Ang Pulong ni Jehova Buhi

Talalupangdon nga mga Punto Gikan sa Tulun-an sang Bugna—II

ANO ang matabo sa mga nagasimba kay Jehova nga Dios kag sa mga wala nagasimba sa iya? Ano ang madangatan ni Satanas kag sang iya mga demonyo? Ano nga mga pagpakamaayo ang mabaton sang matinumanon nga katawhan sa sulod sang Isa ka Libo ka Tuig nga Paggahom ni Cristo? Ang sabat sa sini kag sa iban pa nga importante nga mga pamangkot makita sa Bugna 13:1–22:21. * Ini nga mga kapitulo nagaunod sing naulihi nga 9 sa 16 ka palanan-awon nga nabaton ni apostol Juan sang hingapusan nga bahin sang unang siglo C.E.

“Malipayon ang nagabasa sing mabaskog kag ang mga nagapamati sang mga pulong sini nga tagna,” sulat ni Juan, “kag nagatuman sang mga butang nga nasulat sa sini.” (Bug. 1:3; 22:7) Ang pagbasa kag pag-aplikar sang aton natun-an gikan sa tulun-an sang Bugna makaapektar sa aton pag-alagad sa Dios, makapalig-on sang aton pagtuo sa Iya kag sa iya Anak nga si Jesucristo, kag makahatag sa aton sing masanag nga paglaum sa palaabuton. *—Heb. 4:12.

ANG PAG-ULA SANG PITO KA YAHONG SANG KAAKIG SANG DIOS

(Bug. 13:1–16:21)

“Nagsingkal ang mga pungsod,” siling sang Bugna 11:18, ‘kag nag-abot ang kaugalingon nga kasingkal sang Dios sa paglaglag sa mga nagalaglag sang duta.’ Agod ipakita kon ngaa nag-abot ang kasingkal sang Dios, ginlaragway sang ikawalo nga palanan-awon ang hilikuton sang “mabangis nga sapat . . . nga may napulo ka sungay kag pito ka ulo.”—Bug. 13:1.

Sa ikasiam nga palanan-awon ni Juan, nakita niya nga “ang Kordero nagatindog sa Bukid Sion, kag kaupod niya ang isa ka gatos kag kap-atan kag apat ka libo” nga ‘ginbakal gikan sa katawhan.’ (Bug. 14:1, 4) Ginsundan ini sang anom ka pahibalo sang mga anghel. Sa masunod nga palanan-awon, nakita ni Juan ang “pito ka anghel nga may pito ka kalalat-an.” Maathag nga si Jehova ang nagsugo sa sini nga mga anghel nga iula “ang pito ka yahong sang kaakig sang Dios” sa nagkalainlain nga bahin sang kalibutan ni Satanas. Ang mga yahong nagaunod sang mga kapahayagan kag mga paandam tuhoy sa paghukom sang Dios. (Bug. 15:1; 16:1) Ining duha ka palanan-awon naghatag sing detalye tuhoy sa dugang nga mga paghukom sang Ginharian may kaangtanan sa ikatlo nga kailo kag sa paghuyop sang ikapito nga trumpeta.—Bug. 11:14, 15.

Sabat sa mga Pamangkot sa Kasulatan:

13:8—Ano ang “linukot sang kabuhi nga iya sang Kordero”? Malaragwayon ini nga linukot nga nagaunod lamang sang mga ngalan sang kaupod ni Jesucristo nga magagahom sa iya langitnon nga Ginharian. Nasulat sa sini ang mga ngalan sang hinaplas nga mga Cristiano nga may langitnon nga paglaum nga yari pa sa duta.

13:11-13—Paano ang mabangis nga sapat nga may duha ka sungay nagapanghikot kaangay sang dragon kag nagapapanaug sang kalayo halin sa langit? Ang katunayan nga ang duha sing sungay nga mabangis nga sapat—ang Anglo-Amerikano nga Kagamhanan sa Kalibutan—nagapamulong kaangay sang dragon nagapakita nga nagagamit sia sing pamahog, pag-ipit, kag kasingki agod magpasakop ang mga tawo sa iya paggahom. Nagapapanaug sia sing kalayo halin sa langit, nga nagapahangop nga nagapangangkon sia nga matuod nga manalagna paagi sa pagsiling nga nalutos niya ang malauton nga puersa sa duha ka bug-os kalibutan nga inaway sang ika 20 nga siglo kag nagdaug batok sa Komunismo.

 16:17—Ano ang “hangin” nga gin-ulaan sang ikapito nga yahong? Ang “hangin” nagasimbulo sa panghunahuna ni Satanas, “ang espiritu [huyog sang hunahuna] nga nagapanghikot karon sa mga anak sang pagkadimatinumanon.” Ining makahililo nga hangin ginahaklo sang bug-os nga malaut nga sistema sang mga butang ni Satanas.—Efe. 2:2.

