Ang Cristianong Paghiusa Nagahimaya sa Dios

‘Tinguhai gid nga tipigan ang pag-isa sa espiritu.’—EFE. 4:3.

1. Paano ang mga Cristiano sa Efeso sang unang siglo naghimaya sa Dios?

ANG paghiusa sang Cristianong kongregasyon sa dumaan nga Efeso naghimaya sa matuod nga Dios nga si Jehova. Sa sinang mahamungayaon nga lugar sang negosyo, maathag nga ang pila ka kauturan mga manggaranon nga may mga ulipon samtang ang iban naman mga ulipon kag mga imol. (Efe. 6:5, 9) Ang pila sa ila mga Judiyo nga nakatuon sang kamatuoran sa sulod sang tatlo ka bulan nga pagpanudlo ni apostol Pablo sa ila sinagoga. Ang iban naman nagasimba anay kay Artemis kag nagahimo sing madyik. (Binu. 19:8, 19, 26) Maathag nga ang matuod nga Cristianismo naghiusa sa mga tawo nga may nanuhaytuhay nga ginhalinan. Nahibaluan ni Pablo nga ang paghiusa sang kongregasyon nagahimaya kay Jehova. Ang apostol nagsulat: “Ang himaya mangin sa iya paagi sa kongregasyon.”—Efe. 3:21.

2. Ngaa nabutang sa katalagman ang paghiusa sang mga Cristiano sa Efeso?

² Apang ang paghiusa sang kongregasyon sa Efeso nabutang sa katalagman. Nagpaandam si Pablo sa mga gulang: “Gikan sa inyo mismo may mga tawo nga magalutaw kag magahambal sang tiko nga mga butang agod ipahilayo ang mga disipulo kag pasundon sa ila.” (Binu. 20:30) Luwas sa sini, ang pila ka kauturan may espiritu gihapon sang pagbinahinbahin, nga suno sa paandam ni Pablo ‘nagapanghikot sa mga anak sang pagkadimatinumanon.’—Efe. 2:2; 4:22.

 Ang Sulat nga Nagapadaku sang Paghiusa

3, 4. Paano ginpadaku sang sulat ni Pablo sa mga taga-Efeso ang paghiusa?

³ Nahibaluan ni Pablo nga agod mahuptan sang mga Cristiano ang paghiusa, dapat panikasugan gid sang kada isa nga sakdagon ini. Gin-inspirar si Pablo sa pagsulat sa mga taga-Efeso tuhoy sa importansia sang paghiusa. Halimbawa, nagsiling sia nga katuyuan sang Dios nga “tipunon liwat ang tanan nga butang kay Cristo.” (Efe. 1:10) Ginpaanggid man niya ang hinaplas nga mga Cristiano sa nanuhaytuhay nga bato sa isa ka tinukod. “Ang bug-os nga tinukod, nga nahiusa sa iya kag nagaangtanay sing nahisanto ang tanan nga bahin sini, nagadaku nga mangin isa ka balaan nga templo para kay Jehova.” (Efe. 2:20, 21) Ginpadaku man ni Pablo ang paghiusa sang Judiyo kag Gentil nga mga Cristiano kag ginpahanumdom sa ila nga isa lang ang ila ginhalinan. Ginpatuhuyan niya si Jehova subong “Amay, nga sa iya utang sang tagsa ka pamilya sa langit kag sa duta ang ngalan sini.”—Efe. 3:5, 6, 14, 15.

⁴ Sa kapitulo 4 sang Efeso, makita naton kon ngaa ang paghiusa nagakinahanglan sing panikasog, kon paano kita ginabuligan ni Jehova nga mahiusa, kag kon ano nga mga kinaiya ang makabulig sa aton nga mahuptan ang paghiusa. Ngaa indi mo pagbasahon ang bug-os nga kapitulo agod labi ka nga makabenepisyo sa pagtinuon?

