Talalupangdon nga mga Punto Gikan sa Tulun-an sang Bugna—I
Ang Pulong ni Jehova Buhi
Talalupangdon nga mga Punto Gikan sa Tulun-an sang Bugna—I
SAMTANG nabilanggo sa isla sang Patmos, nakabaton ang tigulang na nga si apostol Juan sing 16 ka serye sang palanan-awon. Nakita niya ang mga hinimuan ni Jehova nga Dios kag ni Jesucristo sang adlaw sang Ginuo—ang panahon sugod sang gintukod ang Ginharian sang Dios sang 1914 tubtob sa katapusan sang Isa ka Libo ka Tuig nga Paggahom ni Cristo. Ang tulun-an sang Bugna nga ginsulat ni Juan sang mga tuig 96 C.E. isa ka makakulunyag nga rekord sining mga palanan-awon.
Binagbinagon naton karon ang talalupangdon nga mga punto sang Bugna 1:1–12:17, nga nagatuptop sang una nga pito ka palanan-awon nga nabaton ni Juan. Interesado kita sa sining mga palanan-awon bangod may kahilabtanan ini sa mga nagakatabo karon sa kalibutan kag ginapakita man sini kon paano si Jehova magapanghikot sa palaabuton. Ang mga nagabasa sining mga palanan-awon nga may pagtuo mapalig-on gid.—Heb. 4:12.
GINHUKAS SANG “KORDERO” ANG ANOM SA PITO KA PAT-IN
Una, nakita ni Juan ang ginhimaya nga si Jesucristo kag nabaton niya ang serye sang mga mensahe nga dapat niya ‘isulat sa isa ka linukot kag ipadala sa pito ka kongregasyon.’ (Bug. 1:10, 11) Dayon nakita niya ang trono ni Jehova sa langit. Sa tuo nga kamot sang Isa nga nagalingkod sa trono may isa ka linukot nga napat-inan sang pito ka pat-in. Ang “takus sa pagbukad sa linukot” wala sing liwan kundi ang “Leon gikan sa tribo ni Juda,” ukon “ang isa ka kordero . . . nga may pito ka sungay kag pito ka mata.”—Bug. 4:2; 5:1, 2, 5, 6.
Ang ikatlo nga palanan-awon nagasugid sa aton kon ano ang natabo sang isaisa nga ginhukas sang “Kordero” ang una nga anom ka pat-in. Sang ginhukas niya ang ikan-om nga pat-in, naglinog sing mabaskog kag nag-abot ang daku nga adlaw sang kasingkal. (Bug. 6:1, 12, 17) Apang ginapakita sang masunod nga palanan-awon nga ‘ginapunggan sang apat ka anghel ang apat ka hangin sang duta’ tubtob nga makompleto ang pagpat-in sa 144,000. Nakita man ni Juan ang “isa ka dakung kadam-an” nga wala sing pat-in nga “nagatindog sa atubangan sang trono kag sa atubangan sang Kordero.”—Bug. 7:1, 9.
Sabat sa mga Pamangkot sa Kasulatan:
1:4; 3:1; 4:5; 5:6—Ano ang ginapahangop sang ekspresyon nga “pito ka espiritu”? Ang numero nga pito nagapahangop sing pagkakompleto sa pagtamod sang Dios. Gani ang mensahe para sa “pito ka kongregasyon” nagapatuhoy sa tanan nga katawhan sang Dios nga katapo sang kapin sa 100,000 ka kongregasyon sa bug-os nga kalibutan. (Bug. 1:11, 20) Ginapasagahay ni Jehova ang iya balaan nga espiritu suno sa iya katuyuan. Gani, ang ekspresyon nga “pito ka espiritu” nagapahangop sing bug-os nga pagpanghikot sang balaan nga espiritu sa paghatag sing paghangop kag pagpakamaayo sa mga nagatalupangod sa tagna. Ang bug-os nga tulun-an sang Bugna pirme nagagamit sing tig-pito sa pagpatuhoy sa mga butang. Ang numero nga pito diri nagakahulugan sing pagkakompleto. Nagahisanto gid ini kay ang tulun-an sang Bugna nagapatuhoy sa ‘pagtapos’ ukon pagkompleto sang “sagrado nga likom sang Dios.”—Bug. 10:7.
