Masako kag Malipayon sa Pag-alagad sa Dios

LUYAG ni Jehova nga mangin malipayon ka. (Sal. 100:2) Subong isa sa iya mga alagad mahimo nga masako man ikaw. Ayhan indi ka amo gid sini kasako sang bag-o ka pa lang sa kamatuoran, apang ang imo karon sekular kag espirituwal nga mga salabton mahimo nagapabudlay sa imo. Ginakonsiensia ka pa gani kon indi mo mahimo ang tanan nga luyag mo himuon. Paano ka mangin balanse kag mahuptan “ang kalipay ni Jehova”?—Neh. 8:10, NW.

Nagakabuhi ka sa mabudlay nga mga tion kag nagaatubang sa madamo nga mga pag-ipit, gani dapat mo organisahon sing maayo ang imo mga hilikuton. Sa sini nga bahin, daku gid ang mabulig sang pila ka inspirado nga laygay ni apostol Pablo: “Padayon ninyo nga bantayi sing maayo nga ang inyo paglakat indi subong di-maalam kundi subong maalam nga mga tawo, nga ginabakal ang nagakaigo nga tion para sa inyo kaugalingon, bangod ang mga adlaw malaut.”—Efe. 5:15, 16.

Agod masunod inang maalamon nga laygay, paano ka makapahamtang sing realistiko nga mga tulumuron para mangin balanse sa imo personal nga pagtuon, pag-atipan sa pamilya, pagministeryo, sekular nga trabaho kag iban pa nga importante nga mga hilikuton?

Nadumduman mo pa bala ang kalipay nga imo nabatyagan sang gindedikar mo ang imo kaugalingon sa Dios kag nagpabawtismo? Nangin malipayon ka sang nakilala mo si Jehova kag nahibaluan ang iya mga katuyuan. Mahimo nga binulan ang imo ginhinguyang sa pagtuon antes mo natigayon ina nga ihibalo kag kalipay. Apang takus gid ang imo pagpanikasog. Ina nga pagtuon nagpauswag sang imo kabuhi.

Agod mahuptan mo ang imo kalipay, kinahanglan nga padayon ka nga magkaon sa espirituwal. Kon nabudlayan ka nga mangita sing tion para sa pagbasa kag pagtuon sang Biblia, usisaa ang imo iskedyul. Bisan ang pila lang ka minuto nga pagtuon kag pagpamalandong kada adlaw makapasuod sa imo kay Jehova, kag pat-od nga makahatag sa imo sang kalipay.

Ang kalabanan sang mga alagad sang Dios nagabakal sang tion sa indi tanto ka importante nga mga butang para magamit nila sa importante nga mga hilikuton. Pamangkuta ang imo kaugalingon, ‘Daw ano ka daku nga tion ang akon ginahinguyang sa pagbasa sa sekular nga mga magasin ukon mga pamantalaan, pagtan-aw sang telebisyon, pagpamati sang musika, ukon sa iban pa nga mga kalingawan?’ Ina nga mga hilikuton makalilipay lamang  kon himuon naton ina sing balanse. (1 Tim. 4:8) Kon nabudlayan ka sa pagbadyet sang imo tion, maghimo sang iskedyul kag sunda ini.

Si Adam nga isa ka bana, amay sang tatlo ka kabataan, kag gulang, nagpaathag kon ano ang nakabulig sa iya: “Gintinguhaan ko nga magkabuhi sing simple. Ginalikawan ko ang mga kalingawan kag mga pagkabutang nga magaubos sang akon tion. Indi buot silingon nga ginadingutan ko ang akon kaugalingon, kontento na ako sa simple nga mga kalingawan.”

