Magkalipay sa Paghimo sing Disipulo
Magkalipay sa Paghimo sing Disipulo
“Busa lakat kamo kag maghimo sang mga disipulo.”—MAT. 28:19.
1-3. (a) Ano ang ginabatyag sang madamo tuhoy sa pagdumala sing mga pagtuon sa Biblia? (b) Ano nga mga pamangkot ang binagbinagon naton?
“MAY ginatun-an ako sa Biblia nga isa ka pamilya halin sa Pakistan sa sulod sang 11 ka semana,” sulat sang isa ka utod nga babayi nga nagapangalagad sa nagahambal sing Hindi nga grupo sa Estados Unidos. “Siempre, nangin mag-abyan kami,” padayon niya. “Nakahibi ako sang mahibal-an ko nga manugpauli na sila sa Pakistan, kay indi lamang nga hidlawon ako sa ila kundi nalipay ako nga natudluan ko sila tuhoy kay Jehova.”
2 Kaangay sining utod nga babayi, nalipay ka man bala nga buligan ang iban nga magtuon sa Biblia? Nagkalipay gid si Jesus kag ang iya mga disipulo sang unang siglo sa sini nga hilikuton. Sang nagbalik ang 70 ka disipulo nga ginhanas ni Jesus dala ang makalilipay nga balita, “napuno sia sing kalipay kag balaan nga espiritu.” (Luc. 10:17-21) Sing kaanggid, madamo man sa karon ang nalipay gid sa paghimo sing mga disipulo. Subong pamatuod, sang 2007, ang mapisan kag malipayon nga mga manugbantala nagdumala sang promedyo nga anom ka milyon kag tunga ka pagtuon sa Biblia kada bulan!
3 Apang may mga manugbantala nga wala pa gid makadumala sing pagtuon sa Biblia kag may pila naman nga wala na sing pagtuon sa Biblia sining ulihi nga mga tinuig. Ano ang pila ka mga kabudlayan nga mahimo naton atubangon samtang ginapanikasugan naton nga makadumala sing pagtuon sa Biblia? Paano naton ini malandas? Kag ano ang mga padya kon himuon naton ang aton bug-os nga masarangan agod tumanon ang sugo ni Jesus: “Busa lakat kamo kag maghimo sang mga disipulo”?—Mat. 28:19.
Mga Kabudlayan nga Mahimo Magdula sang Aton Kalipay
4, 5. (a) Ano ang reaksion sang mga tawo sa aton mensahe sa pila ka bahin sang kalibutan? (b) Ano nga mga kabudlayan ang ginaatubang sang mga manugbantala sa iban nga duog?
4 Sa pila ka bahin sang kalibutan, ang mga tawo nalipay gid magbaton sang aton literatura kag interesado magtuon sa Biblia. Ang isa ka mag-asawa gikan sa Australia nga temporaryo nga nagapangalagad sa Zambia nagsulat: “Matuod gid ang ginasiling nila nga ang Zambia isa ka mabungahon nga teritoryo. Makalilipay gid ang pagpanaksi sa dalan! Ang mga tawo pa ang nagapalapit sa amon kag nagapangabay sing pila ka isyu sang magasin.” Sining ulihi lang nga tuig, kapin sa 200,000 ka pagtuon sa Biblia ang ginadumalahan sang mga kauturan sa Zambia. Sa promedyo, ang kada manugbantala may kapin sa isa ka ginatun-an sa Biblia.
5 Apang sa iban nga duog, indi mahapos para sa mga manugbantala nga magtanyag sing literatura kag magdumala sing regular nga pagtuon sa Biblia. Ngaa? Sa masami ang mga tawo wala sa ila balay kag kon yara gid man, mahimo nga indi sila interesado sa relihion. Ayhan nagdaku sila sa indi relihioso nga panimalay ukon naugot pa sa pagkasalimpapaw sang butig nga relihion. Madamo man sa mga tawo ang nahalitan sa espirituwal—ginpanitan kag ginpaaplaag sang butig nga mga manugbantay. (Mat. 9:36) Gani, mahimo nagapangalag-ag sila nga hambalan ang tuhoy sa Biblia.
