Yari Karon! Ang Nahamut-an nga Alagad ni Jehova
Yari Karon! Ang Nahamut-an nga Alagad ni Jehova
“Yari ang akon alagad . . . nga nahamut-an sang akon kalag.” —ISA. 42:1, Biblia sang Katilingban sang mga Kristiano.
1. Ano ang ginapalig-on nga dapat himuon sang katawhan ni Jehova samtang nagahilapit ang Memoryal, kag ngaa?
SAMTANG nagahilapit ang pagsaulog sang kamatayon ni Cristo, ginapalig-on ang katawhan sang Dios nga sundon ang laygay ni apostol Pablo nga ‘magtulok sing maayo sa Pangulo nga Ahente kag Manughimpit sang aton pagtuo, si Jesus.’ Si Pablo nagdugang: “Sa pagkamatuod, binagbinaga ninyo sing maayo ang isa nga nagbatas sang supak nga hambal sang mga makasasala batok sa ila mismo kaayuhan, agod indi kamo pagkapuyon kag mapunaw ang inyo kalag.” (Heb. 12:2, 3) Ang pagtalupangod sing maayo sang katutom ni Cristo tubtob sa iya kamatayon, makabulig sa hinaplas nga mga Cristiano kag sa ila kaupod nga iban nga mga karnero nga magpadayon sa pag-alagad sing matutom kay Jehova kag likawan nga ‘mangampo ang ila kalag.’—Ipaanggid ang Galacia 6:9.
2. Ano ang matun-an naton sa mga tagna ni Isaias tuhoy sa Anak sang Dios?
2 Gin-inspirar ni Jehova si manalagna Isaias nga magtagna sing pila ka beses tuhoy sa iya Anak. Ini nga mga tagna magabulig sa aton nga ‘magtulok sing maayo sa Pangulo nga Ahente kag Manughimpit sang aton pagtuo,” si Cristo Jesus. * Naghatag ini sing mga detalye tuhoy sa iya personalidad, sa iya pagaantuson, kag sa pagbayaw sa iya subong aton Hari kag Manunubos. Mabuligan kita sini nga mahangpan pa gid ang Memoryal, nga pagasaulugon naton sa sini nga tuig sa Huebes, Abril 9, sa pagtunod sang adlaw.
Nakilal-an ang Alagad
3, 4. (a) Sa tulun-an sang Isaias, ano ang ginapatuhuyan sang tinaga nga “alagad”? (b) Paano ginpakilala sang Biblia ang alagad nga ginsambit sa Isaias kapitulo 42, 49, 50, 52, kag 53?
3 Ang tinaga nga “alagad” pila ka beses nga masapwan sa tulun-an sang Isaias. Kon kaisa, ang ginapatuhuyan sini amo ang manalagna mismo. (Isa. 20:3; 44:26) Kon kaisa nagapatuhoy ini sa pungsod sang Israel, ukon kay Jacob. (Isa. 41:8, 9; 44:1, 2, 21) Apang kamusta ang talalupangdon nga mga tagna tuhoy sa Alagad nga ginrekord sa Isaias kapitulo 42, 49, 50, 52, kag 53? Maathag nga ginapakita sang Cristianong Griegong Kasulatan kon sin-o ang Alagad ni Jehova nga ginlaragway sa sini nga mga kapitulo. Sing makawiwili, ang Etiopianhon nga opisyal nga ginsambit sa tulun-an sang Binuhatan, nagabasa sang isa sining mga tagna sang gintuytuyan sang balaan nga espiritu si Felipe nga palapitan sia. Sang nabasa sang opisyal ang teksto sa Biblia nga masapwan naton karon sa Isaias 53:7, 8, namangkot sia kay Felipe: “Nagapakiluoy ako sa imo, Tuhoy kay sin-o ginapamulong ini sang manalagna? Tuhoy bala sa iya kaugalingon ukon tuhoy sa iban nga tawo?” Ginpaathag dayon ni Felipe nga ang ginapatuhuyan ni Isaias amo ang Mesias, si Jesus.—Binu. 8:26-35.