1:8, 17—Kay sin-o nagapatuhoy ang mga tig-ulo nga “ang Alpha kag ang Omega” kag “ang Nahauna kag ang Katapusan”? Ang tig-ulo nga “ang Alpha kag ang Omega” nagapatuhoy kay Jehova, buot silingon wala na sing labing gamhanan nga Dios antes ukon pagkatapos niya. Sia “ang ginsuguran kag ang katapusan.” (Bug. 21:6; 22:13) Bisan pa ginapatuhuyan si Jehova nga “ang nahauna kag ang naulihi” sa Bugna 22:13, ginapakita sang konteksto sang kapitulo uno sang Bugna nga ang tig-ulo nga “ang Nahauna kag ang Katapusan” nagapatuhoy kay Jesucristo. Sia ang una nga tawo nga ginbanhaw sa di-mamalatyon nga espiritu nga kabuhi kag ang katapusan nga ginbanhaw mismo ni Jehova.—Col. 1:18.
2:7—Ano ang “paraiso sang Dios”? Sanglit nagapatuhoy ini nga mga tinaga sa hinaplas nga mga Cristiano, ang paraiso diri mahimo nagapatuhoy sa tulad-paraiso nga duog sa langit—ang presensia mismo sang Dios. Ang matutom nga hinaplas pagapadyaan sa pagkaon “gikan sa kahoy sang kabuhi.” Matigayon nila ang pagkadimamalatyon.—1 Cor. 15:53.
3:7—San-o ni Jesus nabaton ang “yabi ni David,” kag paano niya ini gingamit? Sang ginbawtismuhan si Jesus sang 29 C.E., nangin Gintangdo sia nga Hari sa linya ni David. Apang nabaton lamang niya ang yabi ni David sang 33 C.E., sang ginbayaw sia sa tuo sang Dios sa langit. Didto nabaton niya ang tanan nga kinamatarong sang Ginharian ni David. Sugod sadto, gingamit ni Jesus ang yabi sa pagbukas sing mga kahigayunan kag mga pribilehiyo may kaangtanan sa Ginharian. Sang 1919, gintugyan ni Jesus “ang yabi sang balay ni David” sa “matutom kag mainandamon nga ulipon” paagi sa pagtangdo sa ulipon nga klase nga magdumala sa “tanan niya nga pagkabutang.”—Isa. 22:22; Mat. 24:45, 47.
3:12—Ano ang “bag-o nga ngalan” ni Jesus? Ini nga ngalan naangot sa iya bag-o nga katungdanan kag mga pribilehiyo. (Fil. 2:9-11) Bisan pa si Jesus lamang ang nakahibalo kon ano gid ang kahulugan sini nga ngalan, ginsulat niya ini sa iya matutom nga mga utod sa langit agod mangin suod sila sa iya. (Bug. 19:12) Ginhatagan man sila sing pila ka pinasahi nga mga pribilehiyo kaangay sang ginhatag ni Jehova kay Jesus.
Mga Leksion Para sa Aton:
1:3. Bangod “malapit na ang gintalana nga tion” nga laglagon sang Dios ang kalibutan ni Satanas, kinahanglan gid nga mahangpan naton ang kahulugan sang tulun-an sang Bugna kag manghikot nahisanto sa sini.
3:17, 18. Agod magmanggaranon sa espirituwal, dapat kita magbakal kay Jesus sing “bulawan nga ginpapuro sa kalayo.” Buot silingon, tinguhaan naton nga mangin manggaranon sa maayong mga buhat. (1 Tim. 6:17-19) Dapat man naton isul-ob ang “puti nga mga panapton” nga nagapakilala sa aton subong mga sumulunod ni Cristo kag maggamit sing “inughaplas sa mata” subong sang laygay nga masapwan sa Lalantawan agod matigayon naton ang espirituwal nga paghantop.—Bug. 19:8.