6. Ano nga mga kabudlayan ang ginaatubang sang iban nga manugbantala?
6 Ang pila ka matutom nga mga manugbantala nagaatubang sing tuhay naman nga kabudlayan nga mahimo magdula sang ila kalipay. Mahimo nga sadto aktibo sila sa paghimo sing disipulo, apang karon naupangan na sila sang balatian kag katigulangon. Binagbinaga man ang mahimo ginakabig naton nga mga kakulangan. Halimbawa, nagabatyag ka bala nga indi sangkol sa pagdumala sing pagtuon sa Biblia? Mahimo nagabatyag ka kaangay ni Moises sadto sang ginsugo sia ni Jehova nga makighambal kay Paraon. Si Moises nagsiling: “Ginuo, indi ako maayo sa pagpamulongpulong, bisan sang una ukon subong nga ginahambal mo ako.” (Ex. 4:10, Biblia sang Katilingban sang mga Kristiano) Ang pagbatyag nga di-sangkol naangot sa kahadlok nga mapaslawan. Mahimo nga mabalaka kita nga indi mangin isa ka disipulo ang aton ginatun-an bangod indi kita maayo magtudlo. Agod malikawan ini, ayhan mamat-od kita nga indi na lang magdumala sing pagtuon sa Biblia. Paano naton atubangon ini nga mga kabudlayan?
Ihanda ang Imo Tagipusuon
7. Ano ang nagpahulag kay Jesus nga magbantala?
7 Ang una nga tikang amo ang paghanda sang aton tagipusuon. Si Jesus nagsiling: “Gikan sa kabuganaan sang tagipusuon nagahambal ang . . . baba.” (Luc. 6:45) Ang sinsero nga kabalaka para sa kaayuhan sang iban amo ang nagpahulag kay Jesus nga magbantala. Halimbawa, sang makita niya nga nagluya ang espirituwalidad sang iya masigka-Judiyo, “naluoy sia sa ila.” Nagsiling sia sa iya mga disipulo: “Ang alanyon bugana . . . Pakiluoy kamo sa Agalon sang alanyon nga magpadala sia sang mga mamumugon sa iya alanyon.”—Mat. 9:36-38.
8. (a) Ano ang maayo gid naton nga dumdumon? (b) Ano ang matun-an naton sa ginsiling sang isa ka estudyante sa Biblia?
8 Samtang nagapakigbahin kita sa paghimo sing disipulo, mas maayo gid nga dumdumon naton nga kita mismo nakabenepisyo bangod may nanikasog nga tudluan kita sa Biblia. Hunahunaa man kon paano ang mga tawo nga masugilanon naton sa ministeryo makabenepisyo sa pagpamati sa aton mensahe. May isa ka babayi nga nagsulat sa sanga talatapan sang ila pungsod: “Luyag ko nga mahibal-an ninyo nga daku gid ang akon pagpasalamat sa mga Saksi nga nagtudlo sa akon sa puluy-an. Kon kaisa, natak-an na sila siguro sa akon bangod madamo ako sing pamangkot kag pirme sila nagakadugayan sa balay. Apang, mapailubon sila kag handa pirme magtudlo sa akon sang ila mga natun-an. Ginapasalamatan ko gid si Jehova kag si Jesus bangod nakilala ko sila.”
9. Sa ano si Jesus nagkonsentrar, kag paano naton sia mailog?
9 Siempre pa, indi man tanan nagbaton sang panudlo ni Jesus. (Mat. 23:37) May pila nga nagsunod sa iya sang umpisa, apang sang ulihi namatok sa iya mga panudlo kag “wala na maglakat upod sa iya.” (Juan 6:66) Apang, wala gintamod ni Jesus nga indi importante ang iya mensahe bangod wala ini ginbaton sang iban. Bisan pa nga ang kalabanan sang binhi nga iya ginsab-ug wala nagpamunga, nagkonsentrar si Jesus sa maayo niya nga ginhimo. Nakita niya nga ang kaumhan maputi na para anihon kag nalipay gid sia nga magbulig sa pag-ani. (Basaha ang Juan 4:35, 36.) Sa baylo nga tan-awon lang ang duta sa ulot sang mga uhay nga wala sing may nagtubo, mahimo man bala kita magkonsentrar sa posible nga alanihon sa aton teritoryo? Tan-awon naton kon paano mahuptan ining positibo nga panimuot.
