‘Magdangop sa Ngalan ni Jehova’
‘Magdangop sa Ngalan ni Jehova’
“Ibilin ko . . . ang mga tawo nga mapainubuson kag mahagop, kag magadangop sila sa ngalan ni Jehova.” —SOF. 3:12, NW.
1, 2. Anong malaragwayon nga bagyo ang magaabot sa katawhan?
NAABUTAN ka na bala sang madamol nga ulan sa dalan amo nga nagpasilong ka sa isa ka payag ukon sa idalom sang taytay? Ang payag ukon taytay sarang makaamlig sa imo sa ulan, apang indi ini bastante nga proteksion sa buhawi ukon bagyo.
2 May isa ka sahi sang bagyo nga magaabot nga magabutang sa katalagman sa kabuhi sang tanan nga tawo. Isa ini ka malaragwayon nga “adlaw sang bagyo.” Amo ini ang “daku nga adlaw ni Jehova” nga magaapektar sa bug-os nga katawhan. Apang, may yara kita dalangpan. (Basaha ang Sofonias 1:14-18. *) Paano kita makadangop sa sini sa tion sang “adlaw sang kaalipungot ni Jehova” nga mahanabo sa indi madugay?
Mga Adlaw sang Bagyo sa Panahon sang Biblia
3. Ano nga “bagyo” ang nag-abot sa napulo ka tribo nga ginharian sang Israel?
3 Ang adlaw ni Jehova magasugod paagi sa paglaglag sa tanan nga butig nga relihion sa duta. Agod mahibaluan naton kon diin mangita sang dalangpan, usisaon naton ang maragtas sang katawhan sang Dios sang una. Si Isaias, nga nagkabuhi sang ikawalo nga siglo B.C.E., nagpaanggid sa paghukom ni Jehova sa apostata nga napulo ka tribo nga ginharian sang Israel sa isa ka “bagyo” nga indi mapunggan sang mga tawo. (Basaha ang Isaias 28:1, 2.) Ina nga tagna natuman sang 740 B.C.E. sang ginsakop sang Asiria ining mga tribo nga ang Efraim amo ang labing prominente.
4. Paano nag-abot ang “daku nga adlaw ni Jehova” sa Jerusalem sang 607 B.C.E.?
4 Ang paghukom sa di-matutom nga Israel ginsundan sang “daku nga adlaw ni Jehova” batok sa Jerusalem kag sa ginharian sang Juda sang 607 B.C.E. Natabo ini bangod ang katawhan sang Juda nangin apostata man. Sang buot na sakupon sang Babilonia, sa idalom ni Nabocodonosor, ang Juda kag ang kapital sini nga Jerusalem, nangayo sila sing bulig sa “dalangpan sang kabutigan,” sa Egipto nga ila kaalyado sa pulitika. Apang, kaangay sang isa ka makahalapay nga bagyo, ginlaglag sang mga taga-Babilonia ina nga “dalangpan.”—Isa. 28:14,17.
5. Ano ang mahanabo sa katawhan sang Dios subong isa ka grupo kon laglagon na ang tanan nga butig nga relihion?
5 Ang daku nga adlaw ni Jehova nga nag-abot sa Jerusalem nagalaragway sa paghukom nga mahanabo sa apostata nga Cristiandad sa aton panahon. Dugang pa, ang nabilin nga bahin sang “Babilonia nga Daku,” ang bug-os kalibutan nga emperyo sang butig nga relihion, pagalaglagon man. Pagkatapos sini, ang nabilin nga bahin sang malaut nga sistema sang mga butang ni Satanas papason. Apang, ang katawhan sang Dios maluwas subong isa ka grupo bangod nagdangop sila kay Jehova.—Bug. 7:14; 18:2, 8; 19:19-21.
