“Ini Amo ang Dalan, Lakat Kamo sa Sini”

Ang Sugilanon Ni Emilia Pederson

Nga Ginsugid ni Ruth E. Pappas

ANG akon iloy nga si Emilia Pederson natawo sang 1878. Isa sia ka maestra, apang luyag gid niya nga buligan ang mga tawo nga mangin suod sa Dios. Gani nagbakal sia sing daku nga maleta agod sudlan sang iya mga gamit kay gusto niya nga mangin misyonera sa China. Apang sang napatay ang iya iloy, wala madayon ang iya plano kay kinahanglan niya nga atipanon ang iya mga manghod. Sang 1907, ginpamana niya si Theodore Holien. Natawo ako sang Disiembre 2, 1925—ang kinagot sa pito ka kabataan. Nagapuyo kami sa isa ka gamay nga banwa sang Jasper, Minnesota, U.S.A.

Madamo gid sing pamangkot si Nanay tuhoy sa Biblia. Ang isa amo ang tuhoy sa impierno—kon bala isa ini ka kalayuhon nga duog para sa malauton. Ginpamangkot niya ang isa ka nagaduaw nga superbisor sang Lutheran Church kon diin sa Biblia mabasa ini nga panudlo. Apang, nagsiling ang superbisor nga indi na importante kon ano ang ginasiling sang Biblia—ang impierno kinahanglan nga itudlo sa mga tawo.

Napun-an ang Iya Espirituwal nga Kinahanglanon

Wala madugay pagkatapos sang 1900, nagkadto ang utod ni Nanay nga si Emma sa Northfield, Minnesota agod magtuon sing musika. Nagdayon sia sa balay sang iya maestro nga si Milius Christianson. Ang asawa ni Milius isa ka Estudyante sang Biblia, ang tawag sa mga Saksi ni Jehova sadto. Nagsiling si Emma nga ang iya utod nga babayi palabasa sing Biblia. Wala madugay, ginsulatan sang asawa ni Milius si Nanay kag nalakip sa sini ang sabat sa mga pamangkot ni Nanay tuhoy sa Biblia.

Isa ka adlaw, si Lora Oathout, gikan sa Sioux Falls, South Dakota nagkadto sa Jasper agod magbantala. Gintun-an ni Nanay ang mga literatura nga ginhatag ni Lora. Sang 1915, ginpaambit man niya sa iban ang mga literatura nga ginhatag sa iya.

Sang 1916, nabatian ni Nanay nga matambong si Charles Taze Russell sa kombension sa siudad sang Sioux, Iowa. Gusto niya magtambong. Apang, sa sining tion lima na ang iya bata, kag ang kinagot nga si Marvin, lima pa lang ka bulan. Walay sapayan sini, gindala niya sila tanan. Nagsakay sila sa tren kag nagbiyahe sing mga 160 kilometros pakadto sa siudad sang Sioux agod magtambong sa kombension. Nabatian niya ang pamulongpulong ni Utod Russell, natan-aw man niya ang “Photo-Drama of Creation,” kag nagpabawtismo. Sang magpauli sia, nagsulat sia sing artikulo tuhoy sa kombension nga ginbalhag sa Jasper Journal.

Sang 1922, isa si Nanay sa mga 18,000 nga nagtambong sa kombension sa Cedar Point, Ohio. Pagkatapos sang kombension, wala untat niya nga ginbantala ang Ginharian sang Dios. Ang iya halimbawa nagpalig-on sa amon nga magsabat sa panawagan: “Ini amo ang dalan, lakat kamo sa sini.”—Isa. 30:21.

 Maayo nga mga Resulta sang Pagpanaksi sa Iban

Sang maaga nga bahin sang dekada 1920, nagsaylo ang akon mga ginikanan sa gua sang banwa. Si Tatay may matin-ad nga negosyo kag may daku nga pamilya. Indi gid sia palatuon sa Biblia kaangay ni Nanay, pero ginasakdag niya ang pagbantala nga hilikuton kag ang amon balay nangin dalayunan sang mga nagalakbay nga manugtatap, nga ginatawag nga mga peregrino sadto. Sa masami, kon magpamulongpulong sa balay ang nagalakbay nga manugtatap, nagaginutok sa amon salas, kalan-an, kag kuarto ang mga isa ka gatos ukon kapin pa ka tawo.

Sang mga pito ako ka tuig, gintawgan kami sang akon tiya nga si Lettie nga ang iya kaingod nga si Ed Larson kag ang asawa sini luyag magtuon sa Biblia. Ginbaton dayon sang mag-asawa nga Larson ang kamatuoran kag sang ulihi gin-agda man nila nga mag-upod sa pagtuon sa Biblia ang ila kaingod nga si Martha Van Daalen, isa ka iloy nga may walo ka bata. Si Martha kag ang iya bug-os nga pamilya nangin mga Estudyante sang Biblia. *

Sa amo man nga tion, nag-obra kay Tatay si Gordon Kammerud, isa ka pamatan-on nga lalaki nga nagapuyo mga pila ka kilometro gikan sa amon. May nagpaandam kay Gordon: “Maghalong ka sa mga bata nga babayi sang aton amo. Daw katingalahan na sang ila relihion.” Apang, nagtuon si Gordon sa Biblia kag wala madugay kumbinsido sia nga nasapwan niya ang kamatuoran. Tatlo ka bulan sang ulihi, ginbawtismuhan si Gordon. Nangin mga tumuluo man ang iya mga ginikanan. Gani ang pamilya nga Kammerud kag Van Daalen nangin suod nga mga abyan sang amon pamilya.