4 Sang lapsag pa si Jesus, nagsiling ang matarong nga tawo nga si Simeon paagi sa gahom sang balaan nga espiritu nga ang “bata nga si Jesus” mangin “isa ka kapawa sa pagkuha sing tabon sa mga pungsod,” subong sang gintagna sa Isaias 42:6 kag 49:6. (Luc. 2:25-32) Dugang pa, ang kahuy-anan nga naeksperiensiahan ni Jesus sang gab-i nga ginkasaba sia gintagna sa Isaias 50:6-9. (Mat. 26:67; Luc. 22:63) Pagkatapos sang Pentecostes 33 C.E., maathag nga ginpakilala ni Pedro si Jesus subong ang “Alagad” ni Jehova. (Isa. 52:13; 53:11; basaha ang Binuhatan 3:13, 26.) Ano ang matun-an naton sa sining mga tagna tuhoy sa Mesias?
Ginhanas ni Jehova ang Iya Alagad
5. Ano nga paghanas ang nabaton sang Alagad?
5 Ang isa ka tagna ni Isaias tuhoy sa Alagad sang Dios nagapakita sang suod nga kaangtanan ni Jehova kag sang iya bugtong nga Anak antes ini mangin tawo. (Basaha ang Isaias 50:4-9.) Ang alagad mismo nagsugid nga pirme sia ginahanas ni Jehova, nga nagasiling: “Ginapukaw niya ang akon idulungug sa pagpamati subong sang mga ginaton-an.” (Isa. 50:4) Sa sining tinion, nagpamati kag nagtuon ang Alagad ni Jehova sa iya Amay kag nangin mapinasakupon nga disipulo. Isa gid ka daku nga pribilehiyo nga tudluan sang Manunuga sang uniberso!
6. Paano ginpakita sang Alagad ang iya bug-os nga pagpasakop sa iya Amay?
6 Sa iya tagna, ginatawag sang Alagad ang iya Amay nga “Ginoong DIOS” nga Jehova. Ini nagapakita nga ginabaton sang Alagad nga si Jehova amo ang Soberano sa uniberso. Bilang pagpakita sang iya bug-os nga pagpasakop sa iya Amay, sia nagsiling: “Ang Ginoong DIOS nagbukas sang akon idulungug, kag indi ako mabinatoon, wala ako mag-isul.” (Isa. 50:5) Sia “yara . . . sa luyo [ni Jehova], subong nga pangolo nga manugpangabudlay” sa pagtuga sang uniberso kag sang tawo. Ining “pangolo nga manugpangabudlay” “nagakasadya sing dayon sa atubangan niya [Jehova], nga nagakasadya sa iya duta nga sarang mapuy-an kag ang akon [Anak sang Dios] kalipay yara kaupud sa mga anak sang mga tawo.”—Hulu. 8:22-31.
7. Ano ang nagapakita nga nagasalig ang Alagad sa pagsakdag sang iya Amay sang gintilawan sia?
7 Bangod sining paghanas nga nabaton sang Alagad kag sang iya kahamuot sa katawhan, handa sia nga atubangon ang daku nga pagpamatok sang nagkari sia sa duta. Nalipay gihapon sia sa paghimo sang kabubut-on sang iya Amay bisan sa idalom sang mapintas nga paghingabot. (Sal. 40:8; Mat. 26:42; Juan 6:38) Sa tanan nga pagtilaw nga naagyan niya sa duta, makasalig si Jesus sa kahamuot kag pagsakdag sang iya Amay. Subong sang gintagna ni Isaias, makasiling si Jesus: “Malapit sia nga nagapakamatarung sa akon. Sin-o bala ang magapakigsuay sa akon? . . . Yari karon, ang Ginoong DIOS magatabang sa akon.” (Isa. 50:8, 9) Ginbuligan gid ni Jehova ang matutom nga Alagad sa iya ministeryo sa duta, subong sang ginpakita sang isa pa ka tagna ni Isaias.