Espirituwal kag Pisikal nga Dalangpan
6. Paano makasapo sing dalangpan ang katawhan ni Jehova?
6 Paano makasapo sing dalangpan ang katawhan sang Dios bisan sa karon, sa sining tion sang katapusan? Makasapo kita sing espirituwal nga dalangpan paagi sa mapinangamuyuon nga ‘pagpainoino sa ngalan sang Dios’ kag sa pag-alagad sa iya sing makugi. (Basaha ang Malaquias 3:16-18.) Apang, nahibaluan naton nga luwas sa paghunahuna sa iya ngalan may dapat pa kita himuon. Ang Biblia nagasiling: “Ang tagsatagsa nga nagatawag sa ngalan ni Jehova maluwas.” (Roma 10:13) Ang pagtawag sa ngalan ni Jehova may yara kaangtanan sa aton kaluwasan. Kag makita sang mga tawo nga bunayag sing tagipusuon ang kinatuhayan sang matuod nga mga Cristiano, nga matinahuron nga ‘nagapainoino sa iya ngalan’ nga nagaalagad subong iya mga Saksi, kag sang mga tawo nga wala nagaalagad sa iya.
7, 8. Sa ano nga paagi naeksperiensiahan sang unang-siglo nga mga Cristiano ang pisikal nga kaluwasan, kag ano ang kaanggid sini sa karon?
7 Apang, indi lamang espirituwal nga dalangpan ang matigayon naton. Ginsaaran man sang Dios ang iya katawhan sang pisikal nga kaluwasan. Ang isa ka halimbawa sini amo ang natabo sang 66 C.E. pagkatapos salakayon sang hangaway sang Roma sa idalom ni Cestius Gallus ang Jerusalem. Gintagna ni Jesus nga ang mga adlaw sinang kapipit-an “palip-uton.” (Mat. 24:15, 16, 21, 22) Natabo ina sang wala ginapaabot nga nag-isol ang hangaway sang Roma sa pagsulod sa siudad nga nagtugot sa pila ka “unod,” nga amo ang matuod nga mga Cristiano, nga “maluwas.” Nakapalagyo sila palayo sa siudad kag sa kaiping nga mga duog sini. Ang iban nagtabok sa Jordan kag nagdangop sa kabukiran sa nasidlangan nga bahin sini.
8 May makita kita nga pagkaanggid sa mga Cristiano sadto kag sa katawhan sang Dios sa karon. Subong nga ang unang-siglo nga mga Cristiano nagpangita sing dalangpan, amo man sini ang ginahimo sang mga alagad sang Dios sa karon. Apang, sa sini nga tion, indi na kinahanglan nga literal nga malagyo sa isa ka lugar ang matuod nga mga Cristiano kay nagapuyo sila sa nanuhaytuhay nga bahin sang duta. Subong isa ka katawhan, ang “mga pinili” kag ang ila matutom nga kaupdanan makaagom sang pisikal nga kaluwasan sa tion nga laglagon na ang apostata nga Cristiandad paagi sa pagdangop kay Jehova kag sa iya kaangay bukid nga organisasyon.
9. Sin-o ang kabangdanan kon ngaa wala karon nakilala sang mga tawo ang ngalan ni Jehova? Maghatag sing halimbawa.
9 Sa pihak nga bahin, ang Cristiandad takus gid sa kalaglagan bangod wala nila gintudlo ang kamatuoran sa ila mga miembro kag ginadumtan nila ang ngalan sang Dios. Sang Edad Media, ang ngalan sang Dios kilala sa Europa. Ina nga ngalan, nga ginahuman sang apat ka Hebreo nga letra nga ginatawag Tetragrammaton nga ang katumbas sa aton nga letra amo ang YHWH (ukon JHVH), makita sa mga sensilyo, sa atubangan sang mga balay, sa madamo nga libro kag mga Biblia, kag bisan sa pila ka simbahan sang mga Katoliko kag mga Protestante. Apang, nangin kinaandan na lang sa karon ang pagdula sa ngalan sang Dios sa mga badbad sang Biblia kag wala na ini ginagamit. Ang isa ka pamatuod sini amo ang Letter to the Bishops’ Conferences on ‘the Name of God,’ nga napetsahan Hunyo 29, 2008, nga ginpagua sang Congregation for Divine Worship and the Discipline of the Sacraments. Sa sini nga sulat, nagsugo ang Iglesia Katolika Romana nga ang Tetragrammaton kag ang pila ka badbad sini dapat islan sang “Ginuo.” Ginpatuman sang Vatican nga ang personal nga ngalan sang Dios indi na dapat paggamiton ukon pagmitlangon sa mga ambahanon kag pangamuyo sa tion sang ila mga misa. Wala ginatudlo sang mga lider sang nanuhaytuhay nga sekta sang Cristiandad kag sang iban pa nga relihion ang kamatuoran tuhoy sa matuod nga Dios sa ila minilyon ka sumilimba.
