Paglandas sa Pagluib sang Tiayon

SI Margarita kag ang iya bana nga si Raúl, magkaupod nga nag-alagad kay Jehova subong bug-os tion nga mga ministro sa sulod sang madamo nga tinuig. * Apang pagkatapos mabun-ag ang ila una nga bata, amat-amat nga nagpalayo si Raúl kay Jehova. Sang ulihi, nangin imoral si Raúl kag gindisfellowship. “Sang matabo ini,” siling ni Margarita, “daw mapatay ako. Grabe gid nga kasakit ang akon nabatyagan, kag indi ako kahibalo sang akon himuon.”

Wala madugay pagkatapos sang ila kasal, nagbatyag si Jane nga ginluiban sia sang iya bana sa tuhay nga paagi. Ginasakit sia sang iya bana amo nga nadula na ang iya pagsalig kag pagpalangga sa iya. “Sa una nga bes nga ginsumbag niya ako,” siling ni Jane, “nakibot gid ako; pamatyag ko ginpakahuy-an ako kag ginpakanubo. Sulitsulit niya ini nga ginhimo sa akon kag sulitsulit man sia nga nagpakitluoy nga patawaron ko sia. Abi ko obligasyon ko subong Cristiano nga magpatawad pirme kag kalimtan ini. Naghunahuna man ako nga isa ka pagluib kon isugid ko ang amon problema sa iban—bisan sa mga gulang sa amon kongregasyon. Ining pagpanakit kag pagpangayo sing kapatawaran sulitsulit nga nagakatabo sa sulod sang mga tinuig. Sa sining mga tinion, naghunahuna ako nga may dapat ako himuon para higugmaon ako sang akon bana. Sang ulihi, sang ginbiyaan niya kami sang akon bata nga babayi, pamatyag ko napaslawan ako, nga dapat  kuntani may ginhimo pa ako kag ginsiling para indi maguba ang amon pag-asawahay.”

Kaangay ni Margarita kag ni Jane, mahimo may problema ka man sa emosyon, pinansial, kag espirituwal bangod ginluiban ka sang imo bana. Ukon ayhan isa ikaw ka bana nga nagaantos sing emosyonal nga kasakit kag mga kabudlayan bangod ginluiban ka sang imo asawa. Huo, subong sang gintagna sang Biblia, nagakabuhi kita sa “makahalanguyos nga mga tion nga mabudlay atubangon.” Ginapakita sini nga tagna nga sa “katapusan nga mga adlaw,” ang kinaugali nga pagpalangga madula amo nga maapektuhan gid sini ang mga pamilya. Ang iban mapamatud-an nga sayop sa ila pagpangangkon nga nagaalagad sila sa Dios. (2 Tim. 3:1-5) Ini nga mga problema nagakatabo man sa matuod nga mga Cristiano; gani, ano ang makabulig sa imo sa paglandas kon ginluiban ka sang imo tiayon?

Tamda ang Imo Kaugalingon Subong sang Pagtamod ni Jehova

Sa umpisa, daw indi ka makapati nga ang isa nga imo ginahigugma makasakit sa imo. Mahimo mo pa gani basulon ang imo kaugalingon sa iya pagpakasala.

Apang, dumduma nga bisan ang himpit nga tawo nga si Jesus ginluiban man sang isa nga iya ginsaligan kag ginhigugma. Antes nagpili si Jesus sing suod nga mga kaupod, ang iya mga apostoles, madugay niya ini nga ginbinagbinag kag ginpangamuyo. Ang 12 nangin masaligan nga mga alagad ni Jehova. Gani, sigurado nga nasakitan gid si Jesus sang si Judas “nangin traidor.” (Luc. 6:12-16) Apang, wala ginbasol ni Jehova si Jesus sa ginhimo ni Judas.

Sa pagkamatuod, wala karon sing tiayon nga himpit. Ang kada isa nagakasala. Realistiko nga nagsulat ang salmista: “Kon ikaw, O GINOO, magtanda sang kalautan, O Ginoo, sin-o bala ang makatindug?” (Sal. 130:3) Dapat ilugon sang mga magtiayon si Jehova nga palampason ang mga di-kahimpitan sang kada isa.—1 Ped. 4:8.

Dumdumon naton nga “ang kada isa sa aton manabat sang iya kaugalingon sa Dios.” (Roma 14:12) Kon nangin batasan na sang isa ka tiayon ang paghambal sing masakit nga mga tinaga ukon pagpanakit, sia mismo ang manabat kay Jehova. Ginapakamalaut ni Jehova ang kasingki kag masakit nga mga pinamulong, amo nga wala gid sing rason ang isa nga himuon ini sa iya tiayon. (Sal. 11:5; Efe. 5:33; Col. 3:6-8) Sa pagkamatuod, kon ang isa ka Cristiano sulitsulit kag indi mahinulsulon nga nagapadala sa iya kaakig, mahimo ini bangdan sang pag-disfellowship sa iya sa Cristianong kongregasyon kon indi sia magbag-o. (Gal. 5:19-21; 2 Juan 9, 10) Ang isa ka tiayon indi dapat magbatyag nga nakasala sia kon ireport niya ining di-Cristiano nga buhat sa mga gulang. Si Jehova naluoy gid sa mga biktima sinang pagmaltratar.

