Ginasunod Mo Bala ang “Labaw gid nga Paagi” sang Gugma?

“ANG Dios gugma.” Ini nga pinamulong ni apostol Juan nagapakilala nga ang pinakapanguna nga kinaiya sang Dios amo ang gugma. (1 Juan 4:8) Bangod sa gugma sang Dios sa katawhan, posible kita nga makapalapit kag makatigayon sing maayo nga kaangtanan sa iya. Sa ano pa nga paagi makaapektar ang gugma sang Dios sa aton? Madamo ang nagasiling: “Ginadihon kita sang mga butang nga aton ginahigugma.” Matuod ina. Apang, ginadihon man kita sang persona nga ginahigugma naton kag sang isa nga nagahigugma sa aton. Bangod gintuga kita sa dagway sang Dios, sarang naton mailog ang gugma sang Dios sa aton kabuhi. (Gen. 1:27) Gani, si apostol Juan nagsulat nga ginahigugma naton ang Dios “bangod sia ang una nga naghigugma sa aton.”—1 Juan 4:19.

Ang Apat ka Sahi sang Gugma

Gintawag ni Pablo ang gugma subong ang “labaw gid nga paagi.” (1 Cor. 12:31) Ngaa amo sini ang paglaragway niya sa gugma? Ano nga sahi sang gugma ang ginapatuhuyan ni Pablo? Agod aton mahibaluan, usisaon naton sing maayo ang kahulugan sang tinaga nga “gugma.”

Ang mga Griego sang una may apat ka lainlain nga tinaga para sa gugma: stor·geʹ, eʹros, phi·liʹa, kag a·gaʹpe. Sa sining apat, ang a·gaʹpe amo ang termino nga gingamit agod ilaragway ang Dios subong “gugma.” * Nahanungod sini nga gugma, si Propesor William Barclay sa iya New Testament Words nagsiling: “Ang agapē may yara kaangtanan sa hunahuna: Indi ini isa ka kinaugali nga balatyagon sang aton tagipusuon; isa ini ka prinsipio nga dapat panikasugan naton nga ikabuhi. Ang agapē ginapakita sing kinabubut-on.” Sa sini nga konteksto, ang a·gaʹpe isa ka sahi sang gugma nga ginatuytuyan sang prinsipio, apang masami nga ginaupdan ini sing mabaskog nga balatyagon. Bangod may maayo kag malain nga mga prinsipio, dapat gid nga magpatuytoy ang mga Cristiano sa maayo nga mga prinsipio nga ginpahamtang mismo ni Jehova sa Biblia. Kon ipaanggid naton ang paglaragway sang Biblia sa a·gaʹpe kag sa iban nga termino nga gingamit sang Biblia sa paglaragway sa gugma, mas mahangpan naton ang sahi sang gugma nga dapat naton ipakita.

Gugma sa mga Katapo sang Pamilya

Makalilipay nga mangin bahin sang isa ka mahigugmaon kag nahiusa nga pamilya! Ang stor·geʹ amo ang Griego nga tinaga nga masami ginagamit sa pagpatuhoy sa kinaugali nga pagpalangga nga nabatyagan sang isa sa mga katapo sang iya pamilya. Ang mga Cristiano nagapanikasog nga makapakita  sang gugma sa mga miembro sang ila pamilya. Apang, si Pablo nagtagna nga sa katapusan nga mga adlaw, ang kalabanan nga mga tawo “wala sing kinaugali nga pagpalangga.” *—2 Tim. 3:1, 3.

Makapasubo nga sa karon amat-amat na nga nagakadula ang kinaugali nga gugma sa miembro sang pamilya. Ngaa madamo sang nagabusong ang nagapahulog sang ila bata? Ngaa madamo nga pamilya ang wala na nagakabalaka sa ila tigulang nga mga ginikanan? Ngaa madamo ang nagabulagay? Ang sabat: Nagakadula na ang kinaugali nga pagpalangga.

