Nagapanguna Ka Bala sa Pagpadungog sa Imo mga Masigkatumuluo?
Nagapanguna Ka Bala sa Pagpadungog sa Imo mga Masigkatumuluo?
“Sa utudnon nga gugma magpakita kamo sang mapinalanggaon nga balatyagon sa isa kag isa. Sa pagpadungog sa isa kag isa manguna kamo.”—ROMA 12:10.
1, 2. (a) Ano nga laygay ang ginhatag ni Pablo sa iya sulat sa mga taga-Roma? (b) Ano nga mga pamangkot ang aton binagbinagon?
SA SULAT ni apostol Pablo sa mga taga-Roma, ginpadaku niya nga subong mga Cristiano importante gid nga magpakita kita sing gugma sa sulod sang kongregasyon. Ginpahanumdom niya kita nga ang aton gugma dapat “indi salimpapaw.” Ginsambit man niya ang tuhoy sa “utudnon nga gugma” kag ginpatalupangod nga ining gugma dapat ipakita upod ang “mapinalanggaon nga balatyagon.”—Roma 12:9, 10a.
2 Huo, ang utudnon nga gugma indi lamang basta pagbatyag sing pagpalangga sa iban. Dapat naton ini ipakita sa aton mga buhat. Paano bala mahibaluan sang iban nga ginahigugma kag ginapalangga naton sila kon indi naton ini pag-ipakita? Bangod sini, si Pablo naghatag sining dugang nga laygay: “Sa pagpadungog sa isa kag isa manguna kamo.” (Roma 12:10b) Ano ang nadalahig sa pagpadungog sa iban? Ngaa importante nga magpanguna kita sa pagpadungog sa aton mga masigkatumuluo? Paano naton ini mahimo?
Pagtahod kag Pagpadungog
3. Sa orihinal nga mga lenguahe sang Biblia, ano ang kahulugan sang tinaga nga “pagpadungog”?
3 Ang Hebreo nga tinaga nga ginbadbad “pagpadungog” literal nga nagakahulugan sing “kabug-aton.” Nagapahangop ini nga ang tawo nga ginapadunggan ginakabig nga may bug-at ukon may importansia. Ini nga tinaga masami man nga ginabadbad sa Kasulatan subong “himaya,” nga nagapakita nga ang isa nga ginapadunggan ginakabig nga mataas. (Gen. 45:13) Ang Griegong tinaga naman nga ginbadbad “pagpadungog” nagapahangop sing pagpakataas, pagpabalor, pagpakahamili. (Luc. 14:10) Huo, ang mga ginapadunggan naton ginakabig naton nga hamili kag bilidhon.
4, 5. Paano naangot ang pagpadungog sa pagtahod? Iilustrar.
4 Ano ang nadalahig sa pagpadungog sa iban? Nagaumpisa ini sa pagtahod. Sa katunayan, ang tinaga nga “pagpadungog” kag “pagtahod” masami ginagamit nga magkaupod bangod naangot ini sa isa kag isa. Ang pagpadungog amo ang pagpakita, ukon hayag nga pagpasundayag, sang pagtahod. Buot silingon, ang pagtahod nagapatuhoy kon paano naton ginatamod ang aton utod samtang ang pagpadungog naman nagapatuhoy kon paano naton sila ginapakig-angutan.
5 Paano mapadunggan sang isa ka Cristiano ang iya mga masigkatumuluo kon wala sia sing tinagipusuon nga pagtahod sa ila? (3 Juan 9, 10) Pareho sa isa ka tanom nga nagalambo kon nanggamot ini sa maayo nga duta, ang pagpadungog mangin tunay kag magadugay man kon ang pagtahod naghalin gid sa aton tagipusuon. Bangod ang pagpadungog nga di-sinsero wala naghalin sa matuod nga pagtahod, malayong ini sa indi madugay. Gani, indi kita matingala nga antes ginhatag ni Pablo ang iya laygay nga padunggan ang iban, nagsiling sia: “Ang inyo gugma mangin indi salimpapaw.”—Roma 12:9; basaha ang 1 Pedro 1:22.
