Pagsapo sang Kaumpawan sa Espirituwal nga mga Butang

“Itakod ang akon gota . . . , kag makakita kamo sang kaumpawan sa inyo kaugalingon.”—MAT. 11:29.

1. Ano nga kahimusan ang ginpasad sang Dios sa Bukid Sinai, kag ngaa?

SANG ginpasad ang Kasuguan nga katipan sa Bukid Sinai, nalakip sa sini ang kahimusan sa semanal nga Adlaw nga Inugpahuway. Paagi sa iya humalambal nga si Moises, ginsugo ni Jehova ang pungsod sang Israel: “Sa sulod sang anom ka adlaw himuon mo ang imo hilikuton; apang sa ikapito nga adlaw indi ka magpangabudlay, agod ang imo baka kag ang imo asno makapahuway kag ang anak nga lalaki sang imo ulipon nga babayi kag ang dumuluong nga pumuluyo makaagom sing kaumpawan.” (Ex. 23:12, NW) Huo, agod hatagan sing konsiderasyon ang mga napaidalom sa Kasuguan, mahigugmaon nga nag-aman si Jehova sang isa ka adlaw nga makapahuway ang iya katawhan kag “makaagom sing kaumpawan.”

2. Paano nakabenepisyo ang Israel sa pag-obserbar sang Adlaw nga Inugpahuway?

² Ang Adlaw nga Inugpahuway para lamang bala sa pagrelaks? Indi. Importante ini nga bahin sang pagsimba sang mga Israelinhon kay Jehova. Ang pag-obserbar sa Adlaw nga Inugpahuway naghatag sing tion sa mga ulo sang pamilya nga matudluan ang ila pamilya “nga sundon ang dalanon ni Jehova sa paghimo sing pagkamatarong.” (Gen. 18:19, NW) Naghatag ini sing kahigayunan sa mga pamilya kag mga mag-abyan nga mapamalandungan ang mga ginhimo ni Jehova kag tion man ini sang ila malipayon nga pag-inupdanay. (Isa. 58:13, 14) Labaw sa tanan, ginalaragway sang Adlaw nga Inugpahuway ang magaabot nga tion sang matuod nga kaumpawan sa idalom sang Isa ka Libo ka Tuig nga Paggahom ni Cristo. (Roma 8:21) Apang, kamusta sa aton panahon? Sa diin kag paano ang matuod nga mga Cristiano nga interesado sa mga dalanon ni Jehova, makasapo sinang kaumpawan?

Kaumpawan sa Pagpakig-upod sa mga Kauturan

3. Paano ang mga Cristiano sang unang siglo nagpabakod sa isa kag isa, kag ano ang resulta?

³ Ginlaragway ni apostol Pablo ang Cristianong kongregasyon subong “isa ka haligi kag pamakod sang kamatuoran.” (1 Tim. 3:15) Ang mga Cristiano sang una nakabaton man sing pagpabakod paagi sa pagpalig-on sa isa kag isa sa gugma. (Efe. 4:11, 12, 16) Samtang si Pablo yara sa Efeso, ginbisitahan sia sang mga kauturan sa kongregasyon sang Corinto. Talupangda kon ano ang epekto sini sa iya: “Nagakasadya ako sa presensia ni Estefanas kag ni Fortunato kag ni Acaico,” siling ni Pablo, “kay ginpaumpawan nila ang akon espiritu.” (1 Cor. 16:17, 18) Sang si Tito nagkadto sa Corinto agod mag-alagad sa mga kauturan didto, si Pablo nagsulat sa kongregasyon: “Ginpaumpawan ninyo tanan ang iya espiritu.” (2 Cor. 7:13) Sing kaanggid, ang mga Saksi ni Jehova sa karon nakasapo man sang matuod nga kaumpawan sa makapalig-on nga pagpakig-upod nila sa ila mga masigka-Cristiano.

