Matuod nga Pag-abyanay sa Wala sing Gugma nga Kalibutan

“Ginasugo ko ini sa inyo agod maghigugmaanay kamo.” —JUAN 15:17.

1. Ngaa dapat magpabilin nga suod ang pag-abyanay sang unang siglo nga mga Cristiano?

SA KATAPUSAN nga gab-i sang iya kabuhi sa duta, ginpalig-on ni Jesus ang iya mainunungon nga mga disipulo nga magpabilin nga suod sa isa kag isa. Sang temprano pa sina nga gab-i, nagsiling sia nga ang gugma nga ginpakita nila sa isa kag isa amo ang magapakilala sa ila subong iya mga sumulunod. (Juan 13:35) Dapat magpabilin nga suod ang pag-abyanay sang mga apostoles para mabatas nila ang mga pagtilaw nga magaabot kag matuman ang hilikuton nga ihatag ni Jesus sa ila. Sa pagkamatuod, ang unang siglo nga mga Cristiano nakilal-an sa ila di-mationg nga debosyon sa Dios kag gugma sa isa kag isa.

2. (a) Ano ang determinado naton nga himuon, kag ngaa? (b) Ano nga mga pamangkot ang aton pagabinagbinagon?

² Daw ano ka makalilipay nga mangin bahin karon sang bug-os kalibutan nga organisasyon sa diin ang mga miembro sini nagasunod sa halimbawa sang unang siglo nga mga Cristiano! Determinado kita nga sundon ang sugo ni Jesus nga magpakita sing matuod nga gugma sa isa kag isa.  Apang, sa tion sining katapusan nga mga adlaw, ang kalabanan nga mga tawo di-mainunungon kag wala sing kinaugali nga pagpalangga. (2 Tim. 3:1-3) Ang ila pagpakig-abyan masami nga hapaw kag para lang sa ila kaugalingon nga benepisyo ukon bentaha. Agod padayon kita nga makilal-an subong matuod nga mga Cristiano, dapat nga indi naton pag-ilugon ang panimuot sang kalibutan. Gani, binagbinagon naton ang masunod: Ano ang pundasyon sang maayo nga pag-abyanay? Paano kita makatigayon sing maayo nga mga abyan? San-o naton dapat untaton ang pagpakig-abyan sa isa ka tawo? Kag paano naton mahuptan ang makapalig-on nga pag-abyanay?

Ano ang Pundasyon sang Maayo nga Pag-abyanay?

3, 4. Sa ano napasad ang pinakamalig-on nga mga pag-abyanay, kag ngaa?

³ Ang pinakamabakod nga mga pag-abyanay amo ang mga pag-abyanay nga napasad sa gugma kay Jehova. Si Hari Solomon nagsulat: “Ang duha ka tawo makabato sang pag-atake nga makalutos sang isa ka tawo. Ang lubid nga tatlo ka doble mabudlay bugtoon.” (Man. 4:12, Maayong Balita nga Biblia) Kon si Jehova amo ang ikatlo nga lubid sa pag-abyanay, ina nga pag-abyanay mabakod gid kag magadugay.

⁴ Matuod, bisan ang mga tawo nga wala nagahigugma kay Jehova, makatukod man sing malipayon nga pag-abyanay. Apang mas mabakod kag malig-on ang pag-abyanay kon ang duha ka indibiduwal pareho nga nagahigugma sa Dios. Kon may mag-utwas nga di-paghangpanay, ginaaplikar sang matuod nga mag-abyan ang mga prinsipio sa Biblia agod mapahamut-an si Jehova. Bisan pa ginatinguhaan sang mga manugpamatok nga magbahinbahin ang mga alagad sang Dios, natalupangdan sining mga kaaway nga indi nila mabungkag ang pag-abyanay sang matuod nga mga Cristiano. Sa bug-os nga maragtas, napamatud-an sang mga alagad ni Jehova nga handa sila mapatay agod indi mabutang sa katalagman ang kabuhi sang ila kauturan.—Basaha ang 1 Juan 3:16.

