Iluga si Jesus—Magbantala nga May Kaisog

“Nagtipon kami sang kaisog . . . agod masugid sa inyo ang maayong balita.”—1 TES. 2:2.

1. Ngaa makagalanyat gid ang maayong balita sang Ginharian?

MAKALILIPAY gid kon makabati kita sing maayo nga balita! Kag ang pinakamaayo sa tanan nga balita amo ang maayong balita sang Ginharian sang Dios. Ini nga balita nagapasalig sa aton nga madula na ang pag-antos, balatian, kasakit, kasubo, kag kamatayon. Ang mga nagabaton sini nga mensahe makatigayon sang kabuhi nga wala sing katapusan. Ginapakita man sini ang katuyuan sang Dios, kag kon ano ang himuon naton agod matigayon ang maayo nga kaangtanan sa iya. Mahimo maghunahuna ka nga malipay gid ang bisan sin-o nga makabati sining balita nga ginsugid ni Jesus sa katawhan. Apang, makapasubo nga indi amo sina ang nagakatabo.

2. Ipaathag ang ginsiling ni Jesus: “Nagkari ako sa pagpahanabo sing pagbinahinbahin.”

² Si Jesus nagsiling sa iya mga disipulo: “Indi kamo maghunahuna nga nagkari ako sa pagdala sing paghidait sa duta; nagkari ako sa pagdala, indi sing paghidait, kundi sing espada. Kay nagkari ako sa pagpahanabo sing pagbinahinbahin, ang lalaki batok sa iya amay, kag ang anak nga babayi batok sa iya iloy, kag ang lamharon nga asawa batok sa iya ugangan nga babayi. Sa pagkamatuod, ang mga kaaway sang tawo amo ang mga katapo mismo sang iya panimalay.” (Mat. 10:34-36) Sa baylo nga batunon ang maayong balita, ginasikway ini sang kalabanan nga tawo. Ang iban ginpamatukan pa gani sang mga katapo sang ila pamilya bangod sa pagbantala sini.

3. Ano ang kinahanglan naton agod makapadayon kita sa pagbantala?

 ³ Ang kamatuoran nga ginabantala naton pareho man sa kamatuoran nga ginbantala ni Jesus. Kon mabatian ini sang mga tawo sa karon, ang ila reaksion pareho man sa reaksion sang mga tawo sang iya panahon. Mapaabot gid naton ini kay nagsiling si Jesus sa iya mga disipulo: “Ang ulipon indi daku pa sa iya agalon. Kon ginhingabot nila ako, hingabuton man nila kamo.” (Juan 15:20) Sa madamo nga lugar, wala kita direkta nga ginahingabot, apang ginapakanubo kita kag wala ginasapak. Gani, kinahanglan naton ang pagtuo kag kaisog agod makapadayon kita sa aton hilikuton nga pagbantala sing maayong balita.—Basaha ang 2 Pedro 1:5-8.

4. Ngaa kinahanglan ni Pablo nga ‘magtipon sing kaisog’ sa pagbantala?

⁴ Mahimo nga nabudlayan ka man kon kaisa sa pagministeryo, ukon may mga tion pa gani nga nakulbaan ka. Kon amo sini ang imo ginabatyag, wala ka nagaisahanon. Bisan pa si apostol Pablo maisog nga manugbantala kag may madalom nga paghangop sa kamatuoran, may mga tion nga nabudlayan sia sa pagbantala. Si Pablo nagsulat sa mga Cristiano sa Tesalonica: “Sa tapos kami mag-antos anay kag ginmaltrato (subong sang nahibaluan ninyo) sa Filipos, nagtipon kami sang kaisog paagi sa aton Dios agod masugid sa inyo ang maayong balita sang Dios nga may daku nga pagpanikasog.” (1 Tes. 2:2) Sa Filipos, ginbunal sang mga awtoridad si Pablo kag ang iya kaupod nga si Silas sing mga bilugon. Ginbilanggo man sila kag ginbutang ang ila mga tiil sa mga pandog. (Binu. 16:16-24) Bisan pa sini, ‘nagtipon sing kaisog’ si Pablo kag si Silas agod makapadayon sa pagbantala. Paano naton sila mailog? Agod masabat ini, binagbinagon naton kon ano ang nagbulig sa mga alagad sang Dios sa panahon sang Biblia nga mabantala nga may kaisog ang kamatuoran tuhoy kay Jehova, kag hibaluon naton kon paano naton mailog ang ila halimbawa.