Padunggi ang mga Gintuga “sa Dagway sang Dios”
6, 7. Ngaa dapat naton tahuron ang iban?
6 Bangod ang tinagipusuon nga pagtahod amo ang yabi sa pagpadungog, indi naton dapat pagkalimtan ang Makasulatanhon nga rason kon ngaa dapat naton tahuron ang tanan naton nga kauturan. Binagbinagon naton ang duha ka rason.
7 Indi kaangay sang iban nga tinuga sa duta, ang tawo gintuga “sa dagway sang Dios.” (Sant. 3:9) Amo sina ang rason kon ngaa may diosnon kita nga mga kinaiya subong sang gugma, kaalam, kag katarungan. Talupangda kon ano pa ang ginhatag sa aton sang aton Manunuga. Ang salmista nagsiling: “O GINOO, . . . Ikaw nga nagpahamtang sang imo himaya sa ibabaw sang kalangitan . . . Ginhimo mo [ang tawo] . . . kag ginapurungpurungan sia sing himaya kag dungug.” (Sal. 8:1, 4, 5; 104:1) * Ang tanan nga tawo ginpurungpurungan, ukon ginpunihan sang Dios sang dignidad, himaya, kag dungog. Kon ginapadunggan naton ang iban, daw kaangay lang nga ginakilala naton ang Ginhalinan sang dignidad sang tawo, si Jehova. Gani, kon may makatarunganon kita nga rason nga tahuron ang tanan nga tawo, indi bala nga labi na gid nga tahuron naton ang aton mga masigkatumuluo?—Juan 3:16; Gal. 6:10.
Isa Lang Kita ka Pamilya
8, 9. Ano nga rason ang ginsambit ni Pablo kon ngaa dapat naton tahuron ang aton mga masigkatumuluo?
8 Ginsambit ni Pablo ang isa pa ka rason kon ngaa dapat naton tahuron ang isa kag isa. Antes sia naghatag sing laygay nga padunggan ang iban, nagsiling sia: “Sa utudnon nga gugma magpakita kamo sang mapinalanggaon nga balatyagon sa isa kag isa.” Ang Griego nga ekspresyon nga ginbadbad “mapinalanggaon nga balatyagon” nagapatuhoy sa suod nga kaangtanan nga nagapahiusa sa isa ka pamilya nga nagahigugmaanay kag nagabinuligay. Gani, paagi sa paggamit sini nga ekspresyon, ginapadaku ni Pablo nga ang mga kauturan sa kongregasyon dapat mangin suod sa isa kag isa kaangay sang nahiusa nga pamilya. (Roma 12:5) Dugang pa, dumduma nga ang ginsulatan ni Pablo hinaplas nga mga Cristiano, nga ang tanan gin-adoptar sang isa lang ka Amay, si Jehova. Gani, masiling gid naton nga isa sila ka suod nga pamilya. Bangod sini, ang hinaplas nga mga Cristiano sang panahon ni Pablo may daku gid nga rason nga tahuron ang isa kag isa. Matuod man ini sa mga hinaplas sa aton panahon.
9 Kamusta naman ang mga katapo sang “iban nga mga karnero”? (Juan 10:16) Bisan wala pa sila gin-adoptar subong mga anak sang Dios, nagakaigo nila nga tawgon ang isa kag isa subong brother kag sister bangod nagahuman sila sang isa ka nahiusa nga bug-os kalibutan nga Cristianong pamilya. (1 Ped. 2:17; 5:9) Gani, kon nahangpan sing bug-os sang mga katapo sang iban nga mga karnero kon ngaa “brother” kag “sister” ang tawag nila sa isa kag isa, mangin mabakod ang ila rason nga tahuron sing tinagipusuon ang ila mga masigkatumuluo.—Basaha 1 Pedro 3:8.