Ang pagpamalandong sa maayo nga mga resulta sang imo mga desisyon makabulig nga mapanumbalik mo ang imo kalipay kag mahuptan ang positibo nga panimuot. Halimbawa, si Mariusz nga isa ka gulang nga may tatlo ka kabataan nagsiling: “Sugod sang nagtuon ako sa Biblia, nangin positibo na ang akon pagtamod sa kabuhi. Kon kaisa, nagaatubang ako sang mga kabudlayan nga madamo sa sini si Jehova lamang ang nakahibalo. Apang bangod sa iya suporta, nalipay ako sa paghulat sa palaabuton.”

Subong sang naeksperiensiahan ni Mariusz, ang positibo nga panimuot indi makadula sang ginabatyag nga kabalaka sang isa. Apang makabulig ini sa imo nga mapahaganhagan ang imo ginabatyag kag mangin malig-on sa pag-atubang sa mga kabudlayan. Ang Biblia nagasiling: “Ang tanan nga adlaw sang napiotan malaut, apang ang malipayon sing tagiposoon may dalayon nga piesta.” (Hulu. 15:15) Pamalandungi man ang gugma nga ginpakita sang Dios sa imo. Makabulig ini sa imo nga higugmaon sia kag magapatudok ini sang imo kalipay.—Mat. 22:37.

Ang pag-una kay Jehova kag sa iya kabubut-on makadugang sa kalipay sang isa ka pamilya. Ang pagpakita sang Cristianong mga kinaiya makabulig agod malikawan ang mga di-paghangpanay kag nagapasuod sa kaangtanan kag pagtinamdanay sa sulod sang pamilya. Sa amo, ang inyo puluy-an mangin duog sang paghidait kag paghiusa.—Sal. 133:1.

Matigayon man sang pamilya ang matuod nga kalipay kon makigbahin sila sing magkaupod sa espirituwal nga mga hilikuton. Si Mariusz nagpaathag: “Ginapabaloran ko gid ang tion nga magkaupod kami subong isa ka pamilya. Ginabuligan gid ako sang akon asawa. Kon posible, ginaupdan niya ako sa pagministeryo ukon sa pagpaninlo sang istadyum antes sang kombension, kag subong man kon magpamulongpulong ako sa iban nga kongregasyon. Napalig-on gid ako sa sini.”

Ginasugo sang Biblia ang mga Cristiano nga amanan sing materyal nga mga kinahanglanon ang ila pamilya. (1 Tim. 5:8) Apang kon ginaubos sang sekular nga trabaho ang imo tion kag kusog, mahimo nga madula ang imo kalipay sa pag-alagad sa Dios. Ipangamuyo ini kay Jehova. (Sal. 55:22) Ang iban nagdesisyon nga mangita sang bag-o nga trabaho agod mauna ang Ginharian sang Dios. Dapat nga indi pagtugutan sang isa ka Cristiano nga mapasapayanan ang espirituwal nga mga butang bangod lamang sa pinansial nga bentaha sang isa ka trabaho nga daku ang sueldo.—Hulu. 22:3.

Mahimo makabulig sa imo kon isulat mo ang mga bentaha kag disbentaha sang imo trabaho karon kag sa trabaho nga luyag mo sayluhan. Siempre pa, luyag naton ang maayo nga trabaho nga may daku nga sueldo. Apang, ang imo bala trabaho nagabulig sa imo nga mapauswag ang espirituwalidad sang imo pamilya? Binagbinaga sing maayo ina tanan nga butang kag maghimo sing desisyon nga ginauna ang imo kaangtanan kay Jehova.

Kon nakita mo nga ang imo karon trabaho nagaupang sa imo pag-uswag sa espirituwal, kinahanglan ka maghimo sing mga pagpasibu. Madamo nga mga Cristiano ang naghimo sing dalagku nga mga pagbag-o para may tion sila sa espirituwal nga mga butang. Ang isa ka utod nga lalaki sa Poland nagsiling: “Wala na ako sang mahimo kundi maghalin sa kompanya nga ginaubrahan ko kay pirme lang ako nagabiyahe sa malayo nga mga lugar. Wala na ako sing tion sa espirituwal nga mga butang kag sa akon pamilya.” Sa karon, ang iya trabaho wala na nagakuha sang iya daku nga tion kag kusog.

