‘Tulugyanan Ka Bala sang Wala Tupong nga Kaayo sang Dios’?
‘Tulugyanan Ka Bala sang Wala Tupong nga Kaayo sang Dios’?
“Sa utudnon nga gugma magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.”—ROMA 12:10.
1. Ano nga mga pagpalig-on ang masapwan naton sa Pulong sang Dios?
ANG Pulong sang Dios sulitsulit nga nagapalig-on nga buligan kita ni Jehova kon ginapung-awan kita ukon ginaluyahan sing buot. Halimbawa, talupangda ining makapaumpaw nga pinamulong: “Ang GINOO nagapatindug sang tanan nga nagakapukan, kag nagapabangon sang tanan nga nagadunguk.” “Ginaayo niya ang boong sa tagiposoon, kag nagabugkos sang ila mga pilas.” (Sal. 145:14; 147:3) Dugang pa, ang aton mismo langitnon nga Amay nagasiling: “Ako ang GINOO nga imo Dios, magauyat sang imo kamut nga too; nagasiling sa imo, ‘Dili magkahadluk, magatabang ako sa imo.’”—Isa. 41:13.
2. Paano ginasakdag ni Jehova ang iya mga alagad?
2 Apang, paano ni Jehova ‘uyatan ang aton kamot’ kay yara sia sa langit? Paano niya kita ‘ginapabangon kon nagadungok’ kita bangod sang kasakit sa balatyagon? Ginasakdag ni Jehova nga Dios ang iya mga alagad sa nanuhaytuhay nga paagi. Halimbawa, ginahatagan niya sila sing “gahom nga labaw sa kinaandan” paagi sa iya balaan nga espiritu. (2 Cor. 4:7; Juan 14:16, 17) Ginapalig-on man sang Dios ang iya mga alagad paagi sa gamhanan nga inspirado nga Pulong sang Dios, ang Biblia. (Heb. 4:12) May iban pa bala nga paagi nga ginapabakod kita ni Jehova? Masapwan naton ang sabat sa sina nga pamangkot sa tulun-an sang Unang Pedro.
‘Ginpakita ang Wala Tupong nga Kaayo sang Dios sa Nanuhaytuhay nga Paagi’
3. (a) Ano ang ginsiling ni apostol Pedro tuhoy sa mga pagtilaw? (b) Ano ang ginabinagbinag sa ulihi nga bahin sang una nga sulat ni Pedro?
3 Ginsulatan ni apostol Pedro ang hinaplas nga mga tumuluo nga magkasadya bangod sa bugana nga pagpakamaayo nga nagahulat sa ila. Nian, nagdugang sia: “Bisan pa nga sa malip-ot nga tion sa karon kinahanglan nga mag-antos kamo sang nanuhaytuhay nga pagtilaw.” (1 Ped. 1:1-6) Talupangda nga gingamit diri ang tinaga nga “nanuhaytuhay.” Ginapakita sini nga ang mga pagtilaw mangin nanuhaytuhay. Apang wala diri magdulog si Pedro. Wala niya ginbutang ang iya mga kauturan sa kahimtangan nga magpalibog sila kon bala mabatas nila ining nanuhaytuhay nga mga pagtilaw. Sa baylo ginpakita man niya nga makasalig ang mga Cristiano nga buligan sila ni Jehova nga malandas ang bisan ano nga sahi sang pagtilaw nga maatubang nila. Ina nga pasalig mabasa sa ulihi nga bahin sang sulat ni Pedro, diin ginalaygayan niya ang iya mga kauturan bangod malapit na ang “katapusan sang tanan nga butang.”—1 Ped. 4:7.
