Buligi ang Imo Kabataan nga Maatubang ang Madamo nga Kabudlayan

ANG aton mga pamatan-on nagaatubang sing madamo nga pag-ipit. Yara sila sa tunga sang malaut nga kalibutan ni Satanas kag mahapos lang sila maimpluwensiahan sang espiritu sini. Nagapakig-away man sila sa “mga kailigbon nga kinaandan sa pagkapamatan-on.” (2 Tim. 2:22; 1 Juan 5:19) Dugang pa, bangod ginatinguhaan nila nga ‘dumdumon ang ila Manunuga,’ ginayaguta sila kag ginahingabot. (Man. 12:1) Ang utod nga si Vincent nagsugid sang natabo sa iya sang gamay pa sia: “Pirme ako ginasunlog, ginasimusimo, kag ginahangkat sing away sang iban nga bata bangod isa ako ka Saksi. Sa masami, sobra na gid ang ila ginahimo amo nga indi ko na gusto magkadto sa eskwelahan.” *

Wala labot sa mga pag-ipit nga ila ginaatubang sa kalibutan, ang aton mga kabataan mahimo nagapakig-away man sa ila huyog nga manamian  sang iban nga pamatan-on. “Mabudlay gid kon tamdon ka sang iban nga laín ka sa ila,” siling sang 16 anyos nga utod nga si Cathleen. Si Alan, isa ka pamatan-on nga utod, nagsiling: “Pirme ako ginahagad sang akon mga kaeskwela nga maglagaw kon Sabado kag Domingo, kag luyag ko gid mag-upod sa ila.” Isa pa, mabaskog man ang handum sang mga pamatan-on nga mag-entra sa sports sa eskwelahan, nga sa diin madali sila maimpluwensiahan sang malain nga mga kaupdanan. “Gusto ko gid ang sports,” siling sang isa ka pamatan-on nga utod nga si Tanya. “Pirme ako ginaagda sang mga coach nga maghampang sa team sang amon eskwelahan. Mabudlay gid ini balibaran.”

Paano mo mabuligan ang imo kabataan nga maatubang ang madamo nga kabudlayan? Ginsugo ni Jehova ang mga ginikanan nga tuytuyan ang ila kabataan. (Hulu. 22:6; Efe. 6:4) Dapat gid tinguhaan sang mahinadlukon sa Dios nga mga ginikanan nga palambuon sa tagipusuon sang ila kabataan ang handum nga tumanon si Jehova. (Hulu. 6:20-23) Paagi sa sini, mapahulag ang mga kabataan nga pamatukan ang mga pag-ipit sang kalibutan bisan pa wala sa ila tupad ang ila mga ginikanan.

Para sa mga ginikanan, indi mahapos ang pagpangita sing kuarta, pagsagod sa isa ka pamilya, kag pagpakigbahin sa mga hilikuton sang kongregasyon. Ang iban nagasolo nga ginikanan ukon ginapamatukan sang ila di-tumuluo nga tiayon. Walay sapayan sini, ginapaabot ni Jehova nga dapat hatagan sang mga ginikanan sing tion ang ila kabataan. Gani, ano ang puede mo himuon agod mabuligan mo ang imo kabataan nga mangin mabakod sa mga pag-ipit, pagsulay, kag paghingabot nga ila ginaatubang sa adlaw-adlaw?

Personal nga Kaangtanan kay Jehova

Labaw sa tanan, dapat makilala sang aton mga pamatan-on nga si Jehova isa gid ka matuod nga Persona. Dapat naton sila buligan nga ‘makita ang Isa nga di-makita.’ (Heb. 11:27) Nadumduman pa ni Vincent nga ginsambit kaina kon paano sia ginbuligan sang iya mga ginikanan nga mangin suod kay Jehova. Nagsiling sia: “Gintudluan nila ako sang importansia sang pagpangamuyo. Nadumduman ko nga sugod sang gamay pa ako, nagapangamuyo na ako kay Jehova antes magtulog. Si Jehova matuod gid sa akon.” Nagapangamuyo ka bala upod sa imo kabataan? Ngaa indi mo pagpamatian kon ano ang ginasiling nila kay Jehova sa  ila pangamuyo? Ginasulitsulit lang bala nila ang ila ginahambal? Ukon ginapabutyag gid nila ang ila balatyagon kay Jehova? Kon ginapamatian mo ang ila pangamuyo, mahibaluan mo kon bala nag-uswag na ang ila kaangtanan kay Jehova.