Ang Ministeryo sang Alagad sa Duta
8. Ano ang pamatuod nga si Jesus amo ang “pinili” ni Jehova, subong sang gintagna sa Isaias 42:1?
8 Ang Biblia nagasugid kon ano ang natabo sang ginbawtismuhan si Jesus sang 29 C.E.: “Nagkunsad sa iya ang balaan nga espiritu . . . kag may tingog gikan sa langit: ‘Ikaw ang akon Anak, ang hinigugma; ginakahamut-an ko ikaw.’” (Luc. 3:21, 22) Maathag nga ginkilala ni Jehova ang iya “pinili” nga ginsambit sa tagna ni Isaias. (Basaha ang Isaias 42:1-7.) Sa iya ministeryo diri sa duta, talalupangdon gid nga gintuman ni Jesus ini nga tagna. Sa iya rekord sa Ebanghelyo, ginkutlo ni Mateo ang mga pinamulong nga masapwan sa Isaias 42:1-4 kag gin-aplikar ini kay Jesus.—Mat. 12:15-21.
9, 10. (a) Paano gintuman ni Jesus ang Isaias 42:3 sa iya ministeryo? (b) Paano si Cristo ‘nagpahayag sang katarungan’ sang yari sia sa duta, kag san-o sia ‘magapahamtang sang katarungan’?
9 Ginatamay sang relihiosong mga lider sang Judiyo ang kinaandan nga mga tawo. (Juan 7:47-49) Ang mga tawo ginapintasan kag daw ‘tabun-ak nga nahapay’ ukon daw ‘lino nga pabilo’ nga manugpalong na. Apang ginpakita ni Jesus ang iya kaluoy sa mga imol kag nasit-an. (Mat. 9:35, 36) Gintanyagan niya sila sing mainayuhon nga pangagda, nga nagasiling: “Kari sa akon, kamo tanan nga ginabudlayan kag ginabug-atan, kag paumpawan ko kamo.” (Mat. 11:28) Dugang pa, si Jesus ‘nagpahayag sang katarungan’ paagi sa pagtudlo sang mga talaksan ni Jehova tuhoy sa kon ano ang husto kag sayop. (Isa. 42:3) Ginpakita pa gid niya nga ang kasuguan sang Dios dapat iaplikar sing makatarunganon kag may kaluoy. (Mat. 23:23) Ginpakita man ni Jesus ang katarungan paagi sa pagbantala nga wala sing pinilian sa mga manggaranon kag imol.—Mat. 11:5; Luc. 18:18-23.
10 Ang tagna ni Isaias nagsiling man nga ang “pinili” ni Jehova ‘magapahamtang sa duta sang katarungan.’ (Isa. 42:4) Subong Hari sang Mesianikong Ginharian, himuon niya ini sa gilayon paagi sa paglaglag sa tanan nga pulitikal nga mga ginharian kag buslan ini sang iya matarong nga paggahom. Ibulos niya ang bag-ong kalibutan, diin “magapuyo ang pagkamatarong.”—2 Ped. 3:13; Dan. 2:44.
“Kapawa” kag “Katipan”
11. Sa ano nga kahulugan nangin “kapawa sang mga pungsod” si Jesus sang unang siglo, kag paano ini nagapadayon tubtob karon?
11 Bilang katumanan sang Isaias 42:6, nangin ‘kapawa gid sang mga pungsod’ si Jesus. Sang yari sia sa duta, ilabi na nga ginhatagan niya sing espirituwal nga kapawa ang mga Judiyo. (Mat. 15:24; Binu. 3:26) Apang si Jesus nagsiling: “Ako ang kapawa sang kalibutan.” (Juan 8:12) Nangin kapawa sia sa mga Judiyo kag sa mga pungsod indi lamang paagi sa pagdala sing espirituwal nga kasanagan kundi paagi man sa paghalad sang iya himpit nga kabuhi bilang gawad sa tanan nga katawhan. (Mat. 20:28) Sa tapos sia mabanhaw, ginsugo niya ang iya mga disipulo nga manaksi tuhoy sa iya “tubtob sa ukbong sang duta.” (Binu. 1:8) Sa tion sang ila ministeryo, nagkutlo sanday Pablo kag Bernabe sang ekspresyon nga “kapawa sa mga pungsod” kag gin-aplikar ini sa pagbantala nila sa mga indi Judiyo. (Binu. 13:46-48; ipaanggid ang Isaias 49:6.) Ginahimo pa gihapon ini tubtob karon samtang ginapalapnag sang hinaplas nga mga kauturan ni Jesus kag sang ila mga kaupod ang maayong balita kag ginabuligan ang mga tawo nga magtuo kay Jesus, ang “kapawa sang mga pungsod.”