Dugang pa, ang Biblia nagatudlo nga “ang tagiposoon malimbongon labaw sa tanan nga butang.” (Jer. 17:9) Ang gugma sa pamilya nagadalahig sa aton tagipusuon kag sa aton mga balatyagon. Apang talalupangdon nga gingamit ni Pablo ang a·gaʹpe sa paglaragway sa gugma nga dapat ipakita sang bana sa iya asawa. Ginpaanggid ni Pablo ina nga gugma sa gugma nga ginapakita ni Cristo sa kongregasyon. (Efe. 5:28, 29) Ini nga gugma napasad sa mga prinsipio nga ginhatag ni Jehova, ang Tagtukod sang kahimusan sang pamilya.

Ang aton matuod nga gugma sa mga miembro sang pamilya nagapahulag sa aton nga magpakita sing kabalaka sa aton tigulang nga mga ginikanan ukon tungdan ang aton obligasyon sa aton kabataan. Magapahulag man ini sa mga ginikanan nga disiplinahon ang ila kabataan sing mahigugmaon kon kinahanglanon kag magapugong ini sa mga ginikanan nga magpadala sa ila emosyon nga masami nagaresulta sa sobra nga pagkamatinuguton sa kabataan.—Efe. 6:1-4.

Romantiko nga Gugma kag mga Prinsipio sa Biblia

Ang gugma sa ulot sang mag-asawa isa ka dulot halin sa Dios. (Hulu. 5:15-17) Apang, ang tinaga nga eʹros, nga nagapatuhoy sa romantiko nga gugma, wala gingamit sang inspirado nga mga manunulat sang Biblia. Ngaa? Pila ka tuig ang nagligad, Ang Lalantawan nagkomento: “Ang bug-os nga kalibutan karon daw nagahimo sing sala nga ginhimo sadto sang mga Griego. Nagsimba sila kay Eros subong isa ka dios, nagyaub sila sa iya altar kag naghalad sa iya. . . . Apang ginapakita sang maragtas nga inang pagsimba sa seksuwal nga gugma nagdul-ong lamang sa kahuy-anan, pagpatuyang, kag pagkabungkag sang pamilya. Mahimo nga amo sina ang rason kon ngaa wala gingamit sang mga manunulat sa Biblia ini nga tinaga.” Para malikawan naton ang relasyon nga napasad lamang sa pisikal nga katahom, ang romantiko nga balatyagon dapat nakontrol sang mga prinsipio sa Biblia. Gani pamangkuta ang imo kaugalingon, ‘Ang akon bala romantiko nga balatyagon sa akon tiayon, nobyo ukon nobya nabalanse sa matuod nga gugma?’

 Sa tion sang ‘paghingurusgan sang pagkapamatan-on,’ tuman kabaskog ang seksuwal nga handum. Apang, ang mga pamatan-on nga nagasunod sa mga prinsipio sang Biblia nagapabilin nga matinlo sa moral. (1 Cor. 7:36; Col. 3:5) Ginatamod naton ang pag-asawahay subong sagrado nga dulot gikan kay Jehova. Si Jesus nagsiling tuhoy sa mag-asawa: “Ang gintingob sang Dios indi pagbulagon sang tawo.” (Mat. 19:6) Ang pag-updanay sang mag-asawa indi lamang bangod nagaluyagay sila, kundi ginatamod nila ang pag-asawahay subong serioso nga kaangtanan. Kon may problema kita sa pag-asawahay, wala naton ini ginapabay-an kundi ginapanikasugan naton nga ipakita ang diosnon nga mga kinaiya agod mangin malipayon ang aton pamilya. Ina nga mga panikasog magadul-ong sa dayon nga kalipay.—Efe. 5:33; Heb. 13:4.

