Nakapanggamot Ka Bala kag Natukod sa Sadsaran?

NAKAKITA ka na bala sang isa ka daku nga kahoy nga ginawaswasan sang mabaskog katama nga hangin? Ini nga kahoy napaidalom sa tuman nga kabudlayan, pero nakabatas. Ngaa? Bangod ang gamot sini mabakod kag madalom ang dulot sa duta. Mahimo man kita mangin kaangay sa sina nga kahoy. Kon nagaatubang kita sang kaangay bagyo nga mga pagtilaw sa kabuhi, makabatas man kita kon magpabilin kita nga ‘nakapanggamot kag natukod sa sadsaran.’ (Efe. 3:14-17) Ano ina nga sadsaran?

Ang Pulong sang Dios nagasiling nga “si Cristo Jesus mismo amo ang sadsaran nga pamusod nga bato” sang Cristianong kongregasyon. (Efe. 2:20; 1 Cor. 3:11) Kita nga mga Cristiano ginapalig-on nga ‘padayon nga maglakat nga nahiusa sa iya, nga nagapanggamot kag natukod sa iya kag napabakod sa pagtuo.’ Kon himuon naton ini, mabatas naton ang tanan nga pagtilaw sa aton pagtuo, lakip na sa sini ang “makabuluyok nga mga argumento” nga base sa “wala pulos nga daya” sang mga tawo.—Col. 2:4-8.

“Ang Kasangkaron kag Kalabaon kag Kataason kag Kadalumon”

Apang, paano kita ‘makapanggamot’ kag ‘mapabakod sa pagtuo’? Ang isa ka importante nga paagi nga malaragwayon naton nga mapadulot sing madalom ang aton gamot sa duta amo ang maukod nga pagtuon sa Biblia. Luyag ni Jehova nga “mahangpan [naton] upod sa tanan nga balaan kon ano ang kasangkaron kag kalabaon kag kataason kag kadalumon” sang kamatuoran. (Efe. 3:18) Gani, subong mga Cristiano, indi lang kita dapat mangin kontento sa hapaw nga paghangop, ukon magbatyag nga bastante na ang “nahauna nga mga butang” nga aton natun-an sa Biblia. (Heb. 5:12; 6:1) Sa baylo, ang kada isa sa aton dapat magtinguha nga padalumon ang aton paghangop sa mga kamatuoran sa Biblia.—Hulu. 2:1-5.

Indi buot silingon sini nga ang tuman kadamo nga ihibalo amo lamang ang kinahanglanon para ‘makapanggamot kita kag matukod sa sadsaran’ sang kamatuoran. Dumduma nga si Satanas nakahibalo man sang kaundan sang Biblia. Gani, kapin pa ang kinahanglanon. Kinahanglan naton “makilala ang gugma ni Cristo nga nagalabaw gid sa ihibalo.” (Efe. 3:19) Kon nagatuon kita bangod ginahigugma naton si Jehova kag ang kamatuoran, ang aton paghangop sa kamatuoran sa Biblia magadalom kag  subong resulta ang aton pagtuo magalig-on.—Col. 2:2.

Tilawi ang Imo Paghangop

Ngaa indi mo karon pagtilawan ang imo paghangop sa pila ka importante nga kamatuoran sa Biblia? Paagi sini mabuligan ka nga mangin maukod pa gid sa imo personal nga pagtuon sa Biblia. Subong halimbawa, basaha ang nagabukas nga mga bersikulo sang sulat ni Pablo sa mga taga-Efeso. (Tan-awa ang kahon nga  “Sa Mga Taga-Efeso.”) Sa tapos mo mabasa ini nga mga bersikulo, pamangkuta ang imo kaugalingon, ‘Nahangpan ko bala ang kahulugan sang nagahilay nga mga tinaga sa dinalan sang Biblia nga yara sa kahon?’ Binagbinagon naton sila sing isa-isa.