Ngaa Importante Gid Ini?
10, 11. Ngaa importante gid nga tahuron kag padunggan naton ang aton kauturan?
10 Ngaa importante gid nga tahuron kag padunggan naton ang aton kauturan? Bangod sa sini nga rason: Paagi sa pagpadungog sa aton mga kauturan, makaamot kita sing daku sa kaayuhan kag paghiusa sang bug-os nga kongregasyon.
11 Huo, subong matuod nga mga Cristiano, nahibaluan naton nga ang pagtigayon sing suod nga kaangtanan kay Jehova kag pagbaton sang pagsakdag sang iya espiritu amo ang pinakamabaskog nga tuburan sang aton kabakod. (Sal. 36:7; Juan 14:26) Sa amo man nga tion, napalig-on kita kon ipakita sang aton mga masigkatumuluo nga ginapabaloran nila kita. (Hulu. 25:11) Nagabakod kita kon ipakita sang iban nga ginaapresyar nila kita kag ginatahod. Nagahatag ini sa aton sing kusog nga magpadayon sa paglakat nga may kalipay kag determinasyon sa dalanon sang kabuhi. Walay duhaduha nga naeksperiensiahan mo na ini.
12. Paano ang kada isa sa aton makaamot sa kainit kag gugma sa sulod sang kongregasyon?
12 Bangod nahibaluan ni Jehova nga nagakinahanglan kita sang pagtahod, ginapalig-on niya kita paagi sa iya Pulong nga “magtinahuray sa isa kag isa.” (Roma 12:10, ANG PULONG SANG DIOS; basaha ang Mateo 7:12.) Ang tanan nga Cristiano nga nagatuman sa sining epektibo nga laygay nagaamot sa kainit kag gugma sang Cristianong paghiliutod. Gani, maayo gid nga pamangkuton naton ang aton kaugalingon, ‘San-o ang pinakaulihi nga tion nga ginpabutyag ko paagi sa pulong kag buhat nga tinagipusuon ko nga ginatahod ang isa ka utod sa kongregasyon?’—Roma 13:8.
Espesipiko nga Asaynment Para sa Tanan
13. (a) Sin-o ang dapat magpanguna sa pagpadungog sa iban? (b) Ano ang ginapahangop sang pinamulong ni Pablo sa Roma 1:7?
13 Sin-o ang dapat magpanguna sa pagpadungog sa iban? Sa sulat ni Pablo sa mga Hebreo, ginlaragway niya ang Cristianong mga gulang subong mga “nagapanguna sa inyo.” (Heb. 13:17) Matuod nga ang mga gulang nagapanguna sa madamo nga hilikuton. Apang, subong mga manugbantay sang panong, dapat nga magapanguna man sila sa pagpadungog sa ila mga masigkatumuluo—pati na sa ila mga masigkagulang. Halimbawa, kon ang mga gulang magtipon agod hinun-anunan ang espirituwal nga mga kinahanglanon sang kongregasyon, ginapadunggan nila ang isa kag isa paagi sa pagpamati sing maayo sa mga komento sang ila mga masigkagulang. Nagapakita man sila sing pagpadungog paagi sa paghatag sing konsiderasyon sa mga pagtamod kag opinyon sang tanan nga gulang samtang nagahimo sila sing desisyon. (Binu. 15:6-15) Apang, dapat naton dumdumon nga ang sulat ni Pablo sa mga taga-Roma wala lamang nagapatuhoy sa mga gulang kundi sa bug-os nga kongregasyon. (Roma 1:7) Gani, masiling naton nga ang laygay nga magpanguna sa pagpadungog sa iban naaplikar man sa aton tanan karon.
14. (a) Iilustrar kon ano ang kinatuhayan sang pagpadungog kag sang pagpanguna sa pagpadungog? (b) Ano ang dapat naton ipamangkot sa aton kaugalingon?
