Ngaa Sundon si Cristo?
Ngaa Sundon si Cristo?
“Kon ang bisan sin-o luyag magsunod sa akon, ipanghiwala niya ang iya kaugalingon . . . kag padayon nga magsunod sa akon.”—LUC. 9:23.
1, 2. Ngaa importante nga binagbinagon naton ang mga rason sa pagsunod kay Cristo?
NALIPAY gid si Jehova nga makita kamo nga mga interesado kag mga pamatan-on sa tunga sang iya mga sumilimba diri sa duta! Samtang padayon kamo nga nagatuon sing Biblia, nagatambong sa Cristianong mga miting, kag nagadugang ang inyo ihibalo sa nagaluwas sing kabuhi nga kamatuoran sa Pulong sang Dios, hunahuna sing serioso ang pangagda ni Jesus: “Kon ang bisan sin-o luyag magsunod sa akon, ipanghiwala niya ang iya kaugalingon kag pas-anon ang iya usok sang pag-antos sa adlaw-adlaw kag padayon nga magsunod sa akon.” (Luc. 9:23) Suno kay Jesus dapat mo ipanghiwala ang imo kaugalingon kag magsunod sa iya. Gani, importante nga binagbinagon naton kon ngaa dapat naton sundon si Cristo.—Mat. 16:13-16.
2 Kamusta naman ang mga nagasunod na sa tikang ni Jesucristo? Ginasugo kita nga ‘padayon nga himuon ini sing labi pa.’ (1 Tes. 4:1, 2) Bisan pa bag-o lang naton ginbaton ang matuod nga pagsimba ukon madugay na, ang pagbinagbinag kon ngaa dapat sundon si Cristo makabulig sa aton nga tumanon ang sugo ni Pablo nga sundon Sia sing labi pa sa aton kabuhi. Binagbinagon naton ang lima ka rason kon ngaa dapat naton sundon si Cristo.
Agod Mangin Suod Pa Gid kay Jehova
3. Ano ang duha ka paagi agod makilala naton si Jehova?
3 “Nagtindog karon si [apostol] Pablo sa tunga sang Areopago” kag nagsiling sa mga taga-Atenas: “Gintangdo [sang Dios] ang gintalana nga mga tion kag ang ginpahamtang nga mga dulunan sang puluy-an sang mga tawo, agod pangitaon nila ang Dios, nga nagapangapkap pa gani sila kag makita gid sia, apang, ang matuod, indi sia malayo sa tagsa sa aton.” (Binu. 17:22, 26, 27) Mahimo naton mapangita ang Dios kag makilala gid sia. Halimbawa, makita naton sa mga tinuga sang Dios ang madamo niya nga kinaiya kag ikasarang. Kon pamalandungan naton ang iya mga tinuga, madamo ini sing ginatudlo parte sa Manunuga. (Roma 1:20) Ginpakilala man sang Dios ang iya kaugalingon sa iya nasulat nga Pulong, ang Biblia. (2 Tim. 3:16, 17) Kon ‘hunahunaon naton kag pamalandungan ang iya mga binuhatan,’ sing labi pa, mas makilala naton si Jehova.—Sal. 77:12, Ang Pulong sang Dios.
4. Paano ang pagsunod kay Cristo makabulig sa aton nga mangin suod kay Jehova?
4 Ang isa pa ka paagi agod mangin suod pa gid kay Jehova amo ang pagsunod kay Cristo. Hunahunaa lamang ang himaya niya upod sa iya Amay “sang wala pa ang kalibutan.” (Juan 17:5) Sia “ang nahauna sa mga tinuga sang Dios.” (Bug. 3:14) Subong “ang panganay sa tanan nga tinuga,” madugay na sia nagkabuhi sa langit upod sa iya Amay nga si Jehova. Antes nangin tawo si Jesus sa duta, wala lamang sia nakig-upod sa iya Amay kundi malipayon sia nga nangabudlay upod sa Labing Gamhanan, kag wala na sing kaangtanan nga mas suod pa sangsa kaangtanan ni Jehova kag ni Jesus. Ginpanilagan ni Jesus ang paagi sang iya Amay sa paghimo sang mga butang, kag gintalupangod ang Iya mga pagtamod kag mga kinaiya. Gintun-an niya ini sing maayo kag ginpakita sa iya pagkabuhi. Gin-ilog gid niya ang mga kinaiya sang iya Amay. Gani, ining matinumanon nga Anak nangin kaangay gid sa iya Amay, amo nga gintawag sia sa Biblia nga “ang larawan sang di-makita nga Dios.” (Col. 1:15) Paagi sa pagsunod sing maayo kay Cristo, labi man kita nga magasuod kay Jehova.
