integridad kon may nakasala ukon nakasaklaw sa aton?

¹³ Isa gid ka maayo nga halimbawa si David para sa aton karon! Bahin kita sang bug-os kalibutan nga kongregasyon sang di-himpit nga mga tawo, kag ang bisan sin-o mahimo makasala sa aton ukon magbiya pa gani sa kamatuoran. Sa pagkamatuod, nalipay kita nga magkabuhi sa tion nga ang katawhan ni Jehova indi na mangin malaut. (Isa. 54:17) Pero, ano ang himuon naton kon ang isa makasaklaw sa aton? Kon may aligutgot kita sa aton masigkatumuluo, mahimo mahalitan sini ang aton integridad sa Dios. Indi naton pagtugutan ang paggawi sang iban nga mangin kabangdanan nga magbugnaw ang aton kaangtanan sa Dios ukon biyaan ang aton matutom nga dalanon. (Sal. 119:165) Kon nagabatas kita sa pag-atubang sang mga pagtilaw, mabuligan kita sini nga mahuptan ang aton integridad.

14. Paano ginabaton sang mga nagahupot sing integridad ang mga pagbag-o sa organisasyon kag sa mga panudlo sang Biblia?

¹⁴ Mahuptan man naton ang aton integridad kon likawan naton nga mangin palapangita sing sala ukon mangin mamulayon. Huo, nagakahulugan ina nga mangin mainunungon kita kay Jehova. Ginapakamaayo niya ang iya mga katawhan ilabi na gid karon. Sa bug-os nga maragtas, subong pa lang nabayaw sing tuman kataas ang putli nga pagsimba. (Isa. 2:2-4) Kon may mga pagbag-o sa pagpaathag sa mga teksto sa Biblia ukon mga pagbag-o sa mga kahimusan, luyag naton ini batunon. Nalipay kita nga masaksihan ang padayon nga pagsilak sang espirituwal nga kapawa. (Hulu. 4:18) Kon nabudlayan kita sa paghangop sa isa ka pagbag-o, mangayo kita sing bulig kay Jehova agod mahangpan ini, samtang nagapabilin kita nga matutom kag ginahuptan ang aton integridad.

 Ano ang Dapat Himuon sang Isa Kon Wala Niya Nahuptan ang Iya Integridad?

15. Sin-o lamang ang makakuha sang imo integridad?

¹⁵ Ina nga pamangkot makapahunahuna gid, indi bala? Subong sang natun-an naton sa nagligad nga artikulo, importante gid ang integridad. Kon wala ini, wala kita sing kaangtanan kay Jehova kag wala sing matuod nga paglaum. Dumduma ini: May isa lamang ka persona sa uniberso nga makakuha sang imo integridad. Ina nga persona ikaw mismo. Ini nga kamatuoran nahangpan gid ni Job. Nagsiling sia: “Tubtub nga mapatay ako indi ko pag-isikway gikan sa akon ang akon pagkatadlong [integridad, NW]!” (Job 27:5) Kon amo man sini ang imo determinasyon kag kon magpabilin ka nga suod kay Jehova, magabulig ini sa imo agod mahuptan mo ang imo integridad.​—Sant. 4:8.

16, 17. (a) Kon nakahimo sing serioso nga sala ang isa ka tawo, ano ang indi niya dapat paghimuon? (b) Ano ang dapat niya himuon?

¹⁶ Apang, ang pila napaslawan sa paghupot sang ila integridad. Subong sang natabo sang yari pa ang mga apostoles, ang pila ka Cristiano sa karon padayon nga nagahimo sing serioso nga mga sala. Kon amo sina ang imo kahimtangan, may paglaum pa bala? Huo. Ano ang puede mo himuon? Binagbinagon naton anay ang indi dapat paghimuon. Ang tawo may huyog nga taguon ang iya sala sa iya mga ginikanan, masigkatumuluo, ukon sa mga gulang. Apang, ginapahanumdom kita sang Biblia: “Ang nagatabon sang iya mga paglalis indi mag-uswag, apang ang bisan sin-o nga nagatu-ad kag nagabiya magaagum sing kalooy.” (Hulu. 28:13) Ang mga nagatinguha sa pagtabon sang sala nagahimo sing makahalanusbo nga sayop, kay wala kita sing matago sa Dios. (Basaha ang Hebreo 4:13.) Ang iban nagakabuhi sing doble-kara, nagapakunokuno nga nagaalagad kay Jehova samtang padayon nga nagahimo sing serioso nga sala. Ina nga mga tawo wala sing integridad. Wala si Jehova nahamuot sa pagsimba sang mga tawo nga nagatago sing mabug-at nga mga sala. Sa baylo, ina nga pagkasalimpapaw nagapaakig sa iya.​—Hulu. 21:27; Isa. 1:11-16.