4. Ngaa makapalig-on sa aton ang ginsiling sang 1 Pedro 4:10?
4 Si Pedro nagsiling: “Suno sa dulot nga nabaton sang tagsatagsa, gamita ini sa pag-alagad sa isa kag isa subong maayong mga tulugyanan sang wala tupong nga kaayo sang Dios nga ginpakita sa nanuhaytuhay nga paagi.” (1 Ped. 4:10) Gingamit liwat ni Pedro ang tinaga nga “nanuhaytuhay.” Daw subong bala nga nagasiling sia, ‘Ang mga pagtilaw nanuhaytuhay apang ginapakita man sang Dios ang iya wala tupong nga kaayo sa nanuhaytuhay nga paagi.’ Ngaa makapalig-on ini? Bangod bisan ano man nga sahi sang pagtilaw ang aton ginaatubang, ang wala tupong nga kaayo sang Dios magabulig sa aton agod mabatas ini. Apang sa ginsiling ni Pedro, natalupangdan mo bala kon paano ginapakita ni Jehova sa aton ang iya wala tupong nga kaayo? Paagi sa aton masigka-Cristiano.
“Sa Pag-alagad sa Isa kag Isa”
5. (a) Ano ang dapat himuon sang tagsa ka Cristiano? (b) Ano ang nagautwas nga mga pamangkot?
5 Ginsilingan ni Pedro ang tanan nga katapo sang Cristianong kongregasyon: “Labaw sa tanan, maghigugmaanay kamo sing tudok.” Nian, nagdugang sia: “Suno sa dulot nga nabaton sang tagsatagsa, gamita ini sa pag-alagad sa isa kag isa.” (1 Ped. 4:8, 10) Gani, ang kada isa sa kongregasyon may bahin agod palig-unon ang iya masigka-Cristiano. May gintugyan si Jehova sa aton nga isa ka bilidhon nga butang kag responsibilidad naton nga ipaambit ini sa iban. Ano ini? Nagsiling si Pedro nga isa ini ka “dulot.” Ano ini nga dulot? Paano naton ini ‘gamiton sa pag-alagad sa isa kag isa’?
6. Ano ang pila ka dulot nga gintugyan sa mga Cristiano?
6 Ang Pulong sang Dios nagasiling: “Ang tagsa ka maayong dulot kag tagsa ka himpit nga regalo gikan sa hitaas.” (Sant. 1:17) Sa pagkamatuod, ang tanan nga dulot nga gintugyan ni Jehova sa iya katawhan nagapakita sang iya wala tupong nga kaayo. Ang isa ka pinasahi nga dulot nga nabaton naton kay Jehova amo ang iya balaan nga espiritu. Nagabulig ini sa aton nga mapalambo ang diosnon nga mga kinaiya subong sang gugma, pagkamaayo, kag kalulo. Subong resulta, ini nga mga kinaiya nagapahulag sa aton nga higugmaon kag buligan ang aton mga masigkatumuluo. Ang matuod nga kaalam kag ihibalo nalakip man sa maayong mga dulot nga natigayon naton paagi sa balaan nga espiritu. (1 Cor. 2:10-16; Gal. 5:22, 23) Mahimo man kabigon nga mga dulot ang aton kusog, ikasarang, kag talento nga ginagamit naton agod dayawon kag padunggan ang aton langitnon nga Amay. May responsibilidad kita nga gamiton ining mga ikasarang kag kinaiya agod ipakita ang wala tupong nga kaayo sang Dios sa aton mga masigkatumuluo.
“Gamita Ini sa Pag-alagad”—Paano?
7. (a) Ano ang ginapahangop sang termino nga “suno sa”? (b) Ano ang dapat naton ipamangkot sa aton kaugalingon, kag ngaa?
