Luyag ni Jehova nga Mangin ‘Hilway Ka sa Katalagman’

KON hinali nga mag-abot ang labing makatalagam nga hitabo sa bug-os nga maragtas, luyag sang Labing Gamhanan nga Dios nga ang tanan nga ginakahamut-an niya “maluwas.” (Joel 2:32) Apang ang matuod, luyag gid pirme ni Jehova nga amligan ang iya katawhan batok sa katalagman. Bangod sia ang “tuburan sang kabuhi,” ginakabig niya ang tanan nga tawo nga bilidhon kag takus amligan.—Sal. 36:9.

Amo man sini ang pagtamod sang matutom nga mga alagad sang Dios sang una. Suno sa Genesis 33:18 (NW), si Jacob kag ang iya pamilya naglakbay sa makatalagam nga duog kag nakaabot sa ila destinasyon nga “hilway sa katalagman.” Huo, nagsalig si Jacob sa proteksion ni Jehova, apang naghimo man sia sing praktikal nga mga paagi para maamligan ang tanan nga nagalakbay upod sa iya. (Gen. 32:7, 8; 33:14, 15) Ang pag-aplikar sa mga prinsipio sa Biblia makabulig man sa imo kag sa iban nga mangin hilway sa katalagman. Tan-awon naton kon paano makabenepisyo sa sini ang mga nagatukod sang Kingdom Hall kag sang kaanggid nga mga proyekto kag ang mga nagaboluntaryo sa disaster-relief projects.

Hilway sa Katalagman sa Idalom sang Mosaikong Kasuguan

Ang Mosaikong Kasuguan may pagsulundan nga ginapatuman agod magpabilin nga hilway sa katalagman ang katawhan sang Dios. Halimbawa, kon ang isa ka Israelinhon magatukod sang isa ka balay, dapat butangan niya sing alubaybay, ukon barandilya ang balisbisan sini. Bangod ang mga tawo sadto pirme nagasaka sa matapan nga atop sang ila balay, mangin proteksion sa ila ang mga barandilya agod indi sila mahulog. (1 Sam. 9:26; Mat. 24:17) Kon may aksidente nga matabo bangod wala gintuman ini nga sugo, ang tag-iya sang balay amo ang manabat kay Jehova.—Deut. 22:8.

May mga pagsulundan man tuhoy sa mga halit nga mahimo matuga sang mga sapat. Kon ang isa ka toro nga baka nagpanungay kag nakapatay sang tawo, dapat ini patyon sang tag-iya agod indi na ini makapanghalit pa liwat. Bangod indi niya puede kaunon ang karne sini ukon ibaligya sa iban, isa ini ka daku nga kapierdihan sa tag-iya. Ano abi kon ang toro nakapanungay na sang una apang wala ini ginbantayan sang tag-iya? Kon makapatay ini sa ulihi, ang toro kag ang tag-iya sini dapat patyon. Ini nga kasuguan nagapaandam sa tanan nga indi nila dapat pagpatumbayaan ang ila mga sapat.—Ex. 21:28, 29.

May mga pagsulundan man tuhoy sa nagakaigo nga paggamit sang mga kagamitan. Madamo nga Israelinhon ang nagagamit sang wasay sa pagbis-ak sang kahoy nga inuggatong. Kon ang sulab sang wasay mahukas sa polo sini kag aksidente nga makapatay sang isa ka tawo, ang nagagamit sang wasay dapat magpalagyo sa siudad nga dalangpan. Dapat sia magpabilin didto tubtob mapatay ang mataas nga saserdote. Nagakahulugan ini nga ang  isa nga indi hungod nga nakapatay mapahilayo sa iya pamilya sing madamo nga tinuig. Ini nga kahimusan nagtudlo sa mga Israelinhon kon daw ano ka sagrado ang kabuhi para kay Jehova. Kon ang isa may pareho sa Dios nga pagtamod sa kabuhi, dapat gid niya pat-uron nga ang iya mga kagamitan yara sa maayo nga kondisyon kag indi delikado gamiton.—Num. 35:25; Deut. 19:4-6.

Makita naton sa sini nga mga kasuguan nga luyag gid ni Jehova nga ang iya katawhan magapanghikot nga hilway sa katalagman sa sulod kag sa gua sang ila puluy-an. Kon makapatay sila ukon makahalit sa iban bisan aksidente lamang, manabat sila sa iya. Ang pagtamod ni Jehova tuhoy sa sini wala nagbag-o. (Mal. 3:6) Indi niya gusto nga mahalitan sang mga tawo ang iban ukon ang ila kaugalingon.  Dapat gid naton ini dumdumon ilabi na kon nagatukod kita ukon nagamentinar sang mga bilding nga nadedikar sa matuod nga pagsimba.