Gugma sa mga Abyan

Ang kabuhi mangin makatalaka kon wala sing abyan! Ang isa ka hulubaton sa Biblia nagasiling: “May abyan nga mahirup pa labi sa utud.” (Hulu. 18:24) Luyag ni Jehova nga may matuod kita nga mga abyan. Nahibaluan naton ang suod nga pag-abyanay ni David kag ni Jonatan. (1 Sam. 18:1) Kag ang Biblia nagasiling nga ‘palangga’ ni Jesus si apostol Juan. (Juan 20:2) Ang Griego nga tinaga para sa “pagpalangga” ukon “pag-abyanay” amo ang phi·liʹa. Wala sing malain kon may suod ka nga abyan sa kongregasyon. Apang, sa 2 Pedro 1:7, ginapalig-on kita nga idugang ang gugma (a·gaʹpe) sa aton “utudnon nga pagpalangga” (phi·la·del·phiʹa, kombinasyon sang phiʹlos, ang Griego nga tinaga para sa “abyan,” kag a·del·phosʹ, ang Griego nga tinaga para sa “utod”). Agod magpadayon ang pag-abyanay, kinahanglan nga sundon naton ini nga laygay. Gani, maayo gid nga pamangkuton naton ang aton kaugalingon, ‘Ang akon bala pagpakig-abyan nabalanse sa mga prinsipio sang Biblia?’

Ang Pulong sang Dios nagabulig sa aton nga malikawan ang paboritismo sa aton mga pagpakig-angot sa aton mga abyan. Wala kita sing doble nga talaksan sa pagpakig-angot sa mga tawo. Halimbawa, ginatolerar bala naton ang aton mga abyan, pero ginaestriktuhan ang iban? Dugang pa, wala kita nagapanginto para makapakig-abyan. Labaw sa tanan, ang pag-aplikar sa mga prinsipio sang Biblia nagahatag sa aton sing paghantop nga makabulig sa aton sa pagpili sang mga abyan. Paagi sini, malikawan naton ang ‘malain nga pagpakig-upod nga nagapalain sa aton mapuslanon nga mga batasan.’—1 Cor. 15:33.

Ang Pinasahi nga Higot sang Gugma!

Ang higot nga nagapahiusa sa mga Cristiano pinasahi gid! Si apostol Pablo nagsulat: “Ang inyo gugma mangin indi salimpapaw. . . . Sa utudnon nga gugma magpakita kamo sang mapinalanggaon nga balatyagon sa isa kag isa.” (Roma 12:9, 10) Ang mga Cristiano may ‘gugma (a·gaʹpe) nga indi salimpapaw.’ Ini nga gugma indi lang isa ka balatyagon sa aton tagipusuon. Sa baylo, napasad ini sa mga prinsipio sa Biblia. Apang, si Pablo nagsiling man parte sa “utudnon nga gugma” (phi·la·del·phiʹa) kag “mapinalanggaon nga balatyagon” (phi·loʹstor·gos, kombinasyon sang phiʹlos kag stor·geʹ). Suno sa isa ka iskolar, ang “utudnon nga gugma” isa ka “mapinalanggaon nga gugma nga nagapakita sing kaayo, simpatiya, kag nagahatag sing bulig.” Kon iaplikar ini upod sa a·gaʹpe, nagapauswag ini sang suod nga pag-updanay sang mga sumilimba ni Jehova. (1 Tes. 4:9, 10) Ang iban pa nga ekspresyon nga ginbadbad nga “mapinalanggaon nga balatyagon” makaisa lamang ginsambit sa Biblia, kag nagapatuhoy ini sa suod nga balatyagon, pareho sang balatyagon sang isa sa iya pamilya. *

Ang higot nga nagapahiusa sa matuod nga Cristiano amo ang kombinasyon sang gugma sa pamilya kag gugma sa matuod nga mga abyan, kag ginagiyahan ini sang gugma nga napasad sa mga prinsipio sa Biblia. Ang Cristianong kongregasyon indi lamang isa ka asosasyon ukon sekular nga organisasyon, kundi isa ini ka suod nga pamilya nga nahiusa sa pagsimba kay Jehova nga Dios. Ginakabig naton ang kada isa subong pamilya, amo nga ginatawag naton sila nga mga kauturan. Bangod bahin sila sang aton espirituwal nga pamilya, ginahigugma naton sila subong mga abyan, kag pirme naton sila ginapakig-angutan suno sa mga prinsipio sang Biblia. Kabay pa nga padayon naton nga pabakuron ang higot sang gugma nga nagapahiusa kag nagapakilala sa matuod nga Cristiano nga kongregasyon.—Juan 13:35.

[Mga Nota]

[Blurb sa pahina 12]

Paano ka makabulig agod magbakod ang higot sang gugma nga nagapahiusa sa aton?