Nasapwan Ko ang Matuod nga Kahulugan sang Kabuhi

Panugiron ni Gaspar Martinez

Ang akon kabuhi, istorya sang isa ka pigado nga taga-uma nga nagsaylo sa siudad kag nagmanggaranon. Apang ang manggad nga akon natigayon indi amo ang akon ginapaabot.

NAGDAKU ako sa naligwin nga uma sa rehiyon sang Rioja sa naaminhan nga Espanya sang katuigan 1930. Sa edad nga dies anyos, nag-untat ako sa pag-eskwela, pero makahibalo na ako magbasa kag magsulat. Sang gagmay pa kami, ako kag ang akon anom ka mga utod nagabantay sang karnero sa latagon kag nagatatap sang amon gamay nga uma.

Bangod sa amon kapigaduhon, naghunahuna kami nga importante gid katama ang kuarta kag pagkabutang. Nahisa kami sa iban nga may sarang sa pangabuhi. Pero nagsiling anay ang isa ka pari nga ang amon lugar amo kuno “ang pinakarelihioso nga lugar sa iya diosesis.” Apang wala niya marealisar nga sa ulihi, madamo ang magabiya sa Katolisismo.

Pagpangita sing Butang nga Mas Maayo

Ginpangasawa ko si Mercedes nga kasimaryo ko man. Wala magdugay, may bata na kami nga lalaki. Sang 1957 nagsaylo kami sa kaingod nga siudad sang Logroño, kag sang ulihi nagsaylo man ang akon mga himata. Bangod kulang ako sing eksperiensia, nabudlayan ako sa pagpangita sing trabaho para masuportahan ang akon pamilya. Nagpalibog ako kon sa diin ako mangayo sing giya. Nagsugod ako sa pagpangita sing impormasyon sa malapit nga librarya, bisan pa wala ako nakahibalo kon ano gid ang akon ginapangita.

Sang ulihi, nabatian ko nga may programa sa radyo nga nagatanyag sing pagtuon sa Biblia paagi sa sulat. Sang natapos ko ang pagtuon paagi sa sulat, ginkontak ako sang pila ka miembro sang Evangelical Protestant. Pagkatapos sang duha ka beses nga pagkadto ko sa ila simbahan, natalupangdan ko nga nagakompetensiahanay ang prominente nga mga miembro sang ila simbahan. Wala na ako nagbalik, kag ginhunahuna ko nga palareho lang ang tanan nga relihion.

Ang mga Himbis Nahulog Gikan sa Akon mga Mata

Sang 1964 ang isa ka pamatan-on nga lalaki nga si Eugenio, nagduaw sa amon balay. Isa sia sa mga Saksi ni Jehova, isa ka relihion nga wala ko pa gid anay nabatian. Pero interesado gid ako mag-istorya parte sa Biblia. Abi ko madamo na ako sing nahibaluan parte sa Kasulatan. Ginagamit ko sa pagsabat sa iya ang pila ka teksto nga natun-an ko sa Biblia paagi sa sulat. Gintinguhaan ko nga pangapinan ang pila sa mga panudlo sang Protestante, bisan pa ang matuod wala ako nagapati sa sini.

Pagkatapos sang duha ka malawig nga pag-istoryahanay,  kumbinsido ako nga eksperto gid si Eugenio sa paggamit sang Pulong sang Dios. Natingala gid ako nga kadasig sa iya mangita sing teksto kag mapaathag niya ini, bisan pa mas manubo ang iya tinun-an sangsa akon. Ginpakita ni Eugenio sa akon sa Biblia nga nagakabuhi na kita sa katapusan nga mga adlaw kag malapit na lang himuon sang Ginharian sang Dios ang duta nga paraiso. Interesado gid ako nga mahibaluan ini.—Sal. 37:11, 29; Isa. 9:6, 7; Mat. 6:9, 10.