12. Paano ginhatag ni Jehova ang iya Alagad subong “katipan sa katawohan”?
12 Sa amo man nga tagna, ginsilingan ni Jehova ang iya pinili nga Alagad: ‘Nagbantay ako sa imo; naghatag ako sa imo nga katipan sa katawohan.’ (Isa. 42:6) Nanikasog si Satanas nga laglagon si Jesus kag punggan sia sa pagtuman sang iya ministeryo sa duta, apang gin-amligan ni Jehova si Jesus tubtob sa gintalana nga tion sang iya kamatayon. (Mat. 2:13; Juan 7:30) Nian ginbanhaw ni Jehova si Jesus kag ginhatag sia subong “katipan,” ukon garantiya, sa katawhan sa duta. Ini nga panaad nagapasalig nga ang matutom nga Alagad sang Dios magapadayon subong “kapawa sang mga pungsod,” nga nagahilway sang mga yara sa espirituwal nga kadulom.—Basaha ang Isaias 49:8, 9. *
13. Sa anong paagi ginhilway ni Jesus ang “mga nagalingkod sa kadudulman” sang yari sia sa duta, kag paano niya ini ginpadayon?
13 Nahisuno sa sini nga garantiya, ang pinili nga Alagad ni Jehova ‘magapamuklat sang mga mata sang bulag,’ ‘magapagowa sa bilanggoan nga madulum sang mga binilanggo’ kag ‘sang mga nagalingkod sa kadudulman.’ (Isa. 42:7) Sang yari si Jesus sa duta, ginhimo niya ini sang ginbuyagyag niya ang butig nga relihiosong mga tradisyon kag ginbantala ang maayong balita sang Ginharian. (Mat. 15:3; Luc. 8:1) Sa amo ginhilway niya sa butig nga relihion ang mga Judiyo nga nangin mga disipulo niya. (Juan 8:31, 32) Sing kaanggid, ginhilway man ni Jesus ang minilyon nga indi Judiyo. Ginsugo niya ang iya mga sumulunod nga “lakat . . . kag maghimo sing disipulo sa mga tawo sang tanan nga pungsod,” kag nagsaad nga mangin kaupod niya sila “tubtob sa katapusan sang sistema sang mga butang.” (Mat. 28:19, 20) Gikan sa langit, ginadumalahan ni Cristo Jesus ang bug-os kalibutan nga pagbantala.
Ginbayaw ni Jehova ang “Alagad”
14, 15. Ngaa kag paano ginbayaw ni Jehova ang iya Alagad?
14 Sa isa pa ka tagna tuhoy sa Mesianikong Alagad, si Jehova nagsiling: “Yari karon, ang akon alagad magauswag, pakataason sia kag bayawon, kag manginmataas gid.” (Isa. 52:13) Bangod sa mainunungon nga pagpasakop sang Anak sa Iya pagkasoberano kag katutom sa idalom sang daku nga pagtilaw, ginbayaw sia ni Jehova.
15 Si apostol Pedro nagsulat tuhoy kay Jesus: “Yara sia sa tuo sang Dios, kay nagkadto sia sa langit; kag ang mga anghel kag mga awtoridad kag mga kagamhanan ginpasakop sa iya.” (1 Ped. 3:22) Sing kaanggid, si apostol Pablo nagsulat: “Nagpaubos sia kag nangin matinumanon tubtob sa kamatayon, huo, kamatayon sa usok sang pag-antos. Subong man, sa sini gid nga rason ginbayaw sia sang Dios sa mataas gid nga posisyon kag mainayuhon nga ginhatagan sia sing ngalan nga labaw sa tanan iban pa nga ngalan, agod sa ngalan ni Jesus magluhod ang tagsa ka tuhod sang mga yara sa langit kag sa duta kag sa idalom sang duta, kag ang tagsa ka dila dayag nga magkilala nga si Jesucristo Ginuo sa himaya sang Dios nga Amay.”—Fil. 2:8-11.
