Hupti ang Panimuot sang Hunahuna ni Cristo
Hupti ang Panimuot sang Hunahuna ni Cristo
“Matigayon ninyo ang panimuot sang hunahuna pareho sang iya ni Cristo Jesus.”—ROMA 15:5.
1. Ngaa dapat naton sundon ang panimuot ni Cristo?
“KARI sa akon,” siling ni Jesucristo. “Magtuon kamo sa akon, kay ako malulo kag mapainubuson sing tagipusuon, kag makakita kamo sang kaumpawan sa inyo kaugalingon.” (Mat. 11:28, 29) Ginapakita sini nga pangagda ang mahigugmaon nga panimuot ni Jesus. Wala na sing makalabaw pa sa maayo nga halimbawa nga ginpakita ni Jesus. Bisan pa gamhanan sia nga Anak sang Dios, nagpakita si Jesus sang empatiya kag kaluoy ilabi na sa mga nagaantos.
2. Ano nga mga aspekto sang panimuot ni Jesus ang aton usisaon?
2 Sa sini kag sa masunod nga duha pa ka artikulo, binagbinagon naton kon paano naton mapalambo kag mahuptan ang panimuot nga kaangay kay Jesus kag mapakita ang “hunahuna ni Cristo” sa aton kabuhi. (1 Cor. 2:16) Usisaon naton ang lima sa sini: Ang kalulo kag pagkamapainubuson ni Jesus, ang iya kaayo, ang iya pagkamatinumanon sa Dios, ang iya kabakod, kag ang iya tunay nga gugma.
Magtuon sa Kalulo ni Cristo
3. (a) Ano nga leksion tuhoy sa pagkamapainubuson ang gintudlo ni Jesus sa iya mga disipulo? (b) Ano ang reaksion ni Jesus sa kaluyahon sang iya mga disipulo?
3 Si Jesus, ang himpit nga Anak sang Dios, kinabubut-on nga nagkari sa duta agod mag-alagad upod sa di-himpit kag makasasala nga katawhan nga ang iban sa ila amo pa gani ang magapatay sa iya sa ulihi. Wala sapayan sini, wala nadula ni Jesus ang iya kalipay kag pagpugong sa kaugalingon. (1 Ped. 2:21-23) Kon ‘magtulok kita sing maayo’ sa halimbawa ni Jesus, mahuptan man naton ang aton kalipay kag pagpugong sa kaugalingon bisan pa nga nagakaapektuhan kita sang mga kasaypanan kag di-kahimpitan sang iban. (Heb. 12:2) Gin-agda ni Jesus ang iya mga disipulo nga ‘itakod ang iya gota’ agod makatuon sila sa iya. (Mat. 11:29) Ano ang matun-an nila? Ang isa amo ang kalulo ni Jesus, kag pagkamapailubon niya sa iya mga disipulo wala sapayan sang ila mga kasaypanan. Sang gab-i antes sia mapatay, ginhinawan ni Jesus ang ila mga tiil agod tudluan sila sing isa ka leksion tuhoy sa ‘pagkamapainubuson sing tagipusuon’ nga indi gid nila malipatan. (Basaha ang Juan 13:14-17.) Sang ulihi, sang napaslawan sanday Pedro, Santiago, kag Juan nga “magpadayon sa pagbantay,” mainayuhon nga ginhatagan ni Jesus sing konsiderasyon ang ila kaluyahon. “Simon, nagakatulog ka bala?” pamangkot niya. “Magpadayon kamo sa pagbantay kag sa pagpangamuyo, agod indi kamo masulay. Sa pagkamatuod, ang espiritu handa, apang ang unod maluya.”—Mar. 14:32-38.
4, 5. Paano ang halimbawa ni Jesus makabulig sa aton sa pagpakig-angot sing nagakaigo sa kaluyahon sang iban?
4 Ano ang aton reaksion kon ang isa ka utod may huyog nga makigkompetensia, madali masaklaw, ukon wala dayon nagasunod sa laygay sang mga gulang ukon sang “matutom kag mainandamon nga ulipon”? (Mat. 24:45-47) Kon di-tumuluo ang makasaklaw sa aton, madali lang naton ini mahangpan kag mapatawad. Apang mabudlay batunon kon ang aton utod mismo ang maghimo sini sa aton. Kon madali lang kita maakig sa mga kakulangan sang iban, dapat pamangkuton naton ang aton kaugalingon, ‘Paano ko mailog ang “panghunahuna ni Cristo”?’ Dumduma nga wala naakig si Jesus sa iya mga disipulo bisan pa may mga kaluyahon sila.