Kinahanglan ang Kaisog Agod Maatubang ang mga Pagpamatok

5. Ngaa kinahanglan pirme nga mangin maisog ang mga mainunungon kay Jehova?

⁵ Siempre, ang pinakamaayo nga halimbawa sang kaisog amo si Jesucristo. Sugod sang gintuga ang mga tawo, kinahanglan pirme nga mangin maisog yadtong mga mainunungon kay Jehova. Ngaa? Pagkatapos sang pagrebelde sa Eden, nagtagna si Jehova nga may mahanabo nga kaawayon sa tunga sang mga nagaalagad sa Dios kag sa mga nagaalagad kay Satanas. (Gen. 3:15) Ini nga kaawayon nakita dayon sang si Abel, nga isa ka matarong nga tawo, ginpatay sang iya utod. Sang ulihi, ginhingabot man si Enoc, isa pa ka matutom nga tawo nga nagkabuhi antes sang Anaw. Gintagna niya nga magaabot ang Dios upod sa Iya balaan nga mga linaksa agod hukman ang mga di-diosnon. (Jud. 14, 15) Ini nga mensahe indi gid luyag nga mabatian sang madamo nga tawo. Gindumtan sang mga tawo si Enoc kag mahimo nga ginpatay pa gani sia kon wala ginpalip-ot ni Jehova ang iya kabuhi. Daku gid nga kaisog ang ginpakita ni Enoc!—Gen. 5:21-24.

6. Ngaa kinahanglan gid ni Moises ang kaisog sa pagpakighambal kay Paraon?

⁶ Hunahunaa man ang kaisog nga ginpakita ni Moises sang nagpakighambal sia kay Paraon, isa ka gumalahom nga ginatamod indi lang subong tiglawas sang mga dios, kundi subong isa mismo ka dios nga anak ni Ra, ang dios sang adlaw. Pareho sang iban nga mga Paraon, mahimo nga ginsimba man niya ang iya mismo imahen. Ang bisan ano nga ihambal ni Paraon ginakabig nga kasuguan nga dapat tumanon. Ang gamhanan, arogante, kag batinggilan nga si Paraon wala maanad nga tudluan sang iban kon ano ang iya dapat himuon. Apang, ang isa ka mapainubuson nga manugbantay sang karnero nga si Moises sulit-sulit nga nakighambal kay Paraon bisan pa wala sia gin-agda ukon ginpatawag. Kag ano ang gintagna ni Moises? Gintagna niya nga magaabot ang mga kalalat-an. Kag ano ang iya ginpangabay? Ginpangabay niya si Paraon nga tugutan ang iya minilyon ka ulipon nga maggua sa Egipto. Kinahanglan bala ni Moises ang kaisog? Huo gid!—Num. 12:3; Heb. 11:27.

7, 8. (a) Ano nga mga pagtilaw ang naatubang sang matutom nga mga alagad sang una? (b) Paano sila nakapakita sing kaisog agod makapanindugan sa matuod nga pagsimba?

⁷ Sang masunod nga mga siglo, ang mga manalagna kag ang iban pa nga matutom nga mga alagad sang Dios nagpabilin nga maisog sa ila panindugan  sa putli nga pagsimba. Naeksperiensiahan nila ang mga paghingabot sang mga alagad ni Satanas. Si Pablo nagsiling: “Ginbato sila, gintilawan sila, gin-utod sila paagi sa lagari, ginpamatay sila paagi sa espada, nagdalangdalang sila nga napanaptan sing mga panit sang mga karnero kag sang mga kanding, samtang yara sila sa kinawad-on, sa kapipit-an, sa idalom sang pagpamintas.” (Heb. 11:37) Ano ang nagbulig sa mga mainunungon nga alagad sang Dios nga magpabilin nga malig-on? Ginpakita ni Pablo sa nahauna nga mga bersikulo kon ano ang naghatag sing kalig-on kanday Abel, Abraham, Sara, kag sa iban pa para makabatas. Nagsiling sia: “Wala nila matigayon ang katumanan sang mga saad, apang [sa pagtuo] nakita nila ini gikan sa malayo kag malipayon nga ginbaton ini.” (Heb. 11:13) Wala duhaduha nga ang mga manalagna subong nanday Elias, Jeremias, kag iban pa nga matutom nga mga tawo sang una, maisog nga nanindugan para sa matuod nga pagsimba. Nabuligan sila nga makabatas paagi sa ila pagsalig sa mga saad ni Jehova.—Tito 1:2.

