Pabalori ang Imo Papel sa Kongregasyon
Pabalori ang Imo Papel sa Kongregasyon
“Ginbutang sang Dios ang mga bahin sa lawas, ang kada isa sini, suno sa iya nahamut-an.”—1 COR. 12:18.
1, 2. (a) Ngaa mapabaloran sang kada isa ang iya papel sa kongregasyon? (b) Ano nga mga pamangkot ang pagabinagbinagon sa sini nga artikulo?
SUGOD pa sang panahon sang dumaan nga Israel, gingamit na ni Jehova ang kongregasyon sa pagpakaon sang iya katawhan sa espirituwal kag sa paghatag sa ila sing instruksion. Halimbawa, pagkatapos malutos sang mga Israelinhon ang siudad sang Ai, “ginbasa [ni Josue] ang tanan nga polong sang kasogoan, ang pagpakamaayo kag ang pagpakamalaut, sono sa tanan nga nasulat sa tolon-an sang kasogoan . . . sa atubangan sang bug-os nga pagtilipon sang Israel.”—Jos. 8:34, 35.
2 Sang una nga siglo C.E., ginsilingan ni apostol Pablo ang Cristianong gulang nga si Timoteo nga ang Cristianong kongregasyon “panimalay sang Dios” kag “isa ka haligi kag pamakod sang kamatuoran.” (1 Tim. 3:15) Sa karon, ang “panimalay sang Dios” amo ang bug-os kalibutan nga paghiliutod sang matuod nga mga Cristiano. Sa kapitulo 12 sang iya nahauna nga inspirado nga sulat sa mga taga-Corinto, ginpaanggid ni Pablo ang kongregasyon sa isa ka lawas. Nagsiling sia nga ang kada bahin sini may nanuhaytuhay nga papel, apang ang tanan kinahanglanon. “Ginbutang sang Dios ang mga bahin sa lawas,” sulat ni Pablo, “ang kada isa sini, suno sa iya nahamut-an.” Ginpadaku pa gani niya nga “ang mga bahin sang lawas nga ginahunahuna naton nga indi tuman ka dungganon, ginahatagan naton ini sing kapin nga kadungganan.” (1 Cor. 12:18, 23) Gani, wala sing mataas ukon kubos sa panimalay sang Dios. Nanuhaytuhay lamang ang aton papel. Kon amo, paano naton mapabaloran ang aton papel sa kahimusan sang Dios? Ngaa nanuhaytuhay ang aton papel? Kag paano naton ‘mapadayag sa tanan nga tawo ang aton pag-uswag’?—1 Tim. 4:15.
Paano Naton Mapabaloran ang Aton Papel?
3. Paano naton mapabaloran ang aton papel sa kongregasyon?
3 Ang isa ka paagi nga mapabaloran naton ang aton papel sa kongregasyon amo ang pagkooperar sing bug-os sa “matutom kag mainandamon nga ulipon” kag sa tiglawas sini nga amo ang Nagadumala nga Hubon. (Basaha ang Mateo 24:45-47.) Kinahanglan naton usisaon kon bala ginatuman gid naton ang panuytoy sang matutom nga ulipon. Halimbawa, halin pa sang una pirme kita ginapahanumdom tuhoy sa pamayo kag pamustura, kalingawan, kag sa indi nagakaigo nga paggamit sang Internet. Mahalungon bala naton nga ginasunod ini nga laygay agod maamligan kita sa espirituwal? Kamusta naman ang panugda nga maghiwat sing regular nga pangpamilya nga pagsimba? Ginasunod bala naton ang panugda nga magpain sang isa ka gab-i para maghiwat sini? Kon kita di-minyo, nagahatag bala kita sing tion para sa personal nga pagtuon sa Biblia? Pakamaayuhon kita ni Jehova subong indibiduwal kag subong pamilya kon ginasunod naton ang panuytoy sang matutom nga ulipon.
