Ginapabaloran Mo Bala ang Ginhimo ni Jehova Agod Luwason Ka?
Ginapabaloran Mo Bala ang Ginhimo ni Jehova Agod Luwason Ka?
“Dayawon si Jehova nga Dios sang Israel, bangod gintalupangod niya kag ginluwas ang iya katawhan.”—LUC. 1:68.
1, 2. Sa ano naton mapaanggid ang aton karon malubha nga kahimtangan, kag ano nga mga pamangkot ang aton pagabinagbinagon?
HANDURAWA nga nagahigda ka sa isa ka katre sa ospital. Yara ka sa ward diin tanan kamo nga pasyente palareho nga nagaantos sing makamamatay nga balatian nga wala pa sang bulong. Apang, sang nahibaluan mo nga may isa ka doktor nga nagpanguna sa pagpanikasog nga makakita sing bulong, nakatigayon ka sing paglaum. Nalangkag ka sa pagpaabot sa mga resulta sinang panikasog. Isa ka adlaw, nahibaluan mo nga may bulong na nga natukiban! Grabe gid nga sakripisyo ang ginhimo sang doktor nga nagpanguna sa pagpanikasog para lang matukiban ang bulong. Ano ang imo batyagon? Pat-od nga magbatyag gid ikaw sing daku nga kabalaslan sa sina nga tawo nga nagtinguha nga luwason ka kag ang iban pa gikan sa kamatayon.
2 Mahimo maghunahuna ka nga ini nga sitwasyon himuhimo lamang, pero kaanggid ini sa sitwasyon nga ginaatubang naton tanan. Ang kahimtangan sang kada isa sa aton mas malubha pa sangsa ginalaragway diri. Nagakinahanglan gid kita sing manluluwas. (Basaha ang Roma 7:24.) Daku katama nga sakripisyo ang ginhimo ni Jehova agod luwason kita. Ang iya Anak naghimo man sing daku nga mga sakripisyo. Binagbinagon naton karon ang apat ka importante nga pamangkot. Ngaa kinahanglan kita luwason? Ano ang ginsakripisyo ni Jesus agod maluwas kita? Ano ang ginsakripisyo ni Jehova? Kag paano naton mapakita nga ginapabaloran naton ang pagluwas sang Dios?
Ngaa Kinahanglan Kita Luwason?
3. Ngaa mapaanggid naton ang sala sa isa ka pandemic?
3 Suno sa isa ka pagbulubanta sining karon lang, ang isa sa pinakamalala nga pandemic sa kasaysayan sang tawo amo ang trangkaso Espanyola sang 1918, nga nagpatay sa minilyon ka tawo. * May iban pa nga balatian nga mas makamamatay sangsa sini. Bisan pa diutay lang ang nagakalatnan, pero mas mataas nga porsiento sang nagakalatnan ang nagakapatay. * Apang, ano abi kon ipaanggid naton ang sala sa isa ka pandemic? Dumduma ang ginsiling sang Roma 5:12: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” Ang sala naglaton sa 100 porsiento sang populasyon sang kalibutan, bangod ang tanan nga tawo nga di-himpit nagakasala. (Basaha ang Roma 3:23.) Kag pila naman ka porsiento ang nagakapatay sa sala? Si Pablo nagsulat nga ang sala nagresulta sa kamatayon sang “tanan nga tawo.”
4. Ano ang pagtamod ni Jehova sa kalawigon sang aton kabuhi, kag ano ang kinatuhayan sang iya pagtamod sa pagtamod sang madamo nga tawo karon?
4 Para sa madamo karon, kinaandan lang ang sala kag kamatayon. Nagakabalaka sila sa ginatawag nga hilaw nga kamatayon, apang para sa ila, “natural” lang nga mapatay bangod sa katigulangon. Nalipatan na sang katawhan ang matuod nga katuyuan sang Manunuga sa aton kabuhi. Ang aton kabuhi malip-ot katama kon ipaanggid sa orihinal nga katuyuan sang Dios. Sa pagkamatuod, wala pa gani sing tawo nga nabuhi sing “isa ka adlaw” sa pagtamod ni Jehova. (2 Ped. 3:8) Amo nga ang Pulong sang Dios nagsiling nga ang aton kabuhi malip-ot lang kaangay sa pagtubo sang hilamon kag daw isa lamang ka huyop sang hangin. (Sal. 39:5; 1 Ped. 1:24) Ina nga pagtamod dapat magpabilin sa aton hunahuna. Ngaa? Bangod kon mahangpan naton kon daw ano kalala ang “balatian” nga naglaton sa aton, mas maapresyar naton ang balor sang “bulong,” ukon ang aton kaluwasan.
