Ginapabaskog sa Paglandas sang Bisan Ano nga Pagtilaw
Ginapabaskog sa Paglandas sang Bisan Ano nga Pagtilaw
“Sa tanan nga butang may kusog ako paagi sa iya nga nagapabakod sa akon.” —FIL. 4:13.
1. Ngaa ang katawhan ni Jehova madamo sing ginaatubang nga kabudlayan?
ANG katawhan ni Jehova masami nagaatubang sing nanuhaytuhay nga mga kabudlayan. Kon kaisa resulta ini sang aton pagkadihimpit ukon sang sistema sang mga butang nga ginakabuhian naton. Apang may mga pagtilaw man nga resulta sang kaawayon sa ulot sang mga tawo nga nagaalagad sa Dios kag sang mga wala nagaalagad sa iya. (Gen. 3:15) Halin pa sang una, ginabuligan na sang Dios ang iya matutom nga mga alagad nga maatubang ang mga paghingabot, makahalalit nga pag-ipit sang mga kaupdanan, kag iban pa nga kabudlayan. Amo man sa karon, maatubang naton ini paagi sa bulig sang iya balaan nga espiritu.
Ginabuligan sa Pag-atubang sa mga Paghingabot
2. Ngaa may mga tawo nga ginahingabot, kag ano ang nanuhaytuhay nga sahi sini?
2 May mga tawo nga ginahingabot ukon ginasakit bangod sang ila relihion ukon ginapatihan. Ang tuyo sang mga manughingabot amo nga dulaon ang ila pagtuluuhan, punggan ang paglapnag sini, ukon gub-on ang ila integridad. May nanuhaytuhay nga sahi sang paghingabot, ang iban direkta, ang iban malalangon. Ginapaanggid sang Biblia ang mga pagsalakay ni Satanas sa pagsalakay sang leon kag sa pagsalakay sang kobra.—Basaha ang Salmo 91:13.
3. Ano nga mga paghingabot ang kaangay-leon kag kaangay-kobra?
3 Kaangay sang isa ka mabangis nga leon, si Satanas masami nga nagasalakay sing direkta paagi sa kasingki, pagbilanggo, ukon pagdumili. (Sal. 94:20) Madamo sa sini nga mga pagsalakay ang ginreport sa aton Tuigan nga Libro. Sa madamo nga lugar, ginasugyot sang mga klero ukon mga pulitiko ang guban sang mga tawo agod hingabuton ang katawhan sang Dios. May pila nga nasandad bangod sa sining kaangay-leon nga mga pagsalakay. Apang kaangay sang kobra, ang Yawa nagasalakay man sa malalangon nga paagi agod hiluan ang hunahuna sang mga tawo kag limbungan sila sa paghimo sang iya kabubut-on. Ini nga pagsalakay gindesinyo agod paluyahon kita kag dagtaan sa espirituwal. Apang sa bulig sang balaan nga espiritu sang Dios, sarang naton malandas ining duha ka sahi sang paghingabot.
4, 5. Ano ang pinakamaayo nga paagi nga makahanda kita sa paghingabot, kag ngaa? Maghatag sing halimbawa.
4 Ang paghunahuna sing abanse sang mga paghingabot nga mahimo naton maatubang indi amo ang pinakamaayo nga paagi nga mahandaan ini. Ang matuod, indi naton mahibaluan kon ano nga paghingabot ang aton maatubang kag wala sing mabulig ang pagkabalaka sa sini. Apang, may butang nga sarang naton mahimo. Ang kalabanan sa mga nakabatas sa paghingabot nagmadinalag-on bangod sa pagpamalandong sa katutom sang mga alagad ni Jehova nga narekord sa Kasulatan, subong man sa mga panudlo kag halimbawa ni Jesus. Amo ini ang nakabulig sa ila nga magtudok ang ila gugma kay Jehova. Kag paagi sa sini, nalandas nila ang bisan ano nga pagtilaw nga ila naatubang.