Mangin Malipayon sa Pagbulig sa Iban

Si Jesus nagsiling nga “may kapin nga kalipay sa paghatag sangsa pagbaton.” (Binu. 20:35) Madamo sing kahigayunan ang mga Cristiano sa paghatag. Kon kaisa, bisan gani ang pagyuhum, pagpangamusta, ukon sinsero nga pagpasalamat sa iban sa pagtungod nila sang ila teokratikong asaynment makahatag na sing kalipay sa ila kag sa imo man.

Ginpalig-on ni apostol Pablo ang iya mga masigka-Cristiano: “Lipayon ang mga kalag nga ginapung-awan, sakdagon ang mga maluya.” (1 Tes.  5:14) Mahimo magbatyag ang mga ginapung-awan nga kon sa ila lang kaugalingon nga kusog indi nila masarangan ang ila mga problema. Mahimo mo bala sila mabuligan? Kon nakita mo nga ang imo utod nadulaan na sing kalipay sa pag-alagad kay Jehova, tinguhai nga palig-unon sia. Sa paghimo sini, ikaw mismo mapalig-on man. Huo, may mga problema nga indi masolbar sang tawo. Apang, kon magpakita ka sing empatiya, mapalig-on mo ang imo utod nga magsandig kay Jehova. Ang mga nagasandig kay Jehova wala gid nagakapaslawan.—Sal. 27:10; Isa. 59:1.

Ang isa pa ka praktikal nga paagi nga makabulig ka sa isa ka utod nga nasubuan amo ang pag-agda sa iya nga updan ka sa ministeryo. Sang ginsugo ni Jesus ang 70 ka disipulo, ginpadala niya sila “sing tagduhaduha.” (Luc. 10:1) Nagaugyon ka bala nga ining kahimusan nagahatag sing kahigayunan nga makapalig-unanay ang duha nga magkaupod? Puede mo bala mapanginpuslan ini nga kahimusan para mapasag-uli mo ang kalipay sang imo utod?

Ang kabuhi naton karon puno gid sing problema. Apang, ginalaygayan kita ni Pablo: “Magkasadya kamo pirme sa Ginuo. Sa liwat ginasiling ko, Magkasadya kamo!” (Fil. 4:4) Bangod ginahigugma mo ang Dios, ginatuman sia, kag makugi ka nga nagapadayon sa hilikuton nga ginhatag niya sa imo, ang imo kabuhi may katuyuan. Nagahatag ini sa imo sing kalipay. Dugang pa, ginabuligan ka ni Jehova nga malandas ang mga pag-ipit kag mga problema nga imo ginaatubang.—Roma 2:6, 7.

Paagi sa aton pagtuo, mahantop naton nga malapit na gid mag-abot ang saad ni Jehova nga bag-ong kalibutan. Magadala gid ina sang madamo nga mga pagpakamaayo kag mga rason sa pagkalipay! (Sal. 37:34) Gani magkasadya ka samtang ginadumdom mo nga bisan karon pa lang, bugana na kita nga ginapakamaayo ni Jehova. Sa amo, ‘maalagad naton si Jehova nga may kasadya!’—Sal. 100:2, NW.

[Diagram sa pahina 8]

(Para sa aktual nga pormat, tan-awa ang publikasyon)

Ayhan kinahanglan mo nga bag-uhon ang imo iskedyul agod makapabilin ka nga malipayon

KALINGAWAN

PULUY-AN kag PAG-ATIPAN SA PAMILYA

CRISTIANONG MGA MITING

PERSONAL NGA PAGTUON

MINISTERYO

[Mga Retrato sa pahina 10]

Makabulig ka bala agod mapanumbalik ang kalipay sang iban?