Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Ngaa importante gid nga huptan naton ang aton Cristianong integridad?

Ang paghupot naton sang aton integridad makabulig sa aton sa pagdampig sa soberanya ni Jehova bangod ginahigugma naton sia kag agod mapamatud-an naton nga butigon si Satanas. Ang aton integridad mangin man basihan sang paghukom sang Dios sa aton, gani importante ini sa aton paglaum sa palaabuton.—12/15, pahina 4-6.

• Ano ang pila ka titulo nga nagapakita sang pinasahi nga papel ni Jesus sa katuyuan sang Dios?

Ang bugtong nga Anak. Ang Pulong. Ang Amen. Ang Manugpatunga sang bag-ong katipan. Ang Mataas nga Saserdote. Ang ginsaad nga Binhi.—12/15, pahina 15.

• Ngaa ginsugo ni Elias ang iya alagad nga magtulok nayon sa dagat sang nangamuyo sia nga mag-ulan? (1 Hari 18:43-45)

Ginpakita ni Elias nga may ihibalo sia tuhoy sa siklo sang tubig. Ang mga panganod nga nagaporma sa ibabaw sang dagat ginahuyop sang hangin pakadto sa duta, kag didto ini nagabundak subong ulan.—1/1, pahina 15-16.

• Paano naton madugangan ang aton kalipay sa aton ministeryo?

Mahimo naton ihanda ang aton tagipusuon, kag magkonsentrar sa pagbulig sa iban. Magbantala kita upod ang tulumuron nga makasugod sing mga pagtuon sa Biblia. Kon makaatubang kita sang mga tawo nga wala nagasapak, mahimo naton ipasibu ang aton presentasyon agod maganyat ang interes sang mga tawo sa aton teritoryo.—1/15, pahina 8-10.

• Ang aro bala nga ginsambit sa Biblia amo man ang balatian nga aro karon?

Sa panahon sang Biblia, may impeksion sa bakterya nga ginatawag aro. (Lev. 13:4, 5) Ang Biblia nagsambit man sang aro nga makita sa mga panapton kag mga balay. Ina nga “aro” mahimo nagapatuhoy sa isa ka sahi sang tagiptip ukon agup-op. (Lev. 13:47-52)—2/1, pahina 19.

• Paano ang panudlo sang Biblia makaapektar sa panimuot sang isa ka Cristiano kag sa mga kustombre sa lubong?

Bisan pa nagapangasubo ang isa ka Cristiano sa kamatayon sang iya hinigugma, nahibaluan niya nga ang patay wala na sing hinalung-ong. Bisan pakalainon pa sia sang mga di-tumuluo, ginalikawan niya ang mga kustombre nga naangot sa pagpati nga ang patay mahimo makaimpluwensia sa mga buhi. Agod malikawan ang mga problema, ginasulat sang pila ka Cristiano ang ila pamilinbilin tuhoy sa mga kahimusan sa ila lubong.—2/15, pahina 29-31.

• Suno sa Salmo 1:1, ano ang tatlo ka butang nga dapat naton likawan agod mangin malipayon kita?

Ginsambit sang Biblia ang “laygay sang malauton,” ang “dalanon sang mga makasasala,” kag ang “lingkoran sang mga mayubiton.” Para mangin malipayon kita, dapat likawan naton ang mga mayubiton ukon yadtong nagasikway sang mga kasuguan sang Dios. Sa baylo, magkalipay kita sa kasuguan ni Jehova.—3/1, pahina 17.

• Ang “tolon-an ni Jaser” kag ang “Tolon-an sang Mga Inaway sang GINOO” amo bala ang nadula nga mga tulun-an sang Biblia?(Jos. 10:13; Num. 21:14)

Indi. Mahimo nga mga dokumento ini nga matigayon sadtong panahon sang Biblia nga indi inspirado apang gingamit sang mga manunulat sang Biblia subong reperensia.—3/15, pahina 32.

• Ano ang talalupangdon nga pagbag-o ang ginhimo sa moderno nga badbad sang Biblia sa Latin?

Sang 1979, gin-aprobahan ni Pope John Paul II ang Nova Vulgata, isa ka bag-o nga badbad sa Latin. Ang una nga edisyon sini nagaunod sang ngalan sang Dios nga Iahveh, sa pila ka teksto. (Ex. 3:15; 6:3) Apang, sang ang ikaduha nga edisyon ginpagua sang 1986, gin-islan ang Iahveh sang Dominus [Ginuo].—4/1, pahina 22.