Kon Ngaa Kinahanglan ang Hanuot nga Panikasog sa Paghiusa

5. Ngaa nahiusa sa pag-alagad ang mga anghel, apang ngaa mas mabudlay para sa aton nga mahuptan ang paghiusa?

⁵ Ginpalig-on ni Pablo ang iya mga kauturan sa Efeso nga ‘tinguhaan gid nga tipigan ang pag-isa sa espiritu.’ (Efe. 4:3) Para mahangpan mo kon ngaa kinahanglan ang panikasog sa sini nga bahin, binagbinaga ang kahimtangan sang mga anghel sang Dios. Ang tanan nga tinuga sa duta magkatuhay, gani makatarunganon lamang nga maghinakop kita nga ang kada isa sa minilyon ka anghel pinasahi. (Dan. 7:10) Apang, nahiusa sila sa pag-alagad kay Jehova bangod sila tanan nagapamati sa iya kag nagatuman sang iya kabubut-on. (Basaha ang Salmo 103:20, 21.) Ang matutom nga mga anghel may nanuhaytuhay nga kinaiya kaangay naton. Apang may nanuhaytuhay man kita nga kaluyahon amo nga mas mabudlay para sa aton nga mahuptan ang paghiusa.

6. Ano nga mga kinaiya ang makabulig sa aton nga mahuptan ang paghiusa bisan pa may nanuhaytuhay kita nga kaluyahon?

⁶ Bangod di-himpit, mas mabudlay para sa mga tawo nga maghiusa. Halimbawa, kamusta kon mag-updanay sa pag-alagad kay Jehova ang isa ka utod nga malulo apang pirme lang leyt kag ang isa ka utod nga temprano nagaabot pero madali maakig? Mahimo nga ang makita sang kada isa amo lang ang kakulangan sang iya utod, kag indi niya matalupangdan nga sia mismo may kakulangan man. Paano sila makaalagad nga may paghiusa? Talupangda kon paano makabulig sa ila ang mga kinaiya nga ginsambit ni Pablo.  Nian, pamalandungi kon paano naton mapasanyog ang paghiusa paagi sa pagpalambo sini nga mga kinaiya. Si Pablo nagsulat: “Nagahingyo [ako] sa inyo nga maglakat sing takus . . . nga may bug-os nga pagpaubos sang hunahuna kag kalulo, nga may pagkamapinasensiahon, nga nagabatas sa isa kag isa sa gugma, nga nagatinguha gid nga tipigan ang pag-isa sa espiritu sa nagapahiusa nga higot sang paghidait.”—Efe. 4:1-3.

7. Ngaa importante nga manghikot kita sing nahiusa upod sa iban pa nga di-himpit nga Cristiano?

⁷ Importante gid nga tinguhaan naton nga mag-alagad sa Dios sing nahiusa upod sa aton di-himpit nga mga utod bangod bahin kita sang isa lamang ka lawas. “May isa ka lawas, kag isa ka espiritu, subong nga gintawag kamo sa isa ka paglaum nga sa sini gintawag kamo; isa ka Ginuo, isa ka pagtuo, isa ka bawtismo; isa ka Dios kag Amay sang tanan nga tawo.” (Efe. 4:4-6) Isa lamang ka grupo ang ginagamit ni Jehova, kag amo ini ang iya ginagiyahan kag ginapakamaayo. Kon may nasungguran kita nga utod sa kongregasyon, may iban pa bala kita nga makadtuan? Diri lang naton mabatian ang mga pinamulong sang kabuhi nga walay katapusan.—Juan 6:68.

