Mag-amba Kay Jehova!
Mag-amba kay Jehova!
“Magaamba ako sing mga pagdayaw sa akon Dios [samtang] nagakabuhi ako.”—SAL. 146:2.
1. Ano ang nagpahulag sa pamatan-on nga si David nga magkomposo sang mga salmo?
SANG pamatan-on pa si David, madamo nga oras ang iya ginhinguyang sa latagon malapit sa Betlehem sa pagbantay sa mga panong sang iya amay. Samtang nagabantay sia sang mga karnero, mahimo nga nakita ni David ang tuman katahom nga mga tinuga ni Jehova: ang kalangitan nga puno sing bituon, “ang kasapatan sang latagon,” kag “ang kapispisan sang kalangitan.” Natandog gid sia sa iya nakita amo nga napahulag sia nga magkomposo sang makatalandog nga mga ambahanon sang pagdayaw sa Manughimo sining dalayawon nga mga butang. Madamo sa mga ambahanon nga ginkomposo ni David ang masapwan sa tulun-an sang mga Salmo. *—Basaha ang Salmo 8:3, 4, 7-9.
2. (a) Ano ang epekto sang musika sa isa ka tawo? Maghatag sing halimbawa. (b) Ano ang matun-an naton tuhoy sa kaangtanan ni David kay Jehova sa Salmo 34:7, 8 kag Salmo 139:2-8?
2 Mahimo nga sa sini nga mga tion napalambo ni David ang iya pagkasampaton sa musika. Sampaton gid sia sa sini amo nga gin-agda sia nga magtokar sang arpa para kay Hari Saul. (Hulu. 22:29) Ang musika nga gintokar ni David nagpaumpaw sa natublag nga hari, kaangay man sang epekto sang maayo nga mga musika sa mga tawo karon. Sa kada tion nga patukaron ni David ang iya instrumento, ‘si Saul nagakaumpawan kag nagaayo.’ (1 Sam. 16:23) Ang mga ambahanon sining mahinadlukon sa Dios nga musikero kag manugkomposo napamatud-an gid nga mapuslanon tubtob sa karon. Hunahunaa ini! Kapin sa 3,000 ka tuig na ang nagligad sugod sang natawo si David, apang minilyon gihapon ka tawo gikan sa lainlain nga lugar kag kahimtangan ang regular nga nagabasa sang mga salmo ni David agod makatigayon sang kaumpawan kag paglaum.—2 Cron. 7:6; basaha ang Salmo 34:7, 8; 139:2-8; Amos 6:5.
Ang Importante nga Papel sang Musika sa Matuod nga Pagsimba
3, 4. Sang panahon ni David, ano nga kahimusan ang ginhimo para sa paggamit sang musika sa pagsimba?
3 Si David may talento, kag gingamit niya ini sa pinakamaayo nga paagi—sa paghimaya kay Jehova. Sang nangin hari na sia sa Israel, naghimo si David sang kahimusan nga ang matahom nga mga musika mangin bahin sa pag-alagad sa tabernakulo. Kapin sa dies porsiento sang mga Levinhon—4,000 sa ila—ang gintangdo nga “magdayaw sa GINOO.” Ang 288 sa sini nga “ginton-an sa pag-amba sa GINOO, . . . sampaton.”—1 Cron. 23:3, 5; 25:7.
4 Si David mismo ang nagkomposo sa madamo nga ambahanon nga gintokar kag gin-amba sang mga Levinhon. Ang mga Israelinhon nga nakatambong sa mga okasyon diin ginaamba ang mga salmo ni David, mahimo nga napahulag gid sang ila nabatian. Sang ulihi, sang gindala ang kaban sang katipan sa Jerusalem, “si David nagpamolong . . . sa puno sang mga Levinhon sa pagtangdo sang ila mga utud nga mga manug-amba, nga may mga tolonggon, mga salterio kag mga arpa kag mga apiping, nga nagapatonog sing mabaskug kag nagabayaw sang tingug nga may kasadya.”—1 Cron. 15:16.
