Ang Alagad ni Jehova—“Ginpilas Tungud sang Aton mga Paglalis”

“Sia ginpilas tungud sang aton mga paglalis, ginhanog sia tungud sa aton mga kalautan; . . . kag sa iya mga labud ginaayo kita.”—ISA. 53:5.

1. Ano ang dapat naton dumdumon kon nagasaulog kita sang Memoryal, kag ano nga tagna ang makabulig sa aton nga himuon ini?

GINASAULOG naton ang Memoryal agod dumdumon ang kamatayon ni Cristo kag pamalandungan kon ano ang nahimo sang iya kamatayon kag pagkabanhaw. Ang Memoryal nagapahanumdom sa aton sang pagbindikar sang pagkasoberano ni Jehova, sang pagpakabalaan sang iya ngalan, kag sang katumanan sang iya katuyuan, lakip ang kaluwasan sang katawhan. Ayhan wala na sing mas maathag pa nga tagna nga nagapakita tuhoy sa paghalad ni Cristo kag kon ano ang nahimo sini sangsa ginrekord sa Isaias 53:3-12. Gintagna ni Isaias ang pag-antos sang Alagad kag nag-aman sing espesipiko nga mga detalye tuhoy sa kamatayon ni Cristo. Gintagna man niya ang mga pagkamaayo nga maagom sang iya hinaplas nga mga kauturan kag sang “iban nga mga karnero” bangod sa iya kamatayon.—Juan 10:16.

2. Ano ang ginapamatud-an sang tagna ni Isaias, kag ano ang epekto sini sa aton?

² Pito ka gatos ka tuig antes matawo si Jesus sa duta, gin-inspirar ni Jehova si Isaias nga magtagna nga ang Iya pinili nga Alagad mangin matutom bisan sa idalom sang daku nga pagtilaw. Ginapamatud-an sini ang bug-os  nga pagsalig ni Jehova sa katutom sang iya Anak. Samtang ginausisa naton ini nga tagna, mapuno sang pagpasalamat ang aton mga tagipusuon kag mapalig-on ang aton pagtuo.

“Gintamay” kag Wala “Pagpakamahala”

3. Ngaa dapat kuntani abiabihon sang mga Judiyo si Jesus, apang paano nila sia ginbaton?

³ Basaha ang Isaias 53:3. Handurawa lamang kon ano ang ginabatyag sang bugtong nga Anak sang Dios nga isikway niya ang kalipay sa pag-alagad sa luyo sang iya Amay kag magkadto sa duta agod ihalad ang iya kabuhi para luwason ang katawhan gikan sa sala kag kamatayon! (Fil. 2:5-8) Paagi sa iya halad, matigayon ang bug-os nga kapatawaran sang sala nga ginlandungan sang paghalad sang mga sapat sa Mosaikong Kasuguan. (Heb. 10:1-4) Indi bala nga dapat sia kuntani abiabihon kag padunggan bisan sang mga Judiyo na lang nga nagahulat sa ginsaad nga Mesias? (Juan 6:14) Sa baylo, subong sang gintagna ni Isaias, “gintamay” si Cristo sang mga Judiyo, kag ‘wala sia nila pagpakamahala.’ Si apostol Juan nagsulat: “Nag-abot sia sa iya kaugalingon nga lugar, apang wala sia ginbaton sang iya kaugalingon nga katawhan.” (Juan 1:11) Si apostol Pedro nagsiling sa mga Judiyo: “Ang Dios sang aton mga katigulangan, naghimaya sa iya Alagad nga si Jesus nga gintugyan ninyo kag ginpanghiwala sa atubangan ni Pilato, sang namat-od si Pilato nga buy-an sia. Huo, ginpanghiwala ninyo ang isa nga balaan kag matarong.”—Binu. 3:13, 14.

