Ginaagda ang Tanan!

GINAAGDA sa ano? Sa pagduaw sa sanga talatapan sang mga Saksi ni Jehova, nga masami ginatawag nga Bethel. May 118 ka sanga talatapan sa bug-os nga kalibutan. Ang mga nagaduaw diri masami nga nagapabutyag gid sang apresasyon sa ila nakita.

Sang nakita sang isa ka pamatan-on nga estudyante sa Biblia ang madamo nga manugpangabudlay nga malipayon nga nagaalagad kay Jehova sa sanga talatapan sa Mexico, namangkot sia: “Ano ang himuon ko para makaistar man ako kag makaobra diri?” Ginsilingan sia: “Kinahanglan nga magpabawtismo ka anay. Dayon, maayo kon magpayunir ka—isa ka bug-os tion nga manugbantala sang Ginharian.” Ginhimo ini sang pamatan-on, kag pagligad sang duha ka tuig gin-agda sia nga mag-alagad sa Bethel sa Mexico, diin nagaalagad na sia karon sing 20 ka tuig.

Ano ang Bethel?

Sa Hebreo nga lenguahe, ang “Bethel” nagakahulugan sing “Balay sang Dios.” (Gen. 28:19, footnote) Ang mga pasilidad sa nanuhaytuhay nga sanga talatapan amo ang ginagamit sa pag-imprinta kag pagpanagtag sang Biblia kag pasad sa Biblia nga mga literatura kag sa pag-aman sing espirituwal nga bulig sa kapin sa 100,000 ka kongregasyon sang mga Saksi ni Jehova sa bug-os nga kalibutan. Halos 20,000 ka manugpangabudlay—lalaki kag babayi nga naggikan sa nanuhaytuhay nga ginhalinan—ang masinakripisyuhon nga nagaalagad sing bug-os tion kay Jehova kag sa ila espirituwal nga mga kauturan. Ang pila sa ila malawig na nga tinuig nga nagaalagad kag ang iban mapagsik pa nga pamatan-on. Sa gab-i kag sa talipuspusan sang semana, ang mga katapo sang pamilya Bethel nagatambong sa mga miting sang malapit nga kongregasyon kag nagapakig-upod sa ila sa ministeryo. Ginagamit man nila ang iban nila nga tion sa pagtuon sa Biblia, pagliwaliwa, kag sa personal nga mga butang.

Ang mga katapo sang pamilya Bethel nagabaton sing gamay nga reimbursement kada bulan. Nagakaon sila sing manamit kag masustansia nga pagkaon kag nagapuyo sa matinlo kag komportable nga mga kuarto. Ang puluy-an Bethel wala gindesinyo nga daw kaangay sang malahalon nga mga hotel, kundi praktikal ini. Ang mga bisita wala lamang nagadayaw sa natatap sing maayo nga mga bilding kag mga palibot kag sa mahim-ong nga pagpanghikot sang organisasyon kundi sa espiritu man sang kaayo kag kooperasyon nga ginapakita sang mga nagaalagad sa Bethel. Bisan pa ang tanan masako sa pagpangabudlay sing lakas, nagapabilin sila nga mainabyanon. Sa Bethel, alalangay ang tanan kag wala sing bisan sin-o ang nagabatyag nga mas mataas  sia bangod sa iya asaynment. Ang tanan nga asaynment importante, pagpaninlo man ini, pagpanghardin, pagluto, ukon pagtrabaho sa imprintahan ukon opisina. Ang mga Bethelite, subong amo ang tawag sa nagaalagad sa Bethel, nagapanghikot sing nahiusa sa pagsakdag sa ministeryo sang mga Saksi ni Jehova.—Col. 3:23.

