Ginatugutan Mo Bala si Jehova nga Pamangkuton Ka?

ANG Biblia nagaunod sang ginatos ka pamangkot nga nagausisa sa nasulod nga balatyagon kag hunahuna sang isa ka tawo. Sa pagkamatuod, si Jehova nga Dios nagagamit sing mga pamangkot agod tudluan kita sang importante nga mga kamatuoran. Halimbawa, naggamit si Jehova sing mga pamangkot agod paandaman si Cain nga tadlungon ang iya makahalalit nga dalanon. (Gen. 4:6, 7) May mga tion nga ang isa ka pamangkot ni Jehova bastante na para mapahulag ang isa ka tawo nga maghimo sang positibo nga aksion. Sang nabatian ni manalagna Isaias ang pamangkot ni Jehova: “Sin-o bala ang akon ipadala, kag sin-o ang magakadto tungud sa amon?” nagsabat sia: “Yari ako! Ipadala ako.”—Isa. 6:8.

Si Jesus, ang Dakung Manunudlo, epektibo man sa paggamit sang mga pamangkot. Kapin sa 280 ka pamangkot ni Jesus ang masapwan sa mga Ebanghelyo. Bisan pa may mga tion nga naggamit sia sang mga pamangkot agod pahipuson ang iya mga kritiko, ang katuyuan sang kalabanan niya nga pamangkot amo ang paglab-ot sa tagipusuon sang iya tagpalamati kag pahulagon sila nga mapamalandungan ang ila espirituwal nga kahimtangan. (Mat. 22:41-46; Juan 14:9, 10) Sing kaanggid, si apostol Pablo nga nagsulat sang 14 ka tulun-an sang Cristianong Griegong Kasulatan, naggamit sang mga pamangkot nga may pagbuyok. (Roma 10:13-15) Halimbawa, ang iya sulat sa mga taga-Roma nagaunod sing madamo nga pamangkot. Ang mga pamangkot ni Pablo nagapahulag sa iya mga bumalasa nga apresyahon ang “pagkadalom sang kamanggaran kag kaalam kag ihibalo sang Dios.”—Roma 11:33.

Bisan pa ang pila sang mga pamangkot nagakinahanglan sing sabat, ang iban sini nagabulig sa isa nga maghunahuna sing maayo. Amo sina nga sahi sang pamangkot ni Jesus ang masami makita sa Ebanghelyo. Isa ka bes, ginpaandaman ni Jesus ang iya mga disipulo: “Mag-andam sa lebadura sang mga Fariseo kag sa lebadura ni Herodes,” buot silingon sa ila pagkasalimpapaw kag butig nga mga panudlo. (Mar. 8:15; Mat. 16:12) Bangod wala ini nahangpan sang mga disipulo ni Jesus, nagbaisay sila kay nalipat sila magdala sang tinapay. Talupangda kon paano naggamit si Jesus sing pamangkot sa masunod nga hitabo. “Nagsiling sia sa ila: ‘Ngaa nagasabtanay kamo bangod wala kamo sing mga tinapay? Wala pa bala ninyo mahantop kag mahangpan ang kahulugan sini? Indi bala makahangop ang inyo tagipusuon? “Bisan pa may mga mata, wala bala kamo makakita; kag bisan pa may mga dulunggan, wala bala kamo makabati?” . . . Wala bala ninyo gihapon mahangpan ang kahulugan sini?’” Ang mga pamangkot ni Jesus nagpahunahuna sa iya mga disipulo, kag nagpahulag sa ila nga mapamalandungan sing maayo ang matuod nga kahulugan sang iya mga pinamulong.—Mar. 8:16-21.

“Mamangkot Ako”

Si Jehova nga Dios naggamit sang mga pamangkot agod tadlungon ang panghunahuna sang iya alagad nga si Job. Paagi sa madamo nga pamangkot, gintudluan ni Jehova si Job kon daw ano sia ka gamay kon ipaanggid sa iya Manunuga. (Job, kap. 38-41) Ginapaabot bala ni Jehova nga sabton ni Job ang iya mga pamangkot? Maathag nga wala. Ang mga pamangkot subong sang “Diin ka bala sang ako nagpasad sang mga sadsaran sang duta?” maathag nga gintuyo lamang para pahulagon ang panghunahuna kag balatyagon ni Job. Pagkatapos sinang makapahunahuna nga mga pamangkot, wala na sing mahambal si Job. Nagsiling lang sia: “Ano bala ang akon isabat sa imo? Ginatabon ko ang akon kamut sa akon baba.” (Job 38:4; 40:4) Nahangpan ni Job ang luyag itudlo ni Jehova kag nagpaubos sia. Apang, wala lamang gintudluan ni Jehova si Job sang pagkamapainubuson. Gintadlong man niya ang panghunahuna ni Job. Sa ano nga paagi?