4. Paano si Jesus naanad sa kasakitan?

⁴ Gintagna man ni Isaias nga si Jesus gintuyo nga “naanad sa kasakitan.” [Biblia sang Katilingban sang mga Kristiano] Sa iya ministeryo, ginkapoy gid man si Jesus, apang wala sia magbalatian. (Juan 4:6) Apang naanad sia sa kasakitan sadtong iya ginabantalaan. Naluoy sia sa ila kag madamo ang iya gin-ayo. (Mar. 1:32-34) Sa amo gintuman ni Jesus ang tagna nga nagasiling: “Sa pagkamatuud ginpas-an niya ang aton mga kalisud kag gindala ang aton mga kasubo.”—Isa. 53:4a; Mat. 8:16, 17.

Daw “Ginbunal sang Dios”

5. Ano ang pagtamod sang mga Judiyo sa kamatayon ni Jesus, kag ngaa nagdugang ini sa iya pag-antos?

⁵ Basaha ang Isaias 53:4b. Madamo sang kadungan ni Jesus ang wala makahangop kon ngaa magaantos sia kag mapatay. Nagapati sila nga ginasilutan sia sang Dios kag ginpatapikan sang makangilil-ad nga balatian. (Mat. 27: 38-44) Ginsumbong sang mga Judiyo si Jesus nga manugpasipala. (Mar. 14:61-64; Juan 10:33) Sa pagkamatuod, si Jesus indi makasasala ukon manugpasipala. Apang bangod sang iya daku nga gugma sa iya Amay, mahimo nga nadugangan pa gid ang pag-antos niya subong Alagad ni Jehova bangod nahibaluan niya nga patyon sia sa panumbungon nga pagpasipala. Bisan pa sini, handa si Jesus nga magpasakop sa kabubut-on ni Jehova.—Mat. 26:39.

6, 7. Sa ano nga kahulugan nga si Jehova ‘nahamuot sa paghanog’ sa iya matutom nga Alagad?

⁶ Indi katingalahan kon magtagna si Isaias nga nagapati ang iban nga “ginbunal sang Dios” si Cristo apang mahimo makapakibot gid kon ang tagna magsiling: “Nahamut-an sang GINOO ang paghanog sa iya.” (Isa. 53:10) Apang paano si Jehova ‘nahamuot sa paghanog sa iya’ sanglit nagsiling man Sia: “Yari karon ang akon alagad, . . . ang akon pinili, nga sa iya ang akon kalag nagakalipay”? (Isa. 42:1) Sa ano nga kahulugan nga nalipay sa sini si Jehova?

⁷ Agod mahangpan naton ini nga bahin sang tagna, dapat naton dumdumon nga sang ginhangkat  ni Satanas ang pagkasoberano ni Jehova, ginduhaduhaan niya ang katutom sang tanan nga alagad sang Dios sa langit kag duta. (Job 1:9-11; 2:3-5) Nag-aman si Jesus sang himpit nga sabat sa hangkat ni Satanas paagi sa pagpabilin nga matutom tubtob sa kamatayon. Sa amo, samtang gintugutan ni Jehova si Cristo nga patyon sang iya mga kaaway, wala sing duhaduha nga nag-antos si Jehova samtang ginatan-aw niya ang pagpatay sa iya pinili nga Alagad. Apang, nalipay gid si Jehova nga makita ang katutom sang iya Anak. (Hulu. 27:11) Dugang pa, nalipay pa gid si Jehova bangod sa mga benepisyo nga matigayon sang mga mahinulsulon nga mga tawo tungod sa kamatayon sang iya Anak.—Luc. 15:7.

“Ginpilas Tungud sang Aton mga Paglalis”

8, 9. (a) Paano si Jesus “ginpilas tungud sang aton mga paglalis”? (b) Paano ini ginpalig-on ni Pedro?

⁸ Basaha ang Isaias 53:6. Kaangay sang nadula nga karnero, nagdalangdalang ang makasasala nga katawhan, nga nagapangita sang kaluwasan gikan sa balatian kag kamatayon nga napanubli nila kay Adan. (1 Ped. 2:25) Wala sing kaliwat ni Adan ang makatubos liwat sang nadula sini bangod dili himpit sila. (Sal. 49:7) Apang bangod sa daku nga gugma ni Jehova, ‘ginpapas-an niya ang kalautan naton tanan’ sa iya pinalangga nga Anak kag pinili nga Alagad. Paagi sa pagpasugot nga ‘pilason tungod sang aton mga paglalis’ kag ‘hanugon tungod sa aton mga kalautan,’ ginpas-an ni Cristo ang aton mga sala sa usok kag napatay tungod sa aton.

