Mga Cristianong Pamilya—Sunda ang Halimbawa ni Jesus!

“Si Cristo . . . [nagbilin] sa inyo sang huwaran agod sundon ninyo sing maayo ang iya mga tikang.”—1 PED. 2:21.

1. (a) Ano ang papel sang Anak sang Dios sa pagpanuga? (b) Ano ang balatyagon ni Jesus sa mga tawo?

SANG gintuga sang Dios ang langit kag duta, kaupod niya ang iya panganay nga Anak “subong batid nga manugpangabudlay.” Ang Anak sang Dios nagbulig sa iya Amay sang gindesinyo kag gintuga ni Jehova ang nanuhaytuhay nga kasapatan kag mga tanom diri sa duta, kag sang ginhanda Niya ang Paraiso nga pagapuy-an sang mga tawo. Ang Anak sang Dios nga nakilal-an sang ulihi nga si Jesus, may daku gid nga gugma sa mga tawo. ‘Nagakalipay sia sa mga tawo.’—Hulu. 8:27-31, NW; Gen. 1:26, 27.

2. (a) Ano ang gin-aman ni Jehova para sa di-himpit nga mga tawo? (b) Sa ano nga bahin sang kabuhi nagahatag sing panuytoy ang Biblia?

² Sa tapos magpakasala ang una nga mag-asawa, nangin sentro sang katuyuan ni Jehova ang paggawad sa makasasala nga katawhan. Agod matuman ini nga katuyuan, gin-aman ni Jehova ang halad gawad ni Cristo. (Roma 5:8) Dugang pa, gin-aman ni Jehova ang iya Pulong, ang Biblia, agod tuytuyan ang mga tawo nga magmadinalag-on sa ila kabuhi bisan pa di-himpit sila. (Sal. 119:105) Paagi sa Biblia, nagaaman si Jehova sing panuytoy agod buligan ang mga pamilya nga magpabilin nga malig-on kag malipayon. Tuhoy sa pag-asawahay, ang tulun-an sang Genesis nagasiling nga ang lalaki dapat “magahiusa sa iya asawa, kag mangin-isa sila ka unud.”—Gen. 2:24.

3. (a) Ano ang gintudlo ni Jesus tuhoy sa pag-asawahay? (b) Ano ang binagbinagon naton sa sini nga artikulo?

³ Sa tion sang pagministeryo ni Jesus sa duta, ginpadaku niya nga ang pag-asawahay isa ka permanente nga kahimusan. Nagtudlo sia sing mga prinsipio nga kon iaplikar sang tagsa ka katapo sang pamilya, malikawan nila ang mga panimuot kag mga paggawi nga makaguba ukon makadula sang kalipay sang ila pamilya. (Mat. 5:27-37; 7:12)  Binagbinagon sa sini nga artikulo kon paano ang mga panudlo kag halimbawa ni Jesus sang diri sia sa duta makabulig sa mga bana, mga asawa, mga ginikanan, kag mga kabataan nga matigayon ang makalilipay nga pagkabuhi.

Kon Paano Padunggan sang Cristianong Bana ang Iya Asawa

4. Ano ang pagkaanggid sang papel ni Jesus kag sang papel sang Cristianong mga bana?

⁴ Gintangdo sang Dios ang bana subong ulo sang pamilya, subong nga si Jesus amo ang Ulo sang kongregasyon. Si apostol Pablo nagsiling: “Ang bana amo ang ulo sang iya asawa subong nga si Cristo amo man ang ulo sang kongregasyon, kay sia ang manluluwas sini nga lawas. Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini.” (Efe. 5:23, 25) Ang pagpakig-angot ni Jesus sa iya mga sumulunod isa ka halimbawa sa Cristianong mga bana kon paano nila dapat pakig-angutan ang ila mga asawa. Binagbinagon naton ang pila ka paagi kon paano ni Jesus gingamit ang awtoridad nga ginhatag sang Dios sa iya.