5. Ngaa mabakod kag nagdugay ang pag-abyanay nanday Rut kag Noemi?

⁵ Wala sing duhaduha nga ang pinakamaayo nga mga abyan nga aton natigayon amo ang aton mga abyan nga nagahigugma kay Jehova. Binagbinaga ang halimbawa nanday Rut kag Noemi. Ang pag-abyanay sining duha ka babayi nangin isa sa mga dalayawon gid nga pag-abyanay nga narekord sa Biblia. Ngaa mabakod kag nagdugay ang ila pag-abyanay? Ginsugid ni Rut ang rason sang nagsiling sia kay Noemi: “Ang imo katawohan mangin-akon katawohan, kag ang imo Dios akon Dios. . . . Himoon sang GINOO sa akon ang amo kag labi pa man kon bisan ang kamatayon magbulag sa imo kag sa akon.” (Rut 1:16, 17) Maathag gid nga sanday Rut kag Noemi pareho nga may tudok nga gugma sa Dios, kag ini nga gugma makita gid sa ila pagpakig-angot sa isa kag isa. Subong resulta, ginpakamaayo sila ni Jehova.

Kon Paano Kita Makatigayon sing Maayo nga mga Abyan

6-8. (a) Ano ang kinahanglan agod magbakod kag magdugay ang isa ka pag-abyanay? (b) Paano mo mahimo ang una nga tikang sa pagpakig-abyan?

⁶ Ang halimbawa nanday Rut kag Noemi nagapakita nga ang maayo nga pag-abyanay wala lamang natabuan. Ang ila gugma kay Jehova amo ang pundasyon sang ila pag-abyanay. Apang, kinahanglan gihapon sila magpanikasog  kag magsakripisyo agod magbakod kag magdugay ang ila pag-abyanay. Bisan pa gani ang mag-ulutod sa Cristianong pamilya nga nagasimba kay Jehova nagakinahanglan gihapon manikasog agod mangin suod sila sa isa kag isa. Nian, paano ka makatigayon sing maayo nga mga abyan?

⁷ Maghimo sang una nga tikang. Ginpalig-on ni apostol Pablo ang iya mga abyan sa kongregasyon sang Roma nga ‘sundon ang dalanon sang pagkamaabiabihon.’ (Roma 12:13) Ang paglakat sa isa ka literal nga dalanon nagakinahanglan sang paghimo sang isa ka tikang. Sing kaanggid, dapat man kita maghimo sing tikang para makapakita sing pagkamaabiabihon. Kita dapat ang maghimo sina nga tikang kag indi ang iban. (Basaha ang Hulubaton 3:27.) Mapakita mo ini paagi sa pag-agda sa lainlain nga miembro sang inyo kongregasyon nga magkaon upod sa imo. Puede mo bala himuon nga bahin sang imo kabuhi ang pagpakita sing pagkamaabiabihon sa imo mga ka-kongregasyon?

⁸ Ang isa pa ka paagi nga makatigayon ka sing mga abyan amo ang paghagad sa lainlain nga mga kauturan nga updan ka sa paggua sa latagon. Kon ginapamatian mo ang imo kaupod samtang tinagipusuon niya nga ginasugid sa tagbalay ang iya gugma kay Jehova, pat-od gid nga mangin suod ka sa sina nga utod.

9, 10. Ano nga halimbawa ang ginpahamtang ni Pablo, kag paano naton sia mailog?

⁹ Pasangkara ang imo gugma. (Basaha ang 2 Corinto 6:12, 13.) Nagabatyag ka bala nga daw wala ka sing puede mangin abyan sa kongregasyon? Indi ayhan nga tuman ka lang ka pislian? Si apostol Pablo nagpahamtang sing maayo nga halimbawa sa pagpasangkad sang iya gugma. Sang una, wala gid sia maghunahuna nga mangin suod niya nga abyan ang mga indi Judiyo. Apang, nangin “apostol [sia] sa mga pungsod.”—Roma 11:13.