⁸ Ang matutom nga mga tawo sang una nagalaum sa isa ka masanag kag makalilipay nga palaabuton. Sa tapos sila mabanhaw, amat-amat sila nga mangin himpit kag ‘pagahilwayon gikan sa pagkaulipon sa pagkamadinulunton’ paagi sa bulig ni Cristo Jesus subong saserdote kag sang iya 144,000 ka kaupod. (Roma 8:21) Dugang pa, si Jeremias kag ang iban pa nga matutom nga mga alagad sang Dios sang una nagpakita sing kaisog bangod sa pasalig ni Jehova nga makita sa iya ginsaad kay Jeremias: “Magapakig-away sila sa imo; apang indi sila makadaug sa imo, kay ako nagaupud sa imo, nagasiling ang GINOO, sa pagluwas sa imo.” (Jer. 1:19) Sa karon, mapalig-on man kita kon pamalandungan naton ang mga saad sang Dios sa palaabuton kag ang iya pasalig nga amligan kita gikan sa mga impluwensia nga makaguba sang aton kaangtanan sa iya.—Hulu. 2:7; basaha ang 2 Corinto 4:17, 18.

Napahulag si Jesus sang Gugma nga Magbantala nga May Kaisog

9, 10. Sa ano nga mga paagi nagpakita si Jesus sing kaisog sa atubang (a) sang relihioso nga mga lider, (b) sang grupo sang mga soldado, (c) sang mataas nga saserdote, (d) ni Pilato?

⁹ Ang aton Huwaran nga si Jesus nagpakita sing kaisog sa nanuhaytuhay nga paagi. Halimbawa, bisan gindumtan sia sang mga tawo nga may mataas nga posisyon, ginsugid gihapon ni Jesus ang mensahe nga luyag sang Dios nga mahibaluan nila. Maisog niya nga ginbuyagyag ang relihioso nga mga lider bangod sang ila pagpakamatarong sa kaugalingon kag butig nga mga panudlo. Direkta kag maathag nga ginpakamalaut sila ni Jesus. Isa ka bes nagsiling sia: “Kailo kamo, mga escriba kag mga Fariseo, mga salimpapaw! bangod kaangay kamo sa ginpaputi nga mga lulubngan, nga matahom sa gua apang sa sulod puno sang mga tul-an sang patay nga mga tawo kag sang tanan nga sahi sang kahigkuan. Sa sini nga paagi kamo man, daw matarong kon tulukon sang mga tawo, apang sa sulod puno kamo sang pagkasalimpapaw kag pagkamalinapason.”—Mat. 23:27, 28.

¹⁰ Sang ginpalapitan si Jesus sang grupo sang mga soldado sa hardin sang Getsemane, maisugon nga nagpakilala sia sa ila. (Juan 18:3-8) Sang ulihi, gindala sia sa atubangan sang Sanhedrin kag ginpamangkot sang mataas nga saserdote. Bisan nahibaluan niya nga ang mataas nga saserdote nagapangita sing rason agod patyon sia, maisugon nga ginsiling ni Jesus nga Sia ang Cristo kag ang Anak sang Dios. Nagsiling man si Jesus nga makita nila sia nga “nagalingkod sa tuo sang Gamhanan kag nagakari upod sa mga panganod sang langit.”  (Mar. 14:53, 57-65) Wala madugay, nag-atubang si Jesus kay Pilato, nga mahimo makahilway sa iya. Apang si Jesus wala nagsabat sa mga panumbungon batok sa iya. (Mar. 15:1-5) Sa sini nga mga kahimtangan kinahanglan gid ang kaisog.

11. Ano ang kaangtanan sang kaisog sa gugma?

¹¹ Si Jesus nagsiling kay Pilato: “Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.” (Juan 18:37) Ginhatagan ni Jehova sing sugo si Jesus nga ibantala ang maayong balita, kag nalipay si Jesus nga himuon ini kay ginahigugma niya ang iya langitnon nga Amay. (Luc. 4:18, 19) Ginahigugma man ni Jesus ang mga tawo. Nahibaluan niya nga mabudlay ang ila kahimtangan sa kabuhi. Sing kaanggid, bangod sang aton tudok nga gugma kay Jehova kag sa mga tawo, nagabantala kita nga may kaisog kag wala sing kahadlok.—Mat. 22:36-40.