Ang mga Nagapakabalaan sa Ngalan sang Dios Pagaamligan
10. Paano ginapadunggan ang ngalan sang Dios sa karon?
10 Indi kaangay sa ginahimo sang iban nga relihion, ginahimaya kag ginapadunggan sang mga Saksi ni Jehova ang ngalan sang Dios. Ginapakabalaan nila ini paagi sa paggamit sini sa dungganon nga paagi. Nahamuot si Jehova sa mga nagasalig sa iya, kag himuon niya ang bisan ano nga butang agod pakamaayuhon kag amligan ang iya katawhan. “Kilala niya ang mga nagadangup sa iya.”—Nah. 1:7; Binu. 15:14.
11, 12. Sin-o ang naghimaya sa ngalan ni Jehova sa dumaan nga Juda, kag sin-o ang nagahimo sini sa moderno nga tion?
11 Bisan pa ang kalabanan nga pumuluyo sa dumaan nga Juda nangin apostata, may pila nga ‘nagdangop sa ngalan ni Jehova.’ (Basaha ang Sofonias 3:12, 13. *) Huo, sang ginsilutan sang Dios ang wala sing pagtuo nga Juda paagi sa pagtugot sa mga taga-Babilonia nga sakupon ang ila duta kag bihagon ang ila katawhan, ang pila, kaangay nanday Jeremias, Baruc, kag Ebed-melec, naluwas. Nagpabilin sila nga matutom bisan pa nagkabuhi sila “sa tunga” sang apostata nga pungsod. Ang iban nagpabilin man nga matutom bisan pa nangin mga bihag sila. Sang 539 B.C.E., ginsakop sang mga Medianhon kag mga Persianhon sa idalom ni Ciro ang Babilonia. Dayon nagpagua si Ciro sing mando nga tugutan ang nagkalabilin nga mga Judiyo nga makabalik sa ila duta.
12 Tuhoy sa mga makaeksperiensia sinang pagpasag-uli sa matuod nga pagsimba, gintagna ni Sofonias nga luwason sila ni Jehova kag magakalipay Sia upod sa ila. (Basaha ang Sofonias 3:14-17.) Natabo man ini sa moderno nga tion. Pagkatapos matukod ang Ginharian sang Dios sa langit, ginluwas ni Jehova ang matutom nga mga nagkalabilin nga hinaplas gikan sa pagkabihag sa Babilonia nga Daku. Kag nagakalipay sia upod sa ila tubtob sa sini nga adlaw.
13. Ano nga kahilwayan ang naeksperiensiahan karon sang mga tawo sang tanan nga pungsod?
13 Yadtong mga may paglaum nga mabuhi sa duta naggua man sa Babilonia nga Daku kag nakaagom sang espirituwal nga kahilwayan gikan sa mga panudlo sang butig nga relihion. (Bug. 18:4) Gani, ang daku nga katumanan sang Sofonias 2:3 (NW) nagakatabo sa aton panahon: “Pangitaa ninyo si Jehova, kamo tanan nga mahagop sa duta.” Ang mga mahagop sa tanan nga pungsod, may langitnon man ukon dutan-on nga paglaum, nagadangop karon sa ngalan ni Jehova.
Ang Ngalan sang Dios Indi Isa ka Anting-Anting
14, 15. (a) Ano ang gingamit sang pila subong anting-anting? (b) Ano ang indi naton dapat paggamiton subong panagang?
14 Ginkabig sang pila ka Israelinhon ang templo subong isa ka anting-anting nga magaamlig sa ila batok sa ila mga kaaway. (Jer. 7:1-4) Antes pa sini, ginkabig man nila ang kaban sang katipan subong anting-anting. (1 Sam. 4:3, 10, 11) Ginpapintahan ni Constantino nga Daku ang mga taming sang iya mga soldado sang Griegong mga letra nga khi kag rho, ang una nga duha ka letra sang titulo nga “Cristo” sa Griego sa paglaum nga maamligan sini ang iya mga soldado sa inaway. Kag si Hari Gustav Adolph II sang Sweden, nga nagpakigbahin sa Treinta ka Tuig nga Inaway amo ang ginahunahuna nga nagsuksok sang hinganib nga makita sa pahina 7. Talupangda nga makita sa sini ang ngalan nga Iehova.
