Pamalandungi ang mga Ginhimo ni Jehova Para sa Imo

WALA madugay sa tapos mabanhaw si Jesus, ang duha niya ka disipulo naglakat halin sa Jerusalem pakadto sa Emaus. “Sang nagahambalanay sila kag nagapamangkutanay,” suno sa Ebanghelyo ni Lucas, “si Jesus nagpalapit kag naglakat upod sa ila; apang wala nila sia makilala.” Dayon namangkot si Jesus sa ila: “‘Ano ining mga butang nga ginahambalan ninyo samtang nagalakat kamo?’ Kag nagdulog sila nga nagapangasubo.” Ngaa nasubuan sila? Kay nagalaum ang mga disipulo nga sadto nga tion luwason ni Jesus ang Israel gikan sa paggahom sang mga Gentil. Apang indi amo sina ang natabo. Sa baylo, ginpatay si Jesus. Amo sina ang rason kon ngaa nagapangasubo sila.—Luc. 24:15-21; Binu. 1:6.

Nangatarungan si Jesus sa mga disipulo. “Sugod kay Moises kag sa tanan nga Manalagna, ginpaathag niya sa ila ang mga butang nahanungod sa iya sa bug-os nga Kasulatan.” Huo, madamo nga importante kag makapabakod sing pagtuo nga mga butang ang natabo sa tion sang ministeryo ni Jesus! Samtang nagapamati ang mga disipulo sa pagpaathag ni Jesus, ang ila kasubo nabuslan sang kalipay. Pagkagab-i sina, nagsiling sila: “Wala bala nagadabdab ang aton tagipusuon sang nagapakighambal sia sa aton sa dalan, samtang ginapaathag niya sa aton ang Kasulatan?” (Luc. 24:27, 32) Ano ang matun-an naton sa reaksion sang mga disipulo ni Jesus?

Ano ang Aton Reaksion Kon Wala Matuman ang Aton Ginapaabot?

Ang duha ka disipulo nga nagalakat sa dalan pakadto sa Emaus nasubuan gid bangod wala natabo ang ila ginapaabot. Naeksperiensiahan nila ang ginsiling sang Hulubaton 13:12: “Ang paglaum nga napalantang nagapasakit sang tagiposoon.” Sing kaanggid, ang pila sa aton nga madugay na nga nagaalagad sing matutom kay Jehova nagahunahuna nga ang “dakung kapipit-an” dapat nag-abot na apang tubtob sa karon wala gihapon. (Mat. 24:21; Bug. 7:14) Gani, mahangpan naton nga may mga tion nga nagabatyag sila sing kasubo.

Apang dumduma nga nadula ang kasubo sang duha ka disipulo sang ginbuligan sila ni Jesus nga magkonsentrar sa mga tagna nga natuman na, nga ang pila nasaksihan nila mismo. Kaangay nila, sarang man naton mahuptan ang aton kalipay kag malandas ang pagbatyag sing kapaslawan. Ang isa ka eksperiensiado nga  Cristianong gulang nga si Michael nagsiling: “Indi magkonsentrar sa mga butang nga wala pa nahimo ni Jehova. Sa baylo, pamalandungi ang mga butang nga nahimo na niya.” Maayo gid nga laygay!

Kon Ano Na ang Nahimo ni Jehova

Binagbinaga ang pila ka talalupangdon nga butang nga nahimo na ni Jehova. Si Jesus nagsiling: “Sia nga nagatuo sa akon, magahimo man sia sang mga buhat nga ginahimo ko; kag magahimo sia sang mga buhat nga daku pa sa sini.” (Juan 14:12) Sa karon, ginahimo sang mga alagad sang Dios ang pinakadaku nga Cristianong hilikuton sa maragtas. Kapin na sa pito ka milyon ka indibiduwal ang nagalaum nga maluwas sa dakung kapipit-an. Karon pa lang nakalab-ot sa amo sini kadamo ang matutom nga mga alagad ni Jehova nga aktibo nga nagapanghikot sa bug-os nga duta! Huo, ginbuligan gid ni Jehova ang iya mga alagad nga makahimo sang “mga buhat nga daku pa sa sini,” subong sang gintagna ni Jesus.

Ano pa ang ginhimo ni Jehova para sa aton? Ginbuligan niya ang mga bunayag sing tagipusuon nga makagua sa malauton nga kalibutan padulong sa espirituwal nga paraiso nga gintuga niya. (2 Cor. 12:1-4) Maghinguyang sing tion nga mapamalandungan ang pila ka bahin sinang espirituwal nga paraiso. Halimbawa, tan-awa ang mga publikasyon sa imo librarya ukon sa Kingdom Hall. Buksi ang Watch Tower Publications Index, ukon mag-research sa Watchtower Library. Pamatii ang narekord nga mga drama sa Biblia. Handurawa ang mga nakita kag nabatian mo sa bag-o lang natapos nga kombension. Dugang pa, hunahunaa ang makalilipay nga pagpakig-angot naton sa aton mga kauturan. Daw ano nga kaalwan ang ginpakita ni Jehova sa pag-aman sa aton sang bugana nga espirituwal nga pagkaon kag mahigugmaon nga mga kauturan—isa gid ka espirituwal nga paraiso!

Ang salmista nga si David nagsiling: “O GINOO, nga akon Dios, madamu ang makatilingala nga buhat nga imo nahimo, kag ang imo mga hunahuna ayon sa amon.” (Sal. 40:5) Huo, paagi sa pagpamalandong sa matahom nga mga butang nga ginhimo ni Jehova kag sa pagdumdom sang iya mahigugmaon nga pag-ulikid sa aton, makatigayon kita liwat sing kusog agod makabatas sing matutom sa pag-alagad sa aton langitnon nga Amay, si Jehova.—Mat. 24:13.

[Retrato sa pahina 31]

Ginbuligan ni Jesus ang iya mga disipulo nga magkonsentrar sa mga nahimo na ni Jehova para sa ila

[Mga Retrato sa pahina 32]

Handurawa ang mga nakita kag nabatian mo sa bag-o lang natapos nga kombension