5, 6. (a) Ngaa ang musika ginhatagan gid sang daku nga igtalupangod sang paggahom ni David? (b) Paano naton nahibaluan nga ang musika may importante nga papel sa pagsimba sa dumaan nga Israel?
5 Ngaa ang musika ginhatagan gid sang daku nga igtalupangod sang panahon ni David? Bangod bala kay ang hari isa ka musikero? Indi. May isa pa ka rason nga nangin hayag mga siniglo sang ulihi, sang ginpasag-uli sang matarong nga si Hari Ezequias ang mga hilikuton sa templo. Sa 2 Cronica 29:25, mabasa naton: “Ginbutang niya [ni Ezequias] ang mga Levinhon sa balay sang GINOO nga may mga apiping, may mga salterio, kag may mga arpa, sono sa sogo ni David kag ni Gad nga manugpanan-aw sang hari kag ni Natan nga manalagna; kay ang sogo gikan sa GINOO paagi sa iya mga manalagna.”
6 Huo, paagi sa iya mga manalagna, ginsugo ni Jehova ang iya mga sumilimba nga dayawon sia paagi sa mga ambahanon. Ang mga manug-amba gikan sa saserdotenhon nga tribo ginhilway pa gani sa iban nila nga mga katungdanan agod makahinguyang sila sang bastante nga tion sa pagkomposo kag sa pag-ensayo.—1 Cron. 9:33.
7, 8. Tuhoy sa pag-amba sang mga ambahanon sang Ginharian, ano ang mas importante sangsa pagkasampaton?
7 Mahimo magsiling ka, “Kon pag-amba ang pagahambalan, sigurado nga indi gid ako malakip sa mga sampaton nga manug-amba sa tabernakulo!” Apang dumduma nga indi tanan nga Levinhon nga musikero mga sampaton. Suno sa 1 Cronica 25:8 (NW), may yara mga “nagatuon pa lang.” Talupangda nga mahimo may yara man sampaton nga mga musikero kag mga manug-amba sa iban nga tribo sang Israel, apang sa mga Levinhon lamang gintangdo ni Jehova ang musika. Makapat-od kita nga bisan mga “sampaton” ukon “nagatuon pa lang” sila, ang tanan nga matutom nga Levinhon tinagipusuon gid nga nagtuman sang ila katungdanan.
8 Ginhigugma ni David ang musika kag sampaton gid sia sa sini. Apang ang pagkasampaton lamang bala ang importante sa Dios? Sa Colosas 3:23, si Pablo nagsulat: “Bisan ano ang inyo ginahimo, himua ninyo ini sing bug-os kalag subong nga kay Jehova, kag indi sa mga tawo.” Maathag ang mensahe sini: Ang importante amo nga mag-amba kita sing “bug-os kalag” sa pagdayaw kay Jehova.
Ang Papel sang Musika Pagkatapos sang Panahon ni David
9. Ilaragway kon ano ang mahimo nga nakita kag nabatian mo kon nakatambong ka sa inagurasyon sang templo sa tion sang paggahom ni Solomon.
9 Ang musika may daku man nga papel sa matuod nga pagsimba sang paggahom ni Solomon. Sa inagurasyon sang templo, may yara kompleto nga orkestra, kag ang saway pa lang nga mga instrumento ginahuman na sang 120 ka budyong. (Basaha 2 Cronica 5:12.) Ang Biblia nagasugid sa aton nga ang “mga manugbudyong,” nga saserdote tanan, kag ‘ang mga manug-amba nagadayaw kag nagapasalamat sa GINOO, “kay maayo sia, kay ang iya malig-on nga paghigugma nagapadayon sa gihapon.”’ Pagkatapos sang ila malipayon nga pagtokar kag pag-amba, “ang balay, napuno sang panganud,” nga nagapamatuod sang kahamuot ni Jehova. Daw ano ka makakulunyag kag makahalawhaw nga mabatian ang pagtunog sang tanan nga budyong nga ginadunganan sang tingog sang linibo ka manug-amba!—2 Cron. 5:13.