5 Binagbinaga ang halimbawa sang duha ka utod nga babayi sa Malawi. Agod mahaylo sila nga magbakal sang kard sang partido sa pulitika, ginkastigo sila, gin-ubahan, kag ginpahog nga luguson sang masingki nga mga manughingabot. Ginsilingan sila nga ang mga katapo sang pamilya Bethel nagbakal na sang mga kard sang partido, bisan ang matuod wala. Ano ang sabat sang mga utod nga babayi? “Si Jehova nga Dios lamang ang amon ginaalagad. Kon nagbakal gid man sang kard ang mga kauturan sa sanga talatapan, indi ina magpabag-o sang amon desisyon. Indi kami magkompromiso, bisan pa patyon ninyo kami!” Pagkatapos nila mapakita inang maisog nga pagpanindugan, ginbuy-an sila.
6, 7. Paano ginapabaskog ni Jehova ang iya mga alagad sa pag-atubang sa paghingabot?
6 Si apostol Pablo nagsiling nga ginbaton sang mga Cristiano sa Tesalonica ang mensahe sang kamatuoran “sa idalom sang madamo nga kapipit-an” apang “may kalipay gikan sa balaan nga espiritu.” (1 Tes. 1:6) Sa pagkamatuod, madamo nga Cristiano sang una kag sa karon nga nakaatubang sang paghingabot kag nakalandas sini ang nagsiling nga sa idalom sang pinakamabudlay nga pagtilaw, nabatyagan nila ang nasulod nga paghidait, isa ka bunga sang balaan nga espiritu sang Dios. (Gal. 5:22) Ini nga paghidait amo ang nakabulig sa ila nga maamligan ang ila tagipusuon kag ikasarang sa paghunahuna. Huo, ginagamit ni Jehova ang iya aktibo nga puersa sa pagpabaskog sa iya mga alagad sa pag-atubang sa mga pagtilaw kag sa pagpanghikot sing maalamon kon makaatubang sila sing mga kabudlayan. *
7 Ang mga nakaobserbar sa determinasyon sang katawhan sang Dios nga huptan ang ila integridad sa atubangan sang mapintas nga paghingabot nagakatingala gid. Nakasiling sila nga ang mga Saksi daw may labaw sa tawo nga gahom, kag matuod gid ina. Si apostol Pedro nagpasalig sa aton: “Kon ginapakahuy-an kamo tungod sa ngalan ni Cristo, malipayon kamo, bangod ang espiritu sang himaya, ang espiritu mismo sang Dios, yara sa inyo.” (1 Ped. 4:14) Kon ginahingabot kita bangod sa pagtuman sa matarong nga mga talaksan, ginapakita sini nga ginakahamut-an kita sang Dios. (Mat. 5:10-12; Juan 15:20) Daw ano gid ka makalilipay ining pamatuod sang pagpakamaayo ni Jehova!
Ginabuligan sa Pagpamatok sa Pag-ipit sang mga Kaupdanan
8. (a) Ano ang nakabulig kanday Josue kag Caleb nga mapamatukan ang pag-ipit sang ila kaupdanan? (b) Ano ang matun-an naton sa halimbawa nanday Josue kag Caleb?
8 Ang isa ka mas malalangon nga sahi sang pagpamatok nga ginaatubang sang mga Cristiano amo ang negatibo nga pag-ipit sang mga kaupdanan. Apang, bangod ang espiritu ni Jehova mas mabaskog sangsa espiritu sang kalibutan, mapamatukan naton ang mga nagayaguta sa aton, ang mga nagapalapnag sing kabutigan tuhoy sa aton, ukon ang mga nagatinguha nga piliton kita nga magsunod sa ila mga talaksan. Halimbawa, ano ang nakabulig kanday Josue kag Caleb nga indi mag-ugyon sa pagtamod sang napulo ka espiya nga ginpadala sa Canaan? Ang balaan nga espiritu nagpahulag sa ila nga magpakita sing tuhay nga “espiritu,” ukon panimuot.—Basaha ang Numeros 13:30; 14:6-10, 24.