5. Paano gingamit ni Jesus ang iya awtoridad sa iya mga disipulo?

⁵ Si Jesus “malulo kag mapainubuson sing tagipusuon.” (Mat. 11:29) Nagahimo man sia sing importante nga mga desisyon kon kinahanglanon. Wala niya ginapatumbayaan ang iya mga responsibilidad. (Mar. 6:34; Juan 2:14-17) Maluluy-on niya nga ginlaygayan ang iya mga disipulo, kag ginasulitsulit pa gani ini kon kinahanglanon. (Mat. 20:21-28; Mar. 9:33-37; Luc. 22:24-27) Bisan pa sini, wala niya sila ginsinggitan, ginpakahuy-an, ukon ginpabatyag nga indi niya sila palangga ukon nga indi nila masarangan nga tumanon ang iya mga sugo. Sa baylo, gindayaw niya kag ginpalig-on ang iya mga disipulo. (Luc. 10:17-21) Gani, indi kita matingala nga gintahod gid si Jesus sang iya mga disipulo bangod sang iya mahigugmaon kag maluluy-on nga pagpakig-angot sa ila.

6. (a) Ano ang matun-an sang mga bana sa paagi sang pagpakig-angot ni Jesus sa iya mga disipulo? (b) Ano ang ginpalig-on ni Pedro sa mga bana?

⁶ Ang halimbawa ni Jesus nagatudlo sa mga bana nga ang Cristianong pagkaulo indi dapat gamiton sa mapintas nga paagi. Sa baylo, dapat nila ipakita pirme ang masinakripisyuhon nga gugma kag pagtahod sa ila asawa. Ginpalig-on ni apostol Pedro ang mga bana nga ilugon ang mahigugmaon nga mga pamaagi ni Jesus paagi sa paghangop sa ila mga asawa, nga “nagahatag sa ila sang dungog.” (Basaha ang 1 Pedro 3:7.) Apang, paano gamiton sang bana ang iya awtoridad sa paagi nga nagahatag sing dungog sa iya asawa?

7. Paano mapadunggan sang bana ang iya asawa? Ipaathag.

⁷ Ang isa ka paagi agod mapadunggan sang bana ang iya asawa amo ang pagbinagbinag anay sing maayo sa pagtamod kag mga balatyagon sang iya asawa antes sia maghimo sing desisyon para sa pamilya. Ayhan desisyon ini tuhoy sa pagsaylo sang ilistaran, pagbag-o sang trabaho ukon iban pa nga ordinaryo nga mga butang, subong sang kon diin sila mabakasyon ukon kon paano sila makakinot sa tion sang krisis. Bangod ini nga mga desisyon makaapektar sa pamilya, maayo gid kon pamatian kag binagbinagon sang bana ang opinyon sang iya asawa kay makabulig ini sa iya sa paghimo  sing mas maayo kag balanse nga desisyon, kag mangin mahapos naman para sa iya asawa ang pagsakdag sa iya. (Hulu. 15:22) Kon padunggan sang Cristianong bana ang iya asawa, higugmaon kag tahuron sia sang iya asawa, kag labaw sa tanan, mahamuot si Jehova sa iya.—Efe. 5:28, 29.

Kon Paano Mapakita sang Asawa ang Tudok nga Pagtahod sa Iya Bana

8. Ngaa indi dapat sundon sang mga asawa ang halimbawa ni Eva?

⁸ Si Jesus amo ang himpit nga halimbawa para sa Cristianong mga asawa tuhoy sa pagpasakop sa awtoridad. Ang pagtamod ni Jesus sa awtoridad tuhay gid sa panimuot nga ginpakita sang una nga tawhanon nga asawa. Si Eva indi gid maayo nga halimbawa para sa mga asawa karon. Nagtangdo si Jehova sang isa nga mangin ulo ni Eva nga amo ang ginhatagan sang Dios sang instruksion. Apang, wala gintahod ni Eva ini nga kahimusan. Wala niya ginsunod ang instruksion nga ginhatag sang Dios kay Adan. (Gen. 2:16, 17; 3:3; 1 Cor. 11:3) Bisan pa masiling naton nga nadaya si Eva, pero dapat kuntani ginpamangkot niya ang iya bana kon bala pamatian niya ang tingog nga nagapangangkon nga nakahibalo tuhoy sa Dios. Apang, indi amo sini ang iya ginhimo, sa baylo ginpangunahan niya ang iya bana.—Gen. 3:5, 6; 1 Tim. 2:14.