10, 11. Ano ang nagapakita nga gingamit sang mga Cristiano sang una ang musika sa pagsimba?
10 Ang musika gingamit man sa pagsimba sang una nga mga Cristiano. Apang wala sila nagatipon sa mga tabernakulo ukon sa templo, kundi sa mga puluy-an na. Bisan pa ginahingabot sila kag mabudlay ang ila kahimtangan, ginadayaw gihapon nila ang Dios paagi sa ambahanon.
11 Ginpalig-on ni apostol Pablo ang iya Cristianong mga kauturan sa Colosas: “Padayon nga . . . maglaygay sa isa kag isa nga may mga salmo, mga pagdayaw sa Dios, espirituwal nga mga ambahanon upod ang pagkamainayuhon.” (Col. 3:16) Sang nabilanggo sanday Pablo kag Silas, “nagpangamuyo kag nagdayaw [sila] sa Dios paagi sa ambahanon” bisan pa wala sila sing libro sang ambahanon nga ginasundan. (Binu. 16:25) Kon mabilanggo ka, pila ka ambahanon sang Ginharian ang saulado mo?
12. Paano naton mapakita nga ginapabaloran gid naton ang aton mga ambahanon sang Ginharian?
12 Bangod ang musika may dungganon nga papel sa aton pagsimba, maayo nga pamangkuton naton ang aton kaugalingon: ‘Ginapabaloran ko bala ini? Ginahimo ko bala ang akon bug-os nga masarangan nga makaabot sing temprano sa mga miting, asembleya, kag mga kombension para makabuylog sa mga kauturan sa nagabukas nga ambahanon, kag nagaamba bala ako sing tinagipusuon? Ginatudluan ko bala ang akon kabataan nga indi maghalin sa ila pulungkuan kon indi man lang kinahanglanon sa tion sang pag-amba sa ulot sang Teokratikong Eskwelahan Para sa Ministeryo kag Miting sa Serbisyo ukon sa ulot sang pamulongpulong publiko kag Pagtinuon sa Lalantawan?’ Dumdumon naton nga ang pag-amba bahin sang aton pagsimba. Huo, “sampaton” man kita ukon “nagatuon pa lang,” tanan kita sarang—kag dapat—mahiusa sa pag-amba sang pagdayaw kay Jehova.—Ipaanggid ang 2 Corinto 8:12.
Nagabag-o ang mga Kinahanglanon sa Pagligad sang Tion
13, 14. Ngaa importante gid ang pag-amba sing tinagipusuon sa tion sang mga miting? Maghatag sing halimbawa.
13 Kapin na sa 100 ka tuig ang nagligad, ang Zion’s Watch Tower nagpaathag sang isa ka rason kon ngaa importante gid ang aton mga ambahanon sang Ginharian. Nagsiling ini: “Ang pag-amba sang kamatuoran amo ang pinakamaayo nga paagi nga mapasalop ini sa hunahuna kag tagipusuon sang katawhan sang Dios.” Madamo nga liriko sang aton mga ambahanon ang nabase sa mga teksto sa Biblia, amo nga ang pagtuon sa mga liriko sang pila ka ambahanon isa ka maayo nga paagi nga mapasalop ang kamatuoran sa aton tagipusuon. Sa masami, ang mga nagtambong sa aton mga miting sa una nga tion natandog gid sang nabatian nila ang tinagipusuon nga pag-amba sang mga kauturan.