Pagtukod sing mga Bilding nga Hilway sa Katalagman

Ginakabig naton nga isa ka daku nga pribilehiyo ang pagtukod kag pagmentinar sang mga Kingdom Hall, Assembly Hall, kag mga pasilidad sang sanga talatapan. Amo man sini ang aton pagtamod kon nagaboluntaryo kita sa mga disaster-relief projects. Sa tanan nga tion, luyag naton mangin lantip sa aton hilikuton, kay ang kakulang sa ihibalo kag ikasarang, bisan sa simple lang nga hilikuton, mahimo makahalit sa aton ukon sa iban. (Man. 10:9) Sa pagkamatuod, malikawan naton ang mga kasamaran kon himuon naton nga batasan nga magtrabaho sing mahalungon.

Ang Biblia nagasiling: “Ang himaya sang mga pamatan-on nga lalaki amo ang ila kusug, kag ang katahum sang mga tigulang amo ang ubanon nga olo.” (Hulu. 20:29) Kinahanglanon ang kusog sang mga pamatan-on para sa mabug-at nga mga trabaho. Apang ang mga ubanon nga trabahador, yadtong mga eksperiensiado sa konstruksion, amo ang may ihibalo kag ikasarang sa pagtapos sang tanan nga detalye sang proyekto. Sang pamatan-on sila, gingamit nila ang ila kusog sa paghimo sang mabug-at nga mga trabaho. Gani, kon bag-uhan ka nga boluntaryo, panilagi  kon paano magtrabaho ang mga eksperiensiado, kag sunda ang ila mga instruksion. Madamo ka sing matun-an sa mga utod nga eksperiensiado sa konstruksion. Mahimo tudluan ka nila sang husto nga paggamit sang delikado nga mga materyal kag sa paghakwat sang mabug-at nga mga butang. Sa amo, makatrabaho ka sing epektibo, hilway sa katalagman, kag may kalipay.

Ang mga nagaboluntaryo sa duog sang konstruksion dapat mangin alisto pirme. Nagabag-obag-o ang kahimtangan diri. Halimbawa, ang matapan nga duta mahimo mangin buho. Mahimo isaylo sang imo upod ang ladder, tapi, ukon balde sang pinta. Kon indi ka alisto, mahimo ka mahalitan. Sa masami, may mga kagamitan para sa proteksion nga ginapasuksok sa mga trabahador sa konstruksion. Ang mga safety glasses, hard hat, kag nagakaigo nga sapatos makaamlig sa imo. Apang mabuligan ka lamang sini, kon yara ini sa maayo nga kondisyon kag kon ginasuksok mo ini.

May kagamitan nga daw simple lang tulukon, apang kinahanglan ang paghanas agod magamit ini sing hilway sa katalagman kag sing malantipon. Kon wala ka sing eksperiensia sa paggamit sini, ipahibalo ini sa imo overseer agod makapangita sia sing paagi nga matudluan ka. Indi ka dapat mahuya manugid kon indi ka kahibalo maggamit sang isa ka kagamitan. Sa pagkamatuod, mahimo ini makabulig sa imo nga malikawan nga mahalitan ang imo kaugalingon ukon ang iban sa duog sang konstruksion.—Hulu. 11:2.

Ang masami nga aksidente sa duog sang konstruksion amo ang pagkahulog. Gani, antes ka magsaka sa ladder ukon scaffolding, pat-ura nga mapag-on ini kag hilway sa katalagman. Kon magtrabaho ka sa mga atop ukon scaffolding, siguraduha nga may mga sagang ini kag may safety harness ka ukon higot sa lawas. Kadtui ang inyo overseer kon may mga pamangkot ka tuhoy sa pagtrabaho sa mataas nga mga lokasyon. *