5. Ano kadaku ang halit sang sala sa aton?
5 Agod mahangpan naton kon daw ano kadaku ang halit sang sala sa aton, dapat anay naton hibaluon kon ano ang nawasi naton bangod sa sala. Sa primero, mahimo nga mabudlayan kita sa paghangop sini kay wala pa gid naton maeksperiensiahan ang kahimtangan nga gin-agom sadto sang aton una nga mga ginikanan. Himpit anay ang kabuhi nanday Adan kag Eva. Bangod himpit ang ila panghunahuna kag lawas, mahimo nila makontrol ang ila panghunahuna, balatyagon, kag mga buhat. Sa amo, padayon sila nga makapalambo sing dalayawon nga mga kinaiya subong mga alagad ni Jehova nga Dios. Pero, wala nila ginpabaloran ining hamili nga regalo. Bangod nagpakasala sila batok kay Jehova, nadula nila kag sang ila mga kaliwatan ang kabuhi nga gintuyo ni Jehova para sa ila. (Gen. 3:16-19) Sa amo, natigayon nila kag sang ila kaliwatan ang makakulugmat nga “balatian” nga ginabinagbinag naton. Bangod sini, makatarunganon lamang nga ginsilutan sila ni Jehova. Pero sa aton bahin, nagatanyag sia sing paglaum nga kaluwasan.—Sal. 103:10.
Kon Ano ang Ginsakripisyo ni Jesus Agod Maluwas Kita
6, 7. (a) Paano una nga ginpakita ni Jehova nga ang aton kaluwasan nagakinahanglan gid sing daku nga sakripisyo? (b) Ano ang matun-an naton sa paghalad nga ginhimo ni Abel kag sang mga patriarka?
6 Nahibaluan ni Jehova nga daku gid nga sakripisyo ang kinahanglan para maluwas ang kaliwatan nanday Adan kag Eva. Ang tagna sa Genesis 3:15 nagasugid sa aton kon ano ang nadalahig para sa kaluwasan. Magaaman si Jehova sing “binhi,” isa ka manluluwas, nga amo ang magalaglag ukon magadugmok sing bug-os kay Satanas sa ulihi. Apang, ina nga manluluwas magaantos, bangod malaragwayon nga dugmukon ang iya tikod. Inang pagdugmok masakit gid kag makapaluya, pero ano ang buot silingon sini? Ano bala ang kinahanglan batason sang Isa nga Pinili ni Jehova?
7 Para maluwas ang katawhan sa sala, kinahanglan ihatag sang manluluwas ang katumbas nga bayad agod mapasag-uli ang kaangtanan sang mga tawo sa Dios kag agod madula ang epekto sang sala. Ano ang nadalahig sa sini? Ang ginhimo sang mga alagad sang Dios sang una, nagapakita nga kinahanglan ang paghalad. Sang naghalad sing sapat ang una nga matutom nga tawo nga si Abel, nahamuot ang Dios. Sang ulihi, ang mahinadlukon sa Dios nga mga patriarka nga sanday Noe, Abraham, Jacob, kag Job naghalad man sing mga dulot nga nagpahamuot sa Dios. (Gen. 4:4; 8:20, 21; 22:13; 31:54; Job 1:5) Pila ka siglo sang ulihi, paagi sa Mosaikong Kasuguan, labi nga nahangpan sang mga tawo nga kinahanglan gid ang paghalad.
8. Ano ang ginahimo sang mataas nga saserdote sa tuigan nga Adlaw sang Katumbasan?
8 Ang isa sa labing importante nga mga halad nga ginapatuman sang Kasuguan amo ang tuigan nga paghalad sa Adlaw sang Katumbasan. Sa sina nga adlaw, ginahimo sang mataas nga saserdote ang mga buhat nga may simbuliko nga kahulugan. Nagahalad sia kay Jehova para sa kapatawaran sang mga sala, una para sa mga sala sang saserdotenhon nga grupo, kag dayon para sa mga sala sang iban nga tribo. Ang mataas nga saserdote nagasulod sa Labing Balaan nga duog sang tabernakulo ukon templo, diin sia lamang ang makasulod diri sing makaisa kada tuig. Ang dugo sang mga sapat nga ginhalad ginawisik niya sa kaban sang katipan. Kon kaisa makita sa ibabaw sang sagrado nga kaban ang masanag nga panganod nga nagarepresentar sang presensia ni Jehova nga Dios.—Ex. 25:22; Lev. 16:1-30.
