Paghiusa—Isa ka Tanda sang Matuod nga Pagsimba

“Ipahamtang ko sila sa paghiusa, kaangay sang mga karnero sa bulukutan.” —MIQ. 2:12, NW.

1. Paano ang pagpanuga nagapamatuod sa kaalam sang Dios?

ANG salmista nagtuaw: “O GINOO, daw ano kadamu sang imo mga binuhatan! Sa kaalam ginhimo mo sila tanan; ang duta puno sang imo mga manggad.” (Sal. 104:24) Ang kaalam sang Dios makita sa dalayawon kag masibod nga pagbinuligay sang minilyon ka nanuhaytuhay nga tanom, insekto, sapat, kag bakterya. Subong man, sa aton lawas, may linibo ka nanuhaytuhay nga mekanismo, halin sa dalagku nga organo tubtob sa magagmay nga mga selula nga nagabinuligay agod mangin mapagros ang aton lawas.

2. Subong sang makita sa pahina 13, ngaa masiling naton nga makatilingala gid ang paghiusa sang mga Cristiano?

² Gintuga ni Jehova ang mga tawo para magbinuligay. Ang mga tawo may nanuhaytuhay nga hitsura, personalidad, kag ikasarang. Isa pa, gintuga sang Dios ang una nga mag-asawa nga may diosnon nga mga kinaiya nga magapahulag sa ila nga magbuligay. (Gen. 1:27; 2:18) Apang, ang kalabanan nga tawo sa karon nahamulag sa Dios kag wala sing paghiusa. (1 Juan 5:19) Gani, makatilingala gid ang paghiusa sang unang siglo nga Cristianong kongregasyon bangod ginahuman ini sang mga tawo nga may nanuhaytuhay nga ginhalinan, subong sang mga ulipon nga taga-Efeso, prominente nga mga Griegong babayi, edukado nga mga Judiyong lalaki, kag mga sumilimba anay sang idolo.—Binu. 13:1; 17:4; 1 Tes. 1:9; 1 Tim. 6:1.

3. Paano ginalaragway sang Biblia ang paghiusa sang mga Cristiano, kag ano ang aton binagbinagon sa sini nga pagtinuon?

³ Ang matuod nga pagsimba, nagabulig sa mga tawo nga mahiusa kaangay sang mga bahin sang aton lawas. (Basaha ang 1 Corinto 12:12, 13.) Ang pila ka aspekto nga binagbinagon naton sa sini nga artikulo amo: Paano ang matuod nga pagsimba nagapahiusa sa mga tawo? Ngaa si Jehova lamang ang makapahiusa sa minilyon ka tawo gikan sa tanan nga pungsod? Ano nga mga balagbag sa paghiusa ang sarang naton malandas sa bulig ni Jehova? Kon tuhoy sa paghiusa, paano nangin tuhay ang matuod nga Cristianismo sa Cristiandad?

Paano ang Matuod nga Pagsimba Nagapahiusa sa mga Tawo?

4. Paano ang matuod nga pagsimba nagapahiusa sa mga tawo?

⁴ Ang matuod nga mga sumilimba nagakilala kag nagabaton nga bangod si Jehova amo ang nagtuga sang tanan nga butang, sia ang may kinamatarong subong Soberano sa bug-os nga uniberso. (Bug. 4:11) Gani, bisan ang matuod nga mga Cristiano nagapuyo sa lainlain nga lugar kag may nanuhaytuhay nga kahimtangan, pareho nga mga kasuguan sang Dios kag mga prinsipio sa Biblia ang ila ginatuman. Nagakaigo lamang nga ang tanan nga matuod nga sumilimba nagatawag kay Jehova subong “Amay.” (Isa. 64:8; Mat. 6:9) Gani sila tanan mag-ulutod sa espirituwal kag nagaagom sang malipayon nga paghiusa nga ginlaragway sang salmista: “Yari karon, daw ano kaayo kag daw ano katahum sang mag-ulutud nga magpuyo sing tingub sa paghiliusa!”—Sal. 133:1.

