Padayon nga Hanasa ang Imo Ikasarang sa Paghantop

DAW ano katahom tulukon sang isa ka eksperto nga gymnast nga nagapasundayag sang iya abilidad! Ang Biblia nagapalig-on sa mga Cristiano nga hanason ang ila ikasarang sa paghantop kaangay sa paghanas nga ginahimo sang isa ka gymnast.

Sa iya sulat sa mga Hebreo, si apostol Pablo nagsiling: “Ang matig-a nga kalan-on para sa hamtong nga mga tawo, nga paagi sa paggamit sang ila mga ikasarang sa paghantop nahanas ini nga makilala ang maayo kag malain.” (Heb. 5:14) Ngaa ginpalig-on ni Pablo ang Hebreo nga mga Cristiano nga hanason ang ila ikasarang sa paghunahuna kaangay sang ginahimo sang isa ka eksperto nga gymnast? Paano naton mahanas ang aton ikasarang sa paghantop?

“Mangin mga Manunudlo Na Kamo Kuntani”

Sang ginpaathag ni Pablo ang papel ni Jesus subong “mataas nga saserdote sa paagi nga kaangay kay Melquisedec,” nagsulat sia: “Nahanungod sa iya [kay Jesus] madamo kami sing masiling kag mabudlay nga ipaathag, bangod nangin mahinay kamo sa inyo pagpamati. Kay sa pagkamatuod, bisan pa dapat nga mangin mga manunudlo na kamo kuntani bangod sang tion, nagakinahanglan kamo liwat sang isa nga magtudlo sa inyo sugod sa pamuno sang nahauna nga mga butang sang sagrado nga mga kapahayagan sang Dios; kag nangin subong kamo sa nagakinahanglan sang gatas, indi sang matig-a nga kalan-on.”—Heb. 5:10-12.

Maathag nga ang pila sa Judiyong mga Cristiano sang unang siglo wala nag-uswag sa espirituwal. Halimbawa, nabudlayan sila sa pagbaton sa nagauswag nga kapawa tuhoy sa Kasuguan kag pagtuli. (Binu. 15:1, 2, 27-29; Gal. 2:11-14; 6:12, 13) Ang iban nabudlayan mag-untat sa pagpakigbahin sa kapiestahan may kaangtanan sa semanal nga Adlaw nga Inugpahuway kag sang Adlaw sang Katumbasan kada tuig. (Col. 2:16, 17; Heb. 9:1-14) Gani, ginpalig-on sila ni Pablo nga hanason ang ila ikasarang sa paghantop agod makilala ang maayo kag malain kag ginsilingan sila nga ‘magpanikasog padulong sa pagkahamtong.’ (Heb. 6:1, 2) Ang iya laygay mahimo nagpahulag sa pila nga pamalandungan kon paano nila gamiton ang ila ikasarang sa paghunahuna kag nagbulig ini sa ila nga mag-uswag sa espirituwal. Kamusta naman kita?

Hanasa ang Imo Ikasarang sa Paghantop

Paano naton hanason ang aton ikasarang sa paghunahuna agod mangin hamtong sa espirituwal? “Paagi sa paggamit,” siling ni Pablo. Kaangay sang mga gymnast nga makahimo sing matahom kag komplikado nga mga eksibisyon kay nagahanas sila, dapat man naton hanason ang aton ikasarang sa paghunahuna agod makilala ang maayo kag malain.

“Ang pag-ehersisyo amo ang pinakamaayo nga butang nga mahimo naton para sa aton utok,” siling ni John Ratey, isa ka propesor sa Harvard Medical School. Suno kay Gene Cohen nga direktor sa Center on Aging, Health and Humanities sa George Washington University, “kon ginagamit naton ang aton utok, ang mga selula sini nagapatubo sang bag-o nga mga dendrite, amo nga nagadamo pa gid ang mga synapse sini, ukon mga koneksion.”

Gani, maayo gid nga hanason naton ang aton ikasarang sa paghunahuna kag dugangan ang aton ihibalo sa Pulong sang Dios. Paagi sa sini, masangkapan pa gid kita nga himuon  ang “himpit nga kabubut-on sang Dios.”—Roma 12:1, 2.

Kalangkagi ang “Matig-a nga Kalan-on”

Kon luyag naton nga ‘magpanikasog padulong sa pagkahamtong,’ dapat naton pamangkuton ang aton kaugalingon: ‘Nagauswag bala ang akon paghangop sa kamatuoran sa Biblia? Ginatamod bala ako sang iban nga hamtong sa espirituwal?’ Nalipay gid ang isa ka iloy nga pasusuhon ukon pakan-on ang iya bata samtang lapsag pa. Apang magakabalaka gid sia kon magdaku na ang iya bata nga wala gihapon nagakaon sang matig-a nga mga pagkaon. Sing kaanggid, nalipay gid kita kon mag-uswag ang aton ginatun-an sa Biblia tubtob makadedikar sia kag magpabawtismo. Apang, ano abi kon pagkatapos sang bawtismo indi na sia mag-uswag? Indi bala nga makapasubo gid ini? (1 Cor. 3:1-4) Luyag gid sang manunudlo nga ang iya ginatun-an mangin manunudlo man sa ulihi.

Agod magamit naton ang aton ikasarang sa paghantop dapat kita magpamalandong, kag nagakinahanglan ina sang panikasog. (Sal. 1:1-3) Indi naton pagtugutan ang pagtan-aw sang telebisyon kag mga kalingawan nga wala nagakinahanglan sing pagpangabudlay sang hunahuna nga mag-upang sa aton sa pagpamalandong sa mapuslanon nga mga butang. Agod mapauswag naton ang aton ikasarang sa paghunahuna, dapat nga mapalambo naton ang aton gana kag kalangkag sa pagtuon sa Biblia kag sa mga publikasyon sang “matutom kag mainandamon nga ulipon.” (Mat. 24:45-47) Luwas sa regular nga pagbasa sang Biblia, importante man nga maghatag kita sang tion para sa Pangpamilya nga Pagsimba kag pagpanalawsaw sa mga topiko sa Biblia.

Si Jerónimo nga isa ka nagalakbay nga manugtatap sa Mexico nagsiling nga kada baton niya sang bag-o nga Lalantawan ginabasa niya ini gilayon. Nagapain man sia sing tion nga magtuon upod sa iya asawa. Nagsiling sia, “Kada adlaw ginabasa namon nga mag-asawa ang Biblia, kag ginagamit namon ang brosyur nga ‘Good Land.’” Ang isa ka Cristiano nga si Ronald nagsiling nga ginasundan niya ang iskedyul sang kongregasyon sa pagbasa sa Biblia. May ginhimo man sia nga isa ukon duha ka personal nga programa sa pagtuon. “Ini nga programa nakabulig sa akon nga kalangkagan ang masunod ko nga pagtuon,” siling ni Ronald.

Kamusta naman kita? Ginahatagan bala naton sang bastante nga tion ang pagtuon kag pagpamalandong sa Pulong sang Dios? Ginahanas bala naton ang aton ikasarang sa paghunahuna kag nagadesisyon suno sa mga prinsipio sang Kasulatan? (Hulu. 2:1-7) Kabay nga mangin tulumuron naton nga mangin hamtong sa espirituwal kag matigayon ang ihibalo kag kaalam sang mga nagahanas sang ila ikasarang sa paghantop nga makilala ang maayo kag malain!

[Retrato sa pahina 23]

Ginahanas naton ang aton ikasarang sa paghunahuna “paagi sa paggamit”