14 Isa ka gab-i sang 1869, samtang nagapauli gikan sa trabaho si C. T. Russell may nabatian sia nga nagaamba gikan sa isa ka bilding. Sa sina nga tion, nadulaan na sia sing paglaum nga masapwan ang kamatuoran tuhoy sa Dios. Gani, nagdesisyon na lang sia nga magkonsentrar sa iya negosyo kag nagpangatarungan nga kon madamo na sia sing kuarta, mabuligan na niya ang mga tawo sa ila pisikal nga mga kinahanglanon bisan pa indi niya sila mabuligan sa espirituwal. Si Utod Russell nagsulod sa yab-ukon kag madulom nga bilding kag nakita niya nga may relihiosong pagtinipon nga ginahiwat didto. Nagpungko sia kag namati. Sang ulihi nagsulat sia nga ang iya nabatian sadto nga gab-i “bastante na, nga sa bulig sang Dios, maglig-on liwat ang [iya] nagluya nga pagtuo nga ang Biblia inspirado sang Dios.” Talupangda nga ang ambahanon amo ang una nga nakaganyat kay Utod Russell sa miting.
15. Ngaa kinahanglan naton ang bag-o nga songbook?
15 Sa pagligad sang tion, may mga pagbag-o nga ginhimo sa aton paghangop sa Kasulatan. Ang Hulubaton 4:18 nagasiling: “Ang banas sang matarung subong sang nagapamanagbanag nga kapawa, nga nagasilak sing labi kag labi tubtub sa himpit nga adlaw.” Bangod sa nagadugang nga kapawa may mga pagbag-o man nga ginhimo sa aton “pag-amba sang kamatuoran.” Beinte singko ka tuig na nga ginagamit sang mga Saksi ni Jehova sa madamo nga kadutaan ang songbook nga natig-uluhan Mag-amba Sing mga Pagdayaw kay Jehova. * Apang pagligad sang mga tinuig sugod sang ginbalhag ina nga libro, labi nga nagasanag ang kapawa sa pila ka topiko, kag ang pila ka ekspresyon nga gingamit sadto wala na ginagamit subong. Halimbawa, sa daan nga Ingles nga songbook nagagamit pa kita sang ekspresyon nga “bag-o nga kahimusan” sa baylo nga “bag-o nga kalibutan.” Kag ginsambit sa pila ka kanta nga ang ngalan ni Jehova “ibindikar” sa baylo nga “pakabalaanon.” Maathag nga kinahanglan naton ang bag-o nga songbook agod mangin sibu ini sa husto nga paghangop sa Kasulatan.
16. Paano ang aton bag-o nga songbook makabulig sa aton nga sundon ang laygay ni Pablo sa Efeso 5:19?
16 Bangod sina kag sa pila pa ka rason, gin-aprobahan sang Nagadumala nga Hubon ang pagbalhag sang bag-o nga songbook nga natig-uluhan Mag-amba kay Jehova. Ang bag-o nga songbook may yara na lang 135 ka ambahanon. Bangod diutay na lang ini, mahapos naton sauluhon ang mga liriko sang pila ka bag-o nga ambahanon. Nahisuno ini sa laygay ni Pablo sa Efeso 5:19.—Basaha.
Mapakita Mo ang Imo Apresasyon
17. Ano ang makabulig sa aton nga malandas ang kahuya kon tuhoy sa pagkanta sa tion sang mga miting?
17 Tugutan bala naton ang kahuya nga magpugong sa aton sa pagkanta sa tion sang Cristianong mga miting? Binagbinaga ini: Tuhoy sa paghambal, indi bala nga “kita tanan nagakasandad sing madamong beses”? (Sant. 3:2) Apang, wala naton ginatugutan nga ang aton di-himpit nga paghambal mag-upang sa aton sa pagdayaw kay Jehova sa pamalaybalay. Gani, tugutan bala naton nga ang aton di-himpit nga pagkanta mag-upang sa aton sa pagdayaw sa Dios paagi sa ambahanon? Si Jehova, nga amo ang “naghimo sing baba sang tawo,” nahamuot sa pagpamati kon gamiton naton ang aton mga tingog sa pagdayaw sa iya.—Ex. 4:11.