16. Paano si Jesus ‘nangin mataas gid’ sang 1914, kag ano ang iya ginhimo sugod sadto?
16 Sang 1914, ginbayaw pa gid ni Jehova si Jesus. ‘Nangin mataas gid’ sia sang ginpalingkod sia ni Jehova subong Hari sa Mesianikong Ginharian. (Sal. 2:6; Dan. 7:13, 14) Sugod sadto, si Cristo ‘naggahom sa tunga sang iya kaaway.’ (Sal. 110:2) Una, ginlutos anay niya si Satanas kag ang mga demonyo sini kag gintagbong sila sa duta. (Bug. 12:7-12) Nian subong ang Dakung Ciro, ginluwas ni Cristo ang nagkalabilin sang iya hinaplas nga mga kauturan sa duta gikan sa pagkaulipon sa “Babilonia nga Daku.” (Bug. 18:2; Isa. 44:28) Ginpangunahan niya ang bug-os kalibutan nga pagbantala nga nagresulta sa pagtipon sang “mga nabilin” sang iya espirituwal nga kauturan kag nian sang minilyon nga “iban nga mga karnero,” ang matutom nga kaupod sang “diutay nga panong.”—Bug. 12:17; Juan 10:16; Luc. 12:32.
17. Ano ang natun-an naton sa pagtuon sang mga tagna ni Isaias tuhoy sa “alagad”?
17 Pat-od gid nga nagdugang ang aton apresasyon sa aton Hari kag Manunubos, si Cristo Jesus bangod gintun-an naton ining tumalagsahon nga mga tagna sa tulun-an sang Isaias. Ang iya pagkamapinasakupon subong anak sang yari sia sa duta nagapabanaag sang paghanas nga nabaton niya gikan sa iya Amay antes sia magkari sa duta. Ginpamatud-an niya nga sia ang “kapawa sang mga pungsod” paagi sa iya ministeryo kag paagi sa pagtuytoy niya sang pagbantala tubtob karon. Subong sang aton matun-an sa masunod, ipakita sang isa pa ka tagna ang tuhoy sa Mesianikong Alagad nga magaantos kag maghalad sang iya kabuhi para sa aton, mga butang nga ‘binagbinagon sing maayo’ samtang nagahilapit ang Memoryal sang iya kamatayon.—Heb. 12:2, 3.
[Mga Nota]
^ par. 2 Masapwan mo ini nga mga tagna sa Isaias 42:1-7; 49:1-12; 50:4-9; kag 52:13–53:12.
^ par. 12 Para sa paghinun-anon sang tagna sa Isaias 49:1-12, tan-awa ang Tagna ni Isaias—Kapawa Para sa Tanan nga Tawo II, pahina 136-145.
Bilang Pagrepaso
• Sin-o ang “alagad” nga ginsambit sa mga tagna ni Isaias, kag paano sia ginpakilala sa aton?
• Ano nga paghanas ang nabaton sang Alagad gikan kay Jehova?
• Paano si Jesus nangin “kapawa sang mga pungsod”?
• Paano ginbayaw ang Alagad?
[Mga Pamangkot sa Pagtinuon]
[Retrato sa pahina 21]
Maathag nga ginpakilala ni Felipe nga ang “alagad” nga ginsambit ni Isaias amo si Jesus, ang Mesias
[Retrato sa pahina 23]
Subong pinili nga Alagad ni Jehova, ginpakita ni Jesus ang iya kaluoy sa mga imol kag nasit-an
[Retrato sa pahina 24]
Ginbayaw ni Jehova si Jesus kag ginpalingkod subong Hari sa Mesianikong Ginharian
