Magpabilin nga Malig-on sa Espirituwal Samtang Nagaatipan sa Nagamasakit nga Katapo sang Pamilya

SI KIM nga isa ka Saksi, natukiban nga may tumor malapit sa iya taludtod. Sang gin-eksamin, natukiban nga kanser ini. * “Sa tapos maoperahan ang iya tumor,” siling sang iya bana nga si Steve, “ginpaidalom si Kim sa radiotherapy kag chemotherapy. Nagresulta ini sa iya pagluya kag limitado na lang ang iya mahimo.”

Mahunahuna mo bala ang kalisod nga ginbatyag ni Steve nga makita ang iya pinalangga nga asawa nga nagaantos sa iya malubha nga balatian? Ayhan may yara ka suod nga katapo sang pamilya nga nagaantos man sa nagalala nga balatian ukon nagaluya bangod sa katigulangon. (Man. 12:1-7) Ikaw mismo nakahibalo nga agod maatipan mo sing maayo ang imo pinalangga, dapat mo man atipanon ang imo kaugalingon. Kon magluya ka sa espirituwal, magaluya man ang imo emosyonal kag pisikal nga kapagros kag mahimo nga indi mo maaman ang mga kinahanglanon sang imo pamilya. Gani, paano ka makapabilin nga balanse sa espirituwal samtang ginaatipan mo ang isa ka katapo sang pamilya nga nagamasakit ukon tigulang na? Ano ang sarang mabulig sang iban nga katapo sang kongregasyon agod ipakita ang ila pag-ulikid sa isa nga nagamasakit?

Kon Paano Makapabilin nga Balanse

Agod makapabilin ka nga balanse sa espirituwal kag mapagros sa pisikal samtang nagaatipan sa nagamasakit nga katapo sang pamilya, dapat ka mangin mapasibusibuon kag makahibalo magbadyet sang imo tion kag kusog. “Sa mapainubuson yara ang kaalam,” siling sang Hulubaton 11:2. Sa sini nga konteksto, ang tinaga nga “mapainubuson” nagakahulugan sing paghibalo sang imo mga limitasyon. Agod mapat-od mo nga wala ka nagapasobra sa imo masarangan, ayhan kinahanglan mo usisaon ang imo iskedyul kag mga responsibilidad.

Si Steve nagpakita sang kaalam kag pagkamapainubuson paagi sa pag-usisa sang iya mga  hilikuton. Magluwas sa iya sekular nga trabaho, nagaalagad sia subong koordenitor sang hubon sang mga gulang kag manugtatap sang pag-alagad sa lokal nga kongregasyon sang mga Saksi ni Jehova sa Ireland. Katapo man sia sang Hospital Liaison Committee sa ila lugar. “Daku nga tion ang akon ginahinguyang sa sining mga responsibilidad pero wala gid ako nakabati nga nagreklamo si Kim nga ginapabay-an ko sia,” siling ni Steve. “Apang nahibaluan ko nga sobra na sa akon masarangan ang akon ginahimo.” Ano ang ginhimo ni Steve? “Sa tapos ko ini ginpangamuyo,” siling niya, “nagdesisyon ako nga mag-untat subong koordenitor. Nagpabilin ako subong gulang, apang gintugyan ko sa iban ang pila sang akon responsibilidad sa kongregasyon amo nga nahatagan ko si Kim sang tion kag atension nga kinahanglan niya.”

Sang ulihi, nag-ayoayo ang panglawas ni Kim. Gin-usisa liwat nanday Steve kag Kim ang ila kahimtangan. Sa bulig sang iya asawa, natungdan liwat ni Steve ang iya mga responsibilidad sa kongregasyon. “Bangod sa balatian, natun-an namon nga himuon kon ano lang ang amon masarangan,” siling ni Steve. “Daku gid ang akon pasalamat sa bulig ni Jehova kag sa suporta sang akon asawa nga wala gid nagareklamo bisan pa may balatian sia.”

Binagbinaga man ang eksperiensia sang nagalakbay nga manugtatap nga si Jerry kag sang  iya asawa nga si Maria. Dapat nila bag-uhon ang ila tulumuron agod maatipan ang ila nagatigulang na nga mga ginikanan. “Tulumuron namon sang akon bana nga mag-alagad subong mga misyonero sa iban nga pungsod,” siling ni Maria. “Apang, si Jerry bugtong lang nga anak, kag ang iya mga ginikanan kinahanglan na atipanon. Gani, nagdesisyon kami nga magpabilin sa Ireland para atipanon sila. Sa amo, nabantayan namon ang amay ni Jerry sang naospital ini antes mapatay. Sa karon, makamusta namon adlaw-adlaw ang iloy ni Jerry kag mahapos lang sia makapangayo sang bulig sa amon. Ang mga kauturan sa kongregasyon sang iloy ni Jerry mabinuligon gid kag ang ila suporta nakabulig sa amon nga makapabilin sa paglakbay nga hilikuton.”