Agod Mailog sing Maayo si Jehova
5. Ano ang makabulig sa aton nga mailog sing maayo si Jehova, kag ngaa?
5 ‘Ginhimo kita sa dagway sang Dios, suno sa kaangay niya,’ gani may ikasarang kita nga ipakita ang diosnon nga mga kinaiya. (Gen. 1:26) Ginpalig-on ni apostol Pablo ang mga Cristiano nga ‘mangin manug-ilog sang Dios, subong mga anak nga hinigugma.’ (Efe. 5:1) Ang pagsunod kay Cristo makabulig sa aton nga ilugon ang aton Amay sa langit. Wala na gid sing iban pa nga nag-ilog sa panghunahuna kag mga binuhatan ni Jehova kag makatudlo sa aton parte sa Iya sing labi pa sangsa kay Jesus. Sang ari si Jesus sa duta, wala lamang niya ginpakilala ang ngalan ni Jehova, kundi ginpakita pa niya kon ano sia nga sahi sang Persona. (Basaha ang Mateo 11:27.) Ginpakita ini ni Jesus sa iya hambal, buhat, panudlo, kag halimbawa.
6. Ano ang ginapakita sang mga panudlo ni Jesus parte kay Jehova?
6 Sa iya panudlo, ginpakita ni Jesus kon ano ang ginapatuman sang Dios kag kon ano ang iya pagtamod sa iya mga sumilimba. (Mat. 22:36-40; Luc. 12:6, 7; 15:4-7) Halimbawa, sa tapos niya masambit ang isa sa Napulo ka Sugo nga “indi ka magpanghilahi,” ginpaathag ni Jesus ang pagtamod sang Dios sa tagipusuon sang tawo antes pa sia maghimo sing sala. Nagsiling sia: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Ex. 20:14; Mat. 5:27, 28) Sang ginsambit ni Jesus ang pagtamod sang mga Fariseo sa Kasuguan nga “higugmaon mo ang imo isigkatawo kag dumti ang imo kaaway,” ginpakita niya ang pagtamod ni Jehova paagi sa pagsiling: “Padayon nga higugmaa ang inyo mga kaaway kag ipangamuyo ang mga nagahingabot sa inyo.” (Mat. 5:43, 44; Ex. 23:4; Lev. 19:18) Ang paghangop sa panghunahuna, pagtamod, kag mga ginapatuman sang Dios, magabulig sa aton nga mailog sia sing maayo.
7, 8. Ano ang matun-an naton parte kay Jehova sa halimbawa ni Jesus?
7 Ginpakilala man ni Jesus kon ano gid ang iya Amay paagi sa iya halimbawa. Mabasa naton sa Ebanghelyo nga si Jesus nagkaluoy sa mga nagakinahanglan kag nagpakita sing pasunaid sa mga nagaantos. Gin-akigan man niya ang mga disipulo sang ginsaway nila ang mga bata nga luyag magpalapit sa iya. Indi bala nga nagapakita ini sang balatyagon sang iya Amay? (Mar. 1:40-42; 10:13, 14; Juan 11:32-35) Hunahunaa kon paano ginpakita sang mga binuhatan ni Jesus ang panguna nga mga kinaiya sang Dios. Indi bala nga ang mga milagro nga ginhimo ni Cristo nagapakita nga gamhanan gid sia? Pero, wala niya gingamit ini nga gahom para sa iya kaayuhan ukon para halitan ang iban. (Luc. 4:1-4) Ginpakita man ni Jesus ang katarungan sang gintabog niya ang makagod nga mga negosyante sa templo. (Mar. 11:15-17; Juan 2:13-16) Ang iya panudlo kag maayo nga mga pulong agod pahulagon ang tagipusuon sang mga tawo nagapakita nga ang iya kaalam “daku pa kay Solomon.” (Mat. 12:42) Kon parte naman sa gugma, ang paghatag ni Jesus sang iya kabuhi para sa iban ginlaragway sing maayo sang Biblia sang magsiling ini: “Wala na sing gugma nga daku pa sa sini.”—Juan 15:13.
8 Nailog gid sing bug-os sang Anak sang Dios si Jehova sa tanan niya nga ginhambal kag ginhimo amo nga nakasiling sia: “Sia nga nakakita sa akon nakakita man sa Amay.” (Basaha ang Juan 14:9-11.) Kon ginailog naton si Cristo, kaangay lang nga ginailog man naton si Jehova.