4. Ano ang dapat naton binagbinagon kon nagahimo kita sing personal nga mga desisyon?
4 Mahimo mangatarungan ang iban nga ang pagpili sang kalingawan, pamayo kag pamustura isa ka personal nga desisyon. Apang kon ginapabaloran sang isa ka dedikado nga Cristiano ang iya papel sa kongregasyon, indi lamang ang iya luyag ang ginahimo niya nga basihan sa paghimo sing desisyon. Mas importante sa iya ang pagtamod ni Jehova nga makita sa Iya Pulong, ang Biblia. Ang mensahe sini dapat mangin ‘suga sa aton mga tiil kag kapawa sa aton banas.’ (Sal. 119:105) Maalamon man nga binagbinagon naton kon paano ang aton desisyon sa personal nga mga butang makaapektar sa aton ministeryo kag sa iban nga tawo, sa sulod man ukon sa gua sang kongregasyon.—Basaha ang 2 Corinto 6:3, 4.
5. Ngaa dapat kita magbantay batok sa di-mapinasakupon nga espiritu?
5 “Ang espiritu nga nagapanghikot karon sa mga anak sang pagkadimatinumanon” lapnag na gid kaangay sang hangin nga ginahaklo naton. (Efe. 2:2) Ina nga espiritu mahimo mag-impluwensia sa aton nga maghunahuna nga indi na naton kinahanglan ang panuytoy sang organisasyon ni Jehova. Siempre indi naton luyag nga mangin kaangay ni Diotrefes nga ‘wala nagtahod kag wala nagpamati’ kay apostol Juan. (3 Juan 9, 10) Kinahanglan naton magbantay agod indi kita maimpluwensiahan sang di-mapinasakupon nga espiritu. Sa aton hambal kag buhat, likawan gid naton nga supakon ang matutom nga ulipon nga ginagamit ni Jehova karon. (Num. 16:1-3) Sa baylo, dapat naton pabaloran ang aton pribilehiyo nga masakdag ang matutom nga ulipon. Gani, nagakaigo gid nga tinguhaan naton nga magmatinumanon kag magpasakop sa mga nagapanguna sa aton kongregasyon.—Basaha ang Hebreo 13:7, 17.
6. Ngaa kinahanglan naton usisaon ang aton personal nga kahimtangan?
6 Ang isa pa ka paagi nga mapakita naton nga ginapabaloran naton ang aton papel sa kongregasyon amo ang pag-usisa sang aton personal nga kahimtangan kag paghimo sang aton bug-os nga masarangan nga ‘mahimaya ang aton ministeryo’ kag mapadunggan si Jehova. (Roma 11:13) Paagi sa paghimo sini, nangin posible sa iban nga magregular payunir. Ang iban naman nagaalagad subong mga misyonero, mga nagalakbay nga manugtatap, kag katapo sang pamilya Bethel sa bug-os nga kalibutan. Madamo nga kauturan nga mga lalaki kag mga babayi ang nagaboluntaryo sa pagtukod sang mga Kingdom Hall. Apang, ang kalabanan sa mga alagad ni Jehova nagahimo sang ila labi nga masarangan sa pag-atipan sang espirituwal nga mga kinahanglanon sang ila pamilya kag nagapakigbahin sing bug-os sa ministeryo kada semana. (Basaha ang Colosas 3:23, 24.) Makasalig kita nga kon ginahimo naton ang aton bug-os nga masarangan sa pag-alagad kay Jehova indi gid kita madulaan sing papel sa iya kahimusan.
Ngaa Nanuhaytuhay ang Aton Papel?
7. Ipaathag kon paano ang aton kahimtangan makaapektar sa aton papel sa kongregasyon.
7 Importante gid nga usisaon naton ang aton kahimtangan bangod ang aton papel sa kongregasyon nagadepende sa kon ano ang aton masarangan himuon kag puede himuon. Halimbawa, ang papel sang utod nga lalaki sa kongregasyon tuhay sangsa utod nga babayi. Ang aton edad, panglawas, kag iban pa nga mga butang makaimpluwensia man sa kon ano ang aton mahimo sa pag-alagad kay Jehova. “Ang himaya sang mga pamatan-on nga lalaki amo ang ila kusug,” siling sang Hulubaton 20:29, “kag ang katahum sang mga tigulang amo ang ubanon nga olo.” Daku ang mabulig sang mga pamatan-on sa kongregasyon bangod sang ila kusog, kag daku man ang mabulig sang mga may edad na bangod sang ila ihibalo kag eksperiensia. Apang dapat naton dumdumon nga ano man ang aton ginahimo sa organisasyon ni Jehova, nangin posible ina bangod sa wala tupong nga kaayo sang Dios.—Binu. 14:26; Roma 12:6-8.