5. Ano nga kinaiya ang nagasakdag sa paghiusa sang matuod nga mga sumilimba?

⁵ Bisan pa indi himpit ang matuod nga mga Cristiano, nahiusa sila sa pagsimba bangod natun-an nila nga higugmaon ang isa kag isa. Si Jehova lamang ang makatudlo sa ila sa paghimo sini. (Basaha ang 1 Juan 4:7, 8.) Ang iya Pulong nagasiling: “Panapti ang inyo kaugalingon sang  mapinalanggaon nga balatyagon nga may kaawa, kaayo, pagpaubos sang hunahuna, kalulo, kag pagkamapinasensiahon. Padayon nga batasa ninyo ang isa kag isa kag patawaron sing kinabubut-on ang isa kag isa kon may reklamo ang isa batok sa isa. Subong nga si Jehova nagpatawad sing kinabubut-on sa inyo, amo man ang himuon ninyo. Apang, dugang pa sa sining tanan nga butang, panapti ninyo ang inyo kaugalingon sang gugma, kay amo ini ang himpit nga higot sang paghiusa.” (Col. 3:12-14) Ang himpit nga higot sang paghiusa—ang gugma—amo ang panguna nga tanda sang matuod nga mga Cristiano. Sa imo bahin, napamatud-an mo man bala nga ini nga paghiusa isa ka tanda sang matuod nga pagsimba?—Juan 13:35.

6. Paano ang paglaum sa Ginharian nagabulig sa aton nga mahuptan ang paghiusa?

⁶ Ang matuod nga mga sumilimba nahiusa man bangod nagasalig sila nga ang Ginharian sang Dios amo lamang ang paglaum sang katawhan. Nahibaluan nila nga amo ini ang magabulos sa gobierno sang tawo kag magadala ini sing matuod kag dayon nga paghidait sa matinumanon nga katawhan. (Isa. 11:4-9; Dan. 2:44) Gani ginasunod sang mga Cristiano ang ginsiling ni Jesus tuhoy sa iya mga sumulunod: “Indi sila bahin sang kalibutan, subong nga ako indi bahin sang kalibutan.” (Juan 17:16) Ang matuod nga mga Cristiano nagapabilin nga neutral sa kinagamo sang kalibutan, amo nga nahuptan nila ang paghiusa bisan pa nagailinaway ang mga tawo sa ila palibot.

Isa Lang ang Ginahalinan sang Instruksion

7, 8. Sa ano nga paagi nagapabakod sa aton paghiusa ang mga panudlo sang Biblia?

⁷ Ang mga Cristiano sang unang siglo nahiusa bangod isa lang ang ginhalinan sang pagpalig-on nga ila nabaton. Ginakilala nila nga si Jesus amo ang nagatudlo kag nagatuytoy sa kongregasyon paagi sa isa ka nagadumala nga hubon, nga ginahuman sang mga apostoles kag mga gulang nga lalaki sa Jerusalem. Ining matutom nga mga lalaki nagadesisyon pasad sa Pulong sang Dios, kag ginapaalinton nila ang mga instruksion sa mga kongregasyon sa madamo nga kadutaan paagi sa mga nagalakbay nga manugtatap. Tuhoy sa pila sining mga manugtatap, ang Biblia nagasiling: “Samtang nagalakbay sila sa mga siudad ginapaalinton nila sa mga kauturan didto ang mga mando nga ginpamat-uran sang mga apostoles kag sang mga gulang nga lalaki sa Jerusalem nga tumanon.”—Binu. 15:6, 19-22; 16:4.

⁸ Sa karon, bangod ang Nagadumala nga Hubon ginahuman man sang hinaplas nga mga Cristiano, ang mga kongregasyon sa bug-os nga kalibutan may yara paghiusa. Nagabalhag sila sang makapalig-on sa pagtuo nga mga literatura sa madamo nga lenguahe. Ining espirituwal nga pagkaon napasad sa Pulong sang Dios. Gani, ang ila ginatudlo wala naghalin sa mga tawo kundi naghalin kay Jehova.—Isa. 54:13.

