Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Ngaa kinahanglan mapatay ang Mesias?

Ang kamatayon ni Jesus nagapamatuod nga ang isa ka himpit nga tawo sarang makahupot sang diosnon nga debosyon bisan sa idalom sang pinakamabudlay nga pagtilaw. Ikaduha, ginbayaran niya ang silot sa napanubli nga sala sang mga kaliwat ni Adan agod mangin posible ang kabuhi nga wala sing katapusan.—12/15, pahina 22-23.

• Ano ang makabulig sa isa nga ibutang sa lugar ang pag-inom sang alkohol?

Ang pagpangamuyo kag pagtuon sang Biblia makabulig. Importante man ang pagpalambo sing pagpugong sa kaugalingon, pagtuman sang imo pamat-od, kag pagpili sing maayo nga kaupdanan. Limitehi ang imo pag-inom kag dapat makahibalo ka magpangindi.—1/1, pahina 7-9.

• Ano ang nalakip sa makapalig-on nga komunikasyon sa kabataan?

Nalakip sa sini indi lamang ang pagpakig-istorya sa ila kundi ang pagpamangkot man kag mapailubon nga pagpamati sa ila mga sabat. Nasapwan sang madamo nga ang tion sang pagkaon maayo gid nga kahigayunan para sa komunikasyon.—1/15, pahina 18-19.

• Bangod himpit si Jehova, paano sia nakabatyag sing paghinulsol?

Kon kaisa, nagabag-o ang pagtamod sang Dios sa mga tawo. Halimbawa, indi lang isa ka bes nga gintalikdan sang dumaan nga Israel si Jehova kag nagsimba sila sa iban nga mga dios. Sa sini nga mga tion nadula nila ang proteksion ni Jehova. Apang sang naghinulsol ang katawhan sa ila mga sala kag nagpakitluoy sa Dios nga buligan sila, nagbag-o ang iya pagtamod sa ila ukon nakabatyag sia sing paghinulsol. (Huk. 2:18)—2/1, pahina 21.

• Sa ano nga mga kahimtangan dapat binagbinagon ang pagpabawtismo liwat?

Himuon ini kon sa tion nga ginbawtismuhan ang isa may ginahimo pa sia nga sekreto nga sala nga mahimo bangdan sang pagdisfellowship sa iya kon bawtismado sia.—2/15, pahina 22.

• Ano ang tatlo ka sayop nga rason ang ginahatag sang mga tawo agod pakamatarungon ang ila pagkadibunayag?

Ginarason sang iban ang ila kapigaduhon para mangawat. Siling naman sang iban, “Ginahimo man ini sang tanan.” Ang iban naman nga nakakita sang malahalon nga mga butang nagapangatarungan, “akon na ini kay ako ang nakakita.” Wala ginasakdag sang Biblia ini nga mga rason.—3/1, pahina 12-14.

• Sa parabola ni Jesus tuhoy sa mga trigo kag mga gamhon, ano ang ginapatuhuyan sang pagsab-ug, ukon pagtanom, sang maayo nga binhi?

Ginhanda sang Anak sang tawo, si Jesus, ang uma sa tion sang iya pagministeryo sa duta. Sugod sang Pentecostes 33 C.E., ang maayo nga binhi ginsab-ug sang ang mga Cristiano ginhaplas subong mga anak sang Dios, ukon mga anak sang Ginharian.—3/15, pahina 20.

• Sa parabola ni Jesus, paano ginadala sa tambubo ni Jehova ang simbuliko nga mga trigo? (Mat. 13:30)

Ini nga tagna nagakatuman sa tion sang katapusan sang sistema sang mga butang. Ang hinaplas nga mga anak sang Ginharian, ang simbuliko nga mga trigo, ginadala sa tambubo ni Jehova sa tion nga ginadala sila sa napasag-uli nga Cristianong kongregasyon ukon kon mabaton na nila ang ila langitnon nga padya.—3/15, pahina 22.

• Sin-o ang nagpili sang mga tulun-an nga mangin bahin sang kanon sang Cristianong Griegong Kasulatan?

Indi ang konsilyo sang simbahan ukon lider sang relihion. Sa baylo, ang matuod nga mga Cristiano sa idalom sang panuytoy sang balaan nga espiritu sang Dios amo ang namat-od kon bala ang mga sinulatan inspirado sang Dios ukon indi. Nahisuno ini sa ginasiling sang Biblia nga ang isa sa milagruso nga dulot sang espiritu nga ginhatag sa una nga mga Cristiano amo ang “paghantop sing pinamulong sang espiritu.” (1 Cor. 12:4, 10)—4/1, pahina 28.