15 Ang pila ka katawhan sang Dios nga ginsalakay sang mga demonyo nangayo sing bulig kay Jehova paagi sa mabaskog nga pagtawag sang iya ngalan. Apang, indi naton dapat pagkabigon ang bisan ano nga butang nga may ngalan sang Dios subong anting-anting ukon panagang nga makaamlig sa aton. Indi amo sina ang kahulugan sang pagdangop sa ngalan ni Jehova.
Pagpangita sing Dalangpan sa Karon
16. Paano kita makatigayon sing espirituwal nga dalangpan sa karon?
16 Makasapo kita sing dalangpan sa karon sa espirituwal nga kalig-unan nga ginaagom sang katawhan sang Dios sa kabilugan. (Sal. 91:1) Paagi sa “matutom kag mainandamon nga ulipon” kag sa mga gulang sa kongregasyon, ginapaandaman kita batok sa mga huyog sang kalibutan nga makaguba sina nga kalig-unan. (Mat. 24:45-47; Isa. 32:1, 2) Hunahunaa lamang kon daw ano kita kasunson nga ginapaandaman batok sa materyalismo, kag binagbinaga kon paano ini nakaamlig sa aton batok sa espirituwal nga katalagman. Kag kamusta naman ang katalagman nga magpalambo sing pagpulupatawhay nga panimuot, nga mahimo magdul-ong sa aton sa pagkadiaktibo sa pag-alagad kay Jehova? Ang Biblia nagasiling: “Ang pagpatawhay-tawhay sang mga buang-buang magalaglag sa ila. Pero ang nagapamati sa akon magakabuhi nga luwas sa katalagman. Indi siya maano kag wala siya sing kahadlukan.” (Hulu. 1:32, 33, Ang Pulong sang Dios, APD) Ang pagpanikasog nga magpabilin nga matinlo sa moral makabulig man sa aton nga mahuptan ang aton espirituwal nga kalig-unan.
17, 18. Ano ang nagabulig sa minilyon ka tawo sa karon nga magdangop sa ngalan ni Jehova?
17 Hunahunaa man ang pagpalig-on sang matutom nga ulipon nga tumanon ang sugo ni Jesus nga mangin aktibo sa pagbantala sang maayong balita sang Ginharian sa bug-os napuy-an nga duta. (Mat. 24:14; 28:19, 20) Ginsambit ni Sofonias ang pagbag-o nga makabulig sa mga tawo nga magdangop sa ngalan sang Dios. Mabasa naton: “Sa sina nga tion, tudluan ko ang tanan nga katawhan nga maghambal sing putli nga lenguahe, agod nga sila tanan magtawag sa ngalan ni Jehova kag mag-alagad sa iya nga may paghiusa.”—Sof. 3:9, NW.
18 Ano ining putli nga lenguahe? Ang putli nga lenguahe amo ang kamatuoran tuhoy kay Jehova nga Dios kag sa iya mga katuyuan nga masapwan sa iya gin-inspirar nga Pulong. Malaragwayon mo nga ginagamit ina nga lenguahe kon ginapaambit mo sa iban ang husto nga paghangop sa Ginharian sang Dios kag kon paano sini pakabalaanon ang iya ngalan, kon ginapadaku mo ang pagbindikar sa pagkasoberano sang Dios, kag kon malipayon mo nga ginapakigsugilanon ang tuhoy sa walay katapusan nga mga pagpakamaayo nga maagom sang mga matutom nga katawhan. Bangod madamo ang nagagamit sining malaragwayon nga lenguahe, madamo karon ang ‘nagatawag sa ngalan ni Jehova’ kag ‘nagaalagad sa iya sing may paghiusa.’ Huo, minilyon na ka tawo sa karon sa bug-os nga kalibutan ang nagadangop kay Jehova.—Sal. 1:1, 3.
19, 20. Paano napaslawan ang mga nagsalig sa “dalangpan sang kabutigan” sang panahon sang Biblia?