Bangod padayon nga nagadamo ang mga nagaalagad kay Jehova sa bug-os nga kalibutan, kinahanglanon man ang pagtukod sang mga Kingdom Hall kag iban pa nga mga pasilidad nga ginagamit sa matuod nga pagsimba. Ang mga overseer sa sini nga mga proyekto amo ang may responsibilidad nga amligan ang hamili nga mga karnero ni Jehova nga ila ginadumalahan. (Isa. 32:1, 2) Kon isa ikaw ka overseer, pat-ura nga hilway sa katalagman ang kauturan nga nagatrabaho upod sa imo. Siguraduha nga matinlo kag wala sing kagamitan nga nagalapta sa duog nga inyo ginatrabahuan. Mangin mainayuhon apang malig-on sa paghatag sing laygay kon kinahanglanon. Indi pagtuguti ang pamatan-on ukon bag-uhan nga magsulod sa delikado katama nga mga lugar. Pamensara kon ano ang posible nga mga katalagman nga maatubang sang imo mga kaupdanan, kag buligi sila nga malikawan ini. Dumduma nga ang aton tulumuron amo nga matapos ang proyekto nga wala sing kasamaran.

Ang Papel sang Gugma

Ang pagtukod sang mga Kingdom Hall kag sang iban pa nga bilding nga ginagamit para sa matuod nga pagsimba mahimo nagadalahig sing katalagman. Gani, importante gid ang paghalong. Ang pagsunod sa mga prinsipio sa Biblia, pagtuman sa mga pagsulundan nga ginhimo para sa sini nga hilikuton, kag ang paghimo sing husto nga desisyon, makabulig sa imo kag sa imo mga kaupdanan nga malikawan ang mga katalagman.

Ano dapat ang magapahulag sa aton nga likawan ang katalagman? Ang aton gugma. Huo, kon ginahigugma naton si Jehova, pabaloran man naton ang kabuhi kaangay sa pagpabalor niya. Kag kon ginahigugma naton ang mga tawo, likawan naton ang paghimo sang mga butang nga mahimo makahalit sa ila. (Mat. 22:37-39) Gani, kabay nga himuon naton ang aton bug-os nga masarangan nga ang mga nagaboluntaryo sa aton proyekto sa pagtukod “hilway sa katalagman.”

[Nota]

[Kahon/Retrato sa pahina 30]

Ang Nagakaigo nga Paggamit sang Ladder

Sining karon lang sa Estados Unidos, kapin sa 160,000 ka trabahador ang nasamaran bangod sa pagkahulog sa mga ladder. Kag mga 150 ang napatay sa sini. Diin ka man nagapuyo ukon nagatrabaho, yari ang pila ka pagsulundan nga makabulig sa imo nga malikawan nga mahulog sa ladder.

◇ Indi maggamit sing ladder nga mahuyang ukon may guba, kag indi na ini pagkay-uha. Ihaboy ini.

◇ Ang kada ladder may espesipiko nga bug-at nga masarangan. Pat-ura nga ang bug-at sang imo lawas kag sang imo kagamitan indi maglampas sa limitasyon sang ladder nga imo gamiton.

◇ Iplastar ang imo ladder sa matig-a kag matapan nga lugar. Indi ini pag-itungtong sa nagauyog nga lugar subong sang scaffolding ukon sa gintangkas nga mga balde kag kahon.

◇ Dapat nga pirme ka nagaatubang sa ladder, nagasaka ka man ukon nagapanaug.

◇ Indi ka magtindog ukon magpungko sa duha ka pinakaibabaw nga halintang sang ladder.

◇ Maggamit ka lamang sang extension ladder kon mas mataas ini sing mga isa ka metro sa atop ukon dingding nga pagasandigan sini. Agod indi magdanlog ang tiil sang ladder, ihigot ini ukon ilansang sa tapi. Kon indi ini puede, pauyati ini sa iban samtang nagatrabaho ka. Ang ibabaw sang ladder dapat ihigot agod indi ini matumba.

◇ Indi pagtungtungi sing tapi ang mga halintang sang ladder agod himuon nga palatungan.

◇ Indi pagpilita nga lab-uton ang mga butang nga malayo sa imo kon yara ka sa ibabaw sang ladder. Delikado ini kay mahimo matumba ang ladder. Isaylo pirme ang ladder kon kinahanglanon agod malapit ka sa imo ginaobra.

◇ Kon kinahanglan ka maggamit sing ladder sa atubangan sang sirado nga puwertahan, magbutang sing pahibalo kag ikandado ang puwertahan. Kon indi ini makandaduhan, pabantayi ini agod wala sing makaagi.

◇ Dapat nga isa lang ka tawo ang magsaka sa ladder luwas lang kon gindesinyo ini para sa duha ka tawo. *

[Nota]

[Retrato sa pahina 29]

Ginapatuman sa Kasuguan ni Moises nga butangan sang barandilya ang kilid sang matapan nga atop