14 Talupangda man ang laygay ni Pablo sa isa pa ka anggulo. Wala lamang niya ginlaygayan ang iya mga masigkatumuluo sa Roma nga padunggan ang iban kundi magpanguna sa pagpadungog. Ano ang kinatuhayan sini? Binagbinaga ini nga halimbawa. Pangabayon pa bala sang maestra ang iya mga estudyante nga magtuon sa pagbasa kon makahibalo na sila magbasa? Indi na. Sa baylo, luyag sang maestra nga buligan sila nga mangin talunsay sa pagbasa. Sing kaanggid, ang gugma tanda na sang matuod nga mga Cristiano, kag amo ini ang nagapahulag sa aton nga padunggan ang iban. (Juan 13:35) Apang, subong nga ang mga estudyante nga makahibalo na magbasa mangin talunsay pa paagi sa pagpauswag sang ila ikasarang sa pagbasa, magauswag man kita sing dugang pa paagi sa pagpanguna sa pagpadungog sa iban. (1 Tes. 4:9, 10) Ining espesipiko nga asaynment ginhatag sa kada isa sa aton. Mahimo naton pamangkuton ang aton kaugalingon, ‘Ginatuman ko bala ang akon asaynment nga magpanguna sa pagpadungog sa mga kauturan?’
Padunggi ang mga “Kubos”
15, 16. (a) Kon nagapadungog sa iban, sin-o ang indi naton dapat pagkalimtan, kag ngaa? (b) Paano naton mahibaluan kon bala sinsero ang aton pagtahod sa aton mga kauturan?
15 Kon nagapadungog sa iban, sin-o sa kongregasyon ang indi naton dapat pagkalimtan? Ang Pulong sang Dios nagasiling: “Ang nagakaawa sa imol nagapahulam sa GINOO, kag ang iya maayo nga buhat bayaran sia niya.” (Hulu. 19:17) Paano ang prinsipio sa sini nga mga pulong makaapektar sa aton sa pagpanguna sa pagpadungog sa iban?
16 Ayhan magaugyon ka nga ginapadunggan sang kalabanan ang mga mas superyor sa ila, apang manubo ang ila pagtan-aw sa mga kubos sa ila. Apang, indi amo sina si Jehova. Nagsiling sia: “Ang mga nagapadungug sa akon padunggan ko.” (1 Sam. 2:30; Sal. 113:5-7) Ginapadunggan ni Jehova ang tanan nga nagaalagad kag nagapadungog sa iya. Wala niya ginasikway ang mga “kubos.” (Basaha ang Isaias 57:15; * 2 Cron. 16:9) Siempre, luyag naton ilugon si Jehova. Gani, agod mahibaluan naton kon bala sinsero ang aton pagpadungog sa iban, pamangkuton naton ang aton kaugalingon, ‘Paano ko ginapakig-angutan ang mga wala sing prominente, ukon mabug-at, nga responsibilidad sa kongregasyon?’ (Juan 13:14, 15) Ang sabat sa sini nga pamangkot magapakita kon daw ano ka sinsero ang aton pagtahod sa iban.—Basaha ang Filipos 2:3, 4.
Ginapadunggan Naton ang Iban Paagi sa Paghatag sang Aton Tion
17. Ano ang isa ka paagi nga makapanguna kita sa pagpadungog sa iban, kag ngaa?
17 Ano ang isa ka paagi nga makapanguna kita sa pagpadungog sa tanan sa kongregasyon? Amo ang paghatag sang aton tion sa ila. Ngaa? Bangod subong mga Cristiano, madamo kita sing importante nga mga hilikuton sa kongregasyon. Gani, indi katingalahan nga ang kada tion hamili gid para sa aton. Mahangpan man naton nga indi kita mahatagan sing tuman kadamo nga tion sang aton mga kauturan. Sing kaanggid, maapresyar naton kon ang aton mga kauturan indi magpangabay sing tuman kadamo nga tion sa aton.
