Palambua ang Gugma nga Wala Nagakapaslawan
Palambua ang Gugma nga Wala Nagakapaslawan
‘Ang gugma nagabatas sang tanan nga butang. Ang gugma wala gid nagakapaslawan.’—1 COR. 13:7, 8, footnote.
1. (a) Sa masami paano ginapakilala ang gugma? (b) Sa ano nasentro ang gugma sang madamo sa karon?
ANG gugma nangin paborito gid nga topiko sang mga tawo. Amo ini pirme ang tema sang mga ambahanon. Huo, ang gugma importante gid sa kabuhi sang tawo. Apang sa masami, ang mga istorya sang gugma nga ginapagua sa mga libro kag mga pelikula himo-himo lang, kag mabakal gid ini. Apang makapasubo nga ang matuod nga gugma sa Dios kag sa isigkatawo malaka lang makita. Nagakatuman na subong ang tagna sang Biblia tuhoy sa katapusan nga mga adlaw. Ang mga tawo “mahigugmaon sa kaugalingon, mahigugmaon sa kuarta, . . . mahigugmaon sa kinasadya sa baylo nga mahigugmaon sa Dios.”—2 Tim. 3:1-5.
2. Ano nga paandam ang ginahatag sang Biblia tuhoy sa sayop nga sahi sang gugma?
2 Ang mga tawo may ikasarang nga magpakita sing gugma, apang ang Pulong sang Dios nagapaandam batok sa sayop nga sahi sang gugma. Kag ginalaragway sang Biblia kon ano ang matabo kon ini nga sahi sang gugma manggamot sa tagipusuon sang isa. (1 Tim. 6:9, 10) Nadumduman mo pa bala ang ginsulat ni apostol Pablo tuhoy kay Demas? Bisan pa magkaupod sila ni Pablo sang una, ginbiyaan niya si Pablo bangod ginhigugma ni Demas ang ginatanyag sang kalibutan. (2 Tim. 4:10) Si apostol Juan nagpaandam man sa mga Cristiano batok sa sini nga katalagman. (Basaha ang 1 Juan 2:15, 16.) Kon ginahigugma naton ang kalibutan kag ang umalagi nga mga butang kag mga dalanon sini, indi kita makasiling nga ginahigugma naton ang Dios kag ang mga butang nga gikan sa iya.
3. Ano nga mga hangkat ang ginaatubang naton, kag ano nga mga pamangkot ang nag-utwas?
3 Indi kita bahin sang kalibutan, apang nagapuyo kita gihapon sa sini. Gani, mahimo kita maimpluwensiahan sang tiko nga pagtamod sang kalibutan tuhoy sa gugma. Apang, indi naton dapat pagtugutan nga masiod kita sang sayop ukon wala sing prinsipio nga gugma. Kon amo, kay sin-o naton dapat palambuon kag ipakita ang may prinsipio nga gugma? Ano nga mga aman ang makabulig sa aton nga mapalambo ang gugma nga nagabatas sang tanan nga butang kag wala nagakapaslawan? Paano ang pagpalambo sini makabulig sa aton karon kag sa palaabuton? Kinahanglan naton hibaluon kon ano ang pagtamod sang Dios tuhoy sa sini agod matuytuyan kita.
Palambua ang Imo Gugma Kay Jehova
4. Paano mapalambo ang gugma sa Dios?
4 Ang pagpalambo ukon pagkultibar, nagapahangop sang paghanda kag pagpatubo sang isa ka butang. Hunahunaa ang isa ka mangunguma nga nagapangabudlay sing lakas sa paghanda sang duta kag sa pagtanom sang mga binhi. Nagapaabot gid sia nga magtubo ang mga binhi. (Heb. 6:7) Sing kaanggid, ang aton gugma sa Dios dapat man magtubo. Ano ang dapat naton himuon para magtubo ini? Dapat naton ihanda kag kultibahon ang maayong duta sang aton tagipusuon, sa diin ginsab-ug ang binhi sang kamatuoran sang Ginharian. Mahimo naton ini paagi sa maukod nga pagtuon sa Pulong sang Dios agod madugangan ang aton ihibalo tuhoy sa iya. (Col. 1:10) Ang regular nga pagtambong kag pagpakigbahin sa mga miting sang kongregasyon makabulig man agod madugangan ang aton ihibalo. Nagapanikasog gid bala ang kada isa sa aton nga magpadayon sa pagkuha sing mas madalom nga ihibalo?—Hulu. 2:1-7.