9. Ngaa ang mga Cristiano wala nahadlok nga mangin tuhay?
9 Ginpabaskog man sang balaan nga espiritu ang mga apostoles ni Jesus sa pagtuman sa Dios sa baylo nga tumanon ang gintahod sang kalabanan subong mga manunudlo sang matuod nga relihion. (Binu. 4:21, 31; 5:29, 32) Ginasunod na lang sang kalabanan nga tawo ang kadam-an agod malikawan ang sinuay. Apang, ang matuod nga mga Cristiano nagapanindugan sa kon ano ang husto. Sa bulig sang aktibo nga puersa sang Dios, wala sila nahadlok nga mangin tuhay. (2 Tim. 1:7) Gani, binagbinagon naton ang isa ka aspekto kon ngaa indi kita dapat magpadala sa pag-ipit sang mga kaupdanan.
10. Ano nga kabudlayan ang mahimo maatubang sang pila ka Cristiano?
10 Ang iban nga pamatan-on mahimo nabudlayan kon ano ang ila himuon kon ang ila abyan may ginahimo nga sala. Nagabatyag sila nga kon mangayo sila sing bulig sa mga gulang, ginaguba nila ang pagsalig sang ila abyan. Abi nila ginaunungan nila ang ila abyan kon maghipos lang sila. Mahimo pa gani sila ipiton sang ila abyan nga indi manugid sa iban. Ang matuod, ini nga problema wala lang nagakatabo sa mga pamatan-on. Bisan ang mga adulto mahimo nabudlayan man sa pagsugid sa mga gulang tuhoy sa sala sang ila abyan ukon himata. Apang ano dapat ang himuon sang matuod nga mga Cristiano sa sini nga pag-ipit?
11, 12. Ano ang pinakamaayo mo nga himuon kon piliton ka sang isa ka katapo sang kongregasyon nga taguon ang iya sala, kag ngaa?
11 Handurawa ini nga kahimtangan. Halimbawa nahibaluan ni Alex, isa ka pamatan-on nga utod, nga ang iya abyan sa kongregasyon nga si Steve, pirme nagatan-aw sang pornograpiya. Ginsilingan ni Alex si Steve nga nabalaka gid sia sa ginahimo sini. Apang, ginbalewala lang ni Steve ang iya ginsiling. Sang ginpalig-on sia ni Alex nga isugid ini sa mga gulang, ginsilingan sia ni Steve nga kon isa sia ka matuod nga abyan, indi sia dapat manugid. Dapat bala mahadlok si Alex nga maglain ang buot sang iya abyan? Mahimo nabalaka sia kon sin-o ang patihan sang mga gulang pananglit ipanghiwala ni Steve ang iya isugid. Apang, indi masolbar ang problema kon maghipos lang si Alex. Ang matuod, mahimo pa gani maguba ang kaangtanan ni Steve kay Jehova. Maayo nga dumdumon ni Alex nga “ang kahadlok sa tawo isa ka siod, apang ang nagasalig kay Jehova amligan.” (Hulu. 29:25, NW) Ano pa ang puede himuon ni Alex? Mahimo niya palapitan liwat si Steve sa mahigugmaon nga paagi kag istoryahon sing prangka tuhoy sa iya ginahimo nga sayop. Nagakinahanglan ini sing kaisog. Basi sa sini nga tion, handa na si Steve nga istoryahan ang tuhoy sa iya problema. Dapat palig-unon liwat ni Alex si Steve nga magpalapit sa mga gulang kag silingan sia nga kon indi niya ini paghimuon sa sulod sang rasonable nga tion, si Alex na ang manugid sa mga gulang.—Lev. 5:1.
12 Kon ikaw ang yara sa sini nga sitwasyon, mahimo nga sa umpisa indi maapresyar sang imo abyan ang imo bulig. Apang, mahimo marealisar niya sa ulihi nga ang imo ginhimo para gid sa iya kaayuhan. Kon batunon niya ang bulig kag manghikot nahisuno sa sini, mahimo niya tamdon nga daku nga kabalaslan ang imo ginpakita nga kaisog kag pagkamainunungon. Sa pihak nga bahin, kon magpabilin sia nga akig sa imo, sia gid bala ang sahi sang tawo nga gusto mo mangin abyan? Mas maayo nga pahamut-an naton pirme ang aton pinakamaayo nga Abyan, si Jehova. Kon mainunungon kita sa iya, tahuron kita sang mga nagahigugma sa iya kag mangin matuod naton sila nga abyan. Indi naton dapat paghatagan sing duog ang Yawa sa Cristianong kongregasyon. Kay kon tugutan naton ini, mapasubo naton ang balaan nga espiritu ni Jehova. Apang makapanghikot kita nahisuno sa sini kon huptan naton nga matinlo ang Cristianong kongregasyon.—Efe. 4:27, 30.