Magsab-ug Agod May Anihon
10, 11. Agod mahuptan ang imo kalipay, ano ang imo himuon?
10 Ang isa ka mangunguma nagasab-ug agod may yara sia anihon. Sing kaanggid, dapat man kita magbantala agod makasugod sing mga pagtuon sa Biblia. Apang, bisan pa regular ka nga nagagua sa ministeryo sa latagon, paano kon diutay lamang ang masapwan mo nga yara sa ila mga balay ukon wala ka sing maabtan kon magduaw ka liwat? Mahimo nga maluyahan ka gid. Bangod sini, indi ka na lang bala magpamalaybalay? Siempre, indi! Madamo gihapon nga tawo ang una nga napanaksihan paagi sa sining epektibo nga metodo sang pagbantala nga madugay na nga ginagamit.
11 Apang agod mahuptan ang imo kalipay, mahimo mo bala gamiton ang iban pa nga pamaagi sa pagbantala agod malab-ot ang mga tawo? Halimbawa, natilawan mo na bala nga magbantala sa mga tawo sa dalan ukon sa ila ulubrahan? Mahimo ka bala makabantala paagi sa telepono ukon makakuha sing numero sang telepono sang imo mga napanaksihan agod matawgan mo sila? Paagi sa imo kaukod kag pagkamapasibusibuon sa ministeryo, malipay ka nga masapwan ang pila ka indibiduwal nga magbaton sing mensahe sang Ginharian.
Paglandas sa Di-pagsapak
12. Kon madamo sa aton teritoryo ang wala nagasapak, ano ang himuon naton?
12 Apang, ano ang imo himuon kon madamo sa inyo teritoryo ang indi interesado sa relihion? Mahimo mo bala mapasibu ang imo presentasyon agod maganyat ang ila interes? Si apostol Pablo nagsulat sa iya masigkatumuluo sa Corinto: “Sa mga Judiyo nangin subong ako sang Judiyo . . . Sa mga wala sing kasuguan nangin subong ako sang wala sing kasuguan, bisan pa indi ako wala sing kasuguan sa Dios.” Ano ang katuyuan ni Pablo? “Nangin tanan nga butang ako sa tanan nga sahi sang mga tawo,” siling niya, “agod maluwas ko sa bisan ano man nga paagi ang iban.” (1 Cor. 9:20-22) Sing kaanggid, mahimo bala naton gamiton ang topiko nga naluyagan gid sang mga tawo sa aton teritoryo? May mga tawo nga bisan pa indi relihioso, luyag nila pauswagon ang ila kaangtanan sa sulod sang pamilya. Mahimo ginapamangkot man nila kon ano gid ang katuyuan sang kabuhi. Mapasibu ayhan naton ang aton presentasyon agod maganyat ina nga mga tawo sa mensahe sang Ginharian?
13, 14. Paano pa gid kita mahimo magmalipayon sa paghimo sing disipulo?
13 Madamo nga manugbantala ang nangin malipayon pa gid sa paghimo sing disipulo bisan pa sa mga duog nga wala nagasapak ang kalabanan nga tawo. Paano? Paagi sa pagtuon sing dumuluong nga lenguahe. Nasapwan sang isa ka mag-asawa nga mga sesentahon na nga may nagapuyo sa ila teritoryo nga linibo ka Intsik nga estudyante upod sa ila pamilya. “Bangod sini, napalig-on kami nga magtuon sing Inintsik,” siling sang bana. “Bisan pa daku nga tion ang amon ginahinguyang sa pagtuon sini nga lenguahe kada adlaw,” padayon niya, “madamo nga mga Intsik sa amon teritoryo ang nadumalahan namon sing pagtuon sa Biblia.”