Kon ang isa ka tiayon nakahimo sing pagpanghilahi, wala lamang sia nakasala sa iya tiayon kundi nakasala man sia kay Jehova. (Mat. 19:4-9; Heb. 13:4) Kon ang ginluiban nga tiayon nagapanikasog nga magkabuhi nahisuno sa mga prinsipio sang Biblia, wala sing rason nga basulon niya ang iya kaugalingon.

Dumduma nga nahibaluan ni Jehova ang imo ginabatyag. Ginlaragway niya ang iya kaugalingon subong bana sang pungsod sang Israel, kag ang iya Pulong nagaunod sang makatalandog nga mga dinalan nga nagapabutyag sang kasubo nga iya gin-antos bangod sa espirituwal nga pagpanghilahi sang Israel. (Isa. 54:5, 6; Jer. 3:1, 6-10) Makasalig ka man nga nakita gid ni Jehova ang mga luha nga imo ginpatulo bangod sa pagluib sang imo tiayon. (Mal. 2:13, 14) Nahibaluan niya nga nagakinahanglan ka sing lugpay kag pagpalig-on.

Kon Paano si Jehova Nagaaman sing Lugpay

Ang isa sa mga paagi nga ginagamit ni Jehova sa pag-aman sing lugpay amo ang Cristianong kongregasyon. Diri nakabaton si Jane sing pagpalig-on. “Sa tion nga ginluyahan gid ako amo man ini ang tion nga nagduaw ang amon manugtatap sang sirkito,” siling ni Jane. “Nakahibalo sia nga nasubuan gid ako bangod ginbulagan ako sang akon bana. Naghatag sia sing tion nga buligan ako nga mangatarungan sa mga teksto subong sang 1 Corinto 7:15. Ang mga teksto sa  Biblia kag ang iya mainayuhon nga mga komento nakabulig sa akon nga indi na pagbasulon ang akon kaugalingon kag nakahatag ini sa akon sing kalinong sa hunahuna.” *

Natun-an ni Margarita nga ginsambit kaina, nga si Jehova nagaaman sing praktikal nga bulig paagi sa Cristianong kongregasyon. “Sang nangin maathag nga ang akon bana indi mahinulsulon,” siling ni Margarita, “gindala ko ang akon mga bata kag nagsaylo kami sa lain nga siudad. Pag-abot namon didto, nakaarkila kami sang duha ka kuarto. Sang masunod nga adlaw, samtang masinulub-on ko nga ginapagua sa bag ang amon mga dala, may nanuktok sa puertahan. Abi ko gani ang amon landlady nga nagaistar sa pihak lang nga kuarto. Nakibot ako sang ginbuksan ko ang puertahan kag nakita ko ang utod nga babayi nga nagtuon sang Biblia sa akon iloy kag nagbulig sa amon pamilya nga makasulod sa kamatuoran. Wala sia maglaum nga magkit-anay kami sa sini nga balay kay nagkadto lang sia diri para magtuon sang Biblia sa amon landlady. Nakabatyag gid ako sing daku nga kaumpawan kag indi ko na makontrol ang akon balatyagon. Ginsugid ko sa iya ang natabo sa amon, kag naghibi kami nga duha. Naghimo sia gilayon sing kahimusan nga makatambong kami sang miting sa sina nga adlaw. Gin-abiabi gid kami sang mga kauturan, kag naghimo sing kahimusan ang mga gulang nga maatipan ang espirituwal nga mga kinahanglanon sang akon pamilya.”

Kon Paano Makabulig ang Iban

Ang mga katapo sang Cristianong kongregasyon mahimo makabulig sa madamo nga paagi. Halimbawa, kinahanglan karon ni Margarita makakita sing trabaho. Ang isa ka pamilya sa kongregasyon nagtanyag sing bulig nga atipanon ang iya kabataan pagkatapos sang klase kon kinahanglanon.

“Ang naapresyar ko gid,” siling ni Margarita, “amo ang pag-upod sang mga kauturan sa akon kag sa akon kabataan sa pag-alagad sa latagon.” Paagi sa sinang praktikal nga bulig, ang mga katapo sang kongregasyon ‘nagadala sang mga lulan sang isa kag isa, kag sa amo ginatuman nila ang kasuguan ni Cristo.’—Gal. 6:2.

Ang mga nagaantos bangod sa sala sang iban nagaapresyar gid sa sini nga sahi sang bulig. Si Monique, nga ginbayaan sang iya bana kag ginbilinan sang $15,000 nga utang sa credit-card kag apat ka kabataan nga salaguron, nagsiling: “Ang akon espirituwal nga mga kauturan mahigugmaon gid. Indi ko mahunahuna kon ano ayhan ang ginhimo ko kon wala nila ako ginbuligan. Nagbatyag ako nga ginhatagan ako ni Jehova sing labing dalayawon nga mga kauturan, nga nagboluntaryo sa pag-atipan sa akon mga kabataan.  Bangod sini, nalipay gid ako nga makita nga nagdalagku ang akon kabataan nga hamtong sa espirituwal. Kon nagakinahanglan ako sing laygay, ginabuligan ako sang mga gulang. Kon kinahanglan ko nga may maistorya, handa sila nga mamati sa akon.”—Mar. 10:29, 30.