Napalig-on sang mga Kombension

Napalig-on gid si Nanay sang kombension sa Cedar Point amo nga gusto gid niya nga tambungan pirme ang tanan nga kombension. Madumduman ko pa nga sang bata ako nagabiyahe kami sing malawig agod tambungan ini nga mga pagtinipon. Indi ko gid malimtan ang kombension sa Columbus, Ohio sang 1931, kay sa sini nga tion ginbaton sang mga Estudyante sang Biblia ang ngalan nga Saksi ni Jehova. (Isa. 43:10-12) Importante man ang kombension sa Washington, D.C. sang 1935, kay didto ginpakilala sa maragtason nga pamulongpulong ang ginhinambitan sang Bugna nga “dakung kadam-an.” (Bug. 7:9) Ang akon utod nga mga babayi nga sanday Lilian kag Eunice nalakip sa kapin sa 800 nga ginbawtismuhan.

Ang amon pamilya nagtambong sa mga kombension sa Columbus, Ohio sang 1937; sa Seattle, Washington sang 1938; kag sa siudad sang New York sang 1939. Sa amon pagbiyahe pakadto sa kombension nagadulog kami sa dalanon agod magpaligad sang gab-i upod ang pamilya Van Daalen, Kammerud kag iban pa. Sang 1940 ginpamana ni Eunice si Leo Van Daalen kag nagpayunir sila. Sa amo man nga tuig, ginkasal si Lilian kay Gordon Kammerud, kag nagpayunir man sila.

 Pinasahi gid ang kombension sang 1941 sa St. Louis, Missouri. Nakabaton ang linibo ka pamatan-on sang libro nga Children. Daku gid ang epekto sa akon sini nga kombension. Wala madugay pagkatapos sadto, sang Septiembre 1, 1941 nagpayunir kami sang akon magulang nga lalaki nga si Marvin upod sa iya asawa nga si Joyce. Kinse anyos ako sadto.

Bangod mangunguma ang mga pumuluyo sa amon lugar, indi tanan nga utod makatambong sa kombension kay sa masami natuon ini sa tig-alani. Gani, agod makabenepisyo ang wala makatambong, ginarepaso ang mga natun-an sa kombension sa likod sang amon balay. Masadya ini nga mga pagtinipon.

Ang Gilead kag ang Pag-alagad sa Iban nga Pungsod

Sang Pebrero 1943 gintukod ang Gilead School agod hanason ang mga payunir nga mangin misyonero. Lakip sa una nga klase amo ang anom ka katapo sang pamilya Van Daalen—ang mag-ulutod nga sanday Emil, Arthur, Homer, kag Leo; ang ila pakaisa nga si Donald; kag ang akon magulang nga si Eunice nga napangasawa ni Leo. Sang nagpaalam sila, nalipay kami nga daw nasubuan man kay wala kami makahibalo kon san-o naman kami magakitaay liwat. Pagkagradwar nila nga anom, ginpadala sila sa Puerto Rico, nga sadto, mga 12 pa lang ang Saksi.

Pagligad sang isa ka tuig, si Lilian kag si Gordon; subong man si Marvin kag si Joyce nag-eskwela sa ikatlo nga klase sang Gilead. Ginpadala man sila sa Puerto Rico. Nian, sang Septiembre 1944, sa edad nga 18, nag-eskwela ako sa ikap-at nga klase sang Gilead. Pagkagradwar ko sang Pebrero 1945, nag-apas man ako sa akon mga utod sa Puerto Rico. Bag-o gid ini nga eksperiensia para sa akon! Indi mahapos ang pagtuon sing Espanyol. Apang, wala madugay ang pila sa amon may kapin na sa 20 ka pagtuon sa Biblia ang kada isa. Ginpakamaayo ni Jehova ang hilikuton. Karon, mga 25,000 na ang Saksi sa Puerto Rico!

Trahedya sa Amon Pamilya

Sang 1950, sang nabun-ag ang anak nga lalaki ni Leo kag ni Eunice nga si Mark, nagpabilin sila sa Puerto Rico. Sang 1952, nagplano sila nga magpauli kag magbakasyon sa amon mga paryente. Sang Abril 11, nagsakay sila sa eroplano. Apang, wala madugay pa lang nga nakalupad ang eroplano, naaksidente ini sa dagat. Si Leo kag si Eunice napatay gid. Ang ila duha ka tuig nga bata nga lalaki nga si Mark nakita nga nagautaw-utaw sa dagat. Ginpasakay sia sa salbabida kag gintustusan sang isa nga nakaluwas, amo nga nabuhi si Mark. *

Pagligad sang lima ka tuig, sang Marso 7, 1957, sang nagapakadto si Nanay kag si Tatay sa Kingdom Hall, nagkupos ang ruweda sang ila salakyan. Samtang ginaislan ni Tatay ang ruweda sang ila salakyan, nabungguan sia sang awto kag insigida nga napatay. Mga 600 ang nagtambong sa diskurso sa lubong. Maayo gid yadto nga panaksi sa amon mga kasimanwa nga nagatahod gid kay Tatay.