4. Paano ang mga miting sang kongregasyon nagapaumpaw sa aton?

⁴ Ikaw mismo makapamatuod nga ang mga miting sang kongregasyon makalilipay gid. Paagi sa sini matigayon naton ang “pagbayluhanay sing pagpalig-on . . . sa kada isa paagi sa pagtuo sang isa.” (Roma 1:12) Ang aton mga kauturan tuhay gid sa mga tawo nga kilala lang naton kag panalagsa nga makita. Matuod sila nga mga abyan nga ginahigugma naton kag ginatahod. Nagabatyag kita sing kalipay kag kaumpawan sa aton regular nga pagpakig-upod sa ila sa tion sang aton mga miting.—Filem. 7.

5. Paano kita mangin makapaumpaw sa isa kag isa sa tion sang kombension kag mga asembleya?

⁵ Ang isa pa nga makahatag sa aton sing kaumpawan  amo ang aton tuigan nga mga kombension kag mga asembleya. Ining dalagku nga mga pagtilipon wala lamang nagatudlo sa aton sang mga kamatuoran gikan sa Pulong sang Dios, kundi nagahatag man ini sing kahigayunan nga “magpasangkad” kita sa aton pagpakig-upod. (2 Cor. 6:12, 13) Apang kamusta kon mahuluy-on kita kag nabudlayan magpakig-istorya sa iban? Ang isa ka paagi nga makilala naton ang aton mga kauturan amo ang pagboluntaryo sa mga kombension. Ang isa ka utod nga babayi nga nagboluntaryo sa internasyonal nga kombension nagsiling: “Luwas sa akon pamilya kag pila ka abyan wala na ako sing kilala didto. Apang sang nagbulig ako sa pagpaninlo, madamo ako sing nakilala nga mga utod nga lalaki kag mga babayi. Makalilipay gid ini!”

6. Ano ang isa ka paagi nga makasapo kita sing kaumpawan sa tion sang aton bakasyon?

⁶ Subong bahin sang ila pagsimba, kinaandan na nga ang mga Israelinhon tatlo ka beses nga nagakadto sa Jerusalem kada tuig para sa tatlo ka kapiestahan. (Ex. 34:23) Agod mahimo ini, kinahanglan nila bayaan ang ila mga uma, mga balaligyaan kag magalakat sila sing pila ka adlaw sa mayab-ok nga mga dalan. Apang, ang pagkadto sa templo nagahatag sa ila sing “daku nga kalipay” kay paagi sa sini ‘madayaw nila si Jehova.’ (2 Cron. 30:21, NW) Madamo man nga mga alagad ni Jehova karon ang nakabatyag sing daku nga kalipay sa paglakbay upod sa ila pamilya para magbisita sa Bethel, ang sanga talatapan sang mga Saksi ni Jehova. Mahimo man bala makabisita sa Bethel ang inyo pamilya sa inyo masunod nga bakasyon?

7. (a) Ngaa mapuslanon ang pagtipontipon? (b) Paano mangin makalilipay kag makapalig-on ang isa ka pagtipontipon?

⁷ Ang pagtipontipon sang pamilya kag mga mag-abyan makapalig-on man. Ang maalam nga si Hari Solomon nagsiling: “Wala na sing maayo pa sa tawo sang sa magkaon sia kag mag-inum, kag magkalipay ang iya kalag sing kaayohan sa iya kinabudlayan.” (Man. 2:24) Ang pagtipontipon wala lamang nagahatag sa aton sing kaumpawan kundi nagapasuod man ini sa aton sa aton mga masigka-Cristiano bangod paagi sa sini makilala naton sila sing maayo. Apang, agod mangin makalilipay kag makapalig-on ang okasyon, mas maayo nga diutay lang ang imo agdahon agod madumalahan mo  ini sing maayo, ilabi na kon may ginaserbe nga alkohol.

Kaumpawan sa Pagministeryo

8, 9. (a) Ipakita ang kinatuhayan sang mensahe ni Jesus kag sang mga escriba kag mga Fariseo. (b) Paano kita nagabenepisyo sa pagpaambit sang mga kamatuoran sa Biblia?