9. Ano nga halimbawa sang pagpasakop ang ginpakita ni Jesus?

⁹ Indi kaangay ni Eva, si Jesus nagpakita sing himpit nga halimbawa sang pagpasakop sa iya Ulo. Ang iya panimuot kag pagkabuhi nagpakita nga “wala niya ginpaminsar ang iya pagkatupong sa Dios.” Sa baylo, “ginpakanubo niya ang iya kaugalingon paagi sa pagsuksok sang kinaiya sang isa ka ulipon.” (Fil. 2:5-7, APD) Sa karon, nagagahom na si Jesus subong Hari, apang padayon niya nga ginahuptan ina nga panimuot. Mapainubuson sia nga nagapasakop sa iya Amay sa tanan nga butang, kag ginasakdag niya ang Iya pagkaulo.—Mat. 20:23; Juan 5:30; 1 Cor. 15:28.

10. Paano masakdag sang asawa ang pagkaulo sang iya bana?

¹⁰ Maayo gid nga ilugon sang isa ka Cristianong asawa si Jesus paagi sa pagsakdag sa pagkaulo sang iya bana. (Basaha ang 1 Pedro 2:21; 3:1, 2.) Binagbinaga ang isa ka kahimtangan nga mapakita sang asawa ang pagpasakop sa iya bana. Ang iya anak nga lalaki naglisensia sa iya nga mag-entra sa isa ka aktibidad nga nagakinahanglan sing pahanugot sang ginikanan. Bangod ini nga butang wala pa nila maistoryahan nga mag-asawa, nagakaigo lamang nga pamangkuton sang iloy ang iya bata, “Nakalisensia ka na kay Tatay mo?” Kon wala pa nakalisensia ang bata sa iya amay, dapat niya ini anay ipakighambal sa iya bana antes magdesisyon. Dugang pa, dapat likawan sang Cristianong asawa nga kontrahon ukon baison ang opinyon sang iya bana sa atubangan sang ila kabataan. Kon indi sia ugyon sa desisyon sang iya bana, dapat niya ini ipakigsugilanon sa iya sing pribado.—Efe. 6:4.

Ang Halimbawa ni Jesus Para sa mga Ginikanan

11. Ano nga halimbawa ang ginpakita ni Jesus para sa mga ginikanan?

¹¹ Bisan pa si Jesus wala sing asawa kag mga anak, sia ang pinakamaayo nga halimbawa para sa Cristianong mga ginikanan. Ngaa?  Mahigugmaon kag mapailubon niya nga gintudluan ang iya mga disipulo paagi sa pulong kag halimbawa. Ginpakita niya sa ila kon paano himuon ang mga sugo nga ginhatag niya sa ila. (Luc. 8:1) Ang panimuot kag paggawi nga ginpakita ni Jesus sa iya mga disipulo nagtudlo sa ila kon paano nila dapat pakig-angutan ang isa kag isa.—Basaha ang Juan 13:14-17.

12, 13. Paano mapadaku sang mga ginikanan ang ila kabataan nga mangin mahinadlukon sa Dios?

¹² Masami ginailog sang kabataan ang ila mga ginikanan, maayo man ukon malain ang ila ginahimo. Gani, maayo nga pamangkuton sang mga ginikanan ang ila kaugalingon: ‘Ano bala nga halimbawa ang amon ginatudlo sa kabataan kon tuhoy sa kadamuon sang tion nga ginahinguyang namon sa TV kag sa mga kalingawan ukon sa pagtuon sa Biblia kag pagpakigbahin sa pag-alagad sa latagon? Ano gid bala ang prioridad sang amon pamilya? Ginapakita bala namon sa amon pagkabuhi kag sa amon mga desisyon nga ginauna namon ang pag-alagad sa Dios?’ Ang kasuguan sang Dios dapat una nga magtudok sa tagipusuon sang mga ginikanan agod mapadaku nila nga mahinadlukon sa Dios ang ila kabataan.—Deut. 6:6.