7 May kaangtanan sa mga dulot nga nabaton naton, nagsiling si Pedro: “Suno sa dulot nga nabaton sang tagsatagsa, gamita ini.” Ang termino nga “suno sa” nagapahangop nga indi palareho ang aton mga kinaiya kag mga ikasarang kag kon paano naton ini ginapakita. Apang, ginapalig-on ang kada isa sa aton nga ‘gamiton ini [ang bisan ano nga dulot nga natigayon naton] sa pag-alagad sa isa kag isa.’ Dugang pa, ang ekspresyon nga “gamita ini . . . subong maayong mga tulugyanan” isa ka sugo. Gani, pamangkuton naton ang aton kaugalingon: ‘Ginagamit ko gid bala ang dulot nga akon nabaton agod palig-unon ang akon mga masigkatumuluo?’ (Ipaanggid ang 1 Timoteo 5:9, 10.) ‘Ukon ginagamit ko bala ang mga ikasarang nga nabaton ko kay Jehova para lang sa akon kaayuhan, ayhan agod magmanggaranon ukon kilalahon ako?’ (1 Cor. 4:7) Kon gamiton naton ang mga dulot nga aton nabaton “sa pag-alagad sa isa kag isa,” mapahamut-an naton si Jehova.—Hulu. 19:17; basaha ang Hebreo 13:16.
8, 9. (a) Ano ang pila ka paagi nga nagaalagad sa mga masigkatumuluo ang mga Cristiano sa bug-os kalibutan? (b) Paano nagabuligay ang mga kauturan sa inyo kongregasyon?
8 Ginasugid sang Pulong sang Dios kon paano ang mga Cristiano sang nahauna nga siglo nag-alagad sa isa kag isa sa nanuhaytuhay nga paagi. (Basaha ang Roma 15:25, 26; 2 Timoteo 1:16-18.) Sa karon, tinagipusuon man nga ginatuman sang matuod nga mga Cristiano ang sugo nga gamiton ang dulot nga nabaton nila para sa kaayuhan sang ila masigkatumuluo. Binagbinaga ang pila ka paagi kon paano ini ginahimo.
9 Madamo nga utod nga lalaki ang nagahinguyang sing inoras kada bulan sa paghanda sing mga bahin para sa mga miting. Sa mga miting, ginapaalinton nila ang mapuslanon nga mga impormasyon nga natun-an nila sa Biblia. Ang ila maalamon nga mga pulong nagapalig-on sa kongregasyon agod magbatas. (1 Tim. 5:17) Madamo man nga mga kauturan ang kilala nga mapinalanggaon kag maluluy-on sa mga masigkatumuluo. (Roma 12:15) May pila nga nagabisita sing regular sa mga ginapung-awan kag nagapangamuyo upod sa ila. (1 Tes. 5:14) Ginasulatan naman sang iban ang ila masigka-Cristiano nga nagaatubang sing mga pagtilaw agod palig-unon sila. May pila ka kauturan nga nagabulig sa mga may sablag sa lawas agod makatambong sa mga miting sa kongregasyon. Linibo man ka Saksi ang nagabulig sa pagpatindog-liwat sing balay sang mga masigkatumuluo nga gin-agyan sing kalamidad. Ginapakita sang gugma kag praktikal nga bulig sining mga kauturan ang “wala tupong nga kaayo sang Dios nga ginpakita sa nanuhaytuhay nga paagi.”—Basaha ang 1 Pedro 4:11.
Diin ang Mas Importante?
10. (a) Anong duha ka bahin sang pag-alagad sa Dios ang ginbaton ni Pablo? (b) Paano naton karon mailog si Pablo?
10 Gintugyanan sang Dios ang iya mga alagad indi lamang sing dulot agod gamiton para sa masigkatumuluo kundi sing mensahe man agod ipaambit sa ila isigkatawo. Ginbaton ni apostol Pablo ining duha ka bahin sang iya pag-alagad kay Jehova. Ginsulatan niya ang kongregasyon sang Efeso tuhoy sa “pagkatulugyanan sang wala tupong nga kaayo sang Dios” nga ginhatag sa iya tungod sa ila. (Efe. 3:2) Apang, nagsiling man sia: “Kami napamatud-an sang Dios nga takus tugyanan sing maayong balita.” (1 Tes. 2:4) Kaangay ni Pablo, ginbaton man naton ang gintugyan sa aton nga hilikuton sa pagbantala sang Ginharian sang Dios. Paagi sa aton makugi nga pagbantala, ginailog naton ang halimbawa ni Pablo subong mapisan nga manugpahayag sang maayong balita. (Binu. 20:20, 21; 1 Cor. 11:1) Nahibaluan naton nga ang pagbantala sing mensahe sang Ginharian nagaluwas sing kabuhi. Apang, ginatinguhaan man naton nga ilugon si Pablo paagi sa pagpangita sing kahigayunan nga ‘makapaambit sang espirituwal nga dulot’ sa aton masigkatumuluo.—Basaha ang Roma 1:11, 12; 10:13-15.