5. (a) Paano kita makatuon tuhoy sa panguna nga mga kinaiya ni Jehova? (b) Ano ang masiling mo tuhoy sa katarungan, kaalam, kag gahom sang Dios?
5 Ginapadayag ni Jehova ang iya kinaiya paagi sa iya Pulong. Paagi sa pagtuon sa Kasulatan kag sa padayon nga pagkuha sing ihibalo tuhoy kay Jehova, magadugang ang aton apresasyon sa iya mga kinaiya—ang iya katarungan, gahom, kaalam kag, labaw sa tanan, ang iya wala sing tupong nga gugma. Ang katarungan ni Jehova makita gid sa tanan niya nga dalanon kag sa iya himpit nga kasuguan. (Deut. 32:4; Sal. 19:7) Samtang ginapamalandungan naton ang mga tinuga ni Jehova labi kita nga magadayaw sa iya superyor nga kaalam. (Sal. 104:24) Ang uniberso nagapamatuod man nga si Jehova amo ang Ginahalinan sang dinamiko nga kusog kag walay latid nga gahom.—Isa. 40:26.
6. Paano ginpabutyag sang Dios ang iya gugma sa aton, kag paano ini nakaapektar sa imo?
6 Ano ang masiling mo sa nagapangibabaw nga kinaiya sang Dios, ang iya gugma? Tuman ini kasangkad kag nagaapektar sa aton tanan. Ginpabutyag niya ini nga gugma paagi sa pag-aman sang halad para magawad ang katawhan. (Basaha ang Roma 5:8.) Ini nga halad gin-aman para sa tanan nga katawhan sa kalibutan, apang ang makabenepisyo lamang sa sini amo ang mga tawo nga nagahigugma sa Dios kag nagatuo sa iya Anak. (Juan 3:16, 36) Ang paghatag sang Dios kay Jesus subong halad nga katumbas sang aton mga sala, dapat gid magpahulag sa aton nga balusan ang gugma ni Jehova.
7, 8. (a) Paano naton mapakita ang aton gugma sa Dios? (b) Ano ang ginaatubang sang mga alagad sang Dios samtang ginatuman nila ang iya mga sugo?
7 Paano naton mabalusan ang gugma nga ginpakita sang Dios sa aton? Maathag ang sabat sang Biblia: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” (1 Juan 5:3) Huo, ang aton gugma kay Jehova nga Dios amo ang nagapahulag sa aton nga sundon ang iya mga sugo. Amo ina ang isa ka rason kon ngaa nagapanaksi kita tuhoy sa iya ngalan kag sa iya Ginharian, nga nagahatag sing benepisyo sa iban. Ang tinagipusuon nga pagpakigbahin sa sini nagapamatuod nga putli ang aton motibo sa pagtuman sa mga sugo sang Dios.—Mat. 12:34.
8 Bisan pa madamo ang wala sing interes kag direkta nga nagapamatok sa mensahe sang Ginharian, padayon nga ginatuman sang aton mga kauturan sa bug-os nga kalibutan ang mga sugo sang Dios. Wala sila nagauntat sa ila pagpanikasog nga matuman sing bug-os ang ila ministeryo. (2 Tim. 4:5) Gani, mapahulag man kita nga ipaambit sa iban ang ihibalo sang Dios kag tumanon ang iban pa niya nga mga sugo.
Kon Ngaa Ginahigugma Naton ang Aton Ginuo nga si Jesucristo
9. Ano ang ginbatas ni Cristo, kag ano ang nagpahulag sa iya nga himuon ini?
9 Dugang pa sa paghigugma naton sa Dios, madamo kita sing rason kon ngaa dapat naton palambuon ang aton gugma sa iya Anak. Bisan pa wala naton makita si Jesus, ang aton gugma sa iya nagalambo samtang nagadugang ang aton ihibalo sa iya. (1 Ped. 1:8) Ano ang pila sa mga butang nga ginbatas ni Jesus? Samtang ginahimo niya ang kabubut-on sang iya Amay, gindumtan si Jesus nga wala sing kabangdanan, ginhingabot, butig nga ginsumbong, kag ginpakalain. Nag-antos man sia sang iban pa nga mga pagpakahuya. (Basaha ang Juan 15:25.) Ang gugma ni Jesus sa iya langitnon nga Amay amo ang nagpahulag sa iya nga batason ina nga mga pagtilaw. Kag bangod sa iya gugma, ginhalad niya ang iya kabuhi subong gawad para sa madamo.—Mat. 20:28.