Si Jesus Amo ang Isa nga Hinaplas ni Jehova
9. San-o kag paano nangin Isa nga Hinaplas sang Dios si Jesus?
9 Binagbinaga ang natabo sang tigragas sang 29 C.E. Ang 30 anyos nga si Jesus nagkadto kay Juan Bautista. “Sang nabawtismuhan na si Jesus, gilayon nga nagbutwa sia sa tubig; kag, yari karon! ang langit nabuksan, kag nakita niya nga nagapanaug ang kaangay sa salampati nga espiritu sang Dios nga nagakunsad sa iya.” Sa sini nga tion nangin Cristo sia ukon Mesias. Ginpahibalo man ni Jehova nga si Jesus amo ang iya Isa nga Hinaplas, nga nagasiling: “Ini ang akon Anak, ang hinigugma, nga ginakahamut-an ko.” (Mat. 3:13-17) Daku gid ini nga rason kon ngaa sundon naton si Cristo!
10, 11. (a) Paano gingamit ang titulo nga “Cristo” sa pagpatuhoy kay Jesus? (b) Ngaa dapat gid naton sundon si Jesucristo?
10 Sa Biblia, ang titulo nga “Cristo” nagapatuhoy kay Jesus sa lainlain nga paagi subong sang Jesucristo, Cristo Jesus, kag Cristo. Si Jesus mismo ang una nga naggamit sang termino nga “Jesucristo”—ngalan nga ginsundan sang titulo. Sa pangamuyo sa iya Amay, nagsiling sia: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Ang Jesucristo diri nagapadaku sang isa nga ginpadala sang Dios kag nangin Isa nga Hinaplas. Kon ibutang ang titulo antes sang ngalan, subong sang “Cristo Jesus,” ang ginapadaku naman amo ang posisyon, sa baylo nga ang persona. (2 Cor. 4:5) Ang ekspresyon naman nga may definite article antes sang titulo pareho sa “ang Cristo” nagapadaku gihapon sang posisyon ni Jesus subong ang Mesias.—Juan 4:29.
11 Bisan ano man ang paggamit sang titulo nga “Cristo” may kaangtanan kay Jesus, ginapadaku sini ang importante nga kamatuoran: Ang Anak sang Dios nagkari diri sa duta subong tawo kag nagbantala sang kabubut-on sang iya Amay. Pero indi lamang sia isa ka ordinaryo nga tawo ukon manalagna kundi Isa nga Hinaplas ni Jehova. Dapat gid naton sundon ining Isa nga Hinaplas.
Si Jesus Amo Lamang ang Paagi Agod Maluwas
12. Ano ang ginhambal ni Jesus kay Tomas nga may importante nga kahulugan para sa aton?
12 Ang isa pa ka importante nga rason kon ngaa sundon ang Mesias amo ang ginsiling ni Jesus sa iya matutom nga mga apostoles, nga ginhambal niya pila lang ka oras antes sia ginpatay. Bilang sabat sa pamangkot ni Tomas parte sa ginsiling ni Jesus nga magalakat sia kag magahanda sing duog para sa ila, si Jesus nagsiling: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:1-6) Nagapakighambal sadto si Jesus sa iya 11 ka matutom nga apostoles. Ginsaaran niya sila sing duog sa langit, pero ang iya ginhambal may importante man nga kahulugan para sa mga may paglaum nga mabuhi sing wala katapusan sa duta. (Bug. 7:9, 10; 21:1-4) Paano?
13. Sa ano nga kahulugan nga si Jesus amo “ang dalan”?
13 Si Jesucristo amo “ang dalan.” Buot silingon, sia lamang ang paagi agod makapalapit kita sa Dios. Matuod ini kon parte sa pangamuyo, kay pamatian lamang sang Amay ang bisan ano nga ginapangabay naton suno sa Iya kabubut-on, kon mangamuyo kita paagi kay Jesus. (Juan 15:16) Pero, si Jesus man “ang dalan” sa iban pa nga paagi. Nahamulag ang katawhan sa Dios bangod sa sala. (Isa. 59:2) Pero, ginhatag ni Jesus “ang iya kalag subong gawad nga kabaylo sang madamo.” (Mat. 20:28) Subong resulta, ang Biblia nagapaathag: “Ang dugo ni Jesus . . . nagatinlo sa aton gikan sa tanan nga sala.” (1 Juan 1:7) Gani, paagi sa Anak makapasag-uli kita sa Dios. (Roma 5:8-10) Mangin suod kita sa Dios paagi sa pagtuo kag pagtuman kay Jesus.—Juan 3:36.
14. Sa ano nga kahulugan nga si Jesus amo “ang kamatuoran”?
14 Si Jesus amo “ang kamatuoran” indi lamang bangod ginahambal niya kag ginakabuhi ang kamatuoran, kundi bangod ang tanan nga tagna nga ginsulat parte sa Mesias natuman sa iya. “Bisan pa daw ano kadamo ang mga saad sang Dios,” sulat ni apostol Pablo, “nangin Huo ini paagi sa iya.” (2 Cor. 1:20) Pati ang “landong sang mga butang nga magaabot” nga ara sa Mosaikong Kasuguan nangin katunayan kay Cristo Jesus. (Heb. 10:1; Col. 2:17) Kay Jesus nasentro ang tanan nga tagna, kag nagabulig ini sa aton nga mahangpan ang iya importante nga papel sa pagtuman sang katuyuan ni Jehova. (Bug. 19:10) Agod makabenepisyo kita sa katumanan sang katuyuan sang Dios sa aton, dapat naton sundon ang Mesias.