9. (a) Sa Adlaw sang Katumbasan, sin-o ang ginarepresentar sang mataas nga saserdote, kag ano ang ginarepresentar sang iya mga halad? (b) Ano ang ginalandong sang pagsulod sang mataas nga saserdote sa Labing Balaan?
9 Si apostol Pablo gintuytuyan sang Dios nga ipahayag ang simbuliko nga kahulugan sadtong mga buhat. Ginpaathag niya nga ang mataas nga saserdote nagarepresentar sa Mesias nga amo si Jesucristo, kag ang paghalad nagarepresentar sa kamatayon ni Cristo. (Heb. 9:11-14) Ining himpit nga halad magaaman sang matuod nga kapatawaran sang sala para sa duha ka grupo sang mga tawo—ang saserdotenhon nga grupo nga amo ang 144,000 nga hinaplas nga mga kauturan ni Cristo kag ang “iban nga mga karnero.” (Juan 10:16) Ang pagsulod sang mataas nga saserdote sa Labing Balaan, nagalandong sa pagsulod ni Jesus sa langit agod ipresentar kay Jehova nga Dios ang balor sang iya halad gawad.—Heb. 9:24, 25.
10. Suno sa mga tagna sang Biblia, ano ang maeksperiensiahan sang Mesias?
10 Maathag, nga ang kaluwasan sang kaliwatan nanday Adan kag Eva nagakinahanglan gid sing daku nga sakripisyo. Kinahanglan isakripisyo sang Mesias ang iya kabuhi! Ang mga manalagna sa Hebreong Kasulatan naghatag sing dugang nga mga detalye tuhoy sa sini. Halimbawa, si manalagna Daniel nagsiling nga ang “Mesias nga Lider” ‘pagautdon’ ukon patyon para sa “kapatawaran sang mga sala.” (Dan. 9:24-26, NW) Gintagna ni Isaias nga ang Mesias pagasikwayon, pagahingabuton, kag pagapatyon, ukon pilason, agod matubos ang mga sala sang katawhan.—Isa. 53:4, 5, 7.
11. Sa ano nga mga paagi ginpakita sang Anak ni Jehova nga handa sia magsakripisyo para sa aton kaluwasan?
11 Antes magkari sa duta ang bugtong nga Anak sang Dios, nahibaluan na niya kon ano nga sakripisyo ang kinahanglan niya himuon agod maluwas kita. Magabatas sia sang tuman nga mga pag-antos kag dayon pagapatyon. Sang ginpahibalo ini sa iya sang iya Amay, nag-isol bala sia ukon nagrebelde? Wala. Sa baylo, kinabubut-on sia nga nagpasakop sa sugo sang iya Amay. (Isa. 50:4-6) Bisan diri na sia sa duta, gintuman gihapon ni Jesus ang kabubut-on sang iya Amay. Ngaa? Naghatag sia sing isa ka rason: “Ginahigugma ko ang Amay.” Nagsiling man sia: “Wala sing isa nga may gugma nga daku pa sa sini, nga ihatag sang isa ang iya kalag para sa iya mga abyan.” (Juan 14:31; 15:13) Gani ang gugma sang Anak ni Jehova may daku gid nga papel sa aton kaluwasan. Bisan pa kinahanglan niya isakripisyo ang iya tawhanon nga himpit nga kabuhi, nalipay sia sa paghimo sini para sa aton kaluwasan.
Kon Ano ang Ginsakripisyo ni Jehova Agod Maluwas Kita
12. Kay sin-o kabubut-on ang gawad, kag ngaa gin-aman niya ini?
12 Indi si Jesus ang nagpasad sang kahimusan sang halad gawad. Sa baylo, ini nga kahimusan para sa kaluwasan amo ang panguna nga bahin sang kabubut-on ni Jehova. Ginpahangop ni apostol Pablo nga ang altar sa templo, nga ginahalaran, nagarepresentar sa kabubut-on ni Jehova. (Heb. 10:10) Gani ang aton kaluwasan paagi sa halad ni Cristo, utang gid naton una sa tanan kay Jehova. (Luc. 1:68) Pagpakita ini sang iya himpit nga kabubut-on kag sang iya daku nga gugma sa katawhan.—Basaha ang Juan 3:16.