⁹ Si apostol Pedro nagsulat: “Gintawag kamo sa sini nga dalanon, bangod si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing maayo ang iya mga tikang. Gindala niya mismo sa usok ang aton mga sala sa iya kaugalingon nga lawas, agod mangin wala na kita sa mga sala kag magkabuhi sa pagkamatarong.” Nian nagakutlo sa tagna ni Isaias, si Pedro nagdugang: “Kag ‘paagi sa iya mga pilas nag-ayo kamo.’” (1 Ped. 2:21, 24; Isa. 53:5) Ini nagbukas sing dalan agod mapasag-uli ang mga makasasala sa Dios, subong sang ginsiling pa gid ni Pedro: “Si Cristo mismo napatay sing makaisa gid lang may kaangtanan sa mga sala, isa ka matarong nga tawo para sa mga di-matarong, agod madul-ong niya kamo sa Dios.”—1 Ped. 3:18.

“Subong sang Cordero nga Ginadul-ong sa Ihawan”

10. (a) Paano ginlaragway ni Juan Bautista si Jesus? (b) Ngaa sibu gid ang mga pinamulong ni Juan?

¹⁰ Basaha ang Isaias 53:7, 8. Si Juan Bautista nagtuaw samtang nagapalapit si Jesus: “Tan-awa, ang Kordero sang Dios nga nagakuha sang sala sang kalibutan!” (Juan 1:29) Sang ginpatuhuyan niya si Jesus subong ang Kordero, ginahunahuna ni Juan ang mga pinamulong ni Isaias: “[Gindala sia] subong sang cordero nga ginadul-ong sa ihawan.” (Isa. 53:7) “Gin-ula niya ang iya kalag tubtub sa kamatayon,” tagna ni Isaias. (Isa. 53:12) Sing makawiwili, sa gab-i nga ginsugdan ni Jesus ang Memoryal sang iya kamatayon, ginhatag niya ang isa ka kopa sang alak sa iya 11 ka matutom nga mga apostoles kag nagsiling: “Ini nagakahulugan sang akon ‘dugo sang katipan,’ nga ibubo para sa madamo sa kapatawaran sang mga sala.”—Mat. 26:28.

11, 12. (a) Ano ang ginailustrar sang kahanda ni Isaac nga ihalad tuhoy sa paghalad ni Cristo? (b) Ano dapat ang aton dumdumon tuhoy sa Daku nga Abraham, si Jehova, kon nagasaulog kita sang Memoryal?

¹¹ Kaangay ni Isaac sadto, handa si Jesus nga ihalad sa halaran kon kabubut-on ni Jehova. (Gen. 22:1, 2, 9-13; Heb. 10:5-10) Bisan kinabubut-on nga nagpasugot si Isaac nga ihalad, si Abraham gid ang nanikasog nga maghalad. (Heb. 11:17) Sing kaanggid, kinabubut-on nga ginbaton ni Jesus nga mapatay, apang si Jehova amo ang Awtor sang kahimusan sa paggawad. Ang halad sang iya Anak nagapabutyag sang madalom nga gugma sang Dios sa katawhan.

¹² Si Jesus mismo nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Si apostol Pablo nagsulat: “Ginarekomendar sang Dios ang iya mismo gugma sa aton amo nga samtang mga makasasala pa kita, si Cristo napatay para sa aton.” (Roma 5:8) Busa, samtang  ginapadunggan si Cristo paagi sa pagdumdom sang iya kamatayon, indi naton dapat pagkalimtan nga ang naghimo sing kahimusan sa paghalad amo ang Daku nga Abraham, si Jehova. Ginasaulog naton ang Memoryal para sa iya kadayawan.

Ang Alagad “Magapakamatarung sing Madamu”

13, 14. Paano “magapakamatarung sing madamu” ang Alagad ni Jehova?