7:13, 14. Ang 24 ka gulang nagarepresentar sa 144,000 sa ila langitnon nga himaya, kag magaalagad sila didto subong mga hari kag mga saserdote. Ginalarawan sila sang mga saserdote sa Israel sang una nga gin-organisar ni Hari David sa 24 ka dibisyon. Ginsugid sang isa ka gulang kay Juan kon sin-o gid ang dakung kadam-an. Gani, mahimo nagsugod ang pagkabanhaw sang hinaplas nga mga Cristiano wala madugay antes sang 1935. Ngaa? Bangod sa sina nga tuig nakilal-an sang hinaplas nga mga alagad sa duta kon sin-o gid ang dakung kadam-an.—Lucas 22:28-30; Bug. 4:4; 7:9.
ANG PAGHUKAS SA IKAPITO NGA PAT-IN NAGDUL-ONG SA PAGPATUNOG SA PITO KA TRUMPETA
Amo sini ang nakita ni Juan sa ikalima nga palanan-awon. Ginhukas sang kordero ang ikapito nga pat-in. Ang pito ka anghel ginhatagan sing pito ka trumpeta. Ginpatunog sang anom ka anghel ang ila mga trumpeta, nga nagapahibalo sang mensahe sang paghukom sa “ikatlo” nga bahin sang katawhan—ang Cristiandad. (Bug. 8:1, 2, 7-12; 9:15, 18) Nakigbahin si Juan sa ikan-om nga palanan-awon. Ginkaon niya ang gamay nga linukot kag gintakus ang santuaryo sang templo. Sa tapos ginpatunog ang ikapito nga trumpeta, may mabaskog nga mga tingog nga nagsiling: “Ang ginharian sang kalibutan nangin ginharian sang aton Ginuo kag sang iya Cristo.”—Bug. 10:10; 11:1, 15.
Ang ikapito nga palanan-awon nagapadaku sa ginsiling sang Bugna 11:15, 17. Nakita ang daku nga tanda sa langit. Ang langitnon nga babayi nagbun-ag sing isa ka bata nga lalaki. Ang Yawa gintagbong sa duta. Bangod naakig gid sia sa langitnon nga babayi, ‘nakig-away sia sa mga nabilin nga binhi sang babayi.’—Bug. 12:1, 5, 9, 17.
Sabat sa mga Pamangkot sa Kasulatan:
8:1-5—Ngaa may kalinong sa langit, kag ano ang ginhaboy sa duta? May simbuliko nga kalinong sa langit agod ang “pangamuyo sang mga balaan” sa duta mabatian. Natabo ini pagkatapos sang Bug-os Kalibutan nga Inaway I. Ang hinaplas nga mga Cristiano wala dayon magpalangit sang matapos ang Panag-on sang mga Gentil subong sang ginapaabot sang kalabanan. Bangod sa kabudlayan sang tion sang inaway, hanuot sila nga nangamuyo sing panuytoy. Bilang sabat sa ila pangamuyo, ginhaboy sang anghel ang simbuliko nga kalayo agod pabaskugon sa espirituwal ang hinaplas nga mga Cristiano. Bisan diutay lang sila, gin-umpisahan nila ang bug-os kalibutan nga pagbantala amo nga nangin mainit nga isyu ang Ginharian sang Dios nga nagpaakig sa Cristiandad. Ginpahibalo nila ang nagadaguob nga mga paandam sang Biblia kag ginpalapnag ang kamatuoran sang Kasulatan. Bilang resulta, ang pundasyon sang butig nga relihion daw kaangay sang tinukod nga gintay-og sang linog.