¹⁰ Dugang pa, wala lamang ginlimitehan ni Pablo ang iya pagpakig-abyan sa iya mga kaedad. Nangin suod sila nga mag-abyan ni Timoteo bisan pa malayo ang antad sang ila edad kag indi pareho ang ila ginhalinan. Sa karon, madamo man nga mga pamatan-on ang nagapakig-abyan sa mga may edad na nga miembro sang kongregasyon. “May pinalangga ako nga abyan nga singkwentahon na ang edad,” siling ni Vanessa nga mga beinte anyos pa lang. “Tanan nga puede ko isugid sa akon mga abyan nga kaedad ko, puede ko masugid sa iya. Kag palangga gid niya ako.” Paano sila nangin mag-abyan? Si Vanessa nagsiling: “Ako gid ang nagpanikasog nga amigahon sia, sa baylo nga hulaton ko lang sia nga magpalapit sa akon.” Luyag mo man bala magpakig-abyan sa indi mo kaedad? Pat-od gid nga pakamaayuhon ka ni Jehova kon himuon mo ina.

11. Ano ang aton matun-an sa halimbawa nanday Jonatan kag David?

¹¹ Mangin mainunungon. “Ang isa ka abyan nagahigugma sa tanan nga tion, kag ang isa ka utud natawo tungud sa kapiotan,” sulat ni Solomon. (Hulu. 17:17) Sang ginsulat niya ini nga mga tinaga, mahimo nga ginahunahuna ni Solomon ang  malipayon nga pag-abyanay sang iya amay nga si David kag ni Jonatan. (1 Sam. 18:1) Luyag ni Hari Saul nga ang iya anak nga si Jonatan amo ang magabulos sa trono sang Israel. Apang ginbaton ni Jonatan nga si David amo ang ginpili ni Jehova nga mangin hari. Indi pareho kay Saul, si Jonatan wala nagbatyag sing kahisa kay David. Wala sia naugot sa pagdayaw nga nabaton ni David, ukon nagpati sa kabutigan nga ginpalapnag ni Saul parte kay David. (1 Sam. 20:24-34) Pareho bala kita kay Jonatan? Kon ang aton mga abyan makabaton sing mga pribilehiyo, nalipay bala kita para sa ila? Kon nagaatubang sila sing mga kabudlayan, ginalugpayan kag ginabuligan bala naton sila? Kon may mabatian kita nga indi maayo parte sa ila, nagapati bala kita dayon? Ukon, pareho kay Jonatan, mainunungon bala naton nga ginapangapinan ang aton abyan?

Kon San-o Dapat Untaton ang Pagpakig-abyan

12-14. Ano nga mga kabudlayan ang ginaatubang sang mga ginatun-an sa Biblia, kag paano naton sila mabuligan?

¹² Kon ang isa nga ginatun-an sa Biblia maghimo sing mga pagbag-o sa iya kabuhi, mahimo mabudlayan na sia magpakig-angot sa iya anay mga abyan nga wala nagasunod sa mga talaksan sang Biblia. Ayhan sadto, pirme sia nagapakig-upod sa ila. Apang, bangod nakita niya nga ang ila ginahimo mahimo makaimpluwensia sing malain sa iya, nagabatyag sia nga kinahanglan niya limitehan ang iya pagpakig-angot sa ila. (1 Cor. 15:33) Sa pihak nga bahin, basi nabalaka man sia nga kon indi na sia makig-upod sa ila, basi maglain ang ila buot sa iya.

¹³ Kon ginatun-an ikaw sa Biblia kag amo sini ang imo ginaatubang, dumduma nga ang isa ka matuod nga abyan magakalipay kon makita niya nga ginatinguhaan mo nga pauswagon ang imo kabuhi. Mahimo pa gani sia mag-upod sa imo sa pagtuon tuhoy kay Jehova. Sa pihak nga bahin, ang indi matuod nga mga abyan “padayon nga nagapakalain” sa imo bangod wala ka nag-upod sa ila “sa amo man nga lamawan sang pagpatuyang.” (1 Ped. 4:3, 4) Ang matuod, ini sila nga mga abyan amo ang indi mainunungon sa imo, kag indi ikaw.