Ang isa pa ka importante nga paagi nga mangin suod ang mga kabataan kay Jehova amo ang personal nga pagbasa sang Pulong sang Dios. Si Cathleen nga ginsambit kaina nagsiling: “Ang pagbasa sang Biblia sugod sang bata pa ako nakabulig gid sa akon. Nagpalig-on ini sa akon nga bisan pa pamatukan ako sang mga tawo, indi ako pagpabay-an ni Jehova.” Ang imo bala kabataan may kaugalingon nga iskedyul sa pagbasa sang Biblia?—Sal. 1:1-3; 77:12.

Huo, indi palareho ang pagsunod sang kada bata sa panuytoy sang ila ginikanan. Ang ila espirituwal nga pag-uswag mahimo nagadepende man sa ila edad. Apang, kon wala sing nagatuytoy sa ila, mabudlayan gid ang mga pamatan-on nga makilala si Jehova subong isa ka matuod nga Persona. Dapat ipatudok sang mga ginikanan sa ila kabataan ang mga pulong sang Dios nga daw subong bala nga mabatian nila si Jehova nga nagahambal, bisan diin man sila. (Deut. 6:6-9) Dapat kumbinsido ang imo kabataan nga si Jehova nagaulikid gid sa ila.

Kon Paano Himuon nga Makapalig-on ang Inyo Komunikasyon

Ang komunikasyon isa pa ka importante nga paagi nga mabuligan mo ang imo kabataan. Huo, ang maayo nga komunikasyon indi lamang basta pagpakig-istorya sa imo kabataan. Nalakip sa sini ang pagpamangkot kag mapailubon nga pagpamati—bisan pa indi mo maluyagan ang ila sabat. “Wala ako nagauntat sa pagpamangkot tubtob mahangpan ko kon ano ang ila ginahunahuna kag kon ano nga mga kabudlayan ang ila ginaatubang,” siling ni Anne nga iloy sang duha ka bata nga lalaki. Nabatyagan bala sang imo kabataan nga ginapamatian mo sila? Si Tanya nga ginsambit kaina, nagsiling: “Ginapamatian gid ako sang akon mga ginikanan kag ginatandaan gid nila ang akon ginasugid. Nakahibalo sila sang ngalan sang akon mga klasmeyt. Ginapamangkot nila ako kon  kamusta na ang akon mga klasmeyt kag ang iban pa nga gin-istoryahan namon sang nagligad.” Ang pagpamati kag pagdumdom importante gid sa maayo nga komunikasyon.

Nasapwan sang madamo nga pamilya nga ang tion sang pagkaon maayo gid nga kahigayunan para sa makapalig-on nga komunikasyon. “Importante gid sa amon pamilya ang pagkaon sing magkaupod,” siling ni Vincent. “Ginatinguhaan gid namon nga kon posible magdungan kami sa pagkaon. Wala kami ginatugutan nga maglantaw sing TV, mamati sing radyo, ukon magbasa samtang nagakaon. Bangod masadya pirme ang amon istoryahanay, nagabatyag ako sing kalinong sa panghunahuna. Nakabulig ini sa akon nga maatubang ang mga problema kag mga pag-ipit sa eskwelahan.” Nagsiling pa sia: “Bangod naanad ako makigsugilanon sa akon mga ginikanan sa tion sang pagkaon, mahapos lang para sa akon nga isugid sa ila ang akon mga problema.”

Pamangkuta ang imo kaugalingon, ‘Daw ano kasunson sa isa ka semana nga nagatingob kami sa pagkaon subong pamilya?’ Kinahanglan mo bala maghimo sing mga pagbag-o agod mapauswag mo ang imo komunikasyon sa imo kabataan?