“Mga Dulot nga mga Lalaki” nga Nagapasanyog sang Paghiusa

8. Ano ang ginagamit ni Cristo para mahiusa kita?

⁸ Gingamit ni Pablo ang pamilyar nga ginahimo sang mga soldado sadto agod ilaragway ang aman ni Jesus nga “mga dulot nga mga lalaki” para mahiusa ang kongregasyon. Kon magdaug ang isa ka soldado sa inaway, nagadala sia sing bihag agod mangin kabulig sang iya asawa sa mga ulubrahon sa balay. (Sal. 68:1, 12, 18) Sing kaanggid, sang nadaug ni Jesus ang kalibutan, nagdala sia sang madamo nga matinumanon nga ulipon. (Basaha ang Efeso 4:7, 8.) Paano niya ginagamit ining malaragwayon nga mga bihag? “Ginhatag niya ang iban subong mga apostoles, ang iban subong mga manalagna, ang iban subong mga ebanghelisador, ang iban subong mga manugbantay kag mga manunudlo, agod pasibuon ang mga balaan, para sa hilikuton sa pag-alagad, sa pagpabakod sa lawas ni Cristo, tubtob makadangat kita tanan sa pag-isa sa pagtuo.”—Efe. 4:11-13.

9. (a) Paano nagabulig ang “mga dulot nga mga lalaki” para mahuptan naton ang paghiusa? (b) Ngaa dapat magbuligay ang kada katapo sang kongregasyon sa pagsakdag sa paghiusa?

⁹ Subong mahigugmaon nga mga manugbantay, ining “mga dulot nga mga lalaki” nagabulig para mahuptan naton ang paghiusa. Halimbawa, kon matalupangdan sang isa ka gulang sa kongregasyon nga ang duha ka utod “nagasugyot sang paindisanay sa isa kag isa,” daku gid ang iya mabulig sa paghiusa sang kongregasyon kon hatagan niya sila sing pribado nga laygay agod “pasibuon sa espiritu sang kalulo.” (Gal. 5:26–6:1) Subong mga manunudlo, ginapalig-on sining  “mga dulot nga mga lalaki” ang aton pagtuo paagi sa mga panudlo sang Biblia. Sa amo, ginapasanyog nila ang paghiusa kag ginabuligan kita nga mag-uswag sa espirituwal. Si Pablo nagsulat nga kinahanglan ini “agod indi na kita mangin mga bata, nga subong ginaanod-anod sang mga balod kag ginapalidpalid sang tagsa ka hangin sang panudlo paagi sa pagkatuso sang mga tawo, paagi sa malimbungon nga pagpadihot sing kabutigan.” (Efe. 4:13, 14) Dapat magbuligay ang kada Cristiano sa pagsakdag sang paghiusa, kaangay sang pagbuligay nga ginahimo sang kada bahin sang aton lawas.—Basaha ang Efeso 4:15, 16.

Palambua ang Maayo nga mga Kinaiya

10. Paano maguba sang imoral nga paggawi ang aton paghiusa?

¹⁰ Ginapakita sang ikap-at nga kapitulo sang sulat ni Pablo sa mga taga-Efeso nga ang yabi sa paghiusa amo ang gugma. Dayon, ginpakita sini kon ano ang nadalahig sa gugma. Halimbawa, ang isa ka mahigugmaon nga tawo indi gid maghimo sing pagpakighilawas ukon lugak nga paggawi. Ginpalig-on ni Pablo ang iya mga kauturan nga indi na “magpadayon sa paglakat subong sang paglakat man sang mga pungsod.” Ina nga mga tawo “wala na sang tanan nga igbalatyag sa maayo kag malain,” kag “nagpatuyang sila sa lugak nga paggawi.” (Efe. 4:17-19) Mahimo gub-on sining imoral nga kalibutan ang aton paghiusa. Ang mga tawo nagalahog tuhoy sa pagpakighilawas, nagakanta tuhoy sini, nagatan-aw sing mga pelikula tuhoy sini kag nagahimo sini sa tago ukon sa dayag. Bisan ang pagpakiat, nga amo ang pagpakita nga may gusto ka sa isa pero wala ka sing tuyo nga pakaslan sia, mahimo makapahilayo sa imo kay Jehova kag sa kongregasyon. Ngaa? Bangod mahapos lang ini magdul-ong sa pagpakighilawas. Wala labot sini, kon ang pagpakiat sang isa ka minyo magdul-ong sa pagpanghilahi, mahimo ini magseparar sang kabataan sa ginikanan kag sang mga mag-asawa. Makaguba gid ini sa paghiusa! Indi katingalahan nga si Pablo nagsulat: “Wala ninyo matun-an nga subong sini si Cristo”!—Efe. 4:20, 21.