10, 11. Subong pag-apresyar sa ginhimo ni Cristo, ano ang aton tulumuron?
10 Ang ginhimo ni Jesus nagapahulag sa aton nga balusan ang iya gugma. Samtang ginahunahuna naton ang ginhimo ni Cristo para sa aton, nagadalom pa gid ang aton gugma sa iya. Subong iya mga sumulunod, dapat mangin tulumuron naton nga palambuon kag huptan ang tulad-Cristo nga gugma para makabatas kita sa pagtuman sang iya sugo nga magbantala sang Ginharian kag maghimo sing mga disipulo.—Mat. 28:19, 20.
11 Kon ginaapresyar naton ang gugma ni Cristo sa katawhan, mapahulag kita nga tapuson ang hilikuton nga gintugyan niya sa aton antes mag-abot ang katapusan. (Basaha ang 2 Corinto 5:14, 15.) Ang gugma nga ginpakita ni Cristo nasentro sa iya pagtuman sa katuyuan sang Dios para sa katawhan. Kag kon sundon naton sing maayo ang halimbawa nga ginpahamtang ni Cristo, makabulig ini sa kada isa sa aton nga makapakigbahin sa sinang katuyuan. Agod mahimo ini, kinahanglan nga palambuon naton sing bug-os ang aton gugma sa Dios. (Mat. 22:37) Paagi sa pagsunod sa gintudlo ni Jesus kag sa pagtuman sang iya mga sugo, mapakita naton nga ginahigugma naton sia kag determinado kita nga sakdagon ang soberanya sang Dios ano man ang matabo, subong sang ginhimo ni Jesus.—Juan 14:23, 24; 15:10.
Sunda ang Labaw Gid nga Paagi sang Gugma
12. Ano ang buot silingon ni Pablo sang ginsambit niya ang “labaw gid nga paagi”?
12 Si apostol Pablo nangin manug-ilog ni Cristo. Bangod gin-ilog sing maayo ni Pablo ang halimbawa ni Cristo, may kahilwayan sia nga palig-unon ang mga kauturan nga ilugon man sia. (1 Cor. 11:1) Bisan pa ginpalig-on ni Pablo ang mga Cristiano sa Corinto nga mangin makugi sa pagtinguha nga matigayon ang mga dulot sang espiritu nga ginpahayag sang unang siglo, subong sang pagpang-ayo kag paghambal sing lainlain nga hambal, ginpakita ni Pablo nga may mas maayo pa nga butang nga dapat nila tinguhaan. Sa 1 Corinto 12:31, nagpaathag sia: “Ipakita ko sa inyo ang labaw gid nga paagi.” Ginapakita sang konteksto sang masunod nga mga bersikulo nga amo ini ang labaw gid nga paagi sang gugma. Ngaa labaw gid ini? Ginpaathag ni Pablo kon ano ang iya buot silingon. (Basaha ang 1 Corinto 13:1-3.) Bisan pa may talalupangdon sia nga mga ikasarang kag nakahimo sing dalagku nga mga butang apang kon wala sia sing gugma, ano ang pulos sini? Wala gid! Ining makapakumbinsi nga kamatuoran napaathag niya paagi sa bulig sang balaan nga espiritu sang Dios. Daw ano gid ka importante nga punto ang ginpaalinton niya sa aton!
13. (a) Ano ang tuigan nga teksto para sa 2010? (b) Ano ang buot silingon nga ang gugma wala nagakapaslawan?
13 Dayon ginpaathag ni Pablo kon ano gid ang matuod nga gugma. (Basaha ang 1 Corinto 13:4-8.) Usisaa karon kon bala matuod nga gugma ang imo ginapakita. Magkonsentrar sa katapusan nga bahin sang bersikulo 7 kag sa una nga dinalan sang bersikulo 8: ‘Ang gugma nagabatas sang tanan nga butang. Ang gugma wala gid nagauntat,’ nga amo ang tuigan nga teksto para sa 2010. Talupangda nga sa bersikulo 8, si Pablo nagsiling nga ang mga dulot sang espiritu, lakip na ang pagpanagna kag paghambal sing lainlain nga hambal nga gingamit sang bag-o pa lang nagsugod ang Cristianong kongregasyon, mauntat na. Buot silingon, madula na ini. Apang ang gugma magapabilin. Si Jehova amo ang personipikasyon sang gugma, kag wala sia sing katapusan. Sa amo, ang gugma indi mapaslawan, ukon indi gid magauntat. Padayon ini nga magaluntad subong ang panguna nga kinaiya sang aton Dios.—1 Juan 4:8.