15. Sa ano nga kahulugan nga si Jesus amo “ang kabuhi”?
15 Si Jesus amo “ang kabuhi” bangod ginbakal niya sang iya dugo ang mga tawo, kag ang kabuhi nga wala katapusan isa ka dulot nga ginahatag sang Dios “paagi kay Cristo Jesus nga aton Ginuo.” (Roma 6:23) Si Jesus man “ang kabuhi” sang mga napatay. (Juan 5:28, 29) Dugang pa, hunahunaa ang iya himuon subong Mataas nga Saserdote sa tion sang Isa ka Libo ka Tuig nga Paghari. Tigayunon niya ang wala katapusan nga pagtubos gikan sa sala kag kamatayon para sa iya mga sakop diri sa duta.—Heb. 9:11, 12, 28.
16. Ngaa sundon naton si Jesus?
16 Kon amo, ang sabat ni Jesus kay Tomas may importante nga kahulugan para sa aton. Si Jesus amo ang dalan, ang kamatuoran, kag ang kabuhi. Sia ang ginpadala sang Dios sa kalibutan, agod ang kalibutan maluwas paagi sa iya. (Juan 3:17) Kag wala sing makakadto sa Amay kon indi paagi sa iya. Ang Biblia maathag nga nagasiling: “Wala sing kaluwasan sa bisan kay sin-o pa, kay wala sing iban nga ngalan sa idalom sang langit nga ginhatag sa mga tawo nga paagi sa iya dapat maluwas kita.” (Binu. 4:12) Gani, ano man ang aton ginapatihan sang una, mangin maalamon kita kon magtuo kag magsunod kita kay Jesus. Sa amo, matigayon naton ang kabuhi.—Juan 20:31.
Ginasugo Kita nga Pamatian si Cristo
17. Ngaa importante gid nga pamatian naton ang Anak sang Dios?
17 Nasaksihan nanday Pedro, Juan, kag Santiago ang pagbaylo dagway ni Jesus. Sadto nga tion, nabatian nila ang isa ka tingog gikan sa langit nga nagasiling: “Ini ang akon Anak, ang isa nga pinili. Magpamati kamo sa iya.” (Luc. 9:28, 29, 35) Importante gid nga tumanon naton ang sugo nga pamatian ang Mesias.—Basaha ang Binuhatan 3:22, 23.
18. Paano kita makapamati kay Jesucristo?
18 Nalakip sa pagpamati kay Jesus ang ‘pagtulok sing maayo sa iya, kag pagbinagbinag sing maayo sa iya halimbawa.’ (Heb. 12:2, 3) Gani, maayo nga “hatagan naton sang labaw pa sa kinaandan nga igtalupangod ang mga butang” nga aton nabasa parte sa iya sa Biblia kag sa publikasyon sang “matutom kag mainandamon nga ulipon,” subong man ang aton nabatian sa Cristianong mga miting. (Heb. 2:1; Mat. 24:45) Subong iya mga karnero, malangkagon kita nga magpamati kay Jesus kag magsunod sa iya.—Juan 10:27.
19. Ano ang makabulig sa aton agod padayon naton nga masunod si Cristo?
19 Magamadinalag-on bala kita sa pagsunod kay Cristo sing padayon, bisan ano pa ang matabo? Huo, kon ‘padayon nga sundon naton ang sulundan sang makapapagros nga mga pulong’ paagi sa pag-aplikar sang aton natun-an “nga may pagtuo kag gugma may kaangtanan kay Cristo Jesus.”—2 Tim. 1:13.
Ano ang Imo Natun-an?
• Ngaa ang pagsunod kay Cristo magapasuod pa gid sa aton kay Jehova?
• Ngaa kaangay lang nga ginailog naton si Jehova kon ginailog naton si Jesus?
• Ngaa si Jesus amo “ang dalan kag ang kamatuoran kag ang kabuhi”?
• Ngaa dapat kita magpamati sa Isa nga Hinaplas ni Jehova?
[Mga Pamangkot sa Pagtinuon]
[Retrato sa pahina 29]
Ginapakita sang mga panudlo ni Jesus ang mataas nga panghunahuna ni Jehova
[Retrato sa pahina 30]
Dapat naton sundon sing matutom ang Isa nga Hinaplas ni Jehova
[Retrato sa pahina 32]
Si Jehova nagsiling: “Ini ang akon Anak . . . magpamati kamo sa iya”