Kon Ngaa Importante ang Pag-ensayo

Ang semanal nga gab-i sang Pangpamilya nga Pagsimba nagapalig-on man sang maayo nga komunikasyon sang pamilya kag nagabulig sa mga pamatan-on nga maatubang ang ila mga problema. Si Alan nga ginsambit kaina, nagsiling: “Ginagamit sang akon mga ginikanan ang pangpamilya nga pagtuon agod mahibaluan nila kon ano ang amon mga problema. Ginapili nila ang mga topiko nga bagay gid sa mga problema nga amon ginaatubang.” Ang iloy ni Alan nagsiling: “Ginagamit namon ang iban nga tion sa amon pagtuon para mag-ensayo. Ini nga mga pag-ensayo nakabulig sa amon kabataan nga matun-an kon paano pangapinan ang ila pagtuo kag pamatud-an nga matuod gid ang ila ginapatihan. Bangod sini, malig-on nila nga nalandas ang mga hangkat nga ila ginaatubang.”

Sa pagkamatuod, kon makaatubang sila sing pag-ipit sa pareho nila nga kabataan, dapat matun-an nila indi lamang ang basta pagsiling nga indi. Dapat makahibalo sila magsabat sa mga pamangkot nga ngaa puede kag ngaa indi puede. Dapat nakahibalo man sila kon ano ang himuon kon yagutaon sila bangod sa ila pagtuo. Kon indi sila  makahibalo kon paano pangapinan ang ila pagtuluuhan, madali lang sila madala sang mga pag-ipit. Gani, daku gid ang mabulig sang pag-ensayo.

Makita sa kahon sa pahina 18 ang pila ka kahimtangan nga mahimo ninyo ensayuhon sa inyo gab-i sang Pangpamilya nga Pagsimba. Himua ini nga realistiko paagi sa paggamit sing mga pamangkot nga magatilaw sa ikasarang sang imo bata nga mangatarungan. Dugang pa sa mga pag-ensayo, binagbinaga ang pila ka praktikal nga mga leksion nga ginatudlo sang mga halimbawa sa Biblia. Pat-od gid nga inang paghanas sa puluy-an makabulig sa imo kabataan nga maatubang ang mga hangkat sa eskwelahan kag sa bisan diin man nga lugar.

Makalilipay Bala nga Duog ang Inyo Puluy-an?

Nalipay bala magpauli ang imo kabataan sa inyo balay pagkatapos sang ila klase? Kon ang inyo puluy-an makalilipay nga duog, makabulig ini sa imo kabataan nga maatubang ang mga pag-ipit sa adlaw-adlaw. Ang isa ka utod nga babayi nga katapo na karon sang pamilya Bethel nagsiling: “Sang gamay pa ako, ang isa ka butang nga nakabulig gid sa akon amo ang amon makalilipay nga puluy-an. Bisan ano pa kabudlay ang kahimtangan sa eskwelahan, nakahibalo ako nga kon magpauli na ako sa balay, malipatan ko na ini tanan.” Paano mo ilaragway ang inyo puluy-an? Isa bala ini ka duog nga may “pagsilabo sang kaakig, pagbaisay, [kag] pagbinahinbahin,” ukon isa ini ka puluy-an nga may yara “gugma, kalipay, [kag] paghidait”? (Gal. 5:19-23) Kon wala pirme sing paghidait sa inyo puluy-an, ginatinguhaan mo bala nga mahibaluan kon ano nga mga pagbag-o ang dapat mo himuon agod mangin makalilipay ini nga duog para sa imo kabataan?