Huo, ang isa ka mahigugmaon nga abyan nakahibalo sang tion kon san-o indi dapat istoryahan ang masubo nga inagihan sang isa. (Man. 3:7) “Sa masami,” siling ni Margarita, “nanamian ako makig-istorya sa mga utod nga babayi sa akon bag-o nga kongregasyon tuhoy sa pagbantala, pagtuon sa Biblia, kag sa amon mga kabataan—bisan ano nga butang, luwas lang sa akon mga problema. Nalipay ako nga ginabuligan nila ako nga malipatan ang akon inagihan kag makasugod sang bag-o nga kabuhi.”

Likawi nga Magbalos

Kon kaisa, sa baylo nga basulon ang imo kaugalingon sa sala sang imo tiayon, mahimo magdumot ka sa iya kay ang iya ginhimo nagresulta sa imo pag-antos. Kon pabay-an mo ini nga balatyagon, mahimo ini manggamot sa imo kag magapaluya sang imo determinasyon nga magpabilin nga matutom kay Jehova. Halimbawa, mahimo masulay ka nga mangita sing paagi nga makabalos sa iya.

Kon amo na sina ang imo ginabatyag, dumduma ang halimbawa ni Josue kag ni Caleb. Ginrisgo nila ang ila kabuhi agod mangespiya sa Ginsaad nga Duta. Ang iban nga espiya wala sing pagtuo kag ginhaylo nila ang mga tawo nga maglapas kay Jehova. Sang gintinguhaan nanday Josue kag Caleb nga palig-unon ang pungsod nga magpabilin nga matutom, luyag pa gani sang iban nga Israelinhon nga batuhon sila. (Num. 13:25–14:10) Bangod sa ginhimo sang Israel, naulamid sanday Josue kag Caleb sa paglibotlibot sa kahanayakan sa sulod sang 40 ka tuig.

Mahimo nga si Josue kag si Caleb nagbatyag gid sing kalugaw-an, apang wala sila nagdumot sa ila mga utod. Nagkonsentrar sila sa pagpabilin nga balanse sa espirituwal. Pagkatapos sang 40 ka tuig nga pagtener sa kahanayakan, sila, kag ang mga Levinhon, amo lamang ang nabilin sa ila henerasyon nga nakasulod sa Ginsaad nga Duta.—Num. 14:28-30; Jos. 14:6-12.

Ang pagluib sang imo tiayon mahimo magpaantos sa imo sa malawig nga tion. Mahimo nga natapos na ang inyo pag-asawahay, apang ang imo emosyonal kag pinansial nga pag-antos nagapadayon. Sa baylo nga magpadaug sa negatibo nga panghunahuna, dumduma nga si Jehova nakahibalo sang pinakamaayo nga himuon sa mga hungod nga nagasikway sa iya mga talaksan, subong sang natabo sa wala sing pagtuo nga mga Israelinhon sa kahanayakan.—Heb. 10:30, 31; 13:4.

Malandas Mo Ina!

Sa baylo nga magpadaug sa negatibo nga mga panghunahuna, pun-a ang imo hunahuna sang espirituwal nga mga butang. “Nasapwan ko nga ang pagpamati sa mga tape recording sang The Watchtower kag Awake! nakabulig sa akon nga malandas ang akon mga problema,” siling ni Jane. “Ang mga miting nakahatag man sa akon sing daku nga kusog. Ang pagpakigbahin sing aktibo sa mga miting nakabulig sa akon nga malimtan ang akon mga problema. Nakabulig man sa akon ang pagbantala nga hilikuton. Paagi sa pagbulig sa iban nga magtuo kay Jehova, labi nga naglig-on ang akon pagtuo. Kag ang pagtatap sa mga estudyante sa Biblia nakabulig sa akon nga magkonsentrar sa mas importante nga mga butang.”

Si Monique, nga ginsambit kaina, nagsiling: “Ang pagtambong sing regular sa mga miting kag pagpakigbahin pirme sa pag-alagad sa latagon tubtob sa akon masarangan, nakabulig sa akon nga makabatas. Ang amon pamilya nangin mas suod sa isa kag isa kag sa kongregasyon. Ang akon inagihan nakabulig sa akon nga makita ang akon mga kaluyahon. Gintilawan ako, apang sa bulig ni Jehova, nalandas ko ini.”

Sarang mo man malandas ang kaanggid nga mga pagtilaw. Huo, bisan pa masakit nga luiban ka sang imo tiayon, tinguhai nga iaplikar ang laygay ni Pablo: “Indi kita magpangampo sa paghimo sing maayo, kay sa nagakaigo nga panahon magaani kita kon indi kita paglapyuon.”—Gal. 6:9.

[Mga Nota]

[Retrato sa pahina 31]

Ginaapresyar gid sang ginluiban nga mga tiayon ang mga nagabulig sa ila sa pag-alagad sa latagon