¹³ Kon ang mga ginikanan nagatinguha gid sa pag-aplikar sang mga prinsipio sa Biblia sa ila adlaw-adlaw nga pagkabuhi, matalupangdan ini sang ila kabataan. Ang ila ginahambal kag ginatudlo may puersa. Apang, kon makita sang mga kabataan nga ang ila mga ginikanan wala nagasunod sa mga prinsipio sang Biblia, mahimo nga maghunahuna sila nga indi gid man ini importante. Subong resulta, ang mga kabataan madali lang maimpluwensiahan ukon madala sa mga pag-ipit sang kalibutan.

14, 15. Ano nga mga tulumuron ang dapat palambuon sang mga ginikanan sa tagipusuon sang ila kabataan, kag ano ang isa ka paagi nga mahimo nila ini?

¹⁴ Nahangpan sang Cristianong mga ginikanan nga indi lamang materyal nga mga butang ang kinahanglanon sang isa ka bata. Gani, indi gid maalamon nga palig-unon sang mga ginikanan ang ila bata nga panikasugan ang mga tulumuron nga nasentro lamang sa materyal nga mga butang. (Man. 7:12) Gintudluan ni Jesus ang iya mga disipulo nga unahon ang ginharian kag ang pagkamatarong sang Dios. (Mat. 6:33) Gani, mailog sang Cristianong mga ginikanan si Jesus kon tinguhaan nila nga palambuon sa tagipusuon sang ila kabataan ang espirituwal nga mga tulumuron.

¹⁵ Ang isa ka paagi nga mahimo ini sang mga ginikanan amo ang pagpaupod sa ila kabataan sa mga kauturan nga yara sa bug-os tion nga pag-alagad. Mapalig-on gid ang mga pamatan-on kon makaupod sila sa mga payunir ukon sa manugtatap sang sirkito kag sa iya asawa. Ang mga misyonero, mga Bethelite, kag internasyonal nga mga boluntaryo sa pagtukod makasugid sang ila kalipay nga nabatyagan sa pag-alagad kay Jehova. Wala sing duhaduha nga madamo gid sila sing masugid nga makapalig-on nga mga eksperiensia. Ang mga sakripisyo nga ila ginhimo sa pag-alagad makabulig sing daku sa inyo kabataan nga maghimo man sing maalamon nga mga desisyon, magpahamtang sing espirituwal nga mga tulumuron, kag magpili sing nagakaigo nga edukasyon agod masuportahan ang ila kaugalingon sa bug-os tion nga pag-alagad.

 Mga Kabataan—Ano ang Makabulig sa Inyo nga Mailog ang Halimbawa ni Jesus?

16. Paano ginpadunggan ni Jesus ang iya mga ginikanan sa duta kag ang iya Amay sa langit?

¹⁶ Naghatag man si Jesus sing maayo nga halimbawa para sa mga kabataan. Sang gintugyan sang Dios kanday Jose kag Maria ang pag-atipan kay Jesus, nagtuman si Jesus sa ila. (Basaha ang Lucas 2:51.) Nahibaluan niya nga bisan pa di-himpit sila, sila ang gintugyanan sang Dios sing responsibilidad nga mag-atipan sa iya. Bangod sini, may salabton si Jesus nga padunggan sila. (Deut. 5:16; Mat. 15:4) Sang nagdaku na si Jesus, pirme niya ginahimo ang mga butang nga makapahamuot sa iya langitnon nga Amay. Agod mahimo ini, kinahanglan nga pamatukan niya ang mga pagsulay. (Mat. 4:1-10) Mga pamatan-on, mahimo nga kon kaisa nasulay man kamo nga lapason ang inyo mga ginikanan. Ano ang makabulig sa inyo nga mailog ang halimbawa ni Jesus?

17, 18. (a) Ano nga pag-ipit ang ginaatubang sang mga pamatan-on sa eskwelahan? (b) Ano ang dapat dumdumon sang mga pamatan-on agod malandas ang mga pag-ipit?