14 Bisan pa indi ka makatuon sing dumuluong nga lenguahe, mahimo mo magamit ang pulyeto nga Good News for People of All Nations kon may masugilanon ka nga nagahambal sing iban nga lenguahe. Mahimo ka man makakuha sing literatura sa lenguahe sang mga tawo nga masumalang mo sa latagon. Matuod, kinahanglan ang dugang nga tion kag panikasog agod makabantala sa mga tawo nga may tuhay nga lenguahe kag kultura. Apang dumduma ang prinsipio nga masapwan sa Pulong sang Dios: “Sia nga nagasab-ug sing bugana magaani man sing bugana.”—2 Cor. 9:6.
Dapat Magbuligay ang Bug-os nga Kongregasyon
15, 16. (a) Ngaa kinahanglan magbuligay ang bug-os nga kongregasyon sa paghimo sing disipulo? (b) Ano ang sarang mahimo sang may edad na nga mga kauturan?
15 Apang, ang paghimo sing disipulo indi hilikuton sang isa lang ka indibiduwal kundi sang bug-os nga kongregasyon. Ngaa? Nagsiling si Jesus: “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:35) Kon ang mga estudyante sa Biblia nagatambong sa mga miting, masami nga nagadayaw gid sila sa kahim-ong sang aton mga pagtinipon. Ang isa ka estudyante sa Biblia nagsulat: “Nanamian gid ako magtambong sa mga miting. Maabiabihon gid ang mga tawo!” Nagsiling si Jesus nga ang mga sumulunod niya mahimo pamatukan sang ila pamilya. (Basaha ang Mateo 10:35-37.) Apang nagsaad man sia nga sa kongregasyon, matigayon nila ang madamo nga espirituwal nga “mga utod nga lalaki kag mga utod nga babayi kag mga iloy kag mga anak.”—Marcos 10:30.
16 Daku ang mahimo sang may edad naton nga mga kauturan sa pagbulig agod mag-uswag ang mga estudyante sa Biblia. Sa ano nga paagi? Bisan pa nga indi sila makadumala sing pagtuon sa Biblia, mapabakod nila ang pagtuo sang tanan nga nagapamati sa mga miting sa kongregasyon paagi sa ila makapalig-on nga mga komento. Ang ila malawig na nga paglakat “sa dalanon sang pagkamatarung” nagapatahom pa gid sang kongregasyon kag nagabuyok sa bunayag sing tagipusuon nga mga tawo sa organisasyon sang Dios.—Hulu. 16:31.
Paglandas sa Aton Kahadlok
17. Ano ang himuon naton kon nagabatyag kita nga indi sangkol?
17 Ano ang himuon mo kon nagabatyag ka nga indi sangkol sa pagdumala sing pagtuon sa Biblia? Dumduma nga ginbuligan ni Jehova si Moises paagi sa pag-aman sa iya sing balaan nga espiritu kag sing kaupod nga amo ang iya utod nga si Aaron. (Ex. 4:10-17) Nagsaad si Jesus nga ang aton hilikuton sa pagbantala sakdagon sang espiritu sang Dios. (Binu. 1:8) Dugang pa, ginpadala ni Jesus ang iya mga sumulunod sing tagduhaduha sa pagbantala. (Luc. 10:1) Gani, kon nabudlayan ka magdumala sing pagtuon sa Biblia, pangabaya ang Dios nga hatagan ka sing kaalam sa bulig sang iya espiritu kag mangita sing eksperiensiado nga kaupod nga makahatag sa imo sing kompiansa. Makapalig-on man nga dumdumon nga ginpili ni Jehova ang ordinaryo nga mga tawo—“ang maluya nga mga butang sang kalibutan”—agod tumanon ining pinasahi nga hilikuton.—1 Cor. 1:26-29.