Mga Leksion Para sa Aton:

13:1-4, 18. Ang “mabangis nga sapat” nga nagasimbulo sa tawhanon nga gobierno nagtakas “gikan sa dagat,” nga amo naman ang magamo nga katilingban sang tawo. (Isa. 17:12, 13; Dan. 7:2-8, 17) Ining sapat nga ginhimo kag ginhatagan sing gahom ni Satanas may numero nga 666, nga nagapadaku sang pagkadihimpit sini. Kon mahangpan naton kon ano ang sapat, makabulig ini sa aton nga malikawan ang pagdayaw ukon pagsimba sa sini kaangay sang ginahimo sang kalabanan nga tawo.—Juan 12:31; 15:19.

13:16, 17. Bisan pa nagaatubang kita sing mga kabudlayan sa aton adlaw-adlaw nga mga buluhaton, kaangay sang ‘pagbakal ukon pagbaligya,’ indi naton dapat pagtugutan nga makontrol kita sang mabangis nga sapat. Ang pagpabutang sing ‘marka sang mabangis nga sapat sa aton kamot ukon sa aton agtang,’ nagapahangop nga ginatugutan naton ang mabangis nga sapat nga kontrolon ang aton mga buhat kag panghunahuna.

14:6, 7. Ang kapahayagan sang mga anghel nagatudlo sa aton nga dapat naton ibantala nga may pagkahilingagawon ang maayong balita sang natukod na nga Ginharian sang Dios. Dapat naton buligan ang aton mga estudyante sa Biblia nga mapalambo ang kahadlok sa Dios agod mapahulag sila nga simbahon kag himayaon si Jehova.

14:14-20. Kon matapos na ang “oras sang pag-ani,” nga amo ang pagtipon sang mga naluwas, pagatipunon sa “daku nga linasan sang ubas sang kaakig sang Dios” ang “ubas sang duta.” Ini nga ubas nagapatuhoy sa malaut nga sistema sang mga gobierno ni Satanas nga naggahom sa katawhan upod sa “mga pinungpong” sang malaut nga mga bunga. Ini sila, laglagon sing bug-os. Dapat kita mangin determinado nga indi magpaimpluwensia sa ubas sang duta.

16:13-16. Ang “di-matinlo nga pinamulong sang espiritu,” nagasimbulo sa propaganda sang mga demonyo. Gintuyo ini agod pasaligon ang mga hari sang duta nga indi sila maapektuhan sa pag-ula sang pito ka yahong sang kaakig sang Dios, sa baylo ginsulsulan nila sila nga mamatok kay Jehova.—Mat. 24:42, 44.

16:21. Samtang nagahilapit na ang katapusan sini nga kalibutan, ang kapahayagan sang mga paghukom ni Jehova batok sa malauton nga sistema ni Satanas mahimo maglakip sing matigdas nga mga ekspresyon sang paghukom sang Dios, kaangay sang nagtig-a nga tubig ukon yelo. Apang, madamo gihapon ang magapasipala sa Dios.

ANG PAGGAHOM SANG MADINALAG-ON NGA HARI

(Bug. 17:1–22:21)

Ang “Babilonia nga Daku,” ang bug-os kalibutan nga emperyo sang butig nga relihion, amo ang makangilil-ad nga bahin sang malaut nga kalibutan ni Satanas. Ginalaragway sia sang ika-11 nga palanan-awon subong “makihilawason nga babayi,” isa ka imoral nga babayi, “nga nagasakay sa duag-escarlata nga mabangis nga sapat.” Laglagon sia sing bug-os sang “napulo ka sungay” sang sapat nga ginasakyan niya mismo. (Bug. 17:1, 3, 5, 16) Subong pagpaanggid sang makihilawason sa “daku nga siudad,” ginpahibalo sang masunod nga palanan-awon ang iya pagkapukan kag ang pagkahilingagawon sang ‘paggua’ sang katawhan sang Dios gikan sa iya. Naghaya ang madamo sa pagkapukan sining daku nga siudad. Apang may kalipay sa langit bangod sa “kasal sang Kordero.” (Bug. 18:4, 9, 10, 15-19; 19:7) Sa ika-13 nga palanan-awon, ang nagasakay sa “isa ka puti nga kabayo” magapakig-away sa mga pungsod. Kag laglagon niya ang malaut nga kalibutan ni Satanas.—Bug. 19:11-16.

Ano ang matabo sa “orihinal nga man-ug, nga amo ang Yawa kag Satanas”? San-o sia ‘itagbong sa linaw nga kalayo’? Amo ini ang isa sa mga topiko sang ika-14 nga palanan-awon. (Bug. 20:2, 10) Ang ulihi nga duha ka palanan-awon nagalaragway sa kabuhi sa tion sang Milenyo. Sa pagtakop sang “bugna,” nakita ni Juan ang ‘suba sang tubig sang kabuhi nga nagailig sa tunga sang malapad nga  dalan,’ kag ginaagda ang “bisan sin-o nga ginauhaw.”—Bug. 1:1; 22:1, 2, 17.