¹⁷ Mahimo ang kalabanan sang imo mga schoolmate wala sing pagtahod sa mga talaksan sang Biblia. Basi piliton ka nila nga makigbahin sa kwestionable nga mga hilikuton kag yagutaon ka kon indi ka mag-entra. Ginabansagan ka bala sang imo mga schoolmate sang nagapakanubo nga mga ngalan bangod wala ka nagapakigbahin sa ila kwestionable nga ginahimo? Kon amo sini ang ginahimo nila sa imo, ano ang imo reaksion? Nahibaluan mo nga kon magsunod ka sa ila, mapasubo mo ang imo mga ginikanan kag ilabi na si Jehova. Ano ang imo madangatan kon sundon mo sila? Mahimo nga may tulumuron ka sa pag-alagad, subong sang pagpayunir, mangin ministeryal nga alagad, pagboluntaryo sa mga teritoryo nga mas daku ang kinahanglanon, ukon mangin isa ka Bethelite. Ang imo ayhan pagpakig-upod sa imo mga schoolmate makabulig sa imo nga malab-ot ang imo mga tulumuron?

¹⁸ Kamo nga mga pamatan-on sa Cristianong kongregasyon, ano ang himuon ninyo kon makaatubang kamo sang mga pagtilaw sa inyo pagtuo? Dumduma ang inyo huwaran nga si Jesus. Wala sia nagpadala sa mga pagsulay, kundi nagtindog sia sing malig-on sa kon ano ang nahibaluan niya nga husto. Ang pagdumdom sang halimbawa ni Jesus makahatag sa inyo sing kaisog nga ipaathag sa inyo mga schoolmate nga indi ninyo luyag himuon ang mga butang nga nahibaluan ninyo nga malain. Kaangay ni Jesus, isentro ang inyo hunahuna sa makalilipay nga pag-alagad kag pagkamatinumanon kay Jehova sa bug-os ninyo nga pagkabuhi.—Heb. 12:2.

Ang Sekreto sang Malipayon nga Pamilya

19. Ano nga paagi sang pagkabuhi ang nagahatag sing matuod nga kalipay?

¹⁹ Luyag ni Jehova nga Dios kag ni Jesucristo ang pinakamaayo para sa katawhan. Bisan pa di-himpit kita, mahimo kita gihapon mangin malipayon. (Isa. 48:17, 18; Mat. 5:3) Gintudlo ni Jesus ang mga kamatuoran tuhoy sa Dios nga amo ang nagahatag sing kalipay sa katawhan. Apang indi lamang amo sina ang iya gintudlo sa iya mga disipulo. Gintudluan man niya sila sang pinakamaayo nga paagi sang pagkabuhi. Magluwas sini, isa man sia ka maayo nga huwaran sang balanse nga panimuot kag pagkabuhi. Ano man ang aton papel sa pamilya, tanan kita makabenepisyo sa pagsunod sa iya halimbawa. Gani, mga bana, mga asawa, mga ginikanan, kag mga kabataan, sunda ang halimbawa ni Jesus! Ang pagsunod sa mga panudlo ni Jesus kag ang pag-ilog sa iya halimbawa amo ang matuod nga sekreto sang malipayon nga pagkabuhi subong pamilya.

Ano ang Imo Sabat?

• Paano dapat gamiton sang mga bana ang awtoridad nga ginhatag sa ila sang Dios?

• Paano mailog sang isa ka asawa ang halimbawa ni Jesus?

• Ano ang matun-an sang mga ginikanan sa pagpakig-angot ni Jesus sa iya mga disipulo?

• Ano ang matun-an sang mga kabataan sa halimbawa ni Jesus?

[Mga Pamangkot sa Pagtinuon]

[Retrato sa pahina 8]

Ano ang himuon sang isa ka mahigugmaon nga bana antes sia maghimo sing isa ka desisyon nga makaapektar sa pamilya?

[Retrato sa pahina 9]

Sa ano nga mga kahimtangan mahimo sakdagon sang isa ka asawa ang pagkaulo sang iya bana?

[Retrato sa pahina 10]

Ginailog sang mga kabataan ang maayo nga pamatasan sang ila mga ginikanan