11. Ano nga pagbag-o ang ginapalig-on sang Biblia nga dapat himuon sang mga Cristiano?

¹¹ Ginpadaku ni Pablo nga dapat naton isikway ang negatibo nga panghunahuna kag sa baylo palambuon ang mga panimuot nga makabulig sa aton nga mahiusa. Nagsiling sia: “Ubahon ninyo ang daan nga personalidad nga nahisuno sa inyo paggawi anay kag ginapalain suno sa iya madaya nga mga kailigbon; apang magbag-o kamo sa puersa nga nagapahikot sa inyo hunahuna, kag magsuklob sang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efe. 4:22-24) Paano kita ‘magbag-o sa puersa nga nagapahikot sa aton hunahuna’? Kon ginapamalandungan naton ang aton natun-an sa Pulong sang Dios kag ang maayong halimbawa sang hamtong nga mga Cristiano, upod ang aton panikasog, sarang naton mabag-o ang aton personalidad “nga gintuga suno sa kabubut-on sang Dios.”

Mangin Mahinalungon sa Imo mga Ginahambal

12. Paano ang paghambal sing kamatuoran nagapasanyog sang paghiusa, kag ngaa nabudlayan ang pila sa paghambal sing matuod?

¹² Importante gid nga maghambal kita sing matuod sa mga katapo sang aton pamilya ukon sang kongregasyon. Ang prangka, tampad kag mainayuhon nga hambal makapasuod sa mga tawo. (Juan 15:15) Apang, kamusta kon ang isa magbutig sa iya utod? Kon mahibaluan ini sang iya utod, madula ang pagsalig sini sa iya. Amo kon ngaa nagsulat si Pablo: “Maghambal sang kamatuoran ang kada isa sa inyo sa iya isigkatawo, bangod mga bahin kita nga natungod sa isa kag  isa.” (Efe. 4:25) Kon ang isa ka tawo naanad na sa pagbinutig, ayhan sugod pa sang bata sia, mahimo nga mabudlayan sia magsugid sing matuod. Apang ginaapresyar gid ni Jehova ang iya panikasog nga magbag-o kag buligan niya sia.

13. Ano ang nadalahig sa pagsikway sang makapasakit nga hambal?

¹³ Ginatudluan kita ni Jehova nga ipakita ang pagtahod kag paghiusa sa sulod sang kongregasyon kag sa pamilya paagi sa pagkontrol sang aton ginahambal. “Indi maggua ang dunot nga pinamulong gikan sa inyo baba . . . Ang tanan nga madinumtanon nga paghinakit kag kaakig kag kasingkal kag sininggitanay kag nagapakalain nga hambal kuhaon gikan sa inyo upod ang tanan nga kalainan.” (Efe. 4:29, 31) Malikawan naton ang makapasakit nga hambal kon daku ang aton pagtahod sa iban. Halimbawa, dapat bag-uhon sang bana nga pirme nagapangakig sa iya asawa ang iya pagtratar sa sini, ilabi na bangod natun-an niya nga ginapadunggan ni Jehova ang mga babayi. Ginhaplasan pa gani sang balaan nga espiritu sang Dios ang pila ka babayi kag may paglaum nga maggahom kaupod ni Cristo. (Gal. 3:28; 1 Ped. 3:7) Sing kaanggid, ang asawa naman nga pirme nagasing-al sa iya bana dapat man magbag-o bangod natun-an niya nga ginpunggan ni Jesus ang iya kaugalingon sang gintamay sia.—1 Ped. 2:21-23.