¹⁴ Bisan pa ang mga ginatun-an sa Biblia sikwayon sang ila anay mga abyan nga wala sing gugma sa Dios, yara ang mga katapo sang kongregasyon para mangin ila bag-o nga abyan. (Gal. 6:10) Kilala mo bala ang mga ginatun-an sa Biblia nga nagatambong sa inyo mga miting? Nagapangita ka bala sing paagi nga mapalig-on sila?

15, 16. (a) Ano ang dapat naton himuon kon ang aton abyan magtalikod kay Jehova? (b) Paano naton mapamatud-an ang aton gugma sa Dios?

¹⁵ Apang, ano abi kon ang isa ka abyan sa kongregasyon magtalikod kay Jehova kag ayhan kinahanglan i-disfellowship? Ina nga kahimtangan makapasubo gid. Ginlaragway sang isa ka utod nga babayi ang iya reaksion sang ang iya suod nga abyan nag-untat sa pag-alagad kay Jehova, sia nagsiling: “Grabe nga kasubo ang akon nabatyagan. Abi ko anay mabakod gid ang panindugan sang akon abyan sa kamatuoran, apang indi gali. Nahunahuna ko nga basi nagaalagad lang sia kay Jehova agod pahamut-an ang iya pamilya. Sa gilayon gin-usisa ko ang akon mga motibo. Husto bala ang akon motibo sa pag-alagad kay Jehova?” Ano ang ginhimo sining utod nga babayi? “Gintugyan ko ang akon lulan kay Jehova,” siling niya. “Determinado ako karon nga pamatud-an kay Jehova nga ginaalagad ko sia bangod ginahigugma ko gid sia, kag indi lang bangod sa akon mga abyan sa sulod sang iya organisasyon.”

¹⁶ Indi naton mapaabot nga makapabilin kita nga abyan sang Dios kon nagadampig kita sa mga tawo nga nagapakig-abyan sa kalibutan. Si disipulo Santiago nagsulat: “Wala bala kamo makahibalo nga ang pagpakig-abyan sa kalibutan pagpakig-away sa Dios? Gani, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Sant. 4:4)  Mapamatud-an naton ang aton gugma sa Dios kon magpabilin kita nga mainunungon sa Iya kag magsalig nga buligan Niya kita nga malandas ang pagkadula sang isa ka abyan. (Basaha ang Salmo 18:25.) Ang utod nga babayi nga ginsambit kaina naghinakop: “Natun-an ko nga indi naton mapilit ang isa nga maghigugma sa aton ukon kay Jehova. Huo, personal ini nga desisyon.” Apang, ano ang mahimo naton agod mahuptan ang makapalig-on nga pag-abyanay sa mga nagapabilin nga matutom sa kongregasyon?

Paghupot sing Maayo nga Pag-abyanay

17. Paano ang maayo nga mga mag-abyan nagapakighambal sa isa kag isa?

¹⁷ Ang maayo nga komunikasyon amo ang nagapasuod sa pag-abyanay. Samtang ginabasa mo ang rekord sa Biblia tuhoy kanday Rut kag Noemi, David kag Jonatan, kag Pablo kag Timoteo, matalupangdan mo nga ang maayo nga mga mag-abyan hilway nga makapabutyag sang ila balatyagon sa isa kag isa nga may pagtahod. Tuhoy sa aton pagpakighambal sa iban, si Pablo nagsulat: “Maghambal kamo pirme nga may pagkamainayuhon, nga natimplahan sing asin.” Ginapatuhuyan diri ni Pablo ilabi na ang aton paagi sa pagpakighambal sa “mga yara sa gua,” buot silingon, sa mga indi naton masigkatumuluo. (Col. 4:5, 6) Gani, kon nagapakighambal kita nga may pagtahod sa mga di-tumuluo, indi bala nga mas labi na gid nga tahuron naton ang aton mga abyan sa sulod sang kongregasyon?

18, 19. Paano naton dapat tamdon ang laygay sang isa ka Cristianong abyan, kag ano nga halimbawa ang ginpahamtang sang mga gulang sa Efeso?