Bag-o nga mga Asaynment

Antes mapatay si Tatay, nakabaton ako sing asaynment nga mag-alagad sa Argentina. Sang Agosto 1957, nag-abot ako sa siudad sang Mendoza sa kunsaran sang Andes Mountains. Sang 1958, si George Pappas nga naggradwar sa ika-30 nga klase sang Gilead gin-asayn sa Argentina. Nangin suod ko nga abyan si George kag sang Abril 1960 ginkasal kami. Sang 1961, napatay si Nanay sa edad nga 83. Naglakat sia sing matutom sa  dalanon sang matuod nga pagsimba kag madamo sia sing nabuligan nga makilala si Jehova.

Sa sulod sang napulo ka tuig nakaupod namon ni George ang iban nga mga misyonero sa lainlain nga puluy-an sang mga misyonero. Nian nangin manugtatap sang sirkito si George sa sulod sang pito ka tuig. Sang 1975, nagbalik kami sa Estados Unidos agod atipanon ang katapo sang amon pamilya nga nagamasakit. Sang 1980 gin-agda kami sa pag-alagad sa sirkito sa nagapamulong sing Espanyol nga teritoryo. May mga 600 ka kongregasyon nga nagapamulong sing Espanyol sadto sa Estados Unidos. Sa sulod sang 26 ka tuig, naduaw namon ang kalabanan sining mga kongregasyon kag nakita namon nga nagdamo ini sing kapin sa 3,000.

Naglakat Sila sa “Dalan” ni Jehova

Nalipay man si Nanay nga makita nga nagsulod sa bug-os tion nga pag-alagad ang iya mga kaapuhan kag kahinablusan. Halimbawa, si Carol nga anak sang amon kamagulangan nga babayi nga si Ester, nagpayunir sang 1953. Napamana niya si Dennis Trumbore kag sugod sadto nangin bug-os tion sila nga alagad. Ang bata nga babayi ni Ester nga si Lois nakapamana kay Wendell Jensen. Nag-eskwela sila sa ika-41 nga klase sang Gilead kag nangin misyonero sa Nigeria sa sulod sang 15 ka tuig. Si Mark nga ang iya mga ginikanan napatay sa aksidente sa eroplano, gin-adoptar sang utod ni Leo nga si Ruth La Londe kag sang iya bana nga si Curtiss. Si Mark kag ang iya asawa nga si Lavonne nagpayunir sa malawig nga tion kag napadaku nila ang ila kabataan sa “dalan” ni Jehova.—Isa. 30:21.

Si Orlen na lang ang buhi ko nga utod kag karon nobentahon na sia. Matutom sia gihapon nga nagaalagad kay Jehova. Kami ni George yara gihapon sa bug-os tion nga pag-alagad.

Ang Handumanan ni Nanay

Yari sa akon ang isa sa hamili nga pagkabutang ni Nanay—ang iya lamesa. Ginregalo ini sang akon amay sa iya sang ginkasal sila. Sa isa sa mga hunoshunos sini, yara ang daan nga scrapbook nga may mga sulat kag mga artikulo sa pamantalaan nga ginsulat niya kag nangin maayo nga panaksi sa Ginharian. Ang iban sini ginsulat sang maaga nga bahin sang dekada 1900. Yari man diri ang hamili nga mga sulat sang mga kabataan ni Nanay nga misyonero. Ginasulitsulit ko gid ini basa! Ang iya mga sulat sa amon makapalig-on gid kag positibo. Wala matuman ang handum ni Nanay nga mangin misyonera. Apang, may espiritu sia sang pagmisyonero nga amo ang nagpahulag sa tagipusuon sang iya mga kabataan kag mga kaapuhan. Nalangkag gid ako nga makita ang akon bug-os nga pamilya lakip na si Nanay kag si Tatay sa paraiso!—Bug. 21:3, 4.

[Mga Nota]

[Retrato sa pahina 17]

Si Emilia Pederson

[Retrato sa pahina 18]

Sang 1916: si Nanay, si Tatay (nagakugos kay Marvin); sa ubos, halin sa wala patuo: sanday Orlen, Ester, Lilian, Mildred

[Retrato sa pahina 19]

Si Leo kag si Eunice, antes sila mapatay

[Retrato sa pahina 20]

Sang 1950: Halin sa wala patuo, sa ibabaw: sanday Ester, Mildred, Lilian, Eunice, Ruth; sa ubos: sanday Orlen, Nanay, Tatay, kag Marvin

[Retrato sa pahina 20]

Si George kag si Ruth Pappas sang 2001, sang nagaalagad sila sa sirkito