Ngaa Dapat Padunggan ang mga Tigulang?

ANG isa sa pinakamasunson kuhaan sing retrato nga kahoy sa bug-os nga kalibutan makita sa baybayon sang California, U.S.A. Ginatawag ini nga Lone Cypress. Suno sa report, ang edad sini nga kahoy kapin na sa 250 ka tuig. Bangod sang talalupangdon nga kabakod sini, ining matahom nga kahoy ginhatagan gid sing atension. Ginbutangan ini sing suporta nga mga kable kag ang puno sini ginpalibutan sang mga bato nga ginsemento.

Ang Lone Cypress nagapahanumdom sa aton sang talalupangdon nga pagbatas sang tigulang naton nga mga kauturan. Nasaksihan naton ang ila katutom sa pagbantala sang maayong balita. Gintagna ni manalagna Joel nga ang “mga tigulang” magapahayag sang mensahe sang Biblia. (Joel 2:28-32; Binu. 2:16-21) Hunahunaa ang di-maisip nga inoras nga ginahinguyang nila sa pagbulig sa iban nga makatuon tuhoy sa “maayong balita sang ginharian”! (Mat. 24:14) Ang pila sining tigulang nga mga manugbantala sang Ginharian nagbatas sing mga paghingabot ukon iban pa nga kabudlayan sa madamo nga tinuig. Kon ang cypress nga kahoy ginapabaloran bangod sa kabakod sini kag ginpalig-on paagi sa pagbutang sang mga kable kag mga bato, indi bala nga ang aton tigulang nga mga kauturan mas takus nga pabaloran kag padunggan?

Ginsugo ni Jehova nga Dios ang iya katawhan sang una: “Magtindug ka sa atubangan sang olo nga ubanon, kag tahora ang nawung sang tigulang nga tawo.” (Lev. 19:32) Madamo nga alagad ni Jehova sa karon ang maayo gid nga halimbawa sa ‘paglakat upod sa Dios’ sa sulod sang mga dekada. (Miq. 6:8) Samtang padayon nila nga ginaaplikar ang mga prinsipio sa Biblia, ang ila ubanon nga ulo amo “ang purungpurung sang himaya.”—Hulu. 16:31.

 Si apostol Pablo nagsiling sa pamatan-on nga si Timoteo: “Indi pagmulaya ang isa ka tigulang nga lalaki.” Sa baylo, dapat si Timoteo “magpangabay sa iya subong amay” kag “sa tigulang nga mga babayi subong mga iloy.” (1 Tim. 5:1, 2) Ginapahangop sini nga si Timoteo “magtindug” sa atubangan sang ulo nga ubanon. Gani, maathag nga ginapaabot ni Jehova nga ang aton paagi sang paghambal dapat magpakita sang pagtahod sa mga tigulang.

“Sa pagpadungog sa isa kag isa manguna kamo,” siling sang Roma 12:10. Ang mga manugtatap sa kongregasyon nagapakita gid sang pagtahod sa tigulang nga mga kauturan. Apang kita tanan dapat manguna sa pagpadungog sa isa kag isa.

Huo, ang mga katapo sang pamilya amo ang may daku nga responsibilidad sa ila mga ginikanan kag mga lolo kag lola. Sa bahin sang Lone Cypress, ang mga tawo nagpangita gid sing mga paagi nga matipigan ini, kag padayon nila ini nga ginahimo. Gani, dapat man kita mangita sing mga paagi nga matipigan ang dignidad sang aton nagatigulang na nga mga ginikanan kag mga lolo kag lola. Ang isa ka paagi nga mapakita naton ini amo ang pagpamati sing maayo sa ila kag likawan nga ipilit ang aton kaugalingon nga luyag agod indi masaklaw ang ila balatyagon.—Hulu. 23:22; 1 Tim. 5:4.

Hamili gid kay Jehova ang tigulang nga mga kauturan. Wala niya sila ginapabay-an. (Sal. 71:18) Ginapalig-on niya sila agod makapadayon sa pag-alagad sa iya sing matutom. Kabay nga padayon naton nga sakdagon kag padunggan ang tigulang naton nga mga kauturan.

[Mga Retrato sa pahina 7]

Kon ang Lone Cypress nagakinahanglan sang suporta, indi bala nga ang mga tigulang nagakinahanglan man sang suporta kag dapat pakig-angutan nga may dignidad kag pagtahod?

[Gubuayan]

American Spirit Images/age fotostock