⁸ Si Jesus makugi gid sa ministeryo, kag ginpalig-on niya ang iya mga disipulo nga mangin makugi man. Makita ini sa iya ginsiling: “Ang alanyon bugana, apang pila lamang ang mamumugon. Busa, pakiluoy kamo sa Agalon sang alanyon nga magpadala sia sang mga mamumugon sa iya alanyon.” (Mat. 9:37, 38) Ang mensahe nga gintudlo ni Jesus makapaumpaw gid; isa ini ka “maayong balita.” (Mat. 4:23; 24:14) Tuhay gid ini sa mabug-at nga mga pagsulundan nga pilit nga ginapatuman sang mga Fariseo sa mga tawo.—Basaha ang Mateo 23:4, 23, 24.

⁹ Kon nagapaambit kita sang mensahe sang Ginharian sa iban, ginahatagan naton sila sang kaumpawan sa espirituwal kag, sa amo man nga tion, nagadalom ang aton paghangop kag apresasyon sa kamatuoran sang Biblia. Nagakaigo gid nga nagsiling ang salmista: “Dayawa ninyo ang GINOO! Kay maayo ang pag-amba sing pagdayaw sa aton Dios; kay matahum ini, kag magayon ang pagdayaw.” (Sal. 147:1) Madugangan mo bala ang imo kalipay paagi sa pagdayaw kay Jehova sa imo mga kaingod?

10. Ang aton bala kadalag-an sa ministeryo nagadepende sa reaksion sang mga tawo sa aton mensahe? Ipaathag.

¹⁰ Huo, may mga lugar nga mas madamo ang interesado sa maayong balita kon ikumparar sa iban nga lugar. (Basaha ang Binuhatan 18:1, 5-8.) Kon diutay lang ang interesado sa mensahe sang Ginharian sa lugar nga imo ginaistaran, magkonsentrar ka sa positibo nga resulta sang imo ministeryo. Dumduma nga ang imo padayon nga panikasog sa pagbantala sang ngalan ni Jehova indi walay pulos. (1 Cor. 15:58) Ang aton kadalag-an wala nagadepende sa reaksion sang mga tawo sa maayong balita. Apang, makasalig kita nga pat-uron ni Jehova nga ang mga tawo nga may matarong nga tagipusuon makabati gid sang mensahe sang Ginharian.—Juan 6:44.

Kaumpawan sa Pangpamilya nga Pagsimba

11. Ano nga salabton ang ginhatag ni Jehova sa mga ginikanan, kag paano nila ini matuman?

¹¹ Ang diosnon nga mga ginikanan amo ang may salabton nga tudluan ang ila kabataan tuhoy kay Jehova kag sa iya mga dalanon. (Deut. 11:18, 19) Kon isa ikaw ka ginikanan, nagahatag ka bala sang tion nga tudluan ang imo kabataan tuhoy sa aton mahigugmaon kag langitnon nga Amay? Agod matuman mo ining mabug-at nga salabton kag maaman ang mga kinahanglanon sang imo pamilya, naghatag sing bulig si Jehova paagi sa bugana nga espirituwal nga pagkaon subong sang mga libro, magasin, video kag mga audio recording.

12, 13. (a) Paano makabenepisyo ang mga pamilya sa gab-i sang Pangpamilya nga Pagsimba? (b) Paano mapat-od sang mga ginikanan nga makapaumpaw ang ila Pangpamilya nga Pagsimba?

¹² Dugang pa, ang matutom kag mainandamon nga ulipon naghimo sing kahimusan para sa gab-i sang Pangpamilya nga Pagsimba. Isa ini ka gab-i nga ginpain sang pamilya para sa ila semanal nga pagtuon sa Biblia. Madamo ang nakasiling nga ini nga kahimusan nagpasuod sa ila sa isa kag isa kag nagpabakod sang ila kaangtanan kay Jehova. Apang, paano mapat-od sang mga ginikanan nga makapaumpaw ang ila Pangpamilya nga Pagsimba?