¹⁸ Ginapabaloran gid sang mga mag-abyan ang opinyon sang kada isa, amo nga sa ila komunikasyon kinahanglan sila mangin prangka apang matinahuron. Ang maalam nga si Hari Solomon nagsulat: “Ang lana kag pahumut nagalipay sang tagiposoon, amo ini ang ginahimo sang katam-is sang abyan sang tawo nga nagagikan sa laygay nga tinagiposoon.” (Hulu. 27:9) Amo bala sina ang pagtamod mo sa laygay nga imo nabaton sa isa ka abyan? (Basaha ang Salmo 141:5.) Kon laygayan ka sang isa ka abyan, ano ang imo reaksion? Apresyahon mo bala ini, ukon masaklaw ka?

¹⁹ Si apostol Pablo nangin suod gid sa mga gulang sa Efeso. Mahimo nga nakilala niya ang pila sa ila sang bag-o pa lang sila nangin tumuluo. Sa iya katapusan nga pagpakigkita sa ila, ginhatagan niya sila sing prangka nga laygay. Ano ang ila reaksion? Wala nasaklaw ang mga abyan ni Pablo. Sa baylo, gin-apresyar nila ang iya kabalaka sa ila, kag naghibi pa gani sila kay basi indi na nila makita liwat si Pablo.—Binu. 20:17, 29, 30, 36-38.

20. Ano ang himuon sang isa ka mahigugmaon nga abyan?

²⁰ Ang maayo nga mga abyan wala lamang nagabaton sing maalamon nga laygay kundi nagahatag man sini. Siempre, indi naton dapat paghilabtan ang kabuhi sang iban. (1 Tes. 4:11) Kag dapat man naton dumdumon nga ang kada isa sa aton “manabat sang iya kaugalingon sa Dios.” (Roma 14:12) Apang kon nakita sang isa ka mahigugmaon nga abyan nga ang iya kaupod nagalapas na sa mga talaksan ni Jehova, dapat gid niya ini pahanumdumon. (1 Cor. 7:39) Halimbawa, ano ang himuon mo kon natalupangdan mo nga ang imo di-minyo nga abyan naluyag sa isa ka di-tumuluo? Nahadlok ka bala nga maguba ang inyo pag-abyanay amo nga indi mo na lang sia pag-istoryahon parte sini? Ano abi kon indi niya pagbatunon ang imo laygay, ano ang himuon mo? Ang isa ka maayo nga abyan magapangayo sing bulig sa mahigugmaon nga mga gulang agod mabuligan ang iya abyan antes mangin ulihi ang tanan. Huo, kinahanglan gid ang kaisog agod mahimo ina. Bisan pa maglain ang iya buot sa imo, magaligad lang ina kon pareho ninyo nga ginahigugma si Jehova.

21. Ano ang mahimo naton kon kaisa, apang ngaa importante nga huptan naton nga mabakod ang aton pagpakig-abyan sa mga kauturan?

²¹ Basaha ang Colosas 3:13, 14. Kon kaisa, ang aton mga abyan mahimo “may reklamo” batok sa aton, kag ayhan sila man makahimo ukon makahambal sang mga butang nga makapaakig sa aton. “Kita tanan nagakasandad sing madamong beses,” sulat ni Santiago. (Sant. 3:2) Apang, ang matuod nga mga mag-abyan wala nagaisipay sang sala kundi nagapinatawaray. Gani, importante gid ang maayo nga komunikasyon kag pagkamapinatawaron agod magpabilin nga mabakod ang pag-abyanay! Kon ginapakita naton ina nga gugma, mangin “himpit [ini] nga higot sang paghiusa.”

Paano Mo Sabton?

• Paano kita makatigayon sing maayo nga mga abyan?

• San-o naton dapat untaton ang pagpakig-abyan sa isa ka tawo?

• Ano ang dapat naton himuon agod magpabilin nga mabakod ang pag-abyanay?

[Mga Pamangkot sa Pagtinuon]

[Retrato sa pahina 18]

Ano ang pundasyon sang mabakod kag nagdugay nga pag-abyanay nanday Rut kag Noemi?

[Retrato sa pahina 19]

Nagapakita ka bala pirme sang pagkamaabiabihon?