Ginapabaskog sa Pagbatas sa Tanan nga Sahi sang Kabudlayan
13. Ano nga mga sahi sang kabudlayan ang ginaatubang sang katawhan ni Jehova, kag ngaa lapnag gid ini sa karon?
13 Nanuhaytuhay nga kabudlayan ang mahimo naton maatubang—hinali nga pagpamigado, pagkadula sang trabaho, kinaugali nga kalamidad, kamatayon sang isa ka hinigugma, pagbalatian, kag iban pa. Bangod nagakabuhi kita sa “makahalanguyos nga mga tion,” tanan kita makaatubang sang nanuhaytuhay nga pagtilaw. (2 Tim. 3:1) Kon matabo gid man ini, indi kita dapat magsalangisag. Ang balaan nga espiritu magapabaskog sa aton nga mabatas ang bisan ano nga kabudlayan.
14. Ano ang nagpabaskog kay Job nga mabatas ang mga kabudlayan?
14 Si Job nakaatubang sing sunodsunod nga kabudlayan. Nadula ang iya palangabuhian, napatay ang iya kabataan, ginbiyaan sia sang iya mga abyan, nagbalatian sia, kag ang iya asawa nadulaan sing pagsalig kay Jehova. (Job 1:13-19; 2:7-9) Apang, nakasapo si Job sing matuod nga lugpay kay Elihu. Ang mensahe ni Elihu, kag ang panguna nga punto sang mensahe ni Jehova kay Job, nagasiling: “Pahimonong ka kag patugsilingi ang makatilingala nga mga binuhatan sang Dios.” (Job 37:14) Ano ang nakabulig kay Job nga mabatas ining mga pagtilaw? Kag ano ang makabulig sa aton nga mabatas ang aton mga kabudlayan? Amo ang pagdumdom kag pagpamalandong sa nanuhaytuhay nga pagpadayag ni Jehova sang iya balaan nga espiritu kag gahom. (Job 38:1-41; 42:1, 2) Mahimo naton dumdumon ang mga tion nga nagpakita ang Dios sang interes sa aton subong indibiduwal. Tubtob subong, interesado sia gihapon sa aton.
15. Ano ang nagpabakod kay apostol Pablo nga mabatas ang mga pagtilaw?
15 Bangod sa iya pagtuo, si apostol Pablo madamo sing nabatas nga kabudlayan nga nagbutang sang iya kabuhi sa katalagman. (2 Cor. 11:23-28) Paano niya nahuptan ang pagkabalanse kag emosyonal nga kalig-on sa sining mabudlay nga mga kahimtangan? Paagi sa pagpangamuyo kag pagsandig kay Jehova. Sa tion sang pagtilaw nga nagdul-ong sa iya kamatayon, si Pablo nagsulat: “Ang Ginuo nagtindog malapit sa akon kag nagpabakod sa akon, agod paagi sa akon matuman sing bug-os ang pagbantala kag mabatian ini sang tanan nga pungsod; kag ginluwas ako gikan sa baba sang leon.” (2 Tim. 4:17) Gani, bangod sa iya naeksperiensiahan, mapasalig ni Pablo ang iya mga masigkatumuluo nga indi sila dapat “magkabalaka sa bisan ano nga butang.”—Basaha ang Filipos 4:6, 7, 13.
16, 17. Maghatag sing halimbawa kon paano ginapabaskog ni Jehova ang iya katawhan sa pag-atubang sa mga kabudlayan sa karon.