Sabat sa mga Pamangkot sa Kasulatan:

17:16; 18:9, 10—Ngaa ang “mga hari sang duta” magapangalisod sa organisasyon nga sila mismo ang naglaglag? Makagod gid ang rason sang ila pagpangalisod. Pagkatapos sang kalaglagan sang Babilonia nga Daku, maathag nga makamarasmas ang mga hari sang duta nga mapuslanon gid ini sa ila. Ginhinabunan sini ang ila mapintas nga mga buhat. Ginbuligan man sila sang Babilonia nga Daku sa pag-engganyo sa mga pamatan-on nga mag-entra sa inaway. Dugang pa, nagbulig man ini sa ila agod padayon nga magpasakop ang mga tawo sa ila.

19:12—Ngaa si Jesus lang ang nakahibalo sang iya wala ginsambit nga ngalan? Ini nga ngalan nagapatuhoy sa katungdanan kag mga pribilehiyo, subong sang ginsiling sang Isaias 9:6, nga natigayon ni Jesus sa adlaw sang Ginuo. Wala sing may nakahibalo sa iya ngalan kundi sia lamang bangod pinasahi ang iya mga pribilehiyo kag sia lamang ang makahangop kon ano ang buot silingon sang iya mataas nga katungdanan. Apang, ginpaambit ni Jesus ang pila sa sini nga mga pribilehiyo sa katapo sang iya nobya, nga daw ‘nasulat sa ila ang iya bag-o nga ngalan.’—Bug. 3:12.

19:14—Sin-o ang magaupod kay Jesus sa Armagedon? Nalakip sa ‘mga kasuldadusan sa langit’ nga magaupod kay Jesus sa inaway sang Dios amo ang mga anghel, subong man ang mga hinaplas nga nagdaug nga nakatigayon na sang ila langitnon nga padya.—Mat. 25:31, 32; Bug. 2:26, 27.

20:11-15—Kay sin-o mga ngalan ang nasulat sa “linukot [ukon, “libro”] sang kabuhi”? Amo ini ang linukot nga nagaunod sing mga ngalan sang mga makabaton sang kabuhi nga walay katapusan. Nalakip sa sini ang hinaplas nga mga Cristiano, ang katapo sang dakung kadam-an, kag ang mga matutom nga mga alagad sang Dios nga ‘banhawon subong matarong.’ (Binu. 24:15; Bug. 2:10; 7:9) Masulat lamang ang ngalan sang ‘mga indi matarong nga banhawon’ sa “linukot sang kabuhi,” kon magkabuhi sila nahisuno sa “mga butang nga nasulat sa mga linukot,” nga pagabuksan sa Milenyo. Apang posible nga mapanas ang nalista nga mga ngalan. Mangin permanente lamang ang mga ngalan sang mga hinaplas kon mapamatud-an nila ang ila katutom tubtob sa kamatayon. (Bug. 3:5) Ang ngalan sang mga makatigayon sing kabuhi sa duta mangin permanente man kon makalampuwas sila sa pinakaulihi nga pagtilaw sa katapusan nga bahin sang isa ka libo ka tuig.—Bug. 20:7, 8.

Mga Leksion Para sa Aton:

17:3, 5, 7, 16. “Ang kaalam nga gikan sa hitaas” magabulig sa aton nga mahangpan “ang misteryo sang babayi kag sang [duag-eskarlata nga] mabangis nga sapat nga ginasakyan niya.” (Sant. 3:17) Nabun-ag ining simbuliko nga mabangis nga sapat subong ang Liga de Nasyones kag sang ulihi subong Nasyones Unidas. Bangod nahibaluan naton ini nga misteryo, indi bala kita mapahulag nga mangin makugi sa pagbantala sang maayong balita sang Ginharian sang Dios kag sa pagpahayag sang adlaw sang paghukom ni Jehova?

21:1-6. Makapat-od gid kita nga matuman ang gintagna nga mga pagpakamaayo sa paggahom sang Ginharian. Ngaa? Bangod ginasiling nga, “Natabo na ini!”

22:1, 17. “Ang suba sang tubig sang kabuhi” nagapatuhoy sa mga aman ni Jehova agod mahilway sa sala kag kamatayon ang matinumanon nga mga tawo. Ang pila sa sini nga tubig matigayon subong. Kabay pa nga indi lang naton pagbatunon ang pangagda nga magkari kag “magkuha sang tubig sang kabuhi nga wala sing bayad” kundi malipayon man kita nga ipaambit ini sa iban!

[Mga Nota]

[Retrato sa pahina 5]

Dalayawon gid ang mga pagpakamaayo nga maeksperiensiahan sang matinumanon nga katawhan sa paggahom sang Ginharian!