9. Paano ang hilikuton nga ginhatag sang Dios sa aton nagabulig sa aton nga mahiusa?

⁹ Ang Cristianong mga manugtatap nagapasanyog man sang paghiusa paagi sa ila pagpanguna sa pagbantala. Ang suod nga kaangtanan sang mga nagaalagad sa Dios mas mabakod sangsa  bisan ano nga mga asosasyon sang mga tawo sa kalibutan. Ang Cristianong kongregasyon wala gintukod para lang sa asosasyon, kundi para sa pagpadungog kay Jehova kag agod matuman ang hilikuton nga pagbantala sang maayong balita, paghimo sing disipulo, kag pagpalig-on sa kongregasyon. (Roma 1:11, 12; 1 Tes. 5:11; Heb. 10:24, 25) Gani, si apostol Pablo nagapaabot nga ang mga tawo makasiling tuhoy sa mga Cristiano: “Nagatindog kamo nga malig-on sa isa ka espiritu, nga may isa ka kalag nga nagapanikasog sing tingob tungod sa pagtuo sa maayong balita.”—Fil. 1:27.

10. Ano ang pila ka paagi nga nahiusa kita subong katawhan sang Dios?

¹⁰ Subong katawhan ni Jehova, nahiusa kita bangod ginabaton naton ang pagkasoberano ni Jehova, ginahigugma naton ang aton mga kauturan, nagalaum kita sa Ginharian sang Dios, kag ginatahod naton ang mga gintangdo sang Dios nga manguna sa aton. Ginabuligan kita ni Jehova nga malandas ang mga panimuot nga makaupang sa aton paghiusa.—Roma 12:2.

Paglandas sa Bugal kag Kahisa

11. Ngaa ang bugal nagapabahinbahin, kag paano kita ginabuligan ni Jehova nga malandas ini?

¹¹ Ang bugal nagapabahinbahin sa mga tawo. Ang bugalon nga tawo nagakabig sang iya kaugalingon nga mas mataas sangsa iban kag nanamian sia nga magpabugal. Pero sa masami, nagaupang ini sa paghiusa kay ang makabati sa pagpabugal mahimo magbatyag sing kahisa. Si disipulo Santiago prangka nga nagsiling: “Ina tanan nga pagpabugal malaut.” (Sant. 4:16) Indi mahigugmaon nga kabigon mo ang iban nga mas kubos sangsa imo. Nagpakita si Jehova sang talalupangdon nga halimbawa sang pagkamapainubuson sa iya pagpakig-angot sa aton nga mga di-himpit nga tawo. Si David nagsulat tuhoy sa Dios: “Ang imo pagpaubus nagpakadaku sa akon.” (2 Sam. 22:36) Ang Pulong sang Dios nagatudlo sa aton kon paano malandas ang bugal. Si Pablo gin-inspirar nga mamangkot: “Sin-o ang nagahimo sa imo nga tuhay sa iban? Sa pagkamatuod, ano ang yara sa imo nga wala mo mabaton? Karon, kon matuod nga nabaton mo ini, ngaa nagapabugal ka nga subong bala wala mo ini mabaton?”—1 Cor. 4:7.

12, 13. (a) Ngaa madali lang kita mahisa? (b) Ano ang mga resulta kon ilugon naton ang pagtamod ni Jehova sa iban?

¹² Ang kahisa nagaupang man sa paghiusa. Bangod sang aton napanubli nga pagkadihimpit, kita tanan may “huyog nga mahisa.” Bisan gani ang madugay na nga mga Cristiano nagabatyag man sing kahisa kon kaisa sa mga kahimtangan, pagkabutang, pribilehiyo, ukon mga ikasarang sang iban. (Sant. 4:5) Halimbawa, ang isa ka utod nga may pamilya mahimo mahisa sa mga pribilehiyo sang isa ka utod nga nagaalagad sing bug-os tion, pero wala sia makahibalo nga ina nga utod mahimo nga nahisa man sa iya bangod may kabataan sia. Ano ang aton himuon para indi maupangan sang kahisa ang aton paghiusa?