5 Binagbinaga ang natabo kay apostol Pedro. Sang ginsilingan ni Jesus si Pedro nga magpanaug sa sakayan kag maglakat sa tubig pakadto sa Iya, nahimo ini ni Pedro sing makadali. Dayon, sang nagtulok si Pedro sa unos, amat-amat sia nga naglugdang. Naakig bala si Jesus kag ginsilingan sia: “Bagay inâ sa imo para makatuon ka sing leksion”? Wala! Kundi, “sa gilayon gin-untay ni Jesus ang iya kamot kag gin-uyatan sia kag nagsiling sa iya: ‘Ikaw nga diutay sing pagtuo, ngaa nagduhaduha ka?’” (Mat. 14:28-31) Kon ang isa ka utod daw nakulangan sing pagtuo, mahimo bala naton malaragwayon nga mauntay ang aton kamot agod buligan sia nga mapalig-on ang iya pagtuo? Amo sini nga leksion ang matun-an naton sa kalulo nga ginpakita ni Jesus kay Pedro.
6. Ano ang gintudlo ni Jesus sa iya mga apostoles tuhoy sa paghingamo sing mataas nga posisyon?
6 Nadalahig man si Pedro sa pagbinaisay sang mga apostoles kon sin-o ang labing daku sa ila. Si Santiago kag si Juan luyag magpungko sa tuo kag wala nga kamot ni Jesus sa iya Ginharian. Sang nabatian ini ni Pedro kag sang iban pa nga apostoles, naakig sila. Nahibaluan ni Jesus nga mahimo nakuha nila ini nga batasan sa lugar nga ila gindak-an. Sang gintawag niya sila, nagsiling sia: “Nahibaluan ninyo nga ang mga manuggahom sang mga pungsod nagapakaginuo sa ila kag ang mga kadalagkuan may awtoridad sa ila. Indi subong sini sa inyo; kundi ang bisan sin-o nga luyag mangin daku sa inyo mangin alagad ninyo, kag ang bisan sin-o nga luyag mangin nahauna sa inyo mangin ulipon ninyo.” Dayon ginpatalupangod ni Jesus ang iya mismo halimbawa: “Subong nga ang Anak sang tawo nagkari, indi agod alagdon, kundi agod mag-alagad kag ihatag ang iya kalag subong gawad nga kabaylo sang madamo.”—Mat. 20:20-28.
7. Paano ang kada isa sa aton makaamot sa paghiusa sang kongregasyon?
7 Ang pagpamalandong sa pagkamapainubuson ni Jesus makabulig sa aton nga ‘maggawi sing kubos’ sa aton mga utod. (Luc. 9:46-48) Ang paghimo sini nagaamot sa paghiusa. Kaangay sang amay sa isa ka daku nga pamilya, luyag ni Jehova nga “magpuyo sing tingub sa paghiliusa” ang iya kabataan. (Sal. 133:1) Nangamuyo si Jesus sa iya Amay nga ang tanan nga matuod nga Cristiano maghiusa, agod “mahibaluan sang kalibutan nga ginpadala mo ako kag ginhigugma mo sila subong nga ginhigugma mo ako.” (Juan 17:23) Gani, ang aton paghiusa nagapakilala sa aton subong mga sumulunod ni Cristo. Agod matigayon naton ini nga paghiusa, dapat tamdon naton ang di-kahimpitan sang iban pareho sang pagtamod ni Cristo. Si Jesus mapinatawaron, kag gintudlo niya nga mabaton lamang naton ang kapatawaran kon mapinatawaron kita sa iban.—Basaha ang Mateo 6:14, 15.