Kilalaha ang Pila ka Bethelite

Kilalahon naton sing maayo ang mga katapo sining internasyonal nga pamilya. Ano ang nagpahulag sa ila nga mag-alagad sa Bethel? Binagbinaga ang kahimtangan ni Mario. Sang nangin Saksi ni Jehova si Mario, may trabaho sia nga daku ang sueldo sa isa ka kilala nga Aleman nga kompanya sang salakyan kag may kahigayunan nga magmanggaranon. Wala madugay pagkatapos sang iya bawtismo, nagboluntaryo sia sing isa ka semana sa Bethel sa ila pungsod. Ginpatrabaho sia sa imprintahan. Nakita ni Mario ang daku nga kinatuhayan sang mga kaupod niya sa Bethel kag sa iya sekular nga trabaho. Bangod sini, nag-aplay sia sa bug-os tion nga pag-alagad sa Bethel. Bisan pa ang iya desisyon indi mahangpan sang iya mga paryente kag mga kaupod anay sa trabaho, si Mario malipayon karon nga nagaalagad sa Bethel sa Germany.

Madamo ang nagsulod sa Bethel nga wala sing mataas nga tinun-an ukon pinasahi nga kalantip. Amo sina si Abel, nga nagaalagad sa Bethel sa Mexico sa sulod na sang 15 ka tuig. “Madamo ako sing natun-an sa Bethel,” siling niya. “Diri ako nakatuon sa pagpadalagan sang hi-tech nga imprintahan. Nakahibalo ako nga daku ang kitaon ko kon magtrabaho ako sa gua, apang indi ko maagom ang mga butang nga ginaagom ko diri—isa ka malinong kag makaalayaw nga kabuhi nga wala sing kabalaka kag pagpaindis-indis subong sang nagakatabo sa madamo nga mga ulubrahan. Para sa akon, amo ini ang pinakamaayo nga edukasyon nga nabaton ko, ang edukasyon nga nakabulig sa akon nga mag-uswag sa espirituwal kag sa iban pa nga ihibalo. Ining espirituwal nga mga benepisyo indi ko matigayon bisan sa pinakamaayo nga mga unibersidad.”

Ang Pagbisita nga Makapalig-on

Ang pagbisita sa Bethel may maayo nga epekto sa aton espirituwalidad. Amo ini ang naeksperiensiahan ni Omar nga taga-Mexico. Gintudluan sia sang iya iloy sang mga kamatuoran sa  Biblia. Apang sang 17 anyos na si Omar, nag-untat sia sa pagtambong sa mga miting kag sa pagpakigbahin sa ministeryo. Sang ulihi nabuyo sia sa bisyo kag sa materyalistiko nga pagkabuhi. Apang sang nagtrabaho sia sa isa ka kompanya sang komunikasyon, isa si Omar sa ginpadala sa Bethel sa Mexico para magpasundayag kon paano gamiton ang pila sang ila produkto. Si Omar nagkomento: “Pagkatapos sang amon pasundayag, ginlibot kami sang amon host sa bug-os nga pasilidad. Ang akon nakita kag ang maayo nga pagtratar sa akon nagpahulag sa akon nga pamalandungan ang akon pagkabuhi, nga nahamulag kay Jehova. Nagsugod ako gilayon sa pagtambong liwat sa mga miting kag nagtuon sa Biblia. Pagligad sang anom ka bulan nga pagbisita ko sa Bethel, nabawtismuhan ako. Ginpasalamatan ko si Jehova sa pagpalig-on nga akon nabaton sa akon pagbisita sa Bethel.”

Si Masahiko nga taga-Japan, nagdaku man sa isa ka Saksi nga pamilya. Apang, nagsugod sia sa paghunahuna nga tuman ka estrikto ang pagkabuhi sang mga Cristiano. Nangin masako sia sa mga hilikuton sa eskwelahan kag nag-untat sa pagtambong sa mga miting kag sa pagpakigbahin sa pagbantala nga hilikuton. Naghinumdom si Masahiko: “Isa ka adlaw, ang amon pamilya kag pila ka Cristiano nga abyan nagplano nga mag-tour sa Bethel. Bangod sa pagpamilit sang akon pamilya, nag-upod ako. Sa akon pag-tour sa Bethel, nakabatyag ako sing pinasahi nga pagpalig-on. Ang kalipay nga akon naagom sa pagpakig-upod sa iban nga Cristiano sa sina nga paglakbay wala ko gid naeksperiensiahan sa akon indi Saksi nga mga abyan. Sugod sadto ginhandum ko nga magkabuhi subong Cristiano, kag nangabay ako sing pagtuon sa Biblia.” Si Masahiko nagaalagad na karon subong bug-os tion nga ministro sa ila kongregasyon.