Ang isa pa ka paagi nga mabuligan mo ang imo kabataan nga malandas ang mga hangkat amo ang pagpaupod sa ila sa maayo nga mga kaupdanan. Halimbawa, puede ka bala mag-agda sing hamtong sa espirituwal nga mga kauturan nga mag-upod sa inyo pamilya sa paglingawlingaw? Ukon puede ka bala maghanda sing simple nga pagkaon kag agdahon sa inyo puluy-an ang nagalakbay nga manugtatap ukon iban pa nga yara sa bug-os tion nga pag-alagad? May kilala ka bala nga mga misyonero ukon Bethelite nga puede mangin abyan sang imo kabataan, bisan paagi lang sa sulat, e-mail, ukon panalagsa nga tawag sa telepono? Ina nga pagpakig-abyan makabulig sa imo kabataan nga maggawi sing nagakaigo kag magpalambo sing espirituwal nga mga tulumuron. Dumduma ang maayo nga impluwensia ni apostol Pablo sa pamatan-on nga si Timoteo. (2 Tim. 1:13; 3:10) Ang ila suod nga pag-abyanay nakabulig kay Timoteo nga magkonsentrar sa espirituwal nga mga tulumuron.—1 Cor. 4:17.

Hatagi sing Komendasyon ang Imo Kabataan

Nalipay gid si Jehova nga makita ang mga pamatan-on nga nagapanindugan sa kon ano ang husto walay sapayan sang mga pag-ipit sa kalibutan ni Satanas. (Sal. 147:11; Hulu. 27:11) Walay duhaduha nga nalipay ka man kon makita mo nga ginapili sang aton mga pamatan-on ang maalamon nga dalanon. (Hulu. 10:1) Ipahibalo sa imo kabataan kon ano ang imo ginabatyag sa ila, kag mangin maalwan sa paghatag sing mahigugmaon nga komendasyon. Si Jehova nagpahamtang sing maayo nga halimbawa sa mga ginikanan. Sa tion sang bawtismo ni Jesus, si Jehova nagsiling: “Ikaw ang akon Anak, ang hinigugma; ginakahamut-an ko ikaw.” (Mar. 1:11) Pat-od gid nga ang pagpasalig sang iya Amay nagpalig-on kay Jesus sa pag-atubang sa madamo nga hangkat! Gani, ipahibalo sa imo kabataan nga ginahigugma mo sila, kag apresyaha ang ila hinimuan.

Huo, indi mo maamligan sing bug-os ang imo kabataan batok sa mga pag-ipit, paghingabot, kag pagyaguta. Apang, daku ang imo mabulig sa ila. Paano? Buligi sila nga mapalambo ang suod nga kaangtanan kay Jehova. Mangita sing paagi nga mapauswag ninyo ang inyo komunikasyon. Himua nga praktikal ang inyo gab-i sang Pangpamilya nga Pagsimba, kag tinguhai nga mangin makalilipay nga duog ang inyo puluy-an. Sa paghimo sini, pat-od gid nga mabuligan mo ang imo kabataan nga malandas ang madamo nga kabudlayan.

[Nota]

[Kahon/Retrato sa pahina 18]

ANG PAG-ENSAYO MAKABULIG

Yari ang pila ka sitwasyon nga mahimo maatubang sang aton mga pamatan-on. Ngaa indi ninyo pag-ensayuhon ang pila sini sa gab-i sang inyo Pangpamilya nga Pagsimba?

▸ Gin-agda sang isa ka coach ang imo bata nga mag-entra sa sports team sang ila eskwelahan.

▸ Gintanyagan sing sigarilyo ang imo bata sang nagapauli sia halin sa eskwelahan.

▸ Ginpahog sang pila ka bata nga lalaki nga kastiguhon ang imo bata kon makita pa nila sia nga nagabantala.

▸ Samtang nagapamalaybalay ang imo bata, nasumalang niya ang iya kaeskwela.

▸ Ginpamangkot ang imo bata sa atubangan sang iya mga klasmeyt kon ngaa wala sia nagasaludo sa bandera.

▸ Pirme ginasunlog sang isa ka bata nga lalaki ang imo bata bangod Saksi sia.

[Retrato sa pahina 17]

Ang imo bala kabataan may kaugalingon nga iskedyul sa pagbasa sang Biblia?

[Retrato sa pahina 19]

Ginaupod bala ninyo ang hamtong sa espirituwal nga mga utod sa inyo mga paglingawlingaw?