Ang Gugma Nagabatas sang Tanan nga Butang
14, 15. (a) Paano ang gugma makabulig sa aton nga mabatas ang mga pagtilaw? (b) Ngaa ang isa ka pamatan-on nga utod wala nagkompromiso?
14 Ano ang nagabulig sa mga Cristiano nga mabatas ang mga pagtilaw, kabudlayan, kag mga problema nga ila ginaatubang? Ang gugma nga nabase sa prinsipio. Ina nga gugma indi lamang pagsakripisyo sang materyal nga mga butang. Nagapahulag ini sa aton nga huptan ang aton integridad sa Dios kag sundon si Cristo bisan pa nagakahulugan ini sang aton kamatayon. (Luc. 9:24, 25) Pamalandungi ang halimbawa sang matutom nga mga Saksi nga nag-antos sa mga kampo konsentrasyon, sa mga kampo sang pilit nga pagpatrabaho, kag sa mga prisuhan sa tion kag pagkatapos sang Bug-os Kalibutan nga Inaway II.
15 Isa ka halimbawa sini amo ang pamatan-on nga Aleman nga Saksi nga si Wilhelm. Wala sia nagkompromiso, kundi nagpabilin sia nga mainunungon tubtob sa kamatayon paagi sa firing squad sang mga Nazi. Sa iya katapusan nga sulat sa iya pamilya, sia nagsiling: “Labaw sa tanan, dapat naton higugmaon si Jehova nga Dios subong sang ginsugo sang aton Lider nga si Jesucristo. Kon magpabilin kita nga mainunungon sa iya pagapadyaan niya kita.” Sang ulihi, ang isa ka miembro sang iya pamilya nagsulat sa isa ka artikulo sang Ang Lalantawan: “Subong pamilya, ginauna gid namon ang amon gugma sa Dios bisan sa pinakamabudlay nga mga tion sang amon kabuhi.” Amo man sini ang panimuot nga ginapakita sang madamo nga mga kauturan nga nagabatas karon sang pagbilanggo sa Armenia, Eritrea, Bagatnan nga Korea kag sa iban pa nga mga pungsod. Ginhuptan sini nga mga kauturan nga malig-on ang ila gugma kay Jehova.
16. Ano ang ginbatas sang aton mga kauturan sa Malawi?
16 Sa madamo nga lugar, nanuhaytuhay nga pagtilaw ang ginabatas sang aton mga kauturan. Sa Malawi, ang mga Saksi ni Jehova nagbatas sing 26 ka tuig nga pagdumili sang gobierno, tuman nga pagpamatok kag madamo pa nga kabudlayan. Apang, ang ila pagbatas ginpadyaan. Sang nag-umpisa ang paghingabot 18,000 lang ang mga Saksi sa sina nga pungsod. Pagligad sang 30 ka tuig, nagsobra sa pilo ang ila kadamuon kag naglab-ot sa 38,393. Amo man sini ang nagakatabo sa iban pa nga kadutaan.
17. Ano nga pagtilaw ang ginaatubang sang mga Cristiano nga katapo sang pamilya nga may lainlain nga relihion, kag paano sila nakabatas?
17 Mabudlay gid para sa katawhan sang Dios ang pag-atubang sa direkta nga pagsalakay. Apang tuhay gid nga pagtilaw kon ang pagpamatok naghalin mismo sa pamilya. Ang isa ka Cristiano mahimo pamatukan sang miembro mismo sang iya panimalay ukon sang iya suod nga mga himata. Indi bala gintagna na ni Jesus nga mahanabo ini? Huo, kag madamo na nga eksperiensia ang nagapamatuod sini. (Mat. 10:35, 36) Ang mga tin-edyer nagabatas sang mga pagpamatok sang ila di-tumuluo nga mga ginikanan. Ang pila ginpalayas sa ila balay apang ginsapupo sila sang mainayuhon nga mga Saksi. Ang iban naman ginsikway pa gani. Ano ang nakabulig sa ila nga mabatas ang pagmaltrato sa ila? Indi lamang ang ila gugma sa paghiliutod kundi, labaw sa tanan, ang ila matuod nga gugma kay Jehova kag sa iya Anak.—1 Ped. 1:22; 1 Juan 4:21.