8. Ano ang matun-an naton sa halimbawa sang madugay na nga mga alagad sang Dios?
8 Madamo man kita sing matun-an kon ilugon naton ang pagtuo sang mga nagailog kay Cristo sa sulod sang malawig na nga tinuig. Kaangay ni Jesus, nahangpan man nila ang mga di-kahimpitan sang iban. Nahibaluan nila nga ang pagpakita sang kaluoy kaangay ni Cristo wala lamang nagabulig sa aton nga ‘madala ang mga kaluyahon sang mga indi mabakod,’ kundi nagaamot man ini sa aton paghiusa. Dugang pa, nagapalig-on ini sa bug-os nga kongregasyon nga ilugon ang panimuot ni Cristo. Luyag nila nga ilugon man sang ila mga kauturan ang panimuot ni Cristo kaangay sang pagpalig-on ni apostol Pablo sa mga Cristiano sa Roma: “Kabay nga ang Dios nga nagahatag sang pagbatas kag lugpay magtugot nga matigayon ninyo ang panimuot sang hunahuna pareho sang iya ni Cristo Jesus, agod nahiusa nga mahimaya ninyo sa isa ka tingog ang Dios kag Amay sang aton Ginuong Jesucristo.” (Roma 15:1, 5, 6) Huo, ang aton nahiusa nga pagsimba nagahatag sing kadayawan kay Jehova.
9. Ngaa kinahanglan naton ang balaan nga espiritu agod mailog naton si Jesus?
9 Gin-angot ni Jesus ang “mapainubuson sing tagipusuon” sa kalulo, nga bahin sang bunga sang balaan nga espiritu sang Dios. Gani, dugang pa sa pagtuon sa halimbawa ni Jesus, kinahanglan man naton ang balaan nga espiritu ni Jehova agod mailog naton sing maayo ang iya halimbawa. Dapat mangamuyo kita sang balaan nga espiritu sang Dios kag manikasog nga mapalambo ang mga bunga sini, nga amo ang “gugma, kalipay, paghidait, pagkamapinasensiahon, kaayo, pagkamaayo, pagtuo, kalulo, pagpugong sa kaugalingon.” (Gal. 5:22, 23) Gani, paagi sa pag-ilog naton sa halimbawa ni Jesus sa pagkamapainubuson kag kalulo, mapahamut-an naton ang aton langitnon nga Amay, si Jehova.
Nagpakita si Jesus sang Kaayo sa Iban
10. Paano ginpakita ni Jesus ang kaayo?
10 Ang kaayo bahin man sang mga bunga sang balaan nga espiritu. Ang kaayo nga ginpakita ni Jesus wala nagabag-obag-o. “Ginbaton niya . . . sing mainayuhon” ang tanan nga sinsero nga nagapalapit sa iya. (Basaha ang Lucas 9:11.) Ano ang matun-an naton sa kaayo nga ginpakita ni Jesus? Ang mainayuhon nga tawo dapat mainabyanon, malulo, kag may simpatiya sa iban. Amo sina si Jesus. Naluoy sia sa mga tawo “kay ginpanitan sila kag nag-alaplaag kaangay sa mga karnero nga wala sing manugbantay.”—Mat. 9:35, 36.
11, 12. (a) Ilaragway ang isa ka kahimtangan nga nagpakita si Jesus sang kaluoy. (b) Ano ang imo matun-an sa halimbawa nga ginbinagbinag diri?
11 Wala lamang nagbatyag si Jesus sang kaluoy sa iban kundi ginpakita niya ini sa buhat. Binagbinaga ang isa ka halimbawa. Ang isa ka babayi ginatagasan sang dugo sa sulod na sang 12 ka tuig. Nahibaluan niya nga suno sa Mosaikong Kasuguan, indi sia matinlo, kag wala sia ginatugutan nga magsimba sa Dios upod sa iban nga tawo, kag ang bisan sin-o nga makatandog sa iya mangin di-matinlo man. (Lev. 15:25-27) Apang, bangod nakita niya kon paano ginpakig-angutan ni Jesus ang mga tawo, kumbinsido sia nga ayuhon sia ni Jesus. Padayon sia nga nagsiling: “Kon matandog ko lamang ang iya mga panapton magaayo ako.” Gani, nagtipon sia sing kaisog kag gintandog ang panapton ni Jesus kag dayon nabatyagan niya nga nag-ayo sia.