Ang Balaan nga Espiritu Nagabulig sa Aton sa Pagbantala nga May Kaisog

12. Ano ang naghatag sing kalipay sa mga disipulo sang una?

¹² Mga pila ka semana sa tapos napatay si Jesus, nalipay ang mga disipulo nga may gindugang si Jehova nga bag-o nga mga disipulo sa pag-upod sa ila. Sa isa lamang ka adlaw, mga 3,000 ka Judiyo kag mga proselita ang ginbawtismuhan! Naghalin sila sa madamo nga kadutaan kag nagkadto sa Jerusalem agod saulugon ang Pentecostes. Mahimo nga gin-istoryahan sang tanan sa Jerusalem ang natabo sa sina nga tion! Nagasiling ang Biblia: “Hinadlukan ang tagsa ka kalag, kag madamo nga kalatingalahan kag mga tanda ang nahanabo paagi sa mga apostoles.”—Binu. 2:41, 43.

13. Ngaa nangamuyo ang mga masigkatumuluo nga hatagan sila sing kaisog, kag ano ang resulta?

¹³ Naakig gid ang relihioso nga mga lider kay Pedro kag kay Juan amo nga gindakop nila sila, ginbilanggo sing isa ka gab-i, kag ginmanduan nga indi na maghambal parte kay Jesus. Sang ginhilway na sila, ginsugid nila sa ila masigkatumuluo ang natabo, kag nangamuyo sila tanan tuhoy sa pagpamatok nga ila gin-atubang, nga nagapangabay: “Jehova, . . . tuguti ang imo mga ulipon nga padayon nga maghambal sang imo pulong nga may bug-os nga kaisog.” Ano ang resulta? “Napuno sila tanan sing balaan nga espiritu kag naghambal sila sang pulong sang Dios nga may kaisog.”—Binu. 4:24-31.

14. Paano kita ginabuligan sang balaan nga espiritu sa aton pagbantala?

¹⁴ Talupangda nga ang gamhanan nga balaan nga espiritu ni Jehova amo ang nagbulig sa mga disipulo nga makahambal sang pulong sang Dios nga may kaisog. Ang kaisog sa paghambal sing kamatuoran sa iban, bisan pa sa mga nagapamatok sa aton mensahe, wala nasandig sa aton kundi sa kusog nga halin kay Jehova. Kon mangabay kita kay Jehova sang iya balaan nga espiritu, handa sia nga hatagan kita sini. Sa bulig ni Jehova, makapakita man kita sing kaisog nga kinahanglan naton agod makabatas sing matutom sa ano man nga pagpamatok.—Basaha ang Salmo 138:3.

Ang mga Cristiano Karon Nagabantala nga May Kaisog

15. Paano ang kamatuoran ginabangdan sang pagbinahinbahin sang mga tawo karon?

¹⁵ Pareho sang una, ang kamatuoran padayon nga ginabangdan sang pagbinahinbahin sang mga tawo karon. Ang pila nagabaton sang kamatuoran, apang ang iban wala nakahangop ukon wala nagaapresyar sang aton pagsimba. Ang iban nagapakalain sa aton, nagayaguta, ukon nagadumot pa gani, subong sang gintagna ni Jesus. (Mat. 10:22) Kon kaisa, kita ang puntariya sang sayop nga impormasyon kag makahalalit nga propaganda paagi sa media. (Sal. 109:1-3) Apang, ang katawhan ni Jehova maisog nga nagabantala sing maayong balita sa bug-os nga duta.