¹³ Para mabuligan kita nga malikawan ang kahisa, dumduma nga ginapaanggid sang Biblia ang hinaplas nga mga katapo sang Cristianong kongregasyon sa mga bahin sang lawas. (Basaha ang 1 Corinto 12:14-18.) Halimbawa, bisan ang imo mata mas madali matalupangdan sangsa imo tagipusuon, pero indi bala nga pareho sila nga importante sa imo? Sing kaanggid, ginapabaloran ni Jehova ang tanan nga katapo sang kongregasyon bisan pa may pila nga mas prominente sangsa iban. Gani, kabay nga ilugon naton ang pagtamod ni Jehova sa aton mga kauturan. Imbes nga mahisa sa iban, ipakita naton ang kabalaka kag personal nga interes sa ila. Sa paghimo sini, mapakita naton nga tuhay gid ang matuod nga mga Cristiano sa mga katapo sang Cristiandad.

 Ang Cristiandad—Nabahinbahin

14, 15. Paano nabahinbahin ang apostata nga Cristianismo?

¹⁴ Tuhay gid ang paghiusa sang matuod nga mga Cristiano sangsa mga katapo sang Cristiandad. Sang ikap-at nga siglo, nangin lapnag ang apostata nga Cristianismo amo nga pati ang emperador sang Roma naganyat sa sini. Subong resulta, labi nga naglapnag ang Cristiandad. Pagkatapos sini, madamo nga pungsod ang nagbulag sa Roma kag nagporma sang ila kaugalingon nga relihion.

¹⁵ Madamo sa ila ang nag-ilinaway sing siniglo. Sang ika-17 kag ika-18 nga siglo, ginpasanyog sang Britanya, Pransia, kag Estados Unidos ang katutom sa ila Estado, amo nga ang nasyonalismo nangin kaangay na sang relihion. Sang ika-19 kag ika-20 nga siglo, naglapnag ang nasyonalismo sa kalabanan nga pungsod sa kalibutan. Sang ulihi, ang relihion sang Cristiandad nabahinbahin sa madamo nga sekta, nga ang kalabanan sini nagasakdag sa nasyonalismo. Ang ila mga sumilimba nagapakig-away pa gani sa ila mga masigkatumuluo sa iban nga pungsod. Gani, nabahinbahin gihapon karon ang Cristiandad bangod sa nasyonalismo kag sa nanuhaytuhay nga pagpati.

16. Ano ang kabangdanan sang pagbinahinbahin sang mga miembro sang Cristiandad?

¹⁶ Sang ika-20 nga siglo, ginsugdan sang ginatos ka sekta sang Cristiandad ang isa ka hublag sa tuyo nga maghiusa sila. Pero sa sulod sang dinekada nila nga pagpanikasog, pila lamang sa ila ang nahiusa, kag nabahinbahin gihapon sila sa mga pamangkot subong sang: Ang tanan bala nga butang nagluntad paagi sa ebolusyon? Nagakaigo bala ang aborsion? Dapat bala pahanugutan ang homoseksuwalidad? Kag nagakaigo bala nga ordenahan ang mga babayi? Sa pila ka relihion sang Cristiandad, gintinguhaan sang ila mga lider nga mahiusa ang mga tawo nga naghalin sa nanuhaytuhay nga sekta paagi sa paglikaw nga istoryahan ang kinatuhayan sang ila mga doktrina. Apang bangod sini, nangin hapaw ang pagtuo sang ila mga katapo kag wala ini nagpahiusa sa nabahinbahin nga Cristiandad.