¹³ Basaha ang Isaias 53:11, 12. Tuhoy sa iya pinili nga Alagad, si Jehova nagsiling: “Ang akon matarung nga alagad, magapakamatarung sing madamu.” Sa ano nga paagi? Ang katapusan nga bahin sang bersikulo 12 nagahatag sa aton sang ideya. “Kag nagatabang [ang alagad] tungud sa mga malalison.” Ang tanan nga kaliwatan ni Adan natawo nga may sala, “malalison,” kag busa nakabaton sing “bayad nga ginabayad sang sala,” nga amo ang kamatayon. (Roma 5:12; 6:23) Kinahanglan nga makapasag-uli ang makasasala nga tawo kay Jehova. Ginalaragway sing maayo sang tagna ni Isaias sa kapitulo 53 kon paano si Jesus “nagatabang,” ukon nagapatunga, tungod sa makasasala nga katawhan, nga nagasiling: “Ang silot sang aton paghidait yara sa iya, kag sa iya mga labud ginaayo kita.”—Isa. 53:5.

¹⁴ Paagi sa pagkuha ni Cristo sang aton mga sala kag pagkapatay tungod sa aton, ‘ginpakamatarong niya ang madamo.’ Si Pablo nagsulat: “Nakita sang Dios nga maayo nga ang tanan nga butang magpuyo sa iya [si Cristo] sing bug-os, kag paagi sa iya ipasag-uli sang Dios sa Iya kaugalingon ang tanan iban pa nga butang paagi sa pagpaluntad sing paghidait paagi sa dugo nga ginpatulo niya sa usok sang pag-antos, ini man mga butang sa duta ukon mga butang sa langit.”—Col. 1:19, 20.

15. (a) Sin-o ang “mga butang sa langit” nga ginsambit ni Pablo? (b) Sin-o lamang ang may kinamatarong nga makapakig-ambit sa mga emblema sa Memoryal, kag ngaa?

¹⁵ Ang “mga butang sa langit” nga napasag-uli kay Jehova paagi sa ginpatulo nga dugo ni Cristo amo ang hinaplas nga mga Cristiano, nga gintawag agod maghari kaupod ni Cristo sa langit. Ang mga Cristiano nga “umalambit sa langitnon nga pagtawag” ginapahayag nga “matarong . . . para sa kabuhi.” (Heb. 3:1; Roma 5:1, 18) Dayon ginbaton sila ni Jehova subong espirituwal nga mga anak. Ang balaan nga espiritu nagapanaksi sa ila nga sila “kaupod nga mga manunubli ni Cristo,” gintawag agod mangin mga hari kag mga saserdote sa iya langitnon nga Ginharian. (Roma 8:15-17; Bug. 5:9, 10) Nangin bahin sila sang espirituwal nga Israel, “ang Israel sang Dios,” kag ginlakip sila sa “bag-ong katipan.” (Jer. 31:31-34; Gal. 6:16) Subong katapo sang bag-ong katipan, may kinamatarong sila nga makig-ambit sa mga emblema sang Memoryal, lakip ang kopa sang pula nga alak, diin si Jesus nagsiling: “Ini nga kopa nagakahulugan sang bag-o nga katipan pasad sa akon dugo, nga ibubo para sa inyo.”—Luc. 22:20.

16. Ano ang “mga butang sa duta,” kag sa ano nga paagi ginhatagan sila sing matarong nga tindog sa atubangan ni Jehova?

¹⁶ Ang “mga butang sa duta” amo ang iban nga mga karnero ni Cristo, nga may paglaum nga mabuhi sing dayon sa duta. Nakatigayon man sila sing matarong nga tindog kay Jehova bangod sa pinili nga Alagad ni Jehova. Bangod nagatuo sila sa halad gawad ni Cristo kag “ginlabhan nila ang ila malaba nga mga panapton kag ginpaputi ini sa dugo sang Kordero,” ginpahayag sila ni Jehova  nga matarong, indi subong espirituwal nga mga anak, kundi subong iya mga abyan, kag ginhatagan niya sila sing dalayawon nga palaabuton nga may paglaum nga makalampuwas sa “dakung kapipit-an.” (Bug. 7:9, 10, 14; Sant. 2:23) Bangod indi bahin sang bag-ong katipan kag wala sing paglaum nga mabuhi sa langit, ining iban nga mga karnero wala nagapakig-ambit sa mga emblema sang Memoryal kundi nagatambong subong matinahuron nga mga tumalan-aw.