13, 14. Paano ang halimbawa ni Abraham makabulig sa aton nga mahangpan kag mapabaloran ang ginhimo ni Jehova para sa aton?
13 Ano ang ginsakripisyo ni Jehova agod ipakita ang iya gugma sa aton sa sini nga paagi? Mabudlay naton ini hangpon. Apang, may kasaysayan sa Biblia nga mahimo makabulig sa aton nga mahangpan ini sing maayo. Ginpangabay ni Jehova ang matutom nga tawo nga si Abraham nga himuon ang isa ka mabudlay gid nga butang—ang paghalad sa iya anak nga si Isaac. Si Abraham isa ka mahigugmaon nga amay. Sang nagpakigsugilanon si Jehova sa iya, ginpatuhuyan ni Jehova si Isaac subong “ang imo bugtong nga anak . . . nga ginahigugma mo.” (Gen. 22:2) Apang, nahibaluan ni Abraham nga ang paghimo sang kabubut-on ni Jehova mas importante sangsa iya gugma kay Isaac. Nagtuman si Abraham. Pero, wala gintugutan ni Jehova si Abraham nga himuon ang isa ka butang nga ginhimo Niya mismo sang ulihi. Nagpadala ang Dios sing isa ka anghel agod punggan si Abraham samtang nagahana na sia sa paghalad sang iya anak. Determinado gid si Abraham nga tumanon ang Dios sa sining mabudlay nga pagtilaw kag nagapati sia nga makita na lang niya liwat ang iya anak sa pagkabanhaw. Bug-os gid ang iya pagtuo nga banhawon sang Dios ang iya anak. Gani, nagsiling si Pablo nga ginbaton ni Abraham si Isaac sa pagkabanhaw “sa malaragwayon nga paagi.”—Heb. 11:19.
14 Mahanduraw mo bala ang kasakit nga nabatyagan ni Abraham samtang ginahanda niya ang paghalad sa iya anak? Paagi sa eksperiensia ni Abraham, mahangpan naton ang balatyagon ni Jehova sang ginsakripisyo niya ang isa nga gintawag niya nga “akon Anak, ang hinigugma.” (Mat. 3:17) Pero, dumduma nga mahimo mas grabe nga kasakit ang nabatyagan ni Jehova. Nag-updanay sila sang iya Anak sa sulod sang di-maisip nga minilyon ukon binilyon pa gani ka tuig. Ang Anak malipayon nga nagpanghikot upod sa iya Amay subong pinalangga nga “pangolo nga manugpangabudlay” kag subong “ang Pulong” nga iya Humalambal. (Hulu. 8:22, 30, 31; Juan 1:1) Indi gid naton mahangpan sing bug-os kon daw ano nga kasakit ang nabatyagan ni Jehova sang ginpaantos, ginyaguta, kag dayon ginpatay subong isa ka kriminal ang iya Anak. Daku katama nga sakripisyo ang ginhimo ni Jehova agod luwason kita! Apang, paano naton mapakita nga ginapabaloran gid naton ina nga kaluwasan?
Paano Mo Mapakita nga Ginapabaloran Mo ang Kaluwasan?
15. Paano nakompleto ni Jesus ang daku nga buhat sang katumbasan, kag ano ang nangin posible bangod sini?
15 Nakompleto ni Jesus ang daku nga buhat sang katumbasan sang ginbanhaw sia pakadto sa langit. Sang didto na sia, ginpresentar niya sa iya pinalangga nga Amay ang balor sang iya halad. Nagresulta ini sa daku nga mga pagpakamaayo. Nangin posible ang bug-os nga kapatawaran, una para sa sala sang hinaplas nga mga utod ni Cristo, kag dayon para sa “bug-os nga kalibutan.” Bangod sa sina nga halad, ang tanan nga sinsero nga nagahinulsol karon sa ila mga sala kag nangin matuod nga mga sumulunod ni Cristo makatigayon na sing matinlo nga tindog sa atubangan ni Jehova nga Dios. (1 Juan 2:2) Paano ini naaplikar sa imo?
