“Ang Kinamatarong sang Bata nga Mag-uswag sa Espirituwal”

SANG Disiembre 9, 2008, ang Swedish Academy for the Rights of the Child naghiwat sang isa ka pinasahi nga seminar nga may tema: “Ang Kinamatarong sang Bata nga Mag-uswag sa Espirituwal.” Nanuhaytuhay nga opinyon ang ginpresentar sang mga humalambal gikan sa Church of Sweden, mga denominasyon sang Cristiandad, Islam, kag iban pa nga organisasyon.

Ang isa sa mga humalambal nga pari nagsiling: “Indi naton mapaathag sing maayo kon daw ano gid kadalom ang epekto sang mga kasaysayan sa Biblia sa espirituwalidad sang bata.” Paano bala ang mga kasaysayan sa Biblia makabulig sa espirituwalidad sang kabataan?

“Ang mga teksto kag mga kasaysayan mahimo mapamalandungan sang kabataan sa ila lang kaugalingon,” siling sang pari. Ginsambit niya “ang kasaysayan ni Adan kag ni Eva, ni Cain kag ni Abel, ni David kag ni Goliat, ang pagkabun-ag ni Jesus, ang manugsukot sang buhis nga si Zaqueo, ang parabola sang buhaha nga anak, kag ang mabinuligon nga Samaritano.” Ginsambit ini subong “pila sa mga kasaysayan nga makatuytoy sa panghunahuna [sang isa ka bata] agod mahangpan niya ang buot silingon sang “pagluib, pagpatawad, pagtubos, pagdumot, pagpakahuya, pagpangayo sing pasaylo, kag sang utudnon kag di-makagod nga gugma.” Nagsiling pa sia: “Ini nga mga kasaysayan may daku nga epekto sa kabuhi sang isa ka bata. Mahimo niya ini sundon kag ikabuhi.”

Huo, maayo gid nga palig-unon naton ang mga bata nga magbasa sang Biblia. Apang, kon ang kabataan ‘magpamalandong sa ila lang kaugalingon’ sang ila mga nabasahan sa Kasulatan, mangin husto ayhan ang ila paghangop?

Bisan gani ang mga adulto nagakinahanglan pa sing paathag para mahangpan ang Kasulatan. Halimbawa, ang Biblia nagasugid sa aton tuhoy sa isa ka tawo nga wala makahangop sing Kasulatan paagi sa ‘iya lang kaugalingon nga pagpamalandong.’ Sia amo ang Etiopianhon nga opisyal. Ginabasa niya ang tagna ni Isaias apang wala niya nahangpan ang kahulugan sini. Bangod luyag niya nga mahangpan ang mensahe sang manalagna, ginbaton niya ang bulig ni disipulo Felipe. (Binu. 8:26-40) Indi lang sia ang nagakinahanglan sang bulig. Tanan kita—ilabi na gid ang mga kabataan—nagakinahanglan sing paathag para mahangpan naton ang Kasulatan.

Ang Biblia nagapaandam sa aton: “Ang kabuangan naputus sa tagiposoon sang bata.” (Hulu. 22:15) Ang mga kabataan nagakinahanglan sang panuytoy kag giya. Responsibilidad sang mga ginikanan nga hatagan sila sang moral kag espirituwal nga edukasyon nga napasad sa Biblia kag nahisuno sa ginatudlo sa Cristianong kongregasyon. May kinamatarong ang kabataan nga magbaton sinang paghanas. Sugod sa pagkalapsag, dapat nga tudluan na ang mga bata tuhoy sa Biblia agod mangin mabakod ang ila espirituwal nga pundasyon kag mangin “hamtong [sila] nga mga tawo, nga paagi sa paggamit sang ila mga ikasarang sa paghantop nahanas ini nga makilala ang maayo kag malain.”—Heb. 5:14.