14. Ngaa makatalagam kon indi naton pagpunggan ang aton kaakig?

¹⁴ Sa masami, ang makapasakit nga hambal resulta sang indi makontrol nga kaakig. Mahimo man ini tunaan sang pagbinahinbahin. Ang kaakig ginpaanggid sa kalayo nga kon indi mapunggan makatuga sing halit. (Hulu. 29:22) Bisan pa ang isa may rason nga maakig, dapat niya ini kontrolon agod indi maguba ang maayo niya nga kaangtanan sa iban. Dapat tinguhaan sang mga Cristiano nga mangin mapinatawaron kag indi magdumot kag indi na pag-ungkaton ang nagligad. (Sal. 37:8; 103:8, 9; Hulu. 17:9) Ginlaygayan ni Pablo ang mga taga-Efeso: “Kon mangakig kamo, indi kamo magpakasala; indi pagpatunuri sang adlaw nga akig kamo, kag indi paghatagi sing duog ang Yawa.” (Efe. 4:26, 27) Kon indi naton pagpunggan ang aton kaakig, mahimo ini maghatag sing kahigayunan sa Yawa nga mapasanyog ang di-paghangpanay kag ang sinuay sa sulod sang kongregasyon.

15. Ano ang epekto kon kuhaon naton ang pagkabutang sang iban?

¹⁵ Ang pagtahod sa pagkabutang sang iban nagahupot man sang paghiusa sang kongregasyon. Ang Biblia nagasiling: “Ang kawatan indi na magpangawat.” (Efe. 4:28) Ang katawhan ni Jehova may yara pagsalig sa isa kag isa. Gani kon abusuhan sang isa ka Cristiano ina nga pagsalig paagi sa pagkuha sang pagkabutang sang iban, mahimo niya maguba ang paghiusa.

Ang Gugma sa Dios Nagapahiusa sa Aton

16. Paano ang makapabakod nga mga pinamulong nagasakdag sang aton paghiusa?

¹⁶ Ang paghiusa sa sulod sang Cristianong kongregasyon resulta sang gugma sa Dios nga amo ang nagapahulag sa ila tanan nga maghigugmaanay. Ang pagpasalamat sa kaayo ni Jehova nagapahulag sa aton nga panikasugan nga iaplikar ini nga laygay: “[Maghambal sang] bisan anong pinamulong nga maayo para sa pagpabakod suno sa kinahanglanon, agod mahatag sini ang maayo sa mga nagapamati. . . . Mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa subong nga ang Dios nagpatawad man sing kinabubut-on sa inyo paagi kay Cristo.” (Efe. 4:29, 32) Kon si Jehova mainayuhon nga nagapatawad sa di-himpit nga mga tawo kaangay naton, indi bala nga dapat man naton patawaron ang di-kahimpitan sang iban?

17. Ngaa dapat naton panikasugan nga mapasanyog ang paghiusa?

¹⁷ Ang paghiusa sang katawhan ni Jehova nagahimaya sa iya. Ang iya espiritu nagapahulag sa aton nga mapasanyog ang paghiusa sa nanuhaytuhay nga paagi. Pat-od gid nga indi naton luyag nga pamatukan ang panuytoy sang espiritu. Si Pablo nagsulat: “Indi pagpasubua ang balaan nga espiritu sang Dios.” (Efe. 4:30) Ang paghiusa isa ka bahandi nga takus gid amligan. Nagahimaya ini kay Jehova kag nagahatag sing kalipay sa iya katawhan. “Busa, mangin manug-ilog kamo sa Dios, subong mga anak nga hinigugma, kag padayon kamo nga maglakat sa gugma.”—Efe. 5:1, 2.

Ano ang Imo Sabat?

• Ano nga mga kinaiya ang nagapasanyog sang paghiusa sa tunga sang mga Cristiano?

• Paano ang aton paggawi nagapasanyog sang paghiusa sa kongregasyon?

• Paano ang aton mga ginahambal makabulig sa aton nga mahiusa?

[Mga Pamangkot sa Pagtinuon]

[Retrato sa pahina 17]

Nahiusa ang nanuhaytuhay nga sahi sang tawo

[Retrato sa pahina 18]

Nahibaluan mo bala kon ngaa makatalagam ang pagpakiat?