18. Paano naton malandas ang kahadlok nga mapaslawan?
18 Paano naton malandas ang kahadlok nga mapaslawan? Dapat naton tandaan nga ang paghimo sing disipulo indi kaangay sa pagluto sing pagkaon nga ang kanamiton sini nagadepende sa isa gid lang ka tawo—ang manugluto. Sa baylo, tatlo ang nadalahig sa paghimo sing disipulo. Si Jehova amo ang may daku gid nga papel sa pagbuyok sa mga tawo sa iya. (Juan 6:44) Kita kag ang iban pa sa kongregasyon nagabulig sa estudyante nga mag-uswag paagi sa aton arte sa pagpanudlo. (Basaha ang 2 Timoteo 2:15.) Kag dapat iaplikar man sang estudyante ang iya mga natun-an. (Mat. 7:24-27) Kon ang aton ginatun-an sa Biblia mag-untat sa pagtuon, mahimo nga maluyahan gid kita. Kuntani luyag gid naton nga pilion nila ang husto nga dalanon, apang ang kada indibiduwal amo ang “manabat sang iya kaugalingon sa Dios.”—Roma 14:12.
Ano ang mga Padya Naton?
19-21. (a) Ano ang mga padya sa pagdumala sing pagtuon sa Biblia? (b) Paano ginatamod ni Jehova ang tanan nga nagapakigbahin sa pagbantala?
19 Ang pagdumala sing mga pagtuon sa Biblia nagabulig sa aton nga unahon pirme ang Ginharian. Ginapatudok man sini sa aton hunahuna kag tagipusuon ang mga kamatuoran sa Pulong sang Dios. Paano? Si Barak nga isa ka payunir nagsiling: “Ang pagdumala sing mga pagtuon sa Biblia nagabulig sa isa nga mangin maukod pa gid sa pagtuon sa Pulong sang Dios. Nahangpan ko nga dapat ko anay pabakuron ang akon pagtuo antes ko matudluan ang iban sing epektibo.”
20 Kon wala ka sing ginadumalahan nga pagtuon sa Biblia, buot silingon bala nga wala na ginapabaloran sang Dios ang imo pag-alagad? Siempre, indi! Ginaapresyar gid ni Jehova ang aton mga panikasog agod dayawon sia. Ang tanan nga nagapakigbahin sa pagbantala “mga masigkamanugpangabudlay sang Dios.” Apang nalipay pa gid kita magdumala sing pagtuon sa Biblia kay makita naton kon paano ginapatubo sang Dios ang binhi nga aton gintanom. (1 Cor. 3:6, 9) “Kon makita mo nga nagauswag ang estudyante sa Biblia,” siling sang isa ka payunir nga si Amy, “makabatyag ka sing daku nga pagpasalamat kay Jehova bangod gingamit ka Niya nga hatagan ina nga tawo sing dalayawon nga regalo—ang kahigayunan nga makilala si Jehova kag matigayon ang kabuhi nga walay katapusan.”
21 Kon himuon naton ang aton masarangan agod makasugod sa pagdumala sing mga pagtuon sa Biblia, makabulig ini sa aton nga isentro ang aton kabuhi sa pag-alagad sa Dios sa karon kag mapabakod ang aton paglaum nga makalampuwas padulong sa bag-ong kalibutan. Upod ang pagsakdag ni Jehova, mabuligan man naton nga maluwas ang nagapamati sa aton. (Basaha ang 1 Timoteo 4:16.) Makalilipay gid ini!
Madumduman Mo Bala?
• Ano nga mga kabudlayan ang mahimo magpugong sa pila nga magdumala sing pagtuon sa Biblia?
• Ano ang aton himuon kon madamo sa aton teritoryo ang wala nagasapak?
• Ano ang mga padya naton sa pagdumala sing pagtuon sa Biblia?
[Mga Pamangkot sa Pagtinuon]
[Retrato sa pahina 9]
Mahimo mo bala gamiton ang iban pa nga pamaagi sa pagbantala agod masapwan ang bunayag sing tagipusuon nga mga indibiduwal?