Kon Paano Makabulig ang Iban

Sang naghinun-anon si apostol Pablo kon paano buligan ang tigulang nga mga balo sa kongregasyon, sia nagsulat: “Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, ginapanghiwala niya ang pagtuo kag malain pa sa tawo nga wala sing pagtuo.” Ginpahanumdom ni Pablo ang iya mga masigka-Cristiano nga kon luyag nila mangin ‘kalahamut-an sa itululok sang Dios’ ang ila pag-alagad, dapat nila sakdagon sa pinansial ang ila tigulang na nga mga ginikanan kag mga lolo kag lola. (1 Tim. 5:4, 8) Apang, mahimo man makabulig ang iban sa kongregasyon suno sa ila masarangan.

Talupangda ang natabo sa tigulang nga mag-asawa nga sanday Hakan kag Inger nga taga-Sweden. “Nakibot gid kami sang natukiban namon nga may kanser ang akon asawa,” siling ni Hakan. “Halin sang una mapagros kag mapagsik si Inger. Pero karon kinahanglan na namon magkadto sa ospital adlaw-adlaw agod magpabulong, kag makapaluya gid sa iya ang epekto sang iya pagpabulong. Bangod sini wala na si Inger nagahalin sa balay, kag indi ko sia puede bayaan kay wala sing maatipan sa iya.” Paano ginbuligan sang mga kauturan sanday Hakan kag Inger?

Ang mga gulang sa kongregasyon naghimo sang kahimusan nga ining mag-asawa makapamati sa Cristianong mga miting paagi sa telepono. Dugang pa, pirme sila ginatawgan kag ginabisitahan sang mga kauturan. Ginapadal-an man sila sang mga sulat kag mga kard. “Nabatyagan gid namon ang bulig ni Jehova kag sang mga kauturan,” siling ni Hakan. “Ang ila pag-ulikid sa amon nakabulig sing daku nga makapabilin kami nga malig-on sa espirituwal. Maayo gani kay nag-ayo si Inger amo nga nakatambong kami liwat sa mga miting sa Kingdom Hall.” Kon ginabuligan sang mga katapo sang kongregasyon ang mga nagamasakit kag mga tigulang, ginapamatud-an nila nga matuod sila nga mga ‘abyan nga nagahigugma sa tanan nga tion, kag isa ka utud nga natawo tungud sa kapiotan.’—Hulu. 17:17.

Ginapabaloran Gid ni Jehova ang Imo mga Panikasog

Ang pag-atipan sa katapo sang pamilya nga nagamasakit makapahuol gid. Si Hari David nagsulat: “Malipayon ang nagapatugsiling sa mga kubos,” kaangay sang isa nga nagakinahanglan sang bulig bangod sa balatian.—Sal. 41:1, NW.

Paano mangin malipayon ang isa nga nagaatipan sa nagamasakit ukon nagaantos? “Ang tawo nga maluluy-on sa imol nagapahulam kay Jehova,” siling sang Hulubaton 19:17 (NW), “kag balusan Niya ang iya ginahimo.” Ang matuod nga Dios nagaulikid gid sa iya matutom nga mga alagad nga nagaantos sang balatian, kag ginapakamaayo niya ang mga nagabulig sa ila. Si salmista David nag-amba: “Buligan sia ni Jehova kon magbalatian sia; atipanon sia kon magmasakit sia.” (Sal. 41:3, NW) Makasalig gid kita nga kon yadtong mga nagabulig naman ang makaeksperiensia sang kabudlayan ukon mga kalamidad, buligan man sila ni Jehova.

Daw ano ka makalilipay mahibaluan nga nakita ni Jehova nga Dios kag ginakahamut-an ang aton mga panikasog nga atipanon ang nagamasakit nga katapo sang aton pamilya! Bisan pa mabudlay ang paghimo sini, ginapasalig kita sang Kasulatan nga “nahamuot gid ang Dios sa sini nga mga halad.”—Heb. 13:16.

[Nota]

[Mga Retrato sa pahina 18]

Magpabilin nga balanse sa espirituwal kag batuna ang bulig sang iban