Bisan pa si Job “tawo nga himpit [“wala sing  kasawayan,” NW] kag matarung,” may tion nga “ginpakamatarung niya ang iya kaugalingon sang sa Dios” amo nga ginsaway sia ni Elihu. (Job 1:8; 32:2; 33:8-12) Si Jehova naggamit sing mga pamangkot para tadlungon ang panghunahuna ni Job. Ang Dios nakighambal kay Job paagi sa buhawi: “Sin-o ining nagapangduhaduha sa akon katuyuan kag nagahambal nga wala sing ihibalo? Wagkusi ang imo balikawang kaangay sang makusog nga tawo, kag mamangkot ako, dayon sabton mo ako.” (Job 38:1-3, NW) Paagi sa mga pamangkot, ginpatalupangod ni Jehova ang iya wala sing tupong nga kaalam kag gahom nga makita sa iya dalayawon nga mga binuhatan. Nakabulig ini kay Job nga labi pa gid nga magsalig sa katarungan ni Jehova kag sa iya paagi sa paghimo sang mga butang. Daw ano ini ka makahalawhaw nga eksperiensia para kay Job—nga ang Dios nga Labing Gamhanan mismo ang mamangkot sa iya!

Paano Naton Matugutan si Jehova nga Pamangkuton Kita?

Kamusta naman kita? Makabenepisyo bala kita sa mga pamangkot nga narekord sa Biblia? Huo! Kon pamalandungan naton ini nga mga pamangkot madamo kita sing matigayon nga espirituwal nga mga pagpakamaayo. Ang makapahulag nga mga pamangkot sa Pulong sang Dios amo ang isa ka rason kon ngaa epektibo ini. Sa pagkamatuod, “ang pulong sang Dios . . . gamhanan . . . kag sarang makahantop sang mga panghunahuna kag mga tinutuyo sang tagipusuon.” (Heb. 4:12) Apang, agod makabenepisyo kita sing labi sa sini, dapat naton ini ipamangkot sa aton kaugalingon. (Roma 15:4) Binagbinagon naton ang pila sa sini nga mga pamangkot.

“Indi bala maghimo sing matarung ang Hukom sang bug-os nga duta?” (Gen. 18:25) Amo ini ang ginpamangkot ni Abraham kay Jehova sang ginhukman Niya ang Sodoma kag Gomorra. Para kay Abraham imposible nga magpanghikot si Jehova sing di-matarong—nga laglagon niya ang mga matarong upod sa malauton. Ang pamangkot ni Abraham nagapakita nga nagatuo gid sia nga himuon ni Jehova kon ano ang matarong.

Sa karon, ang pila may nanuhaytuhay nga espikulasyon tuhoy sa paghukom nga pagahimuon ni Jehova, subong sang kon sin-o ang mga maluwas sa Armagedon ukon kon sin-o ang pagabanhawon. Sa baylo nga palibugan ina nga mga butang, dumdumon naton ang pamangkot ni Abraham. Kaangay ni Abraham, nahibaluan naton nga si Jehova isa ka mahigugmaon nga Amay kag bug-os ang aton pagsalig sa iya katarungan kag kaluoy, amo nga ginalikawan naton nga mauyang ang aton tion kag kusog sa indi kinahanglanon nga pagkabalaka, makapaluya nga pagpangduhaduha, kag wala pulos nga pagbinaisay.

“Sin-o sa inyo nga bangod sa pagkabalaka makasugpon sang isa ka maniko sa kalawigon sang iya kabuhi?” (Mat. 6:27) Amo ini ginpamangkot ni Jesus sa madamo nga tawo lakip sa iya mga disipulo agod ipadaku nga kinahanglan sila magsalig sa  mahigugmaon nga pag-atipan ni Jehova. Sa katapusan nga mga adlaw sining malaut nga sistema sang mga butang madamo sing mahimo kabalak-an. Apang, ang pagkonsentrar sa sini indi makadugang ukon makapauswag sa kalidad sang aton kabuhi.

Kon nagakabalaka kita sa aton kaugalingon ukon sa aton mga hinigugma, ang pagdumdom sa pamangkot ni Jesus makabulig sa aton nga mahuptan ang pagkabalanse. Makabulig ini sa aton nga likawan ang pagkabalaka kag paghunahuna sing negatibo, kay indi maayo ang epekto sini sa aton hunahuna, balatyagon kag panglawas. Subong sang ginpasalig ni Jesus, ang aton langitnon nga Amay nakahibalo gid sang aton mga kinahanglanon kay bisan gani ang mga pispis sa langit ginapakaon niya kag ginpapanaptan ang mga tanom sa latagon.—Mat. 6:26-34.

