Mga Pamangkot Gikan sa mga Bumalasa

Ginsilingan ni Jesus ang iya tagpalamati: “Dapat kamo magpakahimpit, subong nga ang inyo langitnon nga Amay himpit.” Paano ang mga tawo sa karon “magpakahimpit”?—Mat. 5:48.

Agod masabat ini nga pamangkot dapat naton mahangpan kon paano ginagamit sang Biblia ang tinaga nga “himpit” kag “kahimpitan.” Indi ang tanan nga butang nga ginapatuhuyan sang Kasulatan nga “himpit” nagakahulugan nga himpit gid sa kabug-usan. Siempre, si Jehova lamang ang himpit gid sa kabug-usan. Ang mga tawo kag ang mga butang relatibo lamang ang pagkahimpit. Ang Hebreo kag Griego nga tinaga sa Biblia nga ginbadbad “himpit” masami nga nagakahulugan sing “kompleto,” “hamtong,” ukon “walay kasawayan” suno sa talaksan nga ginpahamtang sang isa ka awtoridad.

Sanday Adan kag Eva gintuga nga himpit sa moral, espirituwal, kag pisikal. Himpit sila suno sa talaksan nga ginpahamtang sang ila Manunuga. Bangod sang ila paglalis, wala nila malab-ot ang iya talaksan kag nadula nila kag sang ila kaliwatan ang kahimpitan. Gani paagi kay Adan, ang sala, pagkadihimpit, kag kamatayon ginliton sa katawhan.—Roma 5:12.

Apang subong sang maathag nga ginsiling ni Jesus sa iya Sermon sa Bukid, bisan ang di-himpit nga tawo mahimo magpakahimpit sa relatibo nga kahulugan. Sa iya sermon, nagpahamtang sia sing talaksan para sa himpit ukon matuod nga gugma. Amo ini nga gugma ang ginpakita sang Dios sa katawhan. Si Jesus nagsiling: “Padayon nga higugmaa ang inyo mga kaaway kag ipangamuyo ang mga nagahingabot sa inyo; agod mangin anak kamo sang inyo Amay nga yara sa langit, kay ginapabutlak niya ang iya adlaw sa mga tawo nga malaut kag sa mga maayo kag nagapaulan sa mga tawo nga matarong kag di-matarong.” (Mat. 5:44, 45) Paagi sa pagpakita sini nga gugma, ginailog sang mga disipulo ni Jesus ang himpit nga halimbawa sang Dios.

Sa karon, ginatinguhaan sang mga Saksi ni Jehova sa bug-os nga kalibutan nga mahuptan inang mataas nga talaksan sang gugma para sa iban. Luyag nila buligan ang mga tawo nga makakuha sing sibu nga ihibalo sa kamatuoran sa Biblia bisan ano man ang ila ginhalinan, rasa, kag relihion. Sa 236 ka kadutaan, nagadumala karon ang mga Saksi sing kapin sa 7,000,000 ka pagtuon sa Biblia.

“Kon ginahigugma ninyo ang mga nagahigugma sa inyo, ano ang inyo padya?” pamangkot ni Jesus. “Indi bala ginahimo man ini sang mga manugsukot sing buhis? Kag kon ang inyo mga utod lamang ang inyo ginabugno, ano nga pinasahi nga butang ang ginahimo ninyo? Indi bala ginahimo man ini sang mga tawo sang mga pungsod?” (Mat. 5:46, 47) Ang matuod nga mga Cristiano wala sing pinasulabi ano man ang tinun-an ukon kultura nga ginhalinan sang isa; kag wala sila nagapakita sing gugma sa mga makasarang lamang magbalos sa ila. Sa baylo, nagabulig sila sa mga imol kag sa mga masakiton, bata man ukon tigulang. Paagi sa sina, ginailog nila ang gugma ni Jehova kag sa amo nagpakahimpit sa relatibo nga kahulugan.

Maagom pa bala naton ang kahimpitan nga nadula ni Adan? Huo, paagi sa pagtuo sa halad nga gawad ni Jesus, matigayon sang matinumanon nga katawhan ang kahimpitan sa tion sang Isa ka Libo ka Tuig nga Paggahom ni Cristo, kon ‘laglagon na sang Anak sang Dios ang mga binuhatan sang Yawa.’—1 Juan 3:8.