18. Maghatag sing panugda kon paano mo matun-an ang mga liriko sang mga ambahanon.
18 Ang CD nga natig-uluhan Mag-amba kay Jehova—Vocal Renditions matigayon na sa pila ka lenguahe. Nagaunod ini sang bag-o nga mga ambahanon nga gin-amba sang koro upod ang matahom nga orkestra. Ang pagpamati sa sini makalilipay gid. Pamatii ini pirme agod mangin pamilyar ka sa liriko sang pila sining bag-o nga mga ambahanon. Ang mga liriko sang madamo nga ambahanon ginkomposo sa paagi nga kon ginakanta mo ang una nga linya, mahimo mahibaluan mo na kon ano ang masunod. Gani kon ginapatokar mo ang CD, ngaa indi mo pagtilawan nga magdungan sa koro sa pagkanta? Kon sa inyo balay pamilyar ka na sa mga liriko kag musika, pat-od gid nga may kompiansa ka na sa pagkanta sa Kingdom Hall.
19. Ano ang nadalahig sa paghanda sang orkestra sang aton mga ambahanon sang Ginharian?
19 Mahimo nga ginabalewala lang naton ang musika nga ginagamit sa tion sang aton pinasahi nga mga asembleya, sirkito nga mga asembleya, kag distrito nga mga kombension. Apang, dumdumon naton nga daku nga tion kag panikasog ang ginhinguyang sa paghanda sini. Sa tapos mapili ang musika nga gamiton, ang mga piyesa ginahanda sing maayo para ipatokar sa orkestra sang Watchtower nga may 64 ka katapo. Nagahinguyang sila sang madamo nga oras sa pagtuon kag sa pag-ensayo sini tubtob marekord ini sa aton mga estudyo sa Patterson, New York. Napulo sa sini nga mga utod ang naghalin pa sa iban nga pungsod. Ginakabig nila tanan nga isa ka daku nga kadungganan nga makapakigbahin sa pag-aman sang matahom nga musika para sa aton teokratikong mga okasyon. Sarang naton mapakita ang aton apresasyon sa ila mahigugmaon nga mga panikasog kon magpungko kita kag mamati sing maayo sa musika, sa tion nga agdahon kita sang tsirman sa aton mga asembleya kag mga kombension.
20. Ano ang determinado mo nga himuon?
20 Ginapabaloran ni Jehova ang aton mga ambahanon sa pagdayaw. Importante gid ini sa iya. Mapahalipay naton ang iya tagipusuon paagi sa pag-amba sing tinagipusuon sa tion sang aton mga pagtilipon. Huo, sampaton man kita ukon nagatuon pa lang, ‘mag-amba kita kay Jehova’!—Sal. 104:33, NW.
[Mga Nota]
^ par. 1 Napulo ka siglo sa tapos napatay si David, ang pagkabun-ag sang Mesias ginpahibalo sang mga anghel sa mga manugbantay sang karnero nga nagabantay sang ila panong sa latagon malapit sa Betlehem.—Luc. 2:4, 8, 13, 14.
^ par. 15 Ang daan nga songbook nga may 225 ka ambahanon matigayon anay sa kapin sa 100 ka lenguahe. Sa Hiligaynon, ang Mag-amba Sing mga Pagdayaw kay Jehova ginbalhag sang 1999.
Ano ang Imo Sabat?
• Ano nga mga halimbawa sa Biblia ang nagapakita nga importante ang papel sang musika sa aton pagsimba?
• Ano ang kaangtanan sang pagtuman sa sugo ni Jesus sa Mateo 22:37 kag sa pagkanta sing tinagipusuon sa mga ambahanon sang Ginharian?
• Ano ang pila ka paagi nga mapakita naton ang aton apresasyon sa aton mga ambahanon sang Ginharian?
[Mga Pamangkot sa Pagtinuon]
[Retrato sa pahina 23]
Ginatudluan mo bala ang imo kabataan nga indi maghalin sa ila pulungkuan sa tion sang pag-amba kon indi man lang kinahanglanon?
[Retrato sa pahina 24]
Ginatun-an mo bala ang mga liriko sang aton bag-o nga mga ambahanon sa inyo puluy-an?