Ginbaton ko gilayon ang pagtuon sa Biblia. Halos ang tanan ko nga natun-an bag-o sa akon, kag natandog gid sini ang akon tagipusuon. Nakatigayon ako sing tulumuron nga takus gid panikasugan. Nasalapuan ko na ang akon ginapangita. Indi na importante sa akon karon nga magmanggaranon ukon magpanikasog nga makakita sing trabaho nga daku sing sueldo. Kon ang balatian kag kamatayon pagadulaon, mapaabot naton nga pagadulaon man ang iban pa nga problema.—Isa. 33:24; 35:5, 6; Bug. 21:4.

Ginsugid ko dayon sa akon mga paryente ang akon natun-an. Malipayon ko nga ginpaathag sa ila nga nagsaad ang Dios nga himuon niya nga paraiso ang duta sa diin magapuyo ang matutom nga mga tawo sing wala katapusan.

Ginbaton sang Akon Pamilya ang Kamatuoran sa Biblia

Sang ulihi, mga dose sa amon ang nagdesisyon nga magtipon sa balay sang akon tiyo kada Domingo sang hapon agod binagbinagon ang mga saad sang Biblia. Nagahinguyang kami sing duha ukon tatlo ka oras kada semana para sa sini. Sang nakita ni Eugenio nga madamo sa akon pamilya ang interesado sa Biblia, naghimo sia sing kahimusan agod matun-an ang kada pamilya.

May mga paryente man ako sa Durango, isa ka gamay nga banwa nga mga 120 kilometros ang kalayuon, kag wala sing Saksi sa ila lugar. Gani pagligad sang tatlo ka bulan, nagbakasyon ako sing duha ka adlaw agod bisitahan sila kag ipaathag sa ila ang akon bag-o nga pagtuluuhan. Kada gab-i, mga pulo kami ang nagatipon, kag nagapakigsugilanon ako sa ila tubtob sa kaagahon. Nalipay gid sila tanan sa pagpamati. Sang manugpauli na ako, ginbilinan ko sila sang pila ka Biblia kag mga literatura pasad sa Biblia. Sugod sadto, padayon ang amon komunikasyon.

Sang nag-abot ang mga Saksi sa Durango, sa diin wala pa gid anay nabantalaan, nakasapo sila sang 18 ka tawo nga malangkagon nga nagahulat sang pagtuon sa Biblia. Nalipay gid ang mga Saksi nga tun-an sa Biblia ang kada pamilya.

Tubtob sa sina nga tion wala pa nagtuon si Mercedes sang kamatuoran, indi bangod nagapangalag-ag sia sa mga panudlo sang Biblia, kundi bangod sang iya kahadlok sa tawo. Gindumilian sadto ang pagbantala sang mga Saksi ni Jehova sa Espanya, gani naghunahuna sia nga basi pahalinon sang awtoridad ang amon duha ka kabataan sa eskwelahan kag isikway kami sang mga tawo. Pero sang nakita niya nga ang amon bug-os nga pamilya nagbaton sing kamatuoran, luyag na niya magtuon sa Biblia.

Sa sulod sang duha ka tuig, 40 ka miembro sang amon pamilya ang nabawtismuhan bilang simbulo sang ila dedikasyon sa pag-alagad sa Dios kag nangin mga Saksi. Huo, ang akon tulumuron kag katuyuan sa kabuhi gin-ilog sang akon pamilya. Nabatyagan ko nga nakatigayon ako sang isa ka butang nga may matuod gid nga kapuslanan. Ginpakamaayo kami sing bugana sa espirituwal.

Nangin Mas Malipayon ang Akon Kabuhi Samtang Nagatigulang Ako

Sa sulod sang 20 ka tuig, nagkonsentrar ako sa pag-atipan sa amon duha ka bata nga lalaki kag sa pagbulig sa amon kongregasyon. Sang nagsaylo kami ni Mercedes sa Logroño, mga 20 lang ang mga Saksi sa sini nga siudad nga may 100,000 ka pumuluyo. Wala madugay, nakabaton ako sing madamo nga mga responsibilidad sa kongregasyon.