16 Naeksperiensiahan sang payunir nga si Roxana kon paano ginaamanan ni Jehova ang iya katawhan. Sang nangayo sia sing permiso sa iya boss nga magbakasyon sing pila ka adlaw agod magtambong sa aton kombension, naakig ini kag nagsiling nga kon magtambong sia, pahalinon sia sa iya trabaho. Nagtambong gihapon si Roxana, kag hanuot nga nangamuyo nga kuntani indi sia pagpahalinon sa iya trabaho. Pagkatapos sini, nakabatyag sia sing kalinong sa hunahuna. Sang Lunes, pagbalik niya halin sa kombension, ginpahalin sia sang iya boss sa trabaho. Nabalaka gid si Roxana kay bisan gamay lang ang sueldo niya sa iya trabaho, kinahanglan niya ini para masakdag ang iya pamilya. Nangamuyo sia liwat, kag nagpamalandong nga bangod gin-amanan sia sang Dios sa espirituwal paagi sa kombension, pat-od gid nga amanan man niya sia sa materyal. Samtang nagalakat sia pauli, nakita ni Roxana ang isa ka karatula nga nagapangita sang eksperiensiado nga mananahi, kag nag-aplay sia. Nahibaluan sang manedyer nga wala pa sia sing eksperiensia apang ginbaton sia, kag halos doble ang iya sueldo sangsa iya una nga trabaho. Nabatyagan ni Roxana nga ginsabat ang iya mga pangamuyo. Apang, ang pinakadaku nga pagpakamaayo nga iya nabaton amo nga nakapaambit sia sing maayong balita sa pila niya ka kaupod sa trabaho. Lima sa ila, pati ang manedyer, ang nagbaton sang kamatuoran kag nabawtismuhan.
17 Kon kaisa, nagabatyag kita nga ang aton mga pangamuyo daw wala ginasabat sa gilayon ukon suno sa aton ginapaabot. Kon amo sini ang matabo, ayhan may maayo nga rason. Nahibaluan ini ni Jehova, apang mahimo nga sa ulihi na lang naton mahangpan. Isa ka butang ang mapat-od naton—wala gid ginapabay-an sang Dios ang mga matutom sa iya.—Heb. 6:10.
Ginabuligan nga Malandas ang mga Pagtilaw kag mga Pagsulay
18, 19. (a) Ngaa mapaabot naton nga makaatubang kita sang mga pagtilaw kag mga pagsulay? (b) Paano mo maatubang sing madinalag-on ang mga pagtilaw?
18 Ang katawhan ni Jehova wala na nagakakibot kon makaatubang sila sang mga pagsulay, kaluya sang buot, paghingabot, kag pag-ipit sang mga kaupdanan. Ang kalibutan nagadumot sa aton. (Juan 15:17-19) Apang, ang balaan nga espiritu makabulig sa aton nga malandas ang bisan ano nga hangkat nga maatubang naton sa pag-alagad sa Dios. Indi pagtugutan ni Jehova nga sulayon kita sing labaw sa aton masarangan. (1 Cor. 10:13) Indi gid niya kita pagbayaan ukon pagpatumbayaan. (Heb. 13:5) Ang pagkamatinumanon naton sa iya gin-inspirar nga Pulong nagaamlig kag nagapabakod sa aton. Dugang pa, ang espiritu sang Dios makapahulag sa aton mga masigkatumuluo nga buligan kita sa tion nga kinahanglan gid naton ini.
19 Kabay nga tanan kita padayon nga magtigayon sang balaan nga espiritu paagi sa pagpangamuyo kag pagtuon sa Kasulatan. Kag kabay nga padayon kita nga ‘mapabakod upod ang bug-os nga gahom suno sa mahimayaon nga kagamhanan sang Dios agod makabatas kita sing bug-os kag mangin mapinasensiahon nga may kalipay.’—Col. 1:11.
[Footnote]
^ par. 6 Ang pila ka halimbawa makita sa Ang Lalantawan, Mayo 1, 2001, pahina 16; kag Magmata! Pebrero 8, 1993, pahina 21 kag 22.
Ano ang Imo Sabat?
• Paano mo mahandaan ang mga paghingabot?
• Ano ang dapat mo himuon kon piliton ka sang isa nga taguon ang iya sayop?
• Ano ang mapat-od mo kon makaatubang ka sing mga kabudlayan?
[Mga Pamangkot sa Pagtinuon]
[Piktyur sa pahina 28]
Ano ang matun-an naton kanday Josue kag Caleb?
[Piktyur sa pahina 29]
Paano mo mabuligan ang isa ka abyan nga nakahimo sing sayop?