8. Ngaa ang handum may daku nga epekto sa aton papel sa kongregasyon?
8 Ang halimbawa sang duha ka mag-utod nga babayi nagapakita sang isa pa ka aspekto nga nagaapektar sang aton papel sa kongregasyon. Pareho sila nga nakatapos sa hayskul. Pareho man ang ila kahimtangan. Gintinguhaan gid sang ila ginikanan nga palig-unon sila nga magregular payunir paggradwar nila sa hayskul. Ang isa sa ila nagpayunir, samtang ang isa naman nag-obra sing bug-os tion. Ngaa tuhay ang ila nadangatan? Bangod indi pareho ang ila handum. Ginhimo sang kada isa kon ano ang iya handum. Indi bala nga amo man sina ang ginahimo sang kalabanan sa aton? Dapat naton hunahunaon sing serioso kon ano gid ang gusto naton himuon sa pag-alagad sa Dios. Mapauswag bala naton ang aton pagpakigbahin sa pag-alagad, bisan pa nagakinahanglan ini sang pagbag-o sang aton mga kahimtangan?—2 Cor. 9:7.
9, 10. Ano ang dapat naton himuon kon kulang kita sing determinasyon nga maghimo sing kapin pa sa pag-alagad kay Jehova?
9 Ano abi kon kulang kita sing determinasyon nga maghimo sing kapin pa sa pag-alagad kay Jehova kag may huyog nga magpulupatawhay lang sa kongregasyon? Sa iya sulat sa mga taga-Filipos, si Pablo nagsiling: “Ang Dios amo ang isa nga tungod sa iya nahamut-an nagapanghikot sa sulod ninyo agod magbuot kamo kag manghikot.” Huo, si Jehova makapanghikot sa aton kag makaimpluwensia sa aton gusto, ukon handum.—Fil. 2:13; 4:13.
10 Gani, indi bala nagakaigo nga mangabay kita kay Jehova nga tudluan kita sa paghimo sang iya kabubut-on? Amo sina ang ginhimo ni Hari David sang dumaan nga Israel. Nangamuyo sia: “Ipakita sa akon ang imo mga dalanon, O GINOO; tudloi ako sang imo mga banas. Tuytuyi ako sa imo kamatooran, kag tudloi ako, kay ikaw amo ang Dios sang akon kaluwasan; sa imo nagahulat ako sa bug-os nga adlaw.” (Sal. 25:4, 5) Mahimo man naton ini paagi sa pagpangamuyo kay Jehova nga buligan kita nga himuon kon ano ang makapahamuot sa iya. Samtang ginapamalandungan naton nga ginapabaloran gid ni Jehova nga Dios kag sang iya Anak ang aton pag-alagad, labi pa gid nga magalambo ang aton apresasyon sa ila. (Mat. 26:6-10; Luc. 21:1-4) Inang apresasyon magapahulag sa aton nga pangabayon si Jehova nga buligan kita nga maghimo sing labi pa sa pag-alagad sa iya. Si manalagna Isaias naghatag sing halimbawa kon ano nga kinaiya ang dapat naton palambuon. Sang nabatian niya si Jehova nga namangkot: “Sin-o bala ang akon ipadala, kag sin-o ang magakadto tungud sa amon?” ang manalagna nagsabat: “Yari ako! Ipadala ako.”—Isa. 6:8.
Tinguhai nga Mag-uswag—Paano?