Ang isa ka Saksi sa Pransia nagsaylo sa Moscow agod magtrabaho. Sang didto na sia, wala na sia nakapakig-angot sa katawhan ni Jehova kag nagluya sa espirituwal. Nakahimo sia sing sala kag nakapamana sang indi Saksi. Nian, ginduaw sia sang isa ka utod nga babayi gikan sa Pransia, kag naglakbay sila nga duha pakadto sa St. Petersburg, Rusya, agod magbisita sa puluy-an Bethel didto. Nagsulat sia: “Mainit kami nga gin-abiabi sa Bethel, kag natandog gid ako sa sini. Nabatyagan ko diri ang paghidait kag ang espiritu ni Jehova. Paano ko nahimo nga magpalayo sa organisasyon ni Jehova? Pagkatapos sang pagbisita ko sa Bethel, nangamuyo ako nga buligan ako ni Jehova kag makugi ko nga gintudluan ang akon mga kabataan parte sa Biblia.” Dugang pa sa espirituwal nga bulig nga mahimo nabaton sining maluya anay sa espirituwal nga utod, daku gid ang nabulig sa iya sang pagbisita niya sa Bethel kag pagkatapos sini nag-uswag sia.

Ano naman ang masiling sang mga nagduaw sa Bethel nga indi pa pamilyar sa mga Saksi ni Jehova? Sang 1988, si Alberto, nga isa ka pulitiko, nagduaw sa Bethel sa Brazil. Nagdayaw gid sia sa katinlo, kahim-ong, kag ilabi na sa hayag nga pagpanghikot sang Bethel. Antes sang iya pag-tour sa Bethel, ginduaw ni Alberto ang iya bayaw nga pari sa seminaryo. Nakita ni Alberto ang daku gid nga kinatuhayan. “Ang tanan nga hilikuton sa seminaryo ginahimo sang sekreto,” siling ni Alberto. Wala madugay pagkatapos sini, nagbaton sia sing pagtuon sa Biblia, ginbiyaan ang pulitika, kag nagaalagad na karon subong gulang sang kongregasyon.

Tilawi nga Magbisita sa Bethel!

Madamo ang naghimo sing daku nga mga sakripisyo agod makabisita sa sanga talatapan sa ila pungsod. Halimbawa, sa Brazil, si Pablo kag si Eugenia nagsupot sa sulod sang apat ka tuig agod makalakbay sing duha ka adlaw sakay sa bus sing 3,000-kilometros para magbisita sa Bethel sa ila pungsod. Nagsiling sila: “Takus gid ini sang tanan namon nga panikasog. Labi nga nagsangkad ang amon pagtamod sa organisasyon ni Jehova. Kon ginapaathag namon ang hilikuton sa Bethel sa amon mga ginatun-an sa Biblia, kon kaisa nagapamangkot sila, ‘Nakakadto na kamo didto?’ Karon makasiling na kami sing huo.”

May yara man bala sanga talatapan kag puluy-an Bethel sa inyo pungsod? Ginaagda namon kamo nga duawon ang mga pasilidad sini. Pat-od gid nga makabaton kamo sing mainit nga pag-abiabi kag daku nga espirituwal nga benepisyo sa pagbisita sa Bethel.

[Retrato sa pahina 18]

Si Mario

[Retrato sa pahina 18]

Si Abel

[Retrato sa pahina 18]

Germany

[Retrato sa pahina 18]

Japan

[Retrato sa pahina 18]

Brazil