11. Paano naton tamdon ang aton hilikuton sa pagbantala kag pagpalig-on sa aton masigkatumuluo?
11 Diin sa sining duha ka Cristianong hilikuton ang mas importante? Ini nga pamangkot daw kaangay sa pamangkot nga, Diin sa duha ka pakpak sang pispis ang mas importante? Maathag ang sabat. Kinahanglan sang pispis ang duha ka pakpak agod makalupad. Sing kaanggid, kinahanglan man naton nga himuon ining duha ka hilikuton sang pag-alagad sa Dios agod mangin bug-os nga mga Cristiano. Gani, sa baylo nga tamdon ang pagbantala sing maayong balita kag pagpalig-on sa aton masigkatumuluo subong magkatuhay nga hilikuton, kaangay nanday apostol Pedro kag Pablo, ginatamod naton ini subong nagaupdanay nga responsibilidad. Sa ano nga paagi?
12. Paano kita ginagamit ni Jehova?
12 Subong mga manugbantala, ginagamit naton ang kalantip sa pagtudlo agod malab-ot ang tagipusuon sang mga tawo sang makapalig-on nga mensahe sang Ginharian sang Dios. Sa sina nga paagi, ginabuligan naton sila nga mangin disipulo ni Cristo. Apang, ginagamit man naton ang bisan ano nga mga ikasarang kag iban pa nga dulot nga nabaton naton agod palig-unon ang aton masigkatumuluo paagi sa mainayuhon nga mga pinamulong kag pagbulig sa iban—mga ekspresyon sang wala tupong nga kaayo sang Dios. (Hulu. 3:27; 12:25) Sa sina nga paagi, ginabuligan naton sila nga magpabilin subong mga disipulo ni Cristo. Isa ka daku nga kadungganan para sa aton nga gamiton ni Jehova sa sining duha ka hilikuton—ang pagbantala kag “pag-alagad sa isa kag isa.”—Gal. 6:10.
‘Magpakita sang Mapinalanggaon nga Balatyagon sa Isa kag Isa’
13. Ano ang matabo kon indi kita ‘mag-alagad sa isa kag isa’?
13 Ginpalig-on ni Pablo ang iya masigkatumuluo: “Sa utudnon nga gugma magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.” (Roma 12:10) Sa pagkamatuod, ang gugma sa aton mga kauturan nagapahulag sa aton nga mag-alagad sing bug-os tagipusuon subong mga tinugyanan sang wala tupong nga kaayo sang Dios. Nahangpan naton nga kon magmadinalag-on si Satanas nga punggan kita sa “pag-alagad sa isa kag isa,” maguba ang aton paghiusa. (Col. 3:14) Kon wala na sing paghiusa, mahimo madula man ang kakugi naton sa pagbantala. Nakahibalo gid si Satanas nga kon pauntaton niya kita bisan sa isa lang ka bahin sang aton pag-alagad, indi na naton matuman sing bug-os ang aton hilikuton.