11. (a) Ngaa dapat lab-uton sang mga utod nga lalaki ang mga katungdanan sa organisasyon? (b) Paano malab-ot sang isa ka utod nga lalaki ang mga pribilehiyo sa pag-alagad?
11 Sang 2008 nga tuig sang pag-alagad 289,678 ang nabawtismuhan sa bug-os nga kalibutan. Ginapakita sini nga daku gid ang pagkinahanglan sang mga utod nga lalaki para magdumala. Paano makabulig ang isa ka utod nga lalaki? Siempre, dapat sia magtinguha nga malab-ot ang mga kalipikasyon para sa mga ministeryal nga alagad kag mga gulang nga ginasiling sang Kasulatan. (1 Tim. 3:1-10, 12, 13; Tito 1:5-9) Paano malab-ot sang isa ka utod nga lalaki ining Makasulatanhon nga mga kalipikasyon? Paagi sa iya aktibo nga pagpakigbahin sa ministeryo, maukod nga pag-atipan sa iya mga asaynment sa kongregasyon, pagtinguha nga mapauswag ang iya mga komento sa Cristianong mga miting, kag pagpakita sing personal nga interes sa iya mga masigkatumuluo. Sa paghimo sini, mapakita niya nga ginapabaloran gid niya ang iya papel sa kongregasyon.
12. Paano mapakita sang mga pamatan-on ang ila kakugi?
12 Ano ang dapat himuon sang bataon nga mga utod nga lalaki ilabi na ang mga tin-edyer para mag-uswag sa kongregasyon? Dapat sila manikasog nga pauswagon ang ila “kaalam kag espirituwal nga paghangop” paagi sa pagkuha sing ihibalo sa Biblia. (Col. 1:9) Mahimo nila ina paagi sa maukod nga pagtuon sa Biblia kag aktibo nga pagpakigbahin sa mga miting sang kongregasyon. Mahimo man tinguhaan sang pamatan-on nga mga lalaki nga makasulod sa “daku nga ganhaan nga nagadul-ong sa hilikuton” sa nanuhaytuhay nga aspekto sang bug-os tion nga pag-alagad. (1 Cor. 16:9) Ang paglab-ot sing tulumuron sa pag-alagad kay Jehova nagahatag sing matuod nga kalipay kag nagaresulta sa madamo nga pagpakamaayo.—Basaha ang Manugwali 12:1.
13, 14. Sa ano nga mga paagi mapakita sang mga utod nga babayi nga ginapabaloran nila ang ila papel sa kongregasyon?
13 Mapakita man sang mga utod nga babayi nga ginapabaloran nila ang ila pribilehiyo paagi sa ila pagpakigbahin sa katumanan sang Salmo 68:11. Diri mabasa naton: “Ang Ginoo nagahatag sang polong; ang mga babayi nga nagabantala sang mga balita daku nga kadam-an.” Ang isa sa pinakatalalupangdon nga paagi nga mapakita sang mga utod nga babayi ang ila pagpabalor sa ila papel sa kongregasyon amo ang pagpakigbahin sa hilikuton nga paghimo sang disipulo. (Mat. 28:19, 20) Gani, paagi sa pagpakigbahin sing bug-os sa ministeryo kag pagsakripisyo para sa sini nga hilikuton, ginapamatud-an sang mga utod nga babayi nga ginapabaloran gid nila ang ila papel sa kongregasyon.
14 Sa iya sulat kay Tito, si Pablo nagsiling: “Ang tigulang nga mga babayi maggawi subong mga balaan, . . . mga manunudlo sang maayo; agod mapasag-uli nila ang kaligdong sang lamharon nga mga babayi nga higugmaon ang ila bana, nga higugmaon ang ila mga anak, nga mangin maligdong sing hunahuna, putli, mga manugpangabudlay sa puluy-an, maayo, nagapasakop sa ila bana, agod ang pulong sang Dios indi mapasipalahan.” (Tito 2:3-5) Maayo gid nga impluwensia ang hamtong nga mga utod nga babayi sa kongregasyon! Paagi sa ila pagtahod sa nagapanguna nga mga utod nga lalaki kag paagi sa ila maalamon nga pagpili sing kalingawan, pagpamayo kag pamustura, nagapahamtang sila sing maayo nga halimbawa sa iban kag nagapakita nga ginapabaloran nila ang ila papel sa kongregasyon.