19 Ang mga tawo sa kalibutan nagaatubang sang mga problema nga daw indi na masolbar. Bangod sini, madamo sa ila ang nagadangop sa indi himpit nga mga tawo para sa solusyon. Ang iban nagasandig sa pulitikal nga mga institusyon, kaangay sang ginhimo sang dumaan nga Israel nga nangayo sing bulig sa kaingod nga mga pungsod paagi sa pagpakig-alyansa sa ila. Apang, nahibaluan mo nga wala ini nakabulig sa Israel. Sa karon, wala man sing pulitikal nga estado nga sarang makasolbar sing bug-os sa mga problema sang katawhan, bisan ang Nasyones Unidas. Gani, ngaa magdangop pa kita sa pulitikal nga mga institusyon kag makig-alyansa sa ila? Ang Biblia matagnaon nga nagtawag sa ila nga isa ka “dalangpan sang kabutigan.” Matuod ina bangod ang tanan nga nagalaum sa ila pat-od gid nga malugaw-an.—Basaha ang Isaias 28:15, 17.
20 Sa indi madugay, ang malaragwayon nga bagyo sang adlaw ni Jehova magaabot sa duta. Wala sang bisan ano nga panikasog sang tawo nga makahatag sing pangamlig; bisan ang mga palanaguan batok sa nuklear nga mga bomba ukon ang ila manggad. Ang Isaias 28:17 nagasiling: “Ang hielo nga daw bato magasilhig sang dalangpan sang kabutigan, kag ang mga tubig magalapaw sa duug nga palanagoan.”
21. Ano ang mabenepisyo naton sa pagtuman sa laygay sang aton yeartext para sa 2011?
21 Sa karon kag sa palaabuton, ang katawhan sang Dios makasapo sang matuod nga kalig-unan sa ila Dios nga si Jehova. Ang ngalan ni Sofonias nga nagakahulugan sing “Gintago ni Jehova,” nagapatalupangod sa aton sang matuod nga palanaguan. Gani, nagakaigo gid ang laygay sang aton yeartext para sa 2011: ‘Magdangop sa ngalan ni Jehova.’ (Sof. 3:12, NW) Bisan karon pa lang, dapat na kita magdangop sa ngalan ni Jehova kag magsalig sing bug-os sa iya. (Sal. 9:10) Sa kada adlaw, dapat naton dumdumon ining gin-inspirar nga pasalig: “Ang ngalan ni Jehova isa ka torre nga mabakod. Ang matarong nagadalagan sa sini kag ginaamligan.”—Hulu. 18:10, NW.
[Mga Footnote]
^ par. 2 Sofonias 1:14-18 (NW): “Malapit na ang daku nga adlaw ni Jehova. Malapit na ini, kag nagadalidali gid ini. . . . Ina nga adlaw isa ka adlaw sang kaalipungot, isa ka adlaw sang kalisdanan kag sang kalisang, isa ka adlaw sang bagyo kag sang kahapayan. . . . Bisan ang ila pilak kag ang ila bulawan indi makaluwas sa ila sa adlaw sang kaalipungot ni Jehova; . . . Makahaladlok gid ina nga adlaw kay laglagon niya ang tanan nga pumuluyo sang duta.”
^ par. 11 Sofonias 3:12, 13 (NW): “Ibilin ko sa tunga mo ang mga tawo nga mapainubuson kag mahagop, kag magadangop sila sa ngalan ni Jehova. Ang mga nabilin sa Israel indi maghimo sing malain, indi sila magbutig ukon maghambal sing malimbungon, kay magakaon sila kag magahigda sing matawhay, kag wala sing magapakurog sa ila sa kahadlok.”
Madumduman Mo Bala?
• Paano kita makadangop sa ngalan ni Jehova sa karon?
• Ngaa indi kita dapat magsalig sa “dalangpan sang kabutigan”?
• Ano nga dalangpan ang aton masaligan sa palaabuton?
[Mga Pamangkot sa Pagtinuon]
[Blurb sa pahina 6]
Ang yeartext para sa 2011: ‘Magdangop sa ngalan ni Jehova.’ —Sofonias 3:12, NW.
[Picture Credit Line sa pahina 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”