18. Paano ang gugma nga nagabatas sang tanan nga butang makabulig sa Cristianong mag-asawa?
18 Madamo pa nga mga kahimtangan sa kabuhi nga kinahanglan kita magpakita sing gugma nga nagabatas sang tanan nga butang. Ang gugma makabulig sa mag-asawa nga tumanon ang pinamulong ni Jesus: “Ang gintingob sang Dios indi pagbulagon sang tawo.” (Mat. 19:6) Kon nagaatubang sila sing “kapipit-an sa ila unod,” dapat dumdumon sang Cristianong mag-asawa nga si Jehova amo ang panguna nga bahin sang ila pag-asawahay. (1 Cor. 7:28) Ang Biblia nagasiling nga ‘ang gugma nagabatas sang tanan nga butang,’ kag ang bana kag asawa nga napanaptan sini nga kinaiya magapabilin nga mainunungon sa isa kag isa kag mahuptan nila nga malig-on ang ila pag-asawahay.—Col. 3:14.
19. Ano ang ginhimo sang katawhan sang Dios sang may natabo nga kalamidad?
19 Ang gugma nagabulig sa aton nga mabatas ang tanan nga butang sa tion sang mga kalamidad. Amo sini ang natabo sang naglinog sa nabagatnan nga Peru kag sang nagsalakay ang Bagyo Katrina sa nabagatnan-sidlangan nga bahin sang Estados Unidos. Madamo sa aton mga kauturan ang nadulaan sang ila puluy-an kag mga pagkabutang. Ang gugma amo ang nagpahulag sa mga kauturan sa bug-os nga kalibutan nga maghatag sing bulig kag magboluntaryo sa pagtukod liwat sang mga puluy-an kag sa pagkay-o sang mga Kingdom Hall. Ina nga buhat nagapamatuod nga ang aton mga kauturan nagahigugma kag nagaulikid sa isa kag isa sa tanan nga tion kag sa bisan ano man nga mga kahimtangan.—Juan 13:34, 35; 1 Ped. 2:17.
Ang Gugma Wala Nagakapaslawan
20, 21. (a) Ngaa labaw gid ang balor sang gugma? (b) Ngaa determinado ka nga sundon ang dalanon sang gugma?
20 Sa tunga sang katawhan ni Jehova karon, nakita naton nga maalamon ang pagsunod sa labaw gid nga paagi sang gugma. Matuod gid nga makabulig ini sa tanan nga kahimtangan. Talupangda kon paano ginpadaku ni apostol Pablo ina nga kamatuoran. Una, ginpaathag niya nga ang dulot sang espiritu madula sa ulihi kag ang Cristianong kongregasyon magauswag gikan sa pagkalapsag padulong sa pagkahamtong. Dayon nagsiling sia: “Apang, karon nagapabilin ang pagtuo, paglaum, gugma, ining tatlo; apang ang labing daku sa sini amo ang gugma.”—1 Cor. 13:13.
21 Sa ulihi, ang mga butang nga aton ginatuuhan mangin realidad na, gani indi na kinahanglan ang pagtuo. Kon matuman na ang mga saad nga bag-uhon ang tanan nga butang, indi na kinahanglan ang paglaum. Apang kamusta ang gugma? Indi gid ini mag-untat, ukon mapaslawan. Magapabilin ini. Samtang ginapaabot naton ang kabuhi nga wala sing katapusan, pat-od gid nga makita kag mahangpan naton ang dugang pa nga aspekto sang gugma sang Dios. Paagi sa paghimo sang kabubut-on sang Dios nga sundon ang labaw gid nga paagi sang gugma nga wala nagakapaslawan, mahimo ka makapabilin sing dayon.—1 Juan 2:17.
Paano Mo Sabton?
• Ngaa kinahanglan kita magbantay sa sayop nga sahi sang gugma?
• Ang gugma makabulig sa aton nga mabatas ang ano?
• Ano ang buot silingon nga ang gugma wala nagakapaslawan?
[Mga Pamangkot sa Pagtinuon]
[Blurb sa pahina 27]
Ang tuigan nga teksto para sa 2010: ‘Ang gugma nagabatas sang tanan nga butang. Ang gugma wala gid nagauntat.’—1 Cor. 13:7, 8.
[Retrato sa pahina 25]
Ang gugma sa Dios nagapahulag sa aton nga magpanaksi
[Retrato sa pahina 26]
Ang gugma nga wala nagakapaslawan amo ang nagbulig sa aton mga kauturan sa Malawi nga mabatas ang mga pagtilaw