16. Ano nga eksperiensia ang nagapakita nga ang kaisog makapabag-o sa pagtamod sang aton mga ginabantalaan?

¹⁶ Ang aton kaisog mahimo magpabag-o sa pagtamod sang mga tawo sa mensahe sang Ginharian. Ang isa ka utod nga babayi sa Kyrgyzstan nagsiling: “Samtang nagabantala ako, ang isa ka tagbalay nagsiling sa akon: ‘Nagapati ako sa Dios apang indi sa Dios sang mga Cristiano. Kon magbalik pa kamo diri, ipakagat ko kamo sa akon ido!’ Sa likod niya yara ang daku nga bulldog nga nakadenahan. Apang sa tion sang pagpanagtag sang Kingdom News Num. 37 nga natig-uluhan ‘Malapit na ang Kalaglagan Sang Butig nga Relihion!,’ nagdesisyon ako nga magbalik sa sina gihapon nga balay kay nagalaum  ako nga lain naman nga miembro sang pamilya ang akon maatubang. Apang, amo gihapon nga tawo ang nagbukas sang puertahan. Nangamuyo ako dayon kay Jehova kag nagsiling: ‘Kamusta, nadumduman ko ang aton pag-istoryahanay sang nagligad nga tatlo ka adlaw, kag nadumduman ko man ang imo ido. Apang gusto ko gid ihatag sa imo ini nga tract bangod pareho sa imo, nagapati ako sa isa ka matuod nga Dios. Sa indi madugay silutan sang Dios ang mga relihion nga wala nagasimba sa iya. Mahibaluan mo ang dugang pa paagi sa pagbasa sini nga tract.’ Nakibot gid ako nga ginbaton sang tawo ang Kingdom News. Dayon nagkadto ako sa masunod nga balay. Pagligad sang pila ka minuto, nagdalagan ang tawo pakadto sa akon nga dala ang Kingdom News. ‘Ginbasa ko ini,’ siling niya. ‘Ano ang himuon ko agod indi ako pagsilutan sang Dios?’” Nasugdan ang isa ka pagtuon sa Biblia sa sini nga tawo, kag nagatambong na sia karon sa Cristianong mga miting.

17. Paano ang kaisog sang isa ka utod nga babayi nakapalig-on sa estudyante sa Biblia nga may kahadlok sa tawo?

¹⁷ Ang aton kaisog makapalig-on man sa iban nga mangin maisog. Sa Rusya, gintanyagan sing magasin sang isa ka utod nga babayi nga nagasakay sa bus ang isa ka pasahero. Hinali lang nga nagtindog ang isa ka lalaki, gin-agaw ang magasin nga ginauyatan sang utod, ginkumos ini, kag ginhaboy sa salog. Ginpakalain niya ang utod, ginpamangkot kon taga-diin kag ginpahog nga indi na magbantala sa ila banwa. Nangamuyo ang utod kay Jehova kag gindumdom ang pinamulong ni Jesus: “Indi kamo magkahadlok sa mga nagapatay sang lawas.” (Mat. 10:28) Kalma sia nga nagtindog kag nagsiling sa tawo, “Indi ko pag-isugid sa imo kon taga-diin ako, kag padayunon ko ang pagbantala sa sini nga banwa.” Dayon nanaug ang utod sa bus. Wala nahibal-an sang utod nga ang iya ginatun-an sa Biblia natabuan nga nagasakay man sa amo nga bus. Ini nga babayi wala pa gid nakatambong sa Cristianong mga miting bangod sa kahadlok sa tawo. Apang sang nakita niya ang kaisog sang aton utod, nagdesisyon sia nga magtambong na sa mga miting.

18. Ano ang makabulig sa imo sa pagbantala nga may kaisog subong sang ginhimo ni Jesus?

¹⁸ Sa sining kalibutan nga nahamulag sa Dios, kinahanglan gid ang kaisog agod makabantala subong sang ginhimo ni Jesus. Ano ang makabulig sa imo agod mahimo ini? Hunahunaa ang palaabuton. Hupti nga malig-on ang imo gugma sa Dios kag sa mga tawo. Mangamuyo kay Jehova sing kaisog. Dumduma pirme nga wala ka nagaisahanon kay si Jesus kaupod mo. (Mat. 28:20) Ang balaan nga espiritu magapalig-on sa imo. Kag si Jehova magapakamaayo kag magasakdag sa imo. Gani, kabay nga mangin maisog gid kita kag magsiling: “Si Jehova ang akon manugbulig; indi ako magkahadlok. Ano ang mahimo sang tawo sa akon?”—Heb. 13:6.

Ano ang Imo Sabat?

• Ngaa kinahanglan sang mga alagad sang Dios ang kaisog?

• Kon tuhoy sa kaisog, ano ang matun-an naton . . .

sa mga matutom sang una?

kay Jesucristo?

sa una nga mga Cristiano?

sa mga masigkatumuluo karon?

[Mga Pamangkot sa Pagtinuon]

[Retrato sa pahina 21]

Maisog nga ginbuyagyag ni Jesus ang kalautan sang relihiosong mga lider

[Retrato sa pahina 23]

Si Jehova nagahatag sa aton sing kaisog sa pagbantala