8:6-12; 9:1, 13; 11:15—San-o naghanda ang pito ka anghel sa pagpatunog sang ila mga trumpeta, kag san-o kag paano ginpatunog ang trumpeta? Lakip sa paghanda agod patunugon ang pito ka trumpeta amo ang paghatag sing direksion nga papagsikon liwat ang mga katapo sang Juan nga klase sa duta sugod sang 1919 tubtob 1922. Sa sini nga mga tion masako ang mga hinaplas sa pag-organisar liwat sa pagministeryo sa publiko kag pagtukod sing mga imprintahan. (Bug. 12:13, 14) Ang pagpatunog sa trumpeta nagarepresentar sa maisog nga proklamasyon sang katawhan sang Dios upod sa bulig sang mga anghel sa paghukom ni Jehova batok sa kalibutan ni Satanas. Nagsugod ini sa kombension sa Cedar Point, Ohio sang 1922 kag nagapadayon tubtob sa dakung kapipit-an.
8:13; 9:12; 11:14—Sa ano nga kahulugan nga mga “kailo” ang tatlo ka ulihi nga tunog sang trumpeta? Ang una nga apat ka tunog sang trumpeta mga proklamasyon nga nagbuyagyag nga patay sa espirituwal nga kahimtangan ang Cristiandad. Ang tatlo naman nga naulihi, mga kailo kay nagapatuhoy ini sa espesipiko nga mga hitabo. Ang ikalima nga tunog naangot sa paghilway sa katawhan sang Dios gikan sa “kadadalman” nga wala sing pagpanghikot sang 1919 padulong sa wala sing untat nga pagbantala nga nagdulot sing nagapaantos nga kalalat-an sa Cristiandad. (Bug. 9:1) Ang ikan-om nahanungod sa pinakadaku nga pagsalakay sang mga mangangabayo nga kasuldadusan sa maragtas kag ang bug-os kalibutan nga pagbantala nga nagsugod sang 1922. Ang katapusan nga tunog naangot sa pagkabun-ag sang Mesianikong Ginharian.
Mga Leksion Para sa Aton:
9:10, 19. Ang masaligan nga pinamulong sang pasad sa Biblia nga mga publikasyon sang “matutom kag mainandamon nga ulipon” nagaunod sing nagapangutot nga mensahe. (Mat. 24:45) Ini nga mensahe daw kaangay sang mga ikog sang apan nga may “sudlot kaangay sang mga iwiiwi” kag sang mga kabayo nga may “ikog kaangay sang mga man-ug.” Ngaa? Bangod ini nga mga publikasyon nagahatag sing paandam tuhoy sa “adlaw sang pagtimalus” ni Jehova. (Isa. 61:2) Dapat mangin maisog kag makugi kita sa pagpanagtag sini.
9:20, 21. Madamo sang mahagop nga tawo nga nagapuyo sa di-Cristiano nga mga pungsod ang nagbaton sang mensahe nga dala naton. Apang, indi kita makapaabot nga madamo ang makumbertir gikan sa sini nga mga pungsod nga ginapatuhuyan subong “iban nga mga tawo.” Apang, nagapadayon kita gihapon sa pagministeryo.
12:15, 16. “Ang duta”—ang mga elemento sang sistema ni Satanas ukon ang nagagahom nga mga kagamhanan sa bug-os nga duta—nagahatag sing kahilwayan sa pagsimba. Sugod sang 1940, gintulon sining mga kagamhanan “ang suba [sang paghingabot] nga ginbuga sang dragon gikan sa baba sini.” Sa pagkamatuod, kon gustuhon ni Jehova, mahimo niya pahulagon ang mga opisyales sang gobierno nga tumanon ang iya katuyuan. Nagakaigo gid ang ginasiling sang Hulubaton 21:1: “Ang tagipusoon sang hari kaangay sang sapa sang tubig sa kamot ni [Jehova]; ginatuytoyan niya ini bisan diin suno sa iya luyag.” (Biblia sang Katilingban sang mga Kristiano) Ini nga mga pulong dapat magpabakod gid sang aton pagtuo sa Dios.