Gintangdo Na nga Daan “sa Wala Pa Matukod ang Kalibutan”

Si Pablo nagsulat sa iya mga masigkatumuluo: “Gintangdo na nga daan [sang Dios] ang pag-adoptar sa aton subong iya mga anak paagi kay Jesucristo.” Ang matuod, gintuyo ni Jehova nga mag-adoptar sang pila ka tawo nga mangin bahin sang iya himpit nga langitnon nga pamilya. Ining gin-adoptar nga mga anak sang Dios magagahom subong mga hari kag mga saserdote kaupod ni Cristo. (Roma 8:19-23; Bug. 5:9, 10) Sang ginhangkat ni Satanas ang soberanya ni Jehova, ginpahangop niya nga ang mga tawo nga gintuga sang Dios indi gid makapabilin nga matutom. Nian, nagakaigo gid nga nagpili si Jehova sang pila ka tawo para gamiton niya sa pagtinlo sa uniberso sang tanan nga kalainan, lakip na ang ginhalinan sini nga si Satanas nga Yawa! Apang, wala gintalana ni Jehova kon sin-o nga mga indibiduwal ang iya adoptahon. Sa baylo, nagtalana ang Dios nga may yara isa ka grupo sang mga tawo nga maggahom upod kay Cristo sa langit.—Bug. 14:3, 4.

Ano nga “kalibutan” ang ginapatuhuyan ni Pablo sang nagsulat sia sa iya mga masigka-Cristiano nga sila, subong isa ka grupo, amo ang ginpili  “sa wala pa matukod ang kalibutan”? Wala niya ginapatuhuyan ang tion antes gintuga sang Dios ang duta ukon ang katawhan bangod indi ini maghisanto sa talaksan sang katarungan sang Dios. Ngaa manabat sanday Adan kag Eva sa ila ginhimo kon gintalana na nga daan sang Dios nga mapaslawan sila antes sila gintuga? Kon amo, san-o gintalana sang Dios nga tadlungon ang kahimtangan nga resulta sang pagbuylog nanday Adan kag Eva sa pagrebelde ni Satanas sa soberanya sang Dios? Ginhimo lamang ini ni Jehova pagkatapos nagrebelde ang aton una nga mga ginikanan apang antes magluntad ang kalibutan sang di-himpit pero mahimo pa magawad nga katawhan.

“Suno sa Kamanggaran sang Iya Wala Tupong nga Kaayo”

Ngaa nagsiling si Pablo nga ang kahimusan nga ginbinagbinag sa nagabukas nga mga bersikulo sang Efeso nahimo ‘suno sa kamanggaran sang wala tupong nga kaayo’ sang Dios? Ginsiling niya ina agod ipadaku nga indi obligado si Jehova nga gawaron ang makasasala nga katawhan.

Kon sa aton lang, wala kita sing mahimo para mangin takus gawaron. Apang, bangod sang iya tudok nga gugma sa katawhan, naghimo si Jehova sing pinasahi nga kahimusan para luwason kita. Bangod sang aton pagkadihimpit kag pagkamakasasala, ang paggawad sa aton, subong sang ginsiling ni Pablo, isa gid ka wala tupong nga kaayo.

Ang Sagrado nga Likom sang Katuyuan sang Dios

Sang primero, wala ginpahibalo sang Dios kon paano niya solbaron ang halit nga ginhimo ni Satanas. Isa ini ka “sagrado nga likom.” (Efe. 3:4, 5) Sang ulihi, sang natukod na ang Cristianong kongregasyon, ginpahibalo ni Jehova ang mga detalye kon paano niya tumanon ang iya orihinal nga katuyuan para sa katawhan kag sa duta. “Sa katapusan sang gintalana nga mga tion” paathag ni Pablo, gamiton sang Dios ang “isa ka pagdumalahan,” isa ka sistema sa pagdumala sang mga butang nga magaresulta sa paghiusa sang tanan niya nga intelihente nga tinuga.