12 Nabatyagan ni Jesus nga may nagtandog sa iya, kag ginpangita niya kon sin-o yadto. Mahimo nga nahadlok ang babayi basi akigan sia kay nalapas niya ang Kasuguan, amo nga naghapa sia sa mga tiil ni Jesus kag ginsugid sa iya ang bug-os nga kamatuoran. Gin-akigan bala ni Jesus ining makaluluoy kag nagaantos nga babayi? Wala gid! “Anak,” siling niya, “ang imo pagtuo nag-ayo sa imo. Lakat ka sa paghidait.” (Mar. 5:25-34) Pat-od gid nga nalugpayan ang babayi sang nabatian niya ining mainayuhon nga mga pulong!
13. (a) Ano ang kinatuhayan sang panimuot ni Jesus kag sang mga Fariseo? (b) Paano ginpakig-angutan ni Jesus ang mga kabataan?
13 Indi kaangay sang wala sing kaluoy nga mga Fariseo, wala gingamit ni Jesus ang iya awtoridad agod pabug-atan ang iban. (Mat. 23:4) Sa baylo, mainayuhon kag mapailubon niya nga gintudluan ang iban sang dalanon ni Jehova. Si Jesus mapinalanggaon sa iya mga sumulunod, mahigugmaon, mainayuhon kag isa gid ka matuod nga abyan. (Hulu. 17:17; Juan 15:11-15) Bisan gani ang mga kabataan wala natahap kay Jesus, kag si Jesus nanamian man sa ila. Ginhatagan gid niya sing tion ang mga kabataan, bisan pa masako sia. Isa ka bes, ginpunggan sang mga disipulo ni Jesus ang mga tawo sa pagdala sang ila kabataan kay Jesus agod matandog niya, tungod naimpluwensiahan sila sang panimuot sang relihiosong mga lider nga nagapaimportante gid sa ila kaugalingon. Apang, wala nahamuot si Jesus sa ginhimo sang iya mga disipulo. Ginsilingan niya sila: “Pabay-i ang mga bata nga magpalapit sa akon; indi sila pagpunggi, kay ang ginharian sang Dios ila sang mga kaangay nila.” Dayon, nagkuha sia sing isa ka bata agod tudluan sila sang isa ka leksion: “Sa pagkamatuod nagasiling ako sa inyo, Ang bisan sin-o nga indi magbaton sang ginharian sang Dios subong sang isa ka bata indi gid makasulod sa sini.”—Mar. 10:13-15.
14. Ano nga mga benepisyo ang matigayon sang mga kabataan sa mahigugmaon nga interes nga ginpakita sa ila?
14 Hunahunaa kon ano ang ginbatyag sang pila sadtong mga kabataan sang nagdalagku na sila, mahimo nga indi gid nila malipatan nga ‘ginhakos sila ni Jesucristo kag ginpakamaayo.’ (Mar. 10:16) Madamo man karon nga kabataan ang pat-od nga indi gid malipat sa mga gulang kag sa iban pa nga nagpakita sing mahigugmaon nga interes sa ila. Labaw sa tanan, bisan bata pa sila, mabatyagan sining mga kabataan nga ang espiritu ni Jehova yara gid sa iya katawhan.
Magpakita sing Kaayo sa Di-mainayuhon nga Kalibutan
15. Ngaa indi kita dapat matingala nga madamo sa karon ang wala nagapakita sing kaayo?
15 Madamo sa karon ang wala nagapakita sing kaayo sa iban. Amo nga adlaw-adlaw ang katawhan ni Jehova apektado man sa panimuot sining kalibutan sa ila eskwelahan, sa ulubrahan, samtang nagabiyahe, kag sa ila pagministeryo. Mahimo kita maluyahan sing buot, apang indi kita dapat matingala sa sini. Paagi kay Pablo, ginpaandaman kita ni Jehova nga sa sining makahalanguyos nga “katapusan nga mga adlaw,” ang matuod nga mga Cristiano makasalapo sang mga tawo nga “mahigugmaon sa kaugalingon” kag “wala sing kinaugali nga pagpalangga.”—2 Tim. 3:1-3.