16. Paano naton mailustrar kon ngaa dapat kita magpasalamat sa kaluwasan nga gin-aman ni Jehova para sa aton?
16 Balikan naton ang ilustrasyon nga gingamit sa umpisa. Ibutang naton nga ang doktor nga nakatukib sang bulong magapalapit sa mga pasyente sa inyo ward kag magasiling nga ang bisan sin-o nga pasyente nga magabaton sang bulong kag magasunod sa mga instruksion sa pagtomar sini pat-od nga magaayo gid. Ano abi kon ang kalabanan sa kaupod mo nga mga pasyente indi magpati sa doktor, kag magrason nga mabudlay ang pag-inom sang bulong ukon ang pagtuman sa instruksion? Magabuylog ka bala sa ila, bisan pa kumbinsido ka nga epektibo gid ang bulong? Siempre indi! Wala sing duhaduha nga magapasalamat gid ikaw sa sini nga bulong kag sundon sing maayo ang instruksion sang doktor, kag mahimo nga sugiran mo pa gani ang iban sang imo desisyon. Sa kaanggid nga paagi, may mas daku kita nga rason nga pasalamatan ang kaluwasan nga gin-aman ni Jehova paagi sa halad gawad sang iya Anak.—Basaha ang Roma 6:17, 18.
17. Paano mo mapakita nga ginaapresyar mo ang ginhimo ni Jehova agod luwason ka?
17 Kon ginaapresyar naton ang ginhimo ni Jehova kag sang iya Anak para luwason kita gikan sa sala kag kamatayon, ipakita gid naton ina nga apresasyon. (1 Juan 5:3) Pamatukan naton ang aton huyog nga magpakasala. Likawan gid naton ang hungod nga pagpakasala, nga masami nagaresulta sa pagkabuhi sing doble kara. Kon hungod kita nga nagapakasala, pareho lang nga wala naton ginapabaloran ukon ginaapresyar ang gawad. Sa baylo, mapakita naton ang aton apresasyon paagi sa pagpanikasog nga magpabilin nga matinlo sa panulok sang Dios. (2 Ped. 3:14) Mapakita naton ini paagi sa pagsugid sa iban sang aton matahom nga paglaum sang kaluwasan, agod makatigayon man sila sing matinlo nga tindog sa atubangan ni Jehova kag sang paglaum nga mabuhi sing dayon sa palaabuton. (1 Tim. 4:16) Huo, takus gid nga ihatag naton ang aton tion kag kusog sa pagdayaw kay Jehova kag sa iya Anak! (Mar. 12:28-30) Handurawa! Mapaabot naton ang tion nga madula na sing bug-os ang aton sala. Maagom na naton ang kabuhi nga gintuyo sang Dios para sa aton, ang himpit kag walay katapusan nga kabuhi. Ini tanan nangin posible bangod sa ginhimo ni Jehova agod luwason kita!—Roma 8:21.
[Mga Nota]
^ par. 3 Ang pandemic amo ang paglapnag sang isa ka balatian sa madamo nga pungsod.
^ par. 3 Ang trangkaso Espanyola ginbulubanta nga naglaton sa halos 20 tubtob kapin sa 50 porsiento sang populasyon sang kalibutan sadto nga tion. Ini nga virus nagpatay sa 1 tubtob 10 porsiento sang mga tawo nga nalatnan. Sa pihak nga bahin, ang Ebola nga virus indi amo sina ka lapnag, apang 90 porsiento sang mga nalatnan sini ang nagakapatay.
Ano ang Imo Sabat?
• Ngaa kinahanglan mo gid ang kaluwasan?
• Paano ka naapektuhan sang pagsakripisyo nga ginhimo ni Jesus?
• Ano ang ginabatyag mo tuhoy sa dulot ni Jehova nga gawad?
• Ano ang himuon mo agod ipakita nga ginaapresyar mo ang ginhimo ni Jehova agod luwason ka?
[Mga Pamangkot sa Pagtinuon]
[Retrato sa pahina 27]
Sa Adlaw sang Katumbasan, ang mataas nga saserdote sa Israel nagarepresentar sa Mesias
[Retrato sa pahina 28]
Ang kahanda ni Abraham nga ihalad ang iya anak nagatudlo sa aton tuhoy sa mas daku nga sakripisyo nga ginhimo ni Jehova