Ang Matuod nga Pagsimba Mas Labaw Sangsa Nasyonalismo

17. Paano gintagna nga ang matuod nga pagsimba magapahiusa sa mga tawo “sa olihi nga mga adlaw”?

¹⁷ Bisan pa mas malala ang pagbinahinbahin sang katawhan sa karon, ang matuod nga mga sumilimba padayon nga nahiusa. Ang manalagna sang Dios nga si Miqueas nagtagna: “Ipahamtang ko sila sa paghiusa, kaangay sang mga karnero sa bulukutan.” (Miq. 2:12, NW) Gintagna ni Miqueas ang pagpangibabaw sang matuod nga pagsimba sa tanan nga sahi sang pagsimba, pagsimba man ini sa butig nga mga dios ukon sa Estado. Nagsulat sia: “Sa olihi nga mga adlaw mahanabu nga ang bukid sang balay sang GINOO patindugon sa putokputokan sang mga bukid, kag bayawon ini labaw sa kabakoloran; kag ang mga katawohan magaduguk sa iya. Kay ang tanan nga katawohan magalakat ang tagsatagsa sa ngalan sang iya dios, kag kita magalakat sa ngalan sang GINOO nga aton Dios.”—Miq. 4:1, 5.

18. Ano nga mga pagbag-o ang aton nahimo bangod sa matuod nga pagsimba?

¹⁸ Ginlaragway man ni Miqueas kon paano ang  matuod nga pagsimba magapahiusa sa mga magkaaway sang una. “[Ang mga tawo gikan sa] madamu nga pungsud magakadto, kag magasiling: ‘Kari kamo, kag magtukad kita sa bukid sang GINOO, sa balay sang Dios ni Jacob; kag tudloan kita niya sang iya mga dalanon kag magalakat kita sa iya mga banas.’ . . . Kag salsalon nila nga mga punta sang arado ang ila mga espada, kag mga galab nga inughagbas ang ila mga bangkaw; ang pungsud indi na magbayaw sing espada batok sa pungsud, kag indi na sila magtoon sang inaway.” (Miq. 4:2, 3) Ang mga nagbiya sa pagsimba sa pungsod ukon sa mga dios nga ginhimo sang tawo agod mangin mga sumilimba ni Jehova nagaagom sang bug-os kalibutan nga paghiusa bangod gintudluan sila ni Jehova nga maghigugmaanay.

19. Ano ang ginapamatud-an sang paghiusa sang minilyon ka tawo sa matuod nga pagsimba?

¹⁹ Pinasahi gid sa karon ang bug-os kalibutan nga paghiusa sang matuod nga mga Cristiano kag maathag ini nga pamatuod nga padayon nga ginatuytuyan ni Jehova ang iya katawhan paagi sa iya espiritu. Sa bug-os nga kasaysayan, karon pa lang natabo nga amo sini kadamo nga tawo gikan sa tanan nga pungsod ang nahiusa. Talalupangdon ini nga katumanan sa ginasiling sang Bugna 7:9, 14, kag nagapakita ini nga sa indi madugay buy-an na sang anghel sang Dios ang ‘mga hangin’ nga magalaglag sa malauton nga kalibutan karon. (Basaha ang Bugna 7:1-4, 9, 10, 14.) Indi bala nga isa gid ka pribilehiyo nga mangin bahin sining nahiusa nga paghiliutod sa bug-os nga kalibutan? Paano kita makabulig sa sini nga paghiusa? Amo ini ang binagbinagon sa masunod nga artikulo.

Ano ang Imo Sabat?

• Paano ang matuod nga pagsimba nagapahiusa sa katawhan?

• Ano ang aton himuon agod indi maupangan sang kahisa ang aton paghiusa?

• Ngaa indi sarang mabahinbahin sang nasyonalismo ang matuod nga mga sumilimba?

[Mga Pamangkot sa Pagtinuon]

[Retrato sa pahina 13]

Ang mga Cristiano sang unang siglo nanuhaytuhay ang ginhalinan

[Mga Retrato sa pahina 15]

Paano makaamot sa paghiusa ang pagbulig mo sa mga hilikuton sa Kingdom Hall?