¹³ Ang gab-i sang Pangpamilya nga Pagsimba indi dapat makatalaka ukon tuman ka serioso. Bangod ang aton ginasimba isa ka “malipayon nga Dios,” luyag niya nga mangin malipayon man kita sa aton pagsimba. (1 Tim. 1:11; Fil. 4:4) Ang pagpain sang isa ka gab-i nga makahambalanay tuhoy sa hamili nga mga kamatuoran sa Biblia isa gid ka pagpakamaayo. Mahimo mangin mapasibusibuon ang mga ginikanan sa ila paagi sang pagtudlo, kag dapat nila gamiton ang ila pagkamapahituon. Halimbawa, ginpahanda sang isa ka pamilya ang ila 10 ka tuig nga bata nga si Brandon sang isa ka report nga natig-uluhan “Ngaa Gingamit ni Jehova ang Man-ug sa Paglaragway kay Satanas?” Sang una, nabalaka si Brandon sa sini nga topiko bangod nanamian gid sia sa mga man-ug, kag nasubuan sia nga gingamit ini sa paglaragway kay Satanas. Kon kaisa, ginailog sang iban nga pamilya  ang mga tingog sang mga karakter samtang nagabasa sila sang Biblia. Kon kaisa naman ginadramadrama nila ang isa ka hitabo. Ini nga pamaagi wala lamang nagapasadya sa pagtuon kundi nagabulig man ini agod makapakigbahin ang mga kabataan, sa amo magatudok ang mga prinsipio sang Biblia sa ila tagipusuon. *

Likawi ang mga Butang nga Makapabug-at sa Imo

14, 15. (a) Paano nagadugang ang mga kabudlayan kag pagkawalay kasiguruhan sa sining katapusan nga mga adlaw? (b) Ano pa ang dugang nga kabudlayan nga mahimo naton maatubang?

¹⁴ Sa katapusan nga bahin sining malaut nga sistema sang mga butang, labi nga nagadugang ang aton ginabatyag nga mga kabudlayan kag pagkawalay kasiguruhan. Minilyon ang wala sing trabaho kag naapektuhan sang kapigaduhon. Bisan ang mga may trabaho nagabatyag nga ang ila kinitaan daw nagatahos lang sa ila bulsa, kag diutay lang ang mabenepisyo sang ila pamilya. (Ipaanggid ang Hageo 1:4-6.) Ang mga pulitiko kag iban pa nga lider wala sing mahimo kay sila mismo indi gani makasolbar sa terorismo kag sa iban pa nga problema. Madamo man nga tawo ang nagaantos bangod sang ila sayop nga mga desisyon.—Sal. 38:4.

¹⁵ Ang matuod nga mga Cristiano indi hilway sa mga problema kag mga kabudlayan sa sining sistema sang mga butang ni Satanas. (1 Juan 5:19) Apang luwas sa sini, mahimo pa sila makaatubang sang dugang nga kabudlayan samtang ginatinguhaan nila nga magpabilin nga matutom kay Jehova. “Kon ginhingabot nila ako, hingabuton man nila kamo,” siling ni Jesus. (Juan 15:20) Apang, bisan pa “ginahingabot” kita, ‘wala kita ginapabay-an.’ (2 Cor. 4:9) Ngaa?

16. Ano ang makabulig sa aton nga mahuptan ang aton kalipay?

¹⁶ Si Jesus nagsiling: “Kari sa akon, kamo tanan nga ginabudlayan kag ginabug-atan, kag paumpawan ko kamo.” (Mat. 11:28) Paagi sa pagtuo sing bug-os sa halad gawad ni Cristo, ginatugyan naton ang aton kaugalingon sa mga kamot ni Jehova. Paagi sa sini, matigayon naton ang “gahom nga labaw sa kinaandan.” (2 Cor. 4:7) “Ang manugbulig,” ang balaan nga espiritu sang Dios nagapalig-on sang aton pagtuo agod indi lamang naton mabatas ang mga kabudlayan kundi agod mahuptan man naton ang aton kalipay.—Juan 14:26; Sant. 1:2-4.

