Ika-125 Nga Gradwasyon sa Gilead

Ginpalig-on ang mga Misyonero nga Ilugon si Jeremias

“ISA ka importante nga bahin sang aton kasaysayan ang eskwelahan sang Gilead,” siling ni Geoffrey Jackson sang Nagadumala nga Hubon. Nagpamulongpulong sia sa 6,156 nga nagtambong sa gradwasyon sang ika-125 nga klase sang Watchtower Bible School of Gilead sang Septiembre 13, 2008. Lakip ang 56 ka naggradwar sa sini nga klase, nakapadala na ang Eskwelahan sang Gilead sing kapin sa 8,000 ka misyonero “tubtob sa ukbong sang duta”!—Binu. 1:8.

Ang tsirman sang programa nga si Utod Jackson namangkot, “Mapauswag bala sang kredibilidad ang imo ministeryo?” Naghatag sia sing apat ka panugda agod mapauswag ang kredibilidad: ang maayo nga panimuot, ang pagpahamtang sang maayo nga halimbawa, ang pagbase sang panudlo sa Pulong sang Dios, kag ang pagtinguha nga ipakilala ang ngalan ni Jehova.

Si David Schafer, nga nagapangalagad sa Komite sang Pagtudlo, nagpaathag sang topiko nga “Mahangpan Mo Bala ang Tanan?” Ginpasalig niya ang mga estudyante sa Gilead nga mahimo nila “mahangpan ang tanan” nga kinahanglanon agod makapangalagad subong mga misyonero kon padayon nila nga pangitaon si Jehova kag mapainubuson nga kilalahon ang “matutom kag mainandamon nga ulipon.”—Hulu. 28:5; Mat. 24:45.

Ang masunod nga nagpamulongpulong amo si John E. Barr sang Nagadumala nga Hubon nga may tema: “Indi Pagpahanuguti nga May Magpahamulag sa Inyo sa Gugma sang Dios.” Kaangay sang isa ka amay nga nagalaygay, ginlugpayan ni Utod Barr ang mga naggradwar kag ang ila mga ginikanan. Bangod sini, nadula ang mga pagpangalag-ag nga ginbatyag nila tuhoy sa ila mahimo atubangon bilang bag-o nga mga misyonero. “Ang pagpabilin sa gugma sang Dios amo na ang pinakasigurado kag pinakamalipayon nga pagkabuhi,” paathag niya. Wala sang may makapahamulag sa mga misyonero sa gugma sang Dios, luwas lamang kon sila mismo ang magpalayo sa Dios.

Ginpalig-on naman ni Sam Roberson sang Departamento sang Teokratiko nga mga Eskwelahan sa Patterson ang mga tumalambong nga isul-ob ang “pinakamaayo nga panapton.” Paagi sa pagtuon sa mga binuhatan ni Jesus kag pag-aplikar sini, daw ‘ginasuklob sang mga naggradwar si Ginuong Jesucristo.’ (Roma 13:14) Ang masunod nga nagpamulongpulong amo si William Samuelson, ang manugtatap sang Departamento sang Teokratiko nga mga Eskwelahan sa Patterson. Ginpatalupangod niya nga indi ang pagtamod sang mga tawo kundi ang pagtamod sang Dios ang nagahimo sa isa nga mangin halangdon.

Ang isa sa mga instruktor nga si Michael Burnett, nag-interbyu sa mga estudyante tuhoy sa ila mga eksperiensia sa pagbantala. Bisan gin-asayn sila sa mga teritoryo nga pirme ginabantalaan samtang nagaeskwela sa Gilead sa Patterson, New York, nakasapo sila gihapon sang mga interesado. Gin-interbyu ni Gerald Grizzle sang Talatapan sang Kombension ang tatlo ka utod nga lalaki nga nagatambong sa Eskwelahan Para sa mga Katapo sang Komite sang Sanga. Ang ila mga komento nakabulig sa mga naggradwar nga mangin handa sa ila nagahulat nga asaynment sa iban nga pungsod.

 Ang pamulongpulong nga “Iluga si Jeremias” ginpresentar ni David Splane sang Nagadumala nga Hubon, nga naggradwar man sa Gilead sang ika-42 nga klase. Bisan daw nagpangalag-ag si Jeremias sa iya asaynment, ginpabakod sia ni Jehova. (Jer. 1:7, 8) Amo man sini ang himuon sang Dios sa bag-o nga mga misyonero. “Kon may nalainan kamo sa isa ka tawo,” siling ni Utod Splane, “magpungko kag isulat ang napulo ka kinaiya nga nanamian mo gid sa iya. Kon indi gani ini makalab-ot sa napulo, buot silingon indi mo pa gid sia kilala.”

Masinakripisyuhon si Jeremias. Sang daw mangampo na sia, nangamuyo sia, kag gin-ubayan sia ni Jehova. (Jer. 20:11) “Kon maluyahan ka sing buot,” siling ni Utod Splane, “isugid ini kay Jehova. Makibot ka gid kon paano ka buligan ni Jehova.”

Sa pagtakop sang programa, ginpahanumdom sang tsirman ang mga tumalambong nga natun-an sang mga naggradwar ang pila ka paagi kon paano palig-unon ang ila kredibilidad. Samtang nagapanaksi sila sa ila naasayn nga teritoryo, bangod sang ila kredibilidad, mangin makagalanyat pa gid ang ila mensahe.—Isa. 43:8-12.

[Kahon sa pahina 22]

ESTADISTIKA SANG KLASE

Kadamuon sang pungsod nga gintiglawas: 6

Kadamuon sang pungsod nga ginpadalhan: 21

Kadamuon sang mga estudyante: 56 • Aberids nga edad: 32.9

Aberids nga tuig sa kamatuoran: 17.4

Aberids nga tuig sa bug-os tion nga ministeryo: 13

[Retrato sa pahina 23]

Ika-125 nga Naggradwar nga Klase sang Watchtower Bible School of Gilead

Sa listahan sa ubos, ang mga raya nanumeruhan halin sa atubangan pakadto sa likod, kag ang mga ngalan nalista halin sa wala pakadto sa tuo sa tagsa ka raya.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.