Ang una nga hugna sinang paghiusa nagsugod sang Pentecostes 33 C.E. sang ginsugdan ni Jehova ang pagtipon sang mga magagahom upod kay Cristo sa langit. (Binu. 1:13-15; 2:1-4) Ang ikaduha nga hugna amo ang pagtipon sang mga magapuyo sa paraiso nga duta sa idalom sang Mesianikong Ginharian ni Cristo. (Bug. 7:14-17; 21:1-5) Ang termino nga “pagdumalahan” wala nagapatuhoy sa Mesianikong Ginharian, bangod ini nga Ginharian natukod lamang sang 1914. Sa baylo, ang termino nagapatuhoy sa pagdumala sang Dios sa mga hitabo para matuman ang iya katuyuan nga ipasag-uli ang paghiusa sa bug-os nga uniberso.

‘Mangin Hamtong sa Ikasarang sa Paghangop’

Wala duhaduha nga ang maayo nga personal nga pagtuon makabulig sa imo nga mahangpan sing bug-os “ang kasangkaron kag kalabaon kag kataason kag kadalumon” sang kamatuoran. Apang, bangod sa masako nga estilo sang pagkabuhi sang mga tawo karon nangin mahapos para kay Satanas nga paluyahon ukon pauntaton ang aton maayo nga batasan sa pagtuon. Indi sia pagtuguti nga himuon ina sa imo. Gamita ang “paghangop” nga ginhatag sang Dios sa imo agod “mangin hamtong [ikaw sa imo] ikasarang sa paghangop.” (1 Juan 5:20; 1 Cor. 14:20) Pat-ura nga nahangpan mo ang imo ginapatihan agod mangin handa ka pirme sa paghatag sing “pangatarungan tuhoy sa paglaum nga yara sa [imo].”—1 Ped. 3:15.

Handurawa nga yara ka sa Efeso sang una nga ginbasa ang sulat ni Pablo. Indi ka bala mapahulag sang iya mga pinamulong nga mag-uswag “sa sibu nga ihibalo tuhoy sa Anak sang Dios”? (Efe. 4:13, 14) Pat-od gid nga mapahulag ka! Gani, tuguti ang inspirado nga pinamulong ni Pablo nga magpahulag man sa imo karon. Ang imo tudok nga gugma kay Jehova kag ang sibu nga ihibalo sa iya Pulong makabulig sa imo nga magpabilin nga ‘nagapanggamot kag natukod sa sadsaran’ ni Cristo. Paagi sa sini, mabatas mo ang ano man nga pagtilaw ni Satanas sa imo antes mag-abot ang katapusan sining malauton nga kalibutan.—Sal. 1:1-3; Jer. 17:7, 8.

[Kahon/Retrato sa pahina 27]

 “Sa Mga Taga-Efeso”

“Dayawon ang Dios kag Amay sang aton Ginuong Jesucristo, kay ginpakamaayo niya kita sang tagsa ka espirituwal nga pagpakamaayo sa langitnon nga mga duog nga nahiusa kay Cristo, subong nga ginpili niya kita nga nahiusa sa iya sa wala pa matukod ang kalibutan, agod mangin balaan kita kag wala sing depekto sa iya atubangan bangod sang gugma. Kay gintangdo na nga daan niya ang pag-adoptar sa aton subong iya mga anak paagi kay Jesucristo, suno sa iya nahamut-an kag kabubut-on, agod dayawon ang iya mahimayaon nga wala tupong nga kaayo nga mainayuhon nga ginhatag niya sa aton paagi sa isa nga iya hinigugma. Paagi sa iya nahilway kita paagi sa gawad paagi sa dugo sinang isa, huo, ang kapatawaran sang aton mga paglapas, suno sa kamanggaran sang iya wala tupong nga kaayo. Ginpabugana niya ini sa aton upod ang bug-os nga kaalam kag maayo nga paghangop, kay ginpahibalo niya sa aton ang sagrado nga likom sang iya kabubut-on. Nahisuno ini sa iya nahamut-an kag katuyuan tuhoy sa isa ka pagdumalahan sa katapusan sang gintalana nga mga tion, nga amo, agod tipunon liwat ang tanan nga butang kay Cristo, ang mga butang sa langit kag ang mga butang sa duta.”—Efe. 1:3-10.