14. Sin-o ang nagabenepisyo sang aton “pag-alagad sa isa kag isa”? Maghatag sing halimbawa.
14 Ang “pag-alagad sa isa kag isa” nagabenepisyo indi lamang sa mga nagabaton sang wala tupong nga kaayo sang Dios kundi sa mga nagapaambit man sini. (Hulu. 11:25) Ang isa ka halimbawa sini amo sanday Ryan kag Roni, isa ka mag-asawa gikan sa Illinois, U.S.A. Sang nahibaluan nila nga ginatos ka mga puluy-an sang mga Saksi ang nahalitan bangod sa Bagyo Katrina, ang ila gugma sa mga kauturan nagpahulag sa ila nga bayaan ang ila trabaho, ibaligya ang ila apartment, magbakal sing segunda mano nga salakyan nga puede maistaran, kag maglakbay sing 1,400 kilometros padulong sa Louisiana. Nagpuyo sila didto sing kapin sa isa ka tuig samtang ginahinguyang ang ila tion, kusog, kag pagkabutang agod buligan ang ila mga utod. “Ang pagpakigbahin sa sini nga hilikuton nagapasuod pa gid sa akon sa Dios,” siling sang 29 anyos nga si Ryan. “Nakita ko kon paano ginaatipan ni Jehova ang iya katawhan.” Nagdugang pa si Ryan: “Ang pagpanghikot upod sa may edad na nga mga utod nagtudlo sa akon kon paano pa gid atipanon ang mga kauturan. Natun-an ko man nga kami nga mga bataon, madamo pa sing mahimo para sa organisasyon ni Jehova.” Ang 25 anyos nga si Roni nagsiling: “Nagapasalamat gid ako nga nabuligan ko man ang iban. Subong pa lang ako nakabatyag sing amo sini nga kalipay. Nahibaluan ko nga sa pagligad sang mga tinuig, padayon gihapon ako nga makabenepisyo gikan sa sining dalayawon nga hilikuton.”
15. Ano ang maayo naton nga mga rason nga padayon kita nga mag-alagad subong mga tinugyanan sang wala tupong nga kaayo sang Dios?
15 Matuod gid nga ang pagtuman sa mga sugo sang Dios nga magbantala sing maayong balita kag magpalig-on sa masigkatumuluo nagadala sing pagpakamaayo sa tanan. Ang mga nabuligan naton napalig-on sa espirituwal samtang kita naman nagabatyag sing tinagipusuon nga kalipay bangod sa aton paghatag. (Binu. 20:35) Ang kongregasyon sa kabilugan nagauswag samtang nagapakita sing mahigugmaon nga interes ang tagsatagsa. Dugang pa, ang gugma kag pagpalangga nga ginapakita naton sa kada isa maathag nga nagapakilala sa aton subong matuod nga mga Cristiano. Si Jesus nagsiling: “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:35) Labaw sa tanan, ginapadunggan sini ang aton mainulikdon nga Amay, si Jehova, samtang ginapalig-on niya paagi sa iya dutan-on nga mga alagad ang mga nagakinahanglan sing bulig. Gani, may maayo gid kita nga mga rason nga gamiton ang nabaton naton nga dulot “sa pag-alagad sa isa kag isa subong maayong mga tulugyanan sang wala tupong nga kaayo sang Dios”! Padayon mo bala ini nga himuon?—Basaha ang Hebreo 6:10.
Madumduman Mo Bala?
• Sa ano nga mga paagi ginapalig-on ni Jehova ang iya mga alagad?
• Ano ang gintugyan ni Jehova sa aton?
• Ano ang pila ka paagi nga makaalagad kita sa aton masigkatumuluo?
• Ano ang magapahulag sa aton nga padayon nga gamiton ang aton nabaton nga dulot “sa pag-alagad sa isa kag isa”?
[Mga Pamangkot sa Pagtinuon]
[Retrato sa pahina 13]
Ginagamit mo bala ang nabaton mo nga “dulot” sa pagbulig sa iban ukon sa imo lang nga kaayuhan?
[Retrato sa pahina 15]
Ginabantala naton ang maayong balita sa iban kag ginapalig-on ang aton masigka-Cristiano
[Retrato sa pahina 16]
Ang masinakripisyuhon sa kaugalingon nga mga boluntaryo takus gid nga hatagan sing komendasyon
