Mga Pamangkot Gikan sa mga Bumalasa

San-o gintagbong si Satanas halin sa langit?—Bug. 12:1-9.

Wala ginasugid sang tulun-an sang Bugna kon san-o gid gintagbong si Satanas halin sa langit, pero ginsambit sini ang paagisod nga mga hitabo nga makabulig sa aton sa pagbulubanta kon san-o ini natabo. Una sa mga hitabo amo ang pagtukod sang Mesianiko nga Ginharian. Sa tapos sini ‘nagdabdab ang inaway sa langit.’ Nalutos si Satanas kag gintagbong halin sa langit.

Maathag nga ginapakita sa Kasulatan nga ang 1914 amo ang tuig nga natapos “ang gintalana nga mga tion sang mga pungsod” kag gintukod ang Ginharian. * (Luc. 21:24) Sugod sa pagtukod sang Ginharian, daw ano kadugay antes nag-inaway sa langit nga nagresulta sang pagtagbong kay Satanas?

“Ang dragon padayon nga nagtindog sa atubangan sang babayi nga buot na magbun-ag,” siling sang Bugna 12:4, “agod kon magbun-ag na sia, lamunon sini ang iya anak.” Ginapakita sini nga luyag ni Satanas nga dulaon dayon ang bag-o nabun-ag nga Ginharian sa tion mismo sang pagkabun-ag sini, kon posible. Bangod nagpasilabot si Jehova, wala natuman ni Satanas ang iya malaut nga ginatuyo, pero determinado sia kag wala untat sa iya panikasog nga halitan ang bag-o natukod nga Ginharian. Amo sini kon ngaa “si Miguel kag ang iya mga anghel” naghulag dayon sa pagtagbong sa ‘dragon kag sa iya mga anghel’ halin sa langit agod indi nila mahalitan ang Ginharian. Gani, makahinakop kita nga ang pagkalutos kag pagtagbong kay Satanas natabo dayon sa tapos sang pagkabun-ag sang Ginharian sang 1914.

Ang isa pa ka hitabo nga aton binagbinagon amo ang pagkabanhaw sang hinaplas nga mga Cristiano, nga suno sa mga pamatuod sa Kasulatan nagsugod sa tapos gintukod ang Ginharian. * (Bug. 20:6) Wala ginsambit nga may kaupod si Jesus nga hinaplas nga mga kauturan sang nakig-away sia sa dragon kag sa mga anghel sini. Gani ang inaway sa langit kag ang pagtagbong kay Satanas kag sang iya mga demonyo natabo antes magsugod ang pagkabanhaw sang mga kauturan ni Cristo.

Sa amo, wala ginsugid sang Biblia ang eksakto nga tion kon san-o si Satanas kag ang iya mga demonyo gintagbong halin sa langit. Pero, maathag nga natabo ini wala madugay pagkatapos nga naghari si Jesucristo sa langit sang 1914.

[Mga Nota]