Ang Ngalan sa Kabalayan!

ST. MORITZ. Pamilyar ka bala sa sini nga lugar? Mahimo nga nabatian mo na ini bangod isa ini ka bantog nga balakasyunan sa Engadine Valley sa Switzerland. Apang ang St. Moritz isa lamang sa matahom nga mga lugar nga ginakadtuan sang mga tawo sa nakulapan sang niebe nga kabukiran sang Alps sa bagatnan-sidlangan nga bahin sang Switzerland malapit sa dulunan sang Italya. Nahamtang man diri ang Swiss National Park, sa diin makita ang matahom kag nanarisari nga kabulakan kag kasapatan nga nagadayaw sa aton Dakung Manunuga, si Jehova. (Sal. 148:7-10) Dugang pa, makita man diri ang ebidensia sang kinabatasan sang mga tawo sang tungatunga sang ika-17 nga siglo.

Sa sini nga lugar, may matalupangdan ka nga pinasahi nga dekorasyon sa mga kabalayan. Kinaandan na nga makita mo ang ngalan sang Dios nga natigib sa atubangan sang balay, nga sa masami yara sa ibabaw sang mayor nga puertahan. Sa  nagligad nga mga siglo, nangin kinabatasan sang mga tawo ang pagdekorar sa gua sang ila mga balay sang mga inskripsion nga ginpinta, gindrowing sa palitada, ukon ginsilsil sa bato. Makita mo diri ang laragway sang isa ka balay sa Bever. Ang nasulat diri kon badbaron nagasiling: “Sang tuig 1715. Si Jehova ang ginsuguran, kag si Jehova ang katapusan. Ang tanan nga butang nagluntad bangod sa Dios, kag wala sing magaluntad kon wala sia.” Huo, duha ka beses nga ginsambit sa sining daan nga inskripsion ang personal nga ngalan sang Dios.

Mas daan pa nga inskripsion ang makita mo sa Madulain. Ini nagasiling: “Salmo 127. Kon indi si Jehova ang magtukod sang balay, mangin wala sing pulos ang pagpangabudlay sang mga nagtukod sini. Lucius Rumedius. Sang tuig 1654.”

Ngaa makita sing hayag ang ngalan sang Dios sa sini nga lugar? Sugod pa sang panahon sang Repormasyon, ginbalhag na ang Biblia sa Romansh, ang lenguahe nga naghalin sa Latin nga ginagamit sa Engadine. Ang matuod, amo ini ang pinakauna nga libro nga ginbadbad sa sina nga lenguahe. Madamo nga tawo ang napahulag sang ila nabasa sa Pulong sang Dios amo nga gintigib nila sa gua sang ila mga balay indi lang ang ila mga ngalan kundi ang mga teksto man sa Biblia nga may personal nga ngalan sang Dios.

Huo, ini nga mga inskripsion sa mga balay padayon nga nagapadayag sang ngalan ni Jehova kag nagadayaw sa iya sa sulod na sang mga siglo. Ginaagda ang mga bisita kag mga pumuluyo sa sini nga lugar nga magtuon sing dugang pa tuhoy sa dalayawon nga Dios, si Jehova, paagi sa pagkadto sa isa pa ka bilding nga nagadala sang iya ngalan—ang Kingdom Hall sang mga Saksi ni Jehova sa Bever.

[Picture Credit Line sa pahina 7]

© Stähli Rolf A/age fotostock