16. Paano naton mapakita sa kongregasyon ang tulad-Cristo nga kaayo?
16 Sa pihak nga bahin, ang matuod nga Cristianong kongregasyon nagahatag sa aton sing kaumpawan sa tunga sining di-mainayuhon nga kalibutan. Paagi sa pag-ilog kay Jesus, ang kada isa sa aton mahimo makaamot sa sinang kahimtangan. Paano? Una, madamo sa aton mga kauturan ang nagakinahanglan sang aton bulig kag pagpalig-on bangod sang ila balatian ukon iban pa nga kabudlayan. Sa sining “katapusan nga mga adlaw,” mahimo magadamo pa gid ang mga problema, pero indi na ini bag-o. Sa panahon sang Biblia, ang mga Cristiano nag-atubang man sing mga problema. Gani, kinahanglan man kita magbuligay subong sang ginhimo sang mga Cristiano sang una. Halimbawa, ginpalig-on ni Pablo ang mga Cristiano nga “lipayon ang mga kalag nga ginapung-awan, sakdagon ang mga maluya, mangin mapinasensiahon sa tanan.” (1 Tes. 5:14) Agod mahimo ini, dapat magpakita kita sang tulad-Cristo nga kaayo.
17, 18. Sa ano nga mga paagi naton mailog ang kaayo ni Jesus?
17 Responsibilidad sang mga Cristiano nga ‘batunon ang ila mga kauturan sing mainayuhon,’ pakig-angutan sila kaangay sang pagpakig-angot ni Jesus, kag pakitaan sing matuod nga kabalaka yadtong mga madugay na naton nakilala kag yadtong mga bag-o pa lang. (3 Juan 5-8) Si Jesus amo ang nagauna sa pagpakita sing kaayo sa iban, gani dapat man naton sia ilugon kag maghatag pirme sing paumpaw sa iban.—Isa. 32:2; Mat. 11:28-30.
18 Ang tagsatagsa sa aton sarang makapakita sing kaayo paagi sa pag-ulikid sa iban. Mangita sing mga paagi kag mga kahigayunan nga mahimo ini! “Sa utudnon nga gugma magpakita kamo sang mapinalanggaon nga balatyagon sa isa kag isa,” siling ni Pablo, kag nagdugang sia: “Sa pagpadungog sa isa kag isa manguna kamo.” (Roma 12:10) Buot silingon sini nga ilugon naton ang pagpakig-angot ni Cristo sa iban nga may pagpalangga kag kaayo, nga nagapakita sing “gugma nga indi salimpapaw.” (2 Cor. 6:6) Ginlaragway ni Pablo inang tulad-Cristo nga gugma sa sining paagi: “Ang gugma mapinasensiahon kag mainayuhon. Ang gugma indi maimon, wala ini nagapabugal, wala nagapahambog.” (1 Cor. 13:4) Sa baylo nga maghupot sing kaakig sa aton mga kauturan, sundon naton ini nga laygay: “Mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa subong nga ang Dios nagpatawad man sing kinabubut-on sa inyo paagi kay Cristo.”—Efe. 4:32.
19. Ano ang maayo nga mga resulta kon ipakita naton ang tulad-Cristo nga kaayo?
19 Kon panikasugan naton nga palambuon kag ipakita ang tulad-Cristo nga kaayo sa tanan nga tion, magaresulta ini sing madamo nga pagpakamaayo. Ang espiritu ni Jehova magapanghikot sing hilway sa kongregasyon, kag magabulig sa kada isa nga mapalambo ang mga bunga sang espiritu. Dugang pa, kon sundon naton ang halimbawa ni Jesus kag buligan ang iban nga himuon man ini, ang aton malipayon kag nahiusa nga pagsimba magapahamuot gid sa Dios. Gani, kabay nga padayon naton nga panikasugan nga ipakita ang kalulo kag kaayo ni Jesus sa aton pagpakig-angot sa iban.
Mapaathag Mo Bala?
• Paano ginpakita ni Jesus nga “malulo [sia] kag mapainubuson sing tagipusuon”?
• Paano ginpakita ni Jesus ang kaayo?
• Ano ang pila ka paagi nga mapakita naton ang tulad-Cristo nga kalulo kag kaayo sa sining di-himpit nga kalibutan?
[Mga Pamangkot sa Pagtinuon]
[Retrato sa pahina 8]
Kon magluya ang pagtuo sang aton utod, kaangay sang natabo kay Pedro, buligan man bala naton sia?
[Retrato sa pahina 10]
Paano ka makabulig agod mahuptan ang kaayo sa sulod sang kongregasyon?