15. Ano ang dapat himuon sang isa ka utod nga babayi kon nagabatyag sia sing kasubo bangod sa pag-isahanon?
15 Kon kaisa, mahimo mabudlayan ang isa ka di-minyo nga utod nga babayi nga mapabaloran ang iya papel sa kongregasyon. Ang isa ka utod nga babayi nga nakaeksperiensia sini nagsiling: “Kon kaisa masubo gid ang nagaisahanon.” Sang ginpamangkot sia kon paano niya ini gin-atubang, nagsiling sia: “Ang pagpangamuyo kag pagtuon nakabulig sa akon nga labi nga apresyahon ang akon papel sa kongregasyon. Ginpamalandungan ko kon paano ako ginatamod ni Jehova. Dayon gintinguhaan ko nga mangin mabinuligon sa iban sa kongregasyon. Nakabulig ini sa akon nga hunahunaon ang iban sa baylo nga ang akon lamang kaugalingon.” Sa Salmo 32:8, nagsiling si Jehova kay David: “Laygayan ko ikaw nga ang akon mata yara sa ibabaw nimo.” Huo, interesado gid si Jehova sa tanan niya nga mga alagad, lakip na sa di-minyo nga mga utod nga babayi, kag buligan niya ang tanan nga mapabaloran ang ila papel sa kongregasyon.
Padayon nga Pabalori ang Imo Papel!
16, 17. (a) Ngaa ang pagbaton sa pangagda ni Jehova nga mangin bahin sang iya organisasyon amo ang pinakamaayo nga desisyon nga aton nahimo? (b) Paano naton mahuptan ang aton papel sa organisasyon ni Jehova?
16 Mahigugmaon nga ginabuyok ni Jehova ang tagsa niya ka alagad nga mangin suod sa iya. Si Jesus nagsiling: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Bisan pa binilyon ang mga tawo sa duta, ang kada isa personal nga ginaagda ni Jehova nga mangin bahin sang iya kongregasyon karon. Ang pagbaton sina nga pangagda amo ang pinakamaayo nga desisyon nga aton nahimo. Bangod sini nasapwan naton ang matuod nga kahulugan kag katuyuan sang aton kabuhi. Daku gid ang aton kalipay kag kaayawan bangod may yara kita papel sa kongregasyon!
17 “Ginahigugma ko, O Jehova, ang balay nga imo ginapuy-an,” siling sang salmista. Nagdugang pa sia: “Magakabuhi ako nga wala sing katalagman; sa tunga sang nagatipon nga katilingban dayawon ko si Jehova.” (Sal. 26:8, 12, NW) Ang aton Dios naghatag sa kada isa sa aton sing papel sa iya organisasyon. Paagi sa aton padayon nga pagsunod sa teokratikong kahimusan kag pagpabilin nga masako sa pag-alagad sa Dios, mahuptan naton ang aton hamili nga papel sa kahimusan ni Jehova.
Madumduman Mo Bala?
• Ngaa makasiling kita nga ang tanan nga Cristiano may papel sa kongregasyon?
• Paano naton mapakita nga ginapabaloran gid naton ang aton papel sa organisasyon sang Dios?
• Ano nga mga butang ang makaapektar sang aton papel sa kongregasyon?
• Paano mapakita sang pamatan-on kag hamtong nga mga Cristiano nga ginapabaloran gid nila ang ila papel sa kahimusan sang Dios?
[Mga Pamangkot sa Pagtinuon]
[Mga Retrato sa pahina 16]
Paano malab-ot sang mga utod nga lalaki ang mga pribilehiyo sa kongregasyon?
[Retrato sa pahina 17]
Paano mapakita sang mga utod nga babayi nga ginapabaloran nila ang ila papel sa kongregasyon?