18. Subong sang ginapakita sa larawan sa pahina 18, paano naton mapakita nga handa kita nga hatagan sing tion ang aton mga masigkatumuluo?
18 Bisan pa masako kita, nahibaluan naton (ilabi na kon gulang kita sa kongregasyon) nga ang aton kahanda sa pag-untat sang aton mga ginahimo agod hatagan sing tion ang aton mga masigkatumuluo nagapakita man nga ginatahod naton sila. Paano? Kon ginauntatan naton ang aton mga hilikuton para sa ila, daw kaangay lang nga ginasilingan naton sila, ‘Importante ka sa akon sangsa akon ginaobra.’ (Mar. 6:30-34) Apang, kon nagapangalag-ag kita nga untatan ang aton ginahimo, ayhan magbatyag sia nga wala sia sing balor sa aton. Siempre, may mga tion nga indi naton puede untaton ang aton ginahimo bangod hilingagawon ini. Apang, ang aton kahanda—ukon pagpangalag-ag—sa paghatag sing tion sa aton kauturan magapakita kon daw ano ka sinsero ang aton pagtahod sa ila.—1 Cor. 10:24.
Mangin Determinado nga Manguna
19. Luwas sa paghatag sang aton tion, paano pa naton mapadunggan ang aton mga masigkatumuluo?
19 May iban pa nga paagi nga mapadunggan naton ang aton mga masigkatumuluo. Halimbawa, kon ginahatagan naton sila sing tion, dapat man naton sila hatagan sang aton atension. Si Jehova naghatag man sing maayo nga halimbawa sa sini. Si salmista David nagsiling: “Ang mga mata sang GINOO yara nayon sa mga matarung, kag ang iya mga idulungug bukas sa pagtuaw nila.” (Sal. 34:15) Ginatinguhaan naton nga mailog si Jehova kon ginatuon naton ang aton mata kag dulunggan—ang aton bug-os nga atension—sa aton mga kauturan, ilabi na sa mga nagapangayo sa aton sing bulig. Sa paghimo sini, mapakita naton nga ginapadunggan naton sila.
20. Ano nga mga pahanumdom tuhoy sa pagpadungog ang dapat naton dumdumon?
20 Subong sang nabinagbinag na naton, luyag gid naton dumdumon kon ngaa dapat naton tahuron sing tinagipusuon ang aton mga masigkatumuluo. Dugang pa, nagapangita kita sing mga kahigayunan nga manguna sa pagpadungog sa tanan, lakip sa mga kubos. Paagi sa paghimo sini, mapalig-on naton ang gugma kag paghiusa sa kongregasyon. Gani, kabay pa nga magpadayon kita indi lamang sa pagpadungog sa iban kundi ilabi na sa pagpanguna sa pagpadungog sa isa kag isa. Determinado ka bala sa paghimo sina?
[Mga Nota]
^ par. 7 Ang mga pinamulong ni David sa ika-8 nga Salmo matagnaon man. Nagapatuhoy ini sa himpit nga tawo nga si Jesucristo.—Heb. 2:6-9.
^ par. 16 Isaias 57:15, (NW): “Kay amo ini ang ginsiling sang Labing Mataas, nga ang puluy-an wala sing katapusan kag ang ngalan balaan: ‘Nagapuyo ako sa kahitaasan kag sa balaan nga duog, upod sa napiutan kag mapainubuson, agod ipasag-uli ang kusog sang kubos kag ipasag-uli ang kaisog sang napiutan.’”
Madumduman Mo Bala?
• Ano ang kaangtanan sang pagpadungog sa pagtahod?
• Ano ang aton mga rason para padunggan ang aton mga masigkatumuluo?
• Ngaa importante nga padunggan naton ang isa kag isa?
• Sa ano nga mga paagi mapakita naton nga ginapadunggan naton ang aton mga masigkatumuluo?
[Mga Pamangkot sa Pagtinuon]
[Retrato sa pahina 18]
Paano naton mapadunggan ang aton mga masigkatumuluo?