“Makabutang bala ang lalaki sing kalayo sa iya sabak kag indi masonog ang iya mga panapton?” (Hulu. 6:27) Ang una nga siam ka kapitulo sang Hulubaton nagaunod sang maalamon nga mga laygay sang isa ka amay sa iya anak. Ang pamangkot nga ginkutlo sa ibabaw nagapatuhoy sa mapait nga mga resulta sang pagpanghilahi. (Hulu. 6:29) Kon may yara kita huyog nga magpakiat ukon magpantasya tuhoy sa sekso, ini nga pamangkot dapat gid magpabugtaw sa aton. Ini nga pamangkot naaplikar man kon ang isa ginasulay nga maghimo sang bisan anong sayop nga tikang. Ginapadaku gid sini ang prinsipio sa Biblia: “Kon ano ang ginasab-ug sang tawo, ini man ang iya anihon.”—Gal. 6:7.

“Sin-o ka nga maghukom sa alagad sa balay sang iban?” (Roma 14:4) Sa iya sulat sa mga taga-Roma, ginsambit ni Pablo ang mga problema nga nag-utwas sa unang-siglo nga kongregasyon. Bangod nagkalainlain ang ila ginhalinan, may iban nga Cristiano nga may huyog nga hukman ang mga desisyon kag ginahimo sang ila mga masigkatumuluo. Ang pamangkot ni Pablo nagpahanumdom sa ila nga dapat nila batunon ang kada isa kag itugyan sa mga kamot ni Jehova ang paghukom.

Sa karon, ang katawhan ni Jehova nanuhaytuhay man ang ginhalinan. Apang, ginhugpong kita ni Jehova sa isa ka pinasahi nga paghiusa. Ginasakdag bala naton ini nga paghiusa? Kon may huyog kita nga pangduhaduhaan ang maayo nga ginahimo sang isa ka utod, maayo nga ipamangkot naton sa aton kaugalingon ang pamangkot ni Pablo.

Ang mga Pamangkot Nagapasuod sa Aton kay Jehova

Ginapakita sining pila ka halimbawa kon paano ang mga pamangkot sa Pulong sang Dios makabulig sa isa ka tawo nga usisaon ang iya kaugalingon. Ang pagbinagbinag sa konteksto sang kada pamangkot makabulig sa aton nga iaplikar ini sa aton kahimtangan. Kag samtang ginabasa naton ang Biblia, madamo pa kita sing makita nga mga pamangkot nga makabulig sa aton.—Tan-awa ang kahon sa pahina 14.

Kon tugutan naton ang mga pamangkot sa Pulong sang Dios nga magpahulag sa aton, magabulig ini sa aton nga ipahisuno ang aton hunahuna kag tagipusuon sa matarong nga mga dalanon ni Jehova. Pagkatapos sia pamangkuton ni Jehova, si Job nagsiling: “Sa hinuringhuring nakabati ako tuhoy sa imo, apang karon makita ka sang akon mata.” (Job 42:5, NW) Huo, si Jehova nangin mas matuod kay Job, nga daw subong bala nga yara Sia sa atubangan sang iya mga mata. Sang ulihi, si disipulo Santiago nagsiling: “Magpalapit kamo sa Dios, kag magapalapit sia sa inyo.” (Sant. 4:8) Kabay nga tugutan naton ang Pulong sang Dios, lakip ang mga pamangkot sa sini, nga magbulig sa aton nga mag-uswag sa espirituwal kag “makita” si Jehova sing mas maathag!

[Kahon sa pahina 14]

Paano ang pagpamangkot sa imo kaugalingon sini nga mga pamangkot makabulig sa imo nga mailog ang pagtamod ni Jehova?

▪ “ May daku bala nga kahamuut ang GINOO sa mga halad-nga-sinonog kag mga halad, subong sang sa pagtuman sang tingug sang GINOO?”—1 Sam. 15:22.

▪ “ Indi bala makakita ang Isa nga amo ang naghimo sing mata?”—Sal. 94:9, NW.

▪ “ Nakakita ka bala sing tawo nga maalam sa iya kaugalingon nga hunahuna?”—Hulu. 26:12.

▪ “ Nagahimo ka bala sing maayo sa pagpangakig?”—Jon. 4:4.

▪ “ Ano ang mabenepisyo sang isa ka tawo kon maangkon niya ang bug-os nga kalibutan apang madula ang iya kalag?”—Mat. 16:26.

▪ “ Sin-o ang magapahamulag sa aton gikan sa gugma ni Cristo?”—Roma 8:35.

▪ “ Ano ang yara sa imo nga wala mo mabaton?”—1 Cor. 4:7.

▪ “ Ano ang pag-ambitanay sang kapawa kag kadudulman?”—2 Cor. 6:14.

[Retrato sa pahina 15]

Ano ang natun-an ni Job sa mga pamangkot ni Jehova?