¹⁷ Kon ang isa ka Cristiano nakahimo sing serioso nga sala, may maathag nga panuytoy ang Biblia. Tion ini nga mangayo sia sing bulig sa Cristianong mga gulang. Nagtangdo si Jehova sing mga gulang agod buligan yadtong nagamasakit sing malala sa espirituwal. (Basaha ang Santiago 5:14.) Indi pagtuguti ang posible nga disiplina ukon pagtadlong nga mag-upang sa imo sa pagtigayon sing espirituwal nga kapagros. Maalamon bala nga bangod masakit ang indyeksion ukon operasyon, indi na lang pag-ipabulong sang isa ang iya malala nga balatian?​—Heb. 12:11.

18, 19. (a) Paano ginpakita sang halimbawa ni David nga sarang mapasag-uli ang integridad? (b) Ano ang imo determinasyon tuhoy sa imo integridad?

¹⁸ May paglaum pa bala nga mag-ayo sing bug-os? Mapasag-uli pa bala ang nadula nga integridad? Binagbinaga liwat ang halimbawa ni David. Nakahimo sia sing serioso nga sala. Nagtulok sia nga may kaibog sa asawa sang iban nga tawo, nagpanghilahi sia sa sina nga babayi, kag ginpapatay ang bana sini. Daw kabudlay hunahunaon nga mahimo ina ni David, isa ka tawo nga may integridad, indi bala? Wala na bala sing paglaum ang iya kahimtangan? Nagakinahanglan si David sing mabug-at nga disiplina kag nabaton niya ini. Nian, bangod sang iya sinsero nga paghinulsol, ginkaluuyan sia ni Jehova. Nakatuon si David gikan sa disiplina, kag napasag-uli niya ang iya integridad paagi sa padayon nga pagtuman sa Dios kag sa pagbatas. Nangin matuod gid sa kabuhi ni David ang pinamulong sa Hulubaton 24:16: “Ang matarung nga tawo mapukan sing makapito, kag nagabangon liwat.” Ano ang resulta? Binagbinaga ang ginsiling ni Jehova kay Solomon sang napatay na si David. (Basaha ang 1 Hari 9:4.) Gindumdom sang Dios si David subong tawo nga may integridad. Sa pagkamatuod, sarang matinluan ni Jehova ang mga mahinulsulon gikan sa mantsa sang serioso nga pagpakasala.​—Isa. 1:18.

¹⁹ Huo, mangin tawo ikaw nga nagapakita sing integridad paagi sa mahigugmaon nga pagtuman sa Dios. Hupti ang mainunungon nga pagbatas, kag kon makahimo ka sing serioso nga sala, ipakita ang hanuot nga paghinulsol. Isa gid ka bilidhon nga hiyas ang integridad! Kabay nga ang kada isa sa aton may pareho nga determinasyon ni David: “Magalakat ako nga may integridad.”​—Sal. 26:11, NW.

[Footnote]

Paano Mo Sabton?

• Paano ka mangin tawo nga nagapakita sing integridad?

• Paano mo mahuptan ang imo integridad?

• Paano posible nga mapasag-uli ang integridad?

[Mga Pamangkot sa Pagtinuon]

[Piktyur sa pahina 8]

“MAAYO GID ANG IYA GINHIMO”

Ginsiling ina sang isa ka babayi nga nagabusong sing lima ka bulan bangod sa kaayo kag integridad sang isa ka babayi nga indi niya kilala. Nagkadto sia sa kapehan, kag pila ka oras sang ulihi nga nakahalin na sia, natalupangdan niya nga nabilin didto ang iya kahita. Ang unod sang iya kahita 2,000 ka dolyar, kag mas daku ini nga kantidad sangsa kinaandan nga ginadala niya. “Daw tinakluban ako sang langit,” siling niya sa isa ka lokal nga pamantalaan. Apang, nakita sang isa ka pamatan-on nga babayi ang kahita kag ginpangita niya gilayon ang tag-iya sini. Sang wala niya makita ang tag-iya, gindala niya ang kahita sa estasyon sang pulis, kag sang ulihi nahibaluan sang pulis nga ang tag-iya sini amo ang nagabusong nga babayi. “Maayo gid ang iya ginhimo,” siling sang mapinasalamaton nga tag-iya sang kahita. Ngaa nanikasog gid ang pamatan-on nga babayi nga iuli ang kuarta? Suno sa artikulo sang isa ka pamantalaan, bilang isa sang mga Saksi ni Jehova, “ginpakita niya ina nga integridad bangod sa relihion nga iya gindak-an.”

[Piktyur sa pahina 9]

Sarang mahuptan sang mga pamatan-on ang ila integridad kon ginatilawan sila

[Piktyur sa pahina 10]

Napaslawan si David sa paghupot sang iya integridad, apang napasag-uli niya ini