Sang 56 anyos ako, hinali lang nga nagsira ang pabrika sang kompanya nga ginaobrahan ko, kag nadulaan ako sing obra. Ginahandum ko gid nga mangin bug-os tion nga ministro, gani gingamit ko ini nga kahigayunan agod makapayunir. Gamay lang ang nabaton ko nga pension, amo nga nabudlayan kami nga paiguon ini. Gani, nagtrabaho si Mercedes sing part-time agod makabulig. Nasakdag namon ang amon pamilya kag wala  kami nakulangan sang amon mga kinahanglanon. Nagapayunir gihapon ako, kag si Mercedes nagaauxiliary payunir man kon kaisa kag nalipay gid sia sa pagbantala.

Sang nagligad nga pila ka tuig, regular nga ginadalhan ni Mercedes sang aton mga magasin ang isa ka pamatan-on nga babayi nga si Merche, nga nakatuon na sa Biblia sang bata pa. Interesado gid si Merche sa pagbasa sang aton mga literatura, kag natalupangdan ni Mercedes nga ginaapresyar gihapon ni Merche ang kamatuoran sa Biblia. Sang ulihi, ginbaton niya ang pagtuon sa Biblia kag madasig nga nag-uswag. Apang ang iya bana nga si Vicente, palainom kag pirme lang nagakadulaan sing obra. Gani indi niya masuportahan si Merche, kag nabutang sa katalagman ang ila pag-asawahay bangod sang iya bisyo.

Ginpanugda sang akon asawa kay Merche nga istoryahon ako ni Vicente, kag sang ulihi nag-istoryahanay kami. Pagkatapos sang pila ka pagduaw, ginbaton niya ang isa ka pagtuon sa Biblia. Nagbag-o si Vicente kag nag-untat sa iya pag-inom sing pila ka adlaw. Dayon, nakalab-ot sing isa ka semana ukon sobra pa nga wala sia nag-inom. Sang ulihi, nauntat gid man niya ang iya pag-inom sing alkohol. Nangin maayo na ang iya hitsura, kag nahiusa ang iya pamilya. Sa karon nagapuyo sila sa Canary Islands kag daku gid ang bulig sang iya bug-os nga pamilya, lakip sang iya asawa kag bata nga babayi, sa gamay nga kongregasyon didto.

Pagpamalandong sa Akon Mapuslanon nga Kabuhi

Bisan pa napatay na ang pila sang akon mga paryente nga nakatuon sa Biblia, nagadaku gihapon ang amon pamilya, kag bugana kami nga ginpakamaayo sang Dios. (Hulu. 10:22) Makalilipay gid makita nga ang tanan nga nagtuon sa Biblia sang nagligad nga 40 ka tuig, upod sa ila mga kabataan kag kaapuhan, matutom gihapon nga nagaalagad kay Jehova!

Madamo ako karon sing mga paryente nga Saksi, kag madamo sa ila ang nagalaalagad subong mga gulang, ministeryal nga alagad, kag mga payunir. Ang amon subang nga bata kag ang iya asawa nagaalagad sa sanga talatapan sang mga Saksi ni Jehova sa Madrid, Espanya. Sang nangin Saksi ako, mga 3,000 lang kami sa Espanya. Karon, sobra na kami sa 100,000. Lubos gid ang akon kalipay sa pag-alagad sing bug-os tion, kag nagapasalamat gid ako sa Dios sa akon makalilipay nga kabuhi sa pag-alagad sa iya. Bisan pa nga manubo lang ang akon tinun-an, nagaalagad ako kon kaisa subong tal-us nga manugtatap sang sirkito.

Sining karon lang nga mga tinuig, nahibaluan ko nga ang lugar nga akon gindak-an halos wala na sing nagaistar. Bangod sa kapigaduhon napilitan ang mga pumuluyo didto nga biyaan ang ila mga uma kag mga balay agod mangita sing mas maayo nga kabuhi. Apang, maayo lang kay madamo sa mga nagsaylo, lakip na sa akon, ang nakasapo sang espirituwal nga mga bahandi. Natun-an namon nga may matuod nga kahulugan ang kabuhi kag ang pag-alagad kay Jehova nagahatag sing daku gid nga kalipay.

[Retrato sa pahina 32]

Ang halos tanan nga katapo sang pamilya ni Utod Martínez nga nakasulod sa kamatuoran