17, 18. (a) Ano nga espiritu ang dapat naton andaman? (b) Ano ang mangin resulta kon unahon naton sa aton kabuhi ang mga kalipayan?

¹⁷ Ang matuod nga mga Cristiano karon dapat man mag-andam nga indi sila maimpluwensiahan sang mahuyugon sa kalipay nga espiritu sining kalibutan. (Basaha ang Efeso 2:2-5.) Kon indi sila mangin alisto, “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa” mahimo magsiod sa ila. (1 Juan 2:16) Mahimo pa gani sila maghunahuna nga ang pagpaayaw sa kailigbon sang unod magahatag sa ila sing kaumpawan. (Roma 8:6) Ang iban nga tawo nagaabuso sa droga kag alkohol, nagatan-aw sing pornograpiya, nagapakigbahin sa makatalagam nga sports, ukon iban pa nga imoral nga paggawi sa tuyo nga makabatyag sing kakunyag. Si Satanas nagagamit sang “mga pahito” para patikuon ang pagtamod sang mga tawo sa kon ano ang makahatag sang matuod nga kaumpawan.—Efe. 6:11.

¹⁸ Huo, wala sing malain sa pagkaon, pag-inom, kag sa paglingawlingaw kon ginahimo ini sing nagakaigo. Apang, indi naton dapat pagtugutan nga sa sini na lang nga mga butang nasentro ang aton  kabuhi. Importante gid nga magpakita kita sing pagkabalanse kag pagpugong sa kaugalingon, ilabi na bangod nagakabuhi kita sa sining tion sang katapusan. Kon ubuson naton ang aton tion sa pagpaayaw sang aton kaugalingon, mahimo kita mangin “di-aktibo ukon di-mabungahon may kaangtanan sa sibu nga ihibalo tuhoy sa aton Ginuong Jesucristo.”—2 Ped. 1:8.

19, 20. Paano masapwan ang matuod nga kaumpawan?

¹⁹ Kon ang aton hunahuna nahisuno sa mga prinsipio ni Jehova, nahibaluan naton nga ang bisan ano nga kalipay nga ginatanyag sining kalibutan umalagi lamang. Ina nga butang nahibaluan gid ni Moises, kag nahibaluan man naton ini. (Heb. 11:25) Huo, nakahibalo kita nga ang matuod nga kaumpawan—ang tudok kag nagapadayon nga kalipay kag kaayawan—matigayon lamang paagi sa paghimo sang kabubut-on sang aton langitnon nga Amay.—Mat. 5:6.

²⁰ Kabay nga padayon kita nga makasapo sing kaumpawan sa espirituwal nga mga butang. Sa paghimo sini, ‘masikway naton ang pagkadidiosnon kag kalibutanon nga mga kailigbon samtang ginahulat naton ang makalilipay nga paglaum kag mahimayaon nga pagpadayag sang daku nga Dios kag sang aton Manluluwas nga si Cristo Jesus.’ (Tito 2:12, 13) Gani, dapat kita mangin determinado nga magpabilin sa idalom sang gota ni Jesus paagi sa pagpasakop sa iya awtoridad kag panuytoy. Sa amo, makasapo kita sing matuod nga kalipay kag kaumpawan!

[Nota]

Paano Mo Sabton?

• Paano makasapo sing kaumpawan ang katawhan ni Jehova karon?

• Paano ang aton ministeryo makahatag sing kaumpawan sa aton kag sa aton ginabantalaan?

• Paano mapat-od sang mga ulo sang pamilya nga mangin makapaumpaw ang ila Pangpamilya nga Pagsimba?

• Ano nga mga butang ang mahimo makapaluya sa aton sa espirituwal?

[Mga Pamangkot sa Pagtinuon]

[Mga Retrato sa pahina 26]

Paagi sa pagtakod sang gota ni Jesus makasapo kita sing matuod nga kaumpawan