Salamat kay Jehova kag sa Iya Nahamut-an nga Alagad!

17. Paano ang pagtuon sang mga tagna ni Isaias nga nasentro sa Alagad nagabulig sa aton nga mangin handa para sa Memoryal?

¹⁷ Ang pag-usisa sang mga tagna ni Isaias tuhoy sa Alagad isa ka maayo nga paagi agod mahanda kita sa Memoryal sang kamatayon ni Cristo. Nagabulig ini sa aton nga ‘magtulok sing maayo sa Pangulo nga Ahente kag Manughimpit sang aton pagtuo.’ (Heb. 12:2) Natun-an naton nga indi rebelyuso ang Anak sang Dios. Indi kaangay ni Satanas, nalipay sia nga tudluan ni Jehova kag nagakilala sa iya subong ang Soberanong Ginuo. Natun-an naton nga sang yari si Jesus sa duta, nagpakita sia sing kaawa sa mga tawo nga iya ginbantalaan kag gin-ayo sila sa pisikal kag espirituwal. Sa amo ginpakita niya kon ano ang iya himuon subong Mesianikong Hari sa bag-ong sistema sang mga butang kon ‘magpahamtang sia sing katarungan sa duta.’ (Isa. 42:4) Ang kakugi niya sa pagbantala sang Ginharian, subong “kapawa sa mga Gentil,” isa ka pahanumdom sa iya mga sumulunod nga dapat magbantala sing makugi sang maayong balita sa bug-os nga duta.—Isa. 42:6.

18. Ngaa ginapuno sang tagna ni Isaias ang aton tagipusuon sang pagpasalamat kay Jehova kag sa iya matutom nga Alagad?

¹⁸ Ang tagna ni Isaias nagapadalom man sang aton paghangop sa daku nga sakripisyo ni Jehova sang ginpadala niya ang iya pinalangga nga Anak sa duta agod mag-antos kag mapatay para sa aton. Nalipay si Jehova, indi bangod sa pag-antos sang iya Anak, kundi bangod nakita niya ang katutom ni Jesus tubtob sa kamatayon. Dapat man kita magkalipay kasubong ni Jehova, nga nagakilala sang tanan nga ginhimo ni Jesus agod pamatud-an nga butigon si Satanas kag agod pakabalaanon ang ngalan ni Jehova, sa amo nagabindikar sang Iya kinamatarong subong soberano. Dugang pa, ginkuha ni Cristo ang aton mga sala kag napatay tungod sa aton. Sa sining paagi, ginpaposible niya nga makatigayon sing matarong nga tindog sa atubangan ni Jehova ang diutay nga panong sang iya hinaplas nga mga kauturan kag ang iban nga mga karnero. Samtang nagatipon kita sa Memoryal, kabay nga mapuno sing pagpasalamat ang aton tagipusuon kay Jehova kag sa iya matutom nga Alagad.

Bilang Pagrepaso

• Sa ano nga kahulugan nga si Jehova ‘nahamuot sa paghanog’ sa iya Anak?

• Paano si Jesus “ginpilas tungud sang aton mga paglalis”?

• Paano ang Alagad “magapakamatarung sing madamu”?

• Paano nahanda ang imo hunahuna kag tagipusuon sa Memoryal paagi sa pagtuon sang mga tagna tuhoy sa Alagad?

[Mga Pamangkot sa Pagtinuon]

[Retrato sa pahina 26]

“Gintamay sia kag wala naton sia pagpakamahala”

[Retrato sa pahina 28]

“Gin-ula niya ang iya kalag tubtub sa kamatayon”

[Retrato sa pahina 29]

Ang “iban nga mga karnero” nagatambong